ཞེ་ཆེན་རྒྱལ་ཚབ་འགྱུར་མེད་པདྨ་རྣམ་རྒྱལ།
ཡང་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་དུ་བཞུགས་པའི་ཚེ། ཡུལ་དེའི་ཁྱིམ་བདག་ཕྱུག་པོ་སེར་སྣ་ཅན་ཁྭ་ལ་ཡང་གཏོར་མ་མི་སྟེར་ཞིང་། དགེ་སྦྱོང་དང་བྲམ་ཟེ་དང་བཀྲེན་པ་མཐོང་ན་སེམས་སྡང་བར་བྱེད་པ་ཞིག་ཡོད་པ་དེས། རང་གི་སྐྱེད་མོས་ཚལ་དུ་གསེར་དངུལ་གྱི་ཕུང་པོ་ཆེན་པོ་སྦས་ཏེ་བཞག་ནས། དེ་ལ་ཆགས་ཏེ་ལྷག་པར་ཞེན་བཞིན་དུ་ཤི་འཕོས་ནས་གནས་དེར་སྦྲུལ་གདུག་པ་ཅན་དུ་སྐྱེས་ཏེ་སྐྱེད་མོས་ཚལ་དེར་སུ་ཡོང་བ་ཐམས་ཅད་བལྟས་པ་ཙམ་གྱིས་གསོད་པར་བྱེད་དོ། །དེ་རྒྱལ་པོ་གཟུགས་ཅན་སྙིང་པོས་ཐོས་ནས་དེ་བཅོམ་ལྡན་འདས་ལ་འདུལ་བར་གསོལ་བ་བཏབ་པས། བཅོམ་ལྡན་འདས་ཕྱོགས་དེར་གཤེགས་ཏེ་བསྐལ་པ་སྟོང་གི་བར་དུ་ཡོངས་སུ་བསྒོམ་པའི་བྱམས་པའི་འོད་ཟེར་ཆེན་པོ་དག་བཀྱེས་ཏེ། དེ་སྦྲུལ་དེའི་ལུས་ལ་ཕོག་མ་ཐག་ཏུ་སིམ་པར་གྱུར་ནས་དེས་བལྟས་པས། སངས་རྒྱས་བཅོམ་ལྡན་འདས་བཞུགས་པར་མཐོང་ནས་དང་བའི་སེམས་སྐྱེས་སོ།།
དེར་བཀའ་སྩལ་པ། བཞིན་བཟང་ཁྱོད་ཀྱིས་རྫས་འདི་བསྒྲུབས་པ་དེས་ན་ཁྱོད་སྦྲུལ་གདུག་པར་ལྷུང་བར་བྱས་སོ། །ད་ཡང་ང་ལ་དད་པའི་སེམས་བསྐྱེད་ལ་གཏེར་འདི་ལ་ཡང་སེམས་མ་ཆགས་པར་བྱོས་དང་ལེགས་སོ། །འདི་ནས་ཤི་འཕོས་ནས་སེམས་ཅན་དམྱལ་བར་སྐྱེས་ཏ་རེ། དེ་ནས་སྦྲུལ་དེ་སྔོན་གྱི་ཚེ་རབས་དྲན་ནས་ངུས་སོ། །དེར་བཅོམ་ལྡན་འདས་ཀྱིས། ཁྱོད་ནི་དུད་འགྲོར་སྐྱེས་པ་ལ། །ད་ནི་ང་ཡིས་ཅི་བྱར་མེད། །མི་ཁོམ་པར་ནི་སྐྱེས་ཟིན་གྱི། །དོན་མེད་ངུས་པས་ཅི་ལ་ཕན། །འདི་ནི་རྒྱལ་བ་སྙིང་རྗེ་ཅན། །ང་ལ་དད་པའི་སེམས་བསྐྱེད་ལ། །དུད་འགྲོའི་སྐྱེ་གནས་སྤངས་ན་ལེགས། །འོན་ཀྱང་མཐོ་རིས་འགྲོ་བར་འགྱུར། །དེ་ནས་བཅོམ་ལྡན་འདས་ཀྱིས་སྦྲུལ་དེ་ལྷུང་བཟེད་ཀྱི་ནང་དུ་བཅུག་སྟེ་འོད་མའི་ཚལ་དུ་བསྣམས་ཤིང་། སྦྲུལ་དེས་ཀྱང་རང་གི་ལུས་ལ་སྐྱོ་ནས་ཟས་བཅད་དེ་བཅོམ་ལྡན་འདས་ལ་སེམས་དགའ་བཞིན་དུ་གནས་དེ་ཉིད་དུ་ཤི་འཕོས་ཏེ་སུམ་ཅུ་རྩ་གསུམ་པའི་ལྷར་སྐྱེས་ནས། བཅོམ་ལྡན་འདས་ཀྱི་སྤྱན་སྔར་འོངས་ནས་མཆོད་ཅིང་ཆོས་ཉན་པས་བདེན་པ་མཐོང་ནས་དགའ་བའི་ཚིག་ཀྱང་བརྗོད་པར་བྱས་ཏེ། ལྷའི་བུ་དེ་རྒྱལ་པོ་གཟུགས་ཅན་སྙིང་པོའི་ཐད་དུ་སོང་ནས་ཕོ་བྲང་ཐམས་ཅད་འོད་ཀྱིས་སྣང་བར་བྱས་ཤིང་རྒྱལ་པོ་མནལ་ལས་བསླངས་ནས། སྔར་གྱི་ལོ་རྒྱུས་རྣམས་བཤད་དེ་སྐྱེད་མོས་ཚལ་གྱི་གཏེར་རྣམས་བསྟན་ནས་དེས་སངས་རྒྱས་འཁོར་དང་བཅས་པ་ལ་མཆོད་པ་གྱིས་ཤིག་ཅེས་བསྐུལ་ནས་ལྷ་ཡུལ་དུ་སོང་ངོ་། །དེ་ནས་རྒྱལ་པོ་གཟུགས་ཅན་སྙིང་པོས་དེའི་ངག་ལྟར་ཉན་ནས་གཏེར་རྣམས་ཕྱུང་སྟེ། སངས་རྒྱས་འཁོར་དང་བཅས་པ་ལ་ཟླ་བ་གསུམ་གྱི་བར་དུ་བཤོས་གསོལ་ལོ། །དེར་རྒྱལ་པོས་དེའི་ལས་ཀྱི་རྒྱུ་ཞུས་པ་ན། བཀའ་སྩལ་པ། དེས་ཤས་ཆེར་ཆགས་པ་བསྐྱེད་དེ་དགེ་སློང་དང་བྲམ་ཟེ་དང་སྡུག་ཅིང་ཕོངས་པ་དང་། བཀྲེན་པ་རྣམས་ལ་སྡང་བའི་སེམས་བསྐྱེད་པ་དེས་ནི་སྦྲུལ་གདུག་པར་སྐྱེས་སོ། །ང་ལ་སེམས་དགའ་བར་བྱས་པ་དེས་ནི་ལྷའི་ནང་དུ་སྐྱེས་སོ། །ཡང་དག་པར་རྫོགས་པའི་སངས་རྒྱས་འོད་སྲུང་གི་རིང་ལ་དགེ་བསྙེན་དུ་གྱུར་ཏེ། སྐྱབས་སུ་སོང་བ་དང་བསླབ་པའི་གཞི་བླངས་པ། དེས་ནི་བདེན་པ་མཐོང་བར་གྱུར་ཏོ། །རྒྱལ་པོ་ཆེན་པོ་དེ་བས་ན་སེར་སྣ་སྤང་བའི་ཕྱིར་བརྩོན་པར་བྱས་ཏེ་ཅི་ནས་སྤྲུལ་གདུག་པར་གྱུར་པའི་ཉེས་པ་དེ་ལྟ་བུ་དག་འབྱུང་བར་མི་འགྱུར་བ་དང་། དེ་ཉིད་ལྷའི་བུར་གྱུར་པའི་ཡོན་ཏན་གྱི་ཚོགས་དེ་དག་ལྟ་བུར་འགྱུར་བར་བསླབ་པར་བྱའོ་ཞེས་གསུངས་སོ། །འདིས་ནི་སྡང་སེམས་དང་ཡོ་བྱད་ལ་ལྷག་པར་ཆགས་པའི་ཉེས་དམིགས་དང་སངས་རྒྱས་ལ་དད་པའི་ཕན་ཡོན་བསྟན་པ་ཡིན་ནོ།།
ཁུངས་གཏུག་སའི་ཡིག་ཆ།
ཞེ་ཆེན་རྒྱལ་ཚབ་འགྱུར་མེད་པདྨ་རྣམ་རྒྱལ་གྱིས་མཛད་པའི་«མདོ་ལས་བྱུང་བའི་གཏམ་རྒྱུད་སྣ་ཚོགས།»ཞེས་པ་ལས་སྔ་འགྱུར་རིག་མཛོད་རྩོམ་སྒྲིག་པས་བཏུས།
