མཁན་སྤྲུལ་དགེ་འདུན་རབས་རྒྱས་མཆོག་ལ་བཅར་འདྲི་ཞུས་པ།

རྩོམ་སྒྲིག་པ། མཁན་སྤྲུལ་དགེ་འདུན་རབས་རྒྱས་མཆོག་ལ་ཐོག་མར་འཚམས་འདྲི་བཀྲ་ཤིས་བདེ་ལེགས་ཞུ་བ་དང་ཆབས་ཅིག སྐུ་ཉིད་ཀྱིས་ནང་བསྟན་གཞུང་ལུགས་ལ་ཐོས་བསམ་གནང་ཕྱོགས་ཀྱི་བརྒྱུད་རིམ་དང་འབྲེལ་ནས་སྐུ་ཚེའི་ལོ་རྒྱུས་མདོར་བསྡུས་ཤིག་གསུང་རོགས།

མཁན་སྤྲུལ་དགེ་འདུན་རབས་རྒྱས། ང་རང་མགོ་ལོག་གི་འབྲོག་ཁྱིམ་ཞིག་ཏུ་སྐྱེས་ཤིང་། ངེད་ཚང་ལ་མིང་སྲིང་བཅུ་བཞི་ཡོད་མྱོང་། ངའི་ཨ་ཕ་སྨན་པ་ཡིན་ལ། ཉིན་རྒྱུན་འགྲུལ་པ་མང་བས། ཟ་མ་ཟ་རན་དུས་བྱིས་པ་རྣམས་ལ་དབྱར་ཁར་གུར་ཆུང་དང་། དགུན་ཁར་ཁང་ཆུང་ནང་ཟུར་དུ་ཟ་མ་བསྐྱལ་ཡོང་ལ། ཁུ་ཞང་སོགས་གཉེན་ཉེ་ཚོ་འོངས་ན་ང་ཚོ་ཁྱིམ་ལ་འགྲོ་ཆོག ཁོང་ཚོས་གསར་བརྗེའི་སྔོན་ལ་སློབ་སྦྱོང་ཇི་ལྟར་བྱས་པའི་སྐོར་འབའ་ཞིག་ཤོད་ཀྱིན་ཡོད་པས། དེ་ནི་ཆེས་རིན་ཐང་ཆེ་བའི་ཐོག་མའི་ཁྱིམ་ཚང་སློབ་གསོ་ཡིན་ལ། དེས་ང་ཚོར་ཤེས་ཡོན་ཕྱོགས་ལ་སྐུལ་སློང་ཡག་པོ་ཐེབས་ཡོད། ང་རང་ལོ་བརྒྱད་ནས་གྲྭ་སར་ཞུགས་ཤིང་། དེ་ཕྱིན་རང་ཁྱིམ་དུ་འགྲོ་བ་ཧ་ཅང་ཉུང་། ལོ་བཅུ་ནས་དབྱར་གནས་དང་། སྙིང་ཐིག་སྔོན་རྩ་སོགས་ལ་བསྡད། ལོ་བཅུ་བདུན་སྟེང་རྣམ་གླིང་སྔ་འགྱུར་མཐོ་སློབ་ཆེན་མོར་རྒྱུགས་སྤྲོད་ཀྱི་ལམ་ནས་ཞུགས། ལོ་རིམ་གཉིས་པའི་བར་སྔ་ཕྱིར་སྡོམ་གསུམ་དང་། སྤྱོད་འཇུག སུམ་རྟགས། བློ་རྟགས་སོགས་ཞུ་བའི་གོ་སྐབས་ཐོབ་ཀྱང་། རང་རྟོག་གི་འདུ་ཤེས་ཞན་པ་སོགས་ཀྱིས་བློ་སྐྱེད་ཆེར་མ་བྱུང་། བར་སྐབས་ཤིག་ལ་དགོང་མོའི་ཐུན་བར་དུ། སློབ་དཔོན་སངས་རྒྱས་དབང་འདུས་ཀྱིས། ཉིན་ཤས་རིང་རྣམ་ཐར་སྒོ་བཞིའི་ལན་འདེབས་ཚུལ་འཁྲིད་ཀྱིན་པར་ཞུགས་པས། རྩོད་ལན་གྱི་རྣམ་གཞག་ལ་ཐོག་མར་གོ་རྟོགས་སྐྱེས། ལོ་རིམ་གཉིས་པའི་དུས་སུ་ཉིན་ལྟར་མཚན་ཐུན་རྗེས་ཆུ་ཚོད་ཕྱེད་རེར་བསེ་བསྡུས་ལ་བལྟས་ཤིང་། དེས་ཆོས་རའི་ནང་ནས་བརྩད་རྒྱུ་མང་ཙམ་རྙེད་མོད། གོ་རྟོགས་ལ་གང་ཡང་མ་ཕན། མ་ཟད་ཡིན་ལོག་མིན་ལོག་ནས་བཟུང་སུན་སྣང་སྐྱེས་པས་ལྟ་མཚམས་བཞག་པ་ཡིན། ལོ་རིམ་གཉིས་པར་མི་ཕམ་པའི་དབུ་མ་རྒྱན་གྱི་རྣམ་བཤད་ཞུ་སྐབས། དགེ་རྒན་སློབ་དཔོན་བསྟན་འཛིན་ནོར་རྒྱས་ཀྱིས། གཞུང་དོན་གྱི་བར་མཚམས་དུ་མར་འདིར་གོ་རྒྱུ་ཆེན་པོ་ཡོད་གསུངས་པ་རྣམས་ལ་རྟགས་བརྒྱབས་ནས་བློ་ལ་བླངས། སླར་གཞུང་གོང་འོག་དང་། རྩ་འགྲེལ། ས་བཅད། རང་འགྲེལ་སོགས་དང་བསྡུར་ནས་དཔེ་ཀློག་བརྒྱབས་པས། གཞུང་དོན་དངོས་ལ་སླེབ་སྐབས་གོ་བ་གསར་པ་དུ་མ་སྐྱེས་བྱུང་ལ། གཞུང་དེར་བདེན་གཉིས་སོ་སོའི་རྣམ་གཞག་བཤད་པ་ལ་དམིགས་བསལ་གྱི་ཁྱད་ཆོས་ཡོད་པའི་ཚོར་སྣང་བྱུང་། དེ་ནི་ང་རང་ཐོས་བསམ་ལ་སྤྲོ་སྣང་བར་མེད་དུ་འཇུག་པའི་གཞི་ཡིན་ལ། དེ་ནས་བཟུང་ངས་བསམ་བློ་གཏོང་ཕྱོགས་རང་རྐྱ་བ་ཞིག་རྒྱུན་བསྐྱངས་ནས་སློབ་གཉེར་བྱས། ལོ་རིམ་ལྔ་པར་ཚད་འགྲེལ་ལེགས་བཤད་སྣང་བའི་གཏེར་ལེའུ་དང་པོར་བལྟས་པ་ནས་བཟུང་། ཚད་མའི་ཐད་ལ་དངོས་དོན་དང་མཐུན་པའི་ངེས་ཤེས་མི་དམན་པ་སྐྱེས་ཤིང་། གཞུང་གི་གནད་རྣམས་བསྡུས་གཞུང་དག་གི་བརྗོད་བྱ་དང་རྩད་ནས་མི་འདྲ་བར་རིགས་ལམ་དམིགས་བསལ་བ་ཡིན་པར་ཤེས་ཤིང་། རང་གིས་ཀྱང་དེ་འབྲེལ་གྱིས་ལྟ་གྲུབ་ཟུར་པ་བཟུང་། དེ་ནས་བཟུང་སློབ་མཐར་མ་ཕྱིན་བར་དང་། ད་ལྟའི་བར་དུ། དབུ་ཚད་ཀྱི་དོན་ལ་དམིགས་བསལ་གྱི་གོ་རྟོགས་དང་འབྲེལ། དེ་དག་གི་རྒྱབ་སྐྱོར་གྱི་ལུང་དང་། དངོས་སྟོབས་ཀྱི་རིགས་པ་ལ་བརྟེན་ནས། དོན་དངོས་གང་ཞིག་གནས་མིན་གཤིབ་སྡུར་བྱས་དང་བྱེད་མུས་སུ་ཡོད་དོ།།

རྩོམ་སྒྲིག་པ། སྔ་འགྱུར་བའི་ཀུན་མཁྱེན་ཡབ་སྲས་སྤྱི་དང་། ཁྱད་པར་ཀུན་མཁྱེན་མི་ཕམ་རྒྱ་མཚོའི་གཞུང་དུ་ཐུན་མོང་མིན་པའི་བཞེད་པ་དམིགས་བསལ་བ་དེ་འདྲ་གཟིགས་ཀྱི་ཡོད་མེད་དང་། ཉེ་བའི་ཆར་སྐུ་ཉིད་ཀྱི་དབུ་མའི་སྐོར་གྱི་གསུང་རྩོམ་དཔེ་དེབ་འགའ་མཇལ་སོང་བས། དེ་དག་གི་ནང་མཚན་ཉིད་མང་ཙམ་ཞིག་བཞག་འདུག་ན། དེ་རྣམས་ཁུངས་བཙན་གྱི་ཡིག་ཆ་གང་དག་ལ་གཏུགས་ཡོད་མེད་གསུངས་ན་ཆོག་གམ་ལགས།

མཁན་སྤྲུལ་དགེ་འདུན་རབས་རྒྱས། སྔ་འགྱུར་བའི་ཀུན་མཁྱེན་རྣམ་གསུམ་གྱི་གསུང་ཕལ་ཆེ་བའི་ཁུངས་རྒྱ་གཞུང་ལ་གཏུགས་ཡོད་པས། རྒྱ་གཞུང་གང་དང་ཡང་མི་འདྲ་བའི་བཤད་པ་མེད་མོད། བོད་སྔ་རབས་པ་འགའ་དང་། ཕྱི་རབས་པ་ཕལ་མོ་ཆེའི་བཤད་སྲོལ་དང་ཡེ་མི་མཐུན་ས་མང་། མཚོན་ཙམ་བཤད་ན། ཀློང་ཆེན་པའི་ཡིད་བཞིན་མཛོད་འགྲེལ་དང་། རོང་ཟོམ་པའི་ལྟ་བའི་བརྗེད་བྱང་དང་། མི་ཕམ་པའི་གྲུབ་བསྡུས་སོགས་ཀྱི་མདོ་སྡེ་པའི་འདོད་པ་བཤད་པའི་སྐབས་སུ། འདུས་མ་བྱས་དང་། གཟུགས་ཤེས་གང་ཡང་མིན་པའི་འདུ་བྱེད་གཏན་མེད་དུ་འདོད་ཚུལ་སོགས། བྱེ་སྨྲའི་འདོད་པ་དག་དང་མ་འདྲེས་པར་བཤད་པ་ནི། ཕྱི་རབས་པ་ལ་ཡོངས་སུ་གྲགས་པའི་བསྡུས་གཞུང་སོགས་དང་གཏན་མི་འདྲ་ལ། འཕགས་པ་ལྷའི་ཡེ་ཤེས་སྙིང་པོ་ཀུན་ལས་བཏུས་པ་ལས། ནམ་མཁའ་མོ་གཤམ་བུ་འདྲ་ལ། །འགོག་པ་ནམ་མཁའ་དང་འདྲ་འོ། །འདུས་བྱས་བེམ་པོ་ཡོད་མིན་ལ། །དུས་གསུམ་དག་ཀྱང་ཁས་མི་ལེན། །བསགས་པའི་གཟུགས་མེད་མིན་ཞེས་པ། །མདོ་སྡེ་པ་ནི་མཁས་རྣམས་སོ། །ཞེས་པ་སོགས་རྒྱ་གཞུང་ཚད་ལྡན་དག་དང་ཤིན་ཏུ་མཐུན་ནོ། །དེ་བཞིན་དུ་ཚུར་མཐོང་ཚད་མའི་སྐབས་སུ། ཡོད་ན་མི་རྟག་པས་ཁྱབ་པ་དང་། ཤེས་བྱ་བརྗོད་བྱ་གཞལ་བྱ་བཅས་ལ་ཡོད་པས་མ་ཁྱབ་པ་དང་། སྤྱི་མེད་ཅིང་། ཡོད་ན་བྱེ་བྲག་ཡིན་པས་ཁྱབ་པ་དང་། ཡོད་ན་དོན་གྱི་གཞན་སེལ་ཡིན་པས་ཁྱབ་པ་དང་། ཤེས་པ་ལ་རང་རིག་མངོན་སུམ་གྱིས་ཁྱབ་པ་དང་། སྤྱི་མཚན་ལ་ཤེས་པ་རང་མཚན་གྱིས་ཁྱབ་པ་དང་། དོན་དམ་དོན་བྱེད་ནུས་པའི་དོན་བརྟག་བྱའི་རང་མཚན་ལ་སྦྱར་བ་དང་། སེམས་ཙམ་པའི་ལུགས་ལ་ཐ་སྙད་སྣང་ཚུལ་དུ་ཕྱི་དོན་འདོད་པར་བཤད་པ་དང་། རྣམ་འགྲེལ་གྱི་དགོངས་པ་སེམས་ཙམ་རྣམ་བདེན་གཟུང་འཛིན་གྲངས་མཉམ་པར་གནས་པ་དང་། མངོན་སུམ་ལྟར་སྣང་ལ་རྟོག་མེད་ཀྱིས་ཁྱབ་པ་དང་། སྒྲུབ་ངག་ལ་རང་གིས་མཐོང་དོན་སྟོན་བྱེད་ཡིན་པས་མ་ཁྱབ་པ་སོགས་མང་ཞིང་། དབུ་མའི་སྐབས་སུ། ཐེག་ཆེན་སེམས་ཙམ་པ་དང་ཐལ་རང་གསུམ་པོའི་ཁྱད་པར་དེ། གཉིས་སྟོང་གི་ཤེས་པ་དང་། རྣམ་གྲངས་པའི་དོན་དམ་དང་། རྣམ་གྲངས་མིན་པའི་དོན་དམ་བཅས་སོ་སོར་རྩལ་འདོན་མཛད་པའི་གང་ཟག་གིས་ཕྱེ་བ་དང་། ཐེག་ཆེན་དབུ་སེམས་གཉིས་ཀྱི་སློབ་དཔོན་ཆེན་པོ་རྣམས་མཐར་ཐུག་སྤྲོས་བྲལ་གྱི་དོན་ལ་དགོངས་པ་མཉམ་པ་དང་། ཐེག་ཆེན་གྱི་གྲུབ་མཐའ་སྨྲ་བ་ཀུན་ཀྱིས་ཀུན་གཞི་དང་རང་རིག་འདོད་པ་དང་། བདེན་གྲུབ་དང་རི་རྭ་གཉིས་ཐ་སྙད་ཚད་མས་གྲུབ་མིན་ཁྱད་པར་ཡོད་པ་དང་། དེས་ན་ཀུན་བཏགས་དང་ལྷན་སྐྱེས་ཀྱི་དོན་ཐ་སྙད་དུ་ཡོད་མེད་ཀྱིས་ཕྱེ་བ་དང་། ཀུན་བཏགས་དང་ལྷན་སྐྱེས་ཀྱི་བདེན་འཛིན་གཉིས་ཀྱང་རང་ཡུལ་ཐ་སྙད་དུ་ཡོད་མེད་ཀྱི་རྣམ་རྟོག་ལས་ཕྱེ་བ་དང་། ཀུན་རྫོབ་དང་དོན་དམ་སེམས་བསྐྱེད་གཉིས་ངོ་བོ་འབྲལ་མི་རུང་བར་འདོད་པ་དང་། སྤྲོས་བྲལ་རྟོགས་པའི་བློ་ལ་ཐེག་ཆེན་ལམ་གྱིས་ཁྱབ་པ་དང་། ཐེག་ཆེན་གྱི་ལམ་ལ་མཉམ་བཞག་གིས་ཁྱབ་པ་སོགས་མི་འདྲ་ས་མང་ལ། དེ་དག་རེ་རེ་བཞིན་རིགས་པས་གྲུབ་ཅིང་། རྒྱ་གཞུང་ཚད་ཐུབ་ཀྱི་ཁུངས་ཡོད་པ་སོགས་ལྟ་བུ་རེད།
ཁོ་བོས་གསར་དུ་བྲིས་པའི་དབུ་མ་རྒྱན་རྩ་འགྲེལ་གྱི་རྟགས་སྦྱོར་གཉིས་ཀར། བདག་འཛིན་སོ་སོ་དང་། སྒྲིབ་གཉིས་སོ་སོ། རིགས་པ་སོ་སོ། ཚད་མ་སོ་སོ་སོགས་ལ་མཚན་ཉིད་བཞག་པ་རྣམས་ནི། རྒྱ་གཞུང་ཚད་ལྡན་དག་དང་། ཀུན་མཁྱེན་རྣམ་གསུམ་གྱི་གཞུང་གོང་འོག་གི་གོ་དོན་དག་གུང་བསྒྲིགས་ནས། རིགས་པ་ཚད་མར་བྱས་ཏེ་བྲིས་པ་ལས། དངོས་སུ་མཚན་ཉིད་དེ་ལྟར་བཞག་ནས་བཤད་པའི་གཞུང་ཁུངས་གང་ཡང་མེད། དེའང་དཔེ་མཚོན་ཙམ་བཀོད་ན། དབུ་མ་ལ་འཇུག་པའི་སེམས་བསྐྱེད་པ་དྲུག་པ་ལས། མོ་གཤམ་བུ་ལྟར་སྐྱེ་བ་དང་བྲལ་ཕྱིར། །དེ་ལྟར་གྱུར་པའི་བདག་ནི་ཡོད་མིན་ཞིང་། །འདི་ནི་ངར་འཛིན་རྟེན་དུའང་མི་རིགས་ལ། །འདི་ནི་ཀུན་རྫོབ་ཏུ་ཡང་ཡོད་མི་འདོད། །ཅེས་དང་། གཞན་གྱིས་བརྩད་པའི་ལན་མདོར་བསྡུས་པ་རིགས་ལམ་རབ་གསལ་དེ་ཉིད་སྣང་བྱེད་ལས། ཆོས་ཐམས་ཅད་ཀྱི་སྟེང་ན་བདེན་གྲུབ་ཡན་གར་བ་འགོག་པའི་ཚུལ་དུ་གོ་ནས། ཆོས་ཐམས་ཅད་ལ་དེ་དང་དེར་དམིགས་པ་ཙམ་སྟོང་ཉིད་སྒོམ་པའི་སྐབས་སུ་འགོག་མི་རུང་ན། དེ་འདྲའི་བདེན་གྲུབ་ཀུན་བརྟགས་འགོག་པའི་ལམ་དེ་ཇི་ལྟར་གོམས་ཀྱང༌། ཆོས་དང་གང་ཟག་དང་བདག་དང་གཞན་དུ་དམིགས་པ་ལྷན་སྐྱེས་ནི་ནམ་ཡང་མི་ཁེག་པས། ཉོན་མོངས་པ་དག་མགོ་ནོན་པའི་གཉེན་པོར་ཡང་མི་འགྱུར་ན། འཁོར་གསུམ་དུ་རྟོག་པའི་ཤེས་སྒྲིབ་ལྡོག་པ་ལྟ་ཅི་སྨོས། ཞེས་དང་། དེ་བཞིན་དབུ་མ་རྒྱན་གྱི་རྣམ་བཤད་ལས་གཞུང་དོན་སྐབས་ཆོས་ཅན་ལ་དཔྱད་པ་སོགས་སུ་གསལ་བ་ལྟར། བདག་འཛིན་ཀུན་བཏགས་དང་ལྷན་སྐྱེས་སོ་སོའི་མཚན་ཉིད་བཞག་པ་ལྟ་བུས་མཚོན་ནོ།།

རྩོམ་སྒྲིག་པ། སྐུ་ཉིད་ཀྱི་གསུང་རྩོམ་ལས། སེམས་ཙམ་པ་མངོན་པའི་ང་རྒྱལ་ཅན་གྱིས་བདག་མེད་མ་རྫོགས་ཚུལ། ཞེས་དང་། ཐེག་པ་ཆེན་པོ་སེམས་ཙམ་པས་འབྲས་བུ་སངས་རྒྱས་སྒྲུབ་ཚུལ། ཞེས་པ་དེ་གཉིས་ཀྱིས། སེམས་ཙམ་པ་ཡིན་ན་རྣམ་ཤེས་གཞན་དབང་མཐར་ཐུག་དོན་དམ་པར་འདོད་པས་མ་ཁྱབ་པ་ལྟ་བུར་གསུངས་འདུག་པས། མ་ཁྱབ་པའི་མཚན་གཞིར་ཐོགས་མེད་སྐུ་མཆེད་གཉིས་བཞག་ན། རྟོག་གེ་འབར་བ་ལས་རྣམ་ཤེས་དོན་དམ་དུ་འདོད་པའི་ཕྱོགས་སྔར་ཐོགས་མེད་སྐུ་མཆེད་གཉིས་ཀ་དྲངས་འདུག་ཅིང་། དེའི་ཐད་ནས་དགོངས་ཚུལ་ཞིག་དང་། སེམས་ཙམ་པ་ལ་བཀའ་དང་གྲུབ་མཐའི་སེམས་ཙམ་པ་གཉིས་ཞེས་འབྱེད་སྲོལ་དེ་ཇི་ལྟར་ཡིན་ནམ་ལགས།

མཁན་སྤྲུལ་དགེ་འདུན་རབས་རྒྱས། སེམས་ཙམ་པའི་སློབ་དཔོན་ཆེན་པོ་དག་གི་གཞུང་ན་གཞན་དབང་དོན་དམ་མིན་ཚུལ་དངོས་སུ་གསུངས་ཏེ། ཐོགས་མེད་ཀྱི་ཐེག་པ་ཆེན་པོ་བསྡུས་པ་ལས། རྣམ་པར་རིག་པ་ཙམ་གྱི་བློ་ཡང་རྣམ་པར་གཞིག་པར་བྱ་བ་ཡིན་ནོ། །དེ་ལྟར་བྱང་ཆུབ་སེམས་དཔའ་འདི་ཡིད་ཀྱི་བརྗོད་པ་སྣང་བའི་དོན་གྱི་མཚན་ཉིད་ལ་འཇུག་པས། ཀུན་བརྟགས་པའི་ངོ་བོ་ཉིད་ལ་འཇུག་པ་ཡིན་ནོ། །རྣམ་པར་རིག་པ་ཙམ་ལ་འཇུག་པས་གཞན་གྱི་དབང་གི་ངོ་བོ་ཉིད་ལ་འཇུག་པ་ཡིན་ནོ། །ཡོངས་སུ་གྲུབ་པའི་ངོ་བོ་ཉིད་ལ་ཇི་ལྟར་འཇུག་ཅེ་ན། རྣམ་པར་རིག་པ་ཙམ་གྱི་འདུ་ཤེས་ཀྱང་བཟློག་ནས་འཇུག་སྟེ། དེའི་ཚེ་བྱང་ཆུབ་སེམས་དཔའ་དོན་གྱི་འདུ་ཤེས་རྣམ་པར་བཤིག་པ་དེ་ལ། ཡིད་ཀྱི་བརྗོད་པ་ཐོབ་པའི་ཆོས་ཀྱི་བག་ཆགས་ཀྱི་རྒྱུ་ལས་བྱུང་བ་དེ་དག དོན་དུ་སྣང་བ་ཐམས་ཅད་འབྱུང་བའི་སྐབས་མེད་པ་ཡིན་ནོ། །དེས་ན་རྣམ་པར་རིག་པ་ཙམ་དུ་སྣང་བ་ཡང་མི་འབྱུང་སྟེ། གང་གི་ཚེ་དོན་ཐམས་ཅད་ལ་རྣམ་པར་མི་རྟོག་པའི་མིང་ལ་གནས་ཤིང༌། ཆོས་ཀྱི་དབྱིངས་ལ་མངོན་སུམ་གྱི་ཚུལ་གྱིས་གནས་པ་དེའི་ཚེ། བྱང་ཆུབ་སེམས་དཔའ་དེའི་དམིགས་པར་བྱ་བ་དང༌། དམིགས་པར་བྱེད་པ་མཉམ་པའི་ཡེ་ཤེས་རྣམ་པར་མི་རྟོག་པ་འབྱུང་སྟེ། དེ་ལྟར་ན་བྱང་ཆུབ་སེམས་དཔའ་འདི་ཡོངས་སུ་གྲུབ་པའི་ངོ་བོ་ཉིད་ལ་ཞུགས་པ་ཡིན་ནོ། །ཞེས་དང་། དབྱིག་གཉེན་གྱི་དབུས་དང་མཐའ་རྣམ་པར་འབྱེད་པའི་འགྲེལ་པ་ལས། དམ་པའི་དོན་ནི་གཅིག་པུའོ། །དོན་དམ་པའི་བདེན་པ་ནི་ཡོངས་སུ་གྲུབ་པའི་ངོ་བོ་ཉིད་གཅིག་པུར་རིག་པར་བྱའོ། །ཞེས་དང་། བློ་གྲོས་བརྟན་པས། དབུས་དང་མཐའ་རྣམ་པར་འབྱེད་པའི་འགྲེལ་བཤད་ལས་ཐེག་པ་བླ་ན་མེད་པའི་ལེའུ་སྟེ་ལྔ་པ་ལས། ད་ནི་དོན་དམ་པའི་བདེན་པ་བརྗོད་པར་བྱ་སྟེ། དེའི་ཕྱིར། དམ་པའི་དོན་ནི་གཅིག་པུའོ། །ཞེས་བྱ་བ་གསུངས་སོ། །བརྟགས་པ་དང་ནི་གཞན་དབང་གཉིས་ནི་དོན་དམ་པར་མི་སྲིད་པའི་ཕྱིར། དོན་དམ་པའི་བདེན་པ་ནི་ཡོངས་སུ་གྲུབ་པའི་ངོ་བོ་ཉིད་གཅིག་པུར་རིག་པར་བྱའོ། །ཞེས་མཚན་ཉིད་གསུམ་ལས་ཡོངས་གྲུབ་ཁོ་ན་དོན་དམ་དུ་བཤད་པ་དང་། ཕྱོགས་གླང་གི་ཚད་མ་ཀུན་ལས་བཏུས་པའི་ལྟག་ཆོད་བརྟག་པའི་ལེའུ་སྟེ་དྲུག་པའི་མཇུག་ཏུ། གང་ཞིག་རྟོག་གེའི་ལམ་ནས་ཆོས་ཉིད་ལ་ཁྲིད་ན། །ཐུབ་པའི་བསྟན་ལས་ཆེར་བསྲིངས་ཉམས་པར་བྱས་པ་ཡིན། །ཞེས་དང་། ཆོས་གྲགས་ཀྱི་ཚད་མ་རྣམ་འགྲེལ་གྱི་མངོན་སུམ་ལེའུ་སྟེ་གསུམ་པ་ལས། གང་གིས་དངོས་པོ་རྣམ་དཔྱད་ན། །དེ་ཉིད་དུ་ན་དེ་དངོས་མེད། །གང་གི་ཕྱིར་ན་དེ་དག་ལ། །གཅིག་དང་དུ་མའི་རང་བཞིན་མེད། །ཅེས་པ་ལྟར་རྣམ་ངེས་ལས་ཀྱང་དེ་བཞིན་གསུངས་པ་འདི་ཉིད། ཞི་བ་འཚོས། དབུ་མ་རྒྱན་གྱི་འགྲེལ་པ་ལས་དུ་བྲལ་སྒྲུབ་པའི་སྐབས་སུ། དེ་བས་ན་བློ་གྲོས་དཀར་པོ་རྣམས་ཀྱིས། དོན་འདི་དེ་དང་དེར་སྨོས་ཏེ། གང་གིས་དངོས་རྣམས་ངེས་བརྟགས་ནས། །ཡང་དག་ཏུ་ན་དངོས་དེ་མེད། །འདི་ལྟར་དེ་དག་གཅིག་པུ་དང་། །དུ་མའི་རང་བཞིན་ཡོད་མ་ཡིན། །ཞེས་སོགས་རྣམ་འགྲེལ་དང་རྣམ་ངེས་ཀྱི་ལུང་དེ་དག་རང་ལུགས་སྟོང་ཉིད་ཀྱི་སྒྲུབ་བྱེད་དུ་དྲངས་ནས་གསུངས་པ་སྟེ། དེ་ཉིད་ལས། དེ་ལྟར་རིགས་པ་དང་། ལུང་དང་ལྡན་པའི་ཤེས་རབ་ཀྱིས་བརྟགས་ན། དངོས་པོ་མ་ལུས་པ་བརྒྱ་ཚལ་དུ་གཞིགས་ཏེ། གཅིག་པ་དང་དུ་མའི་རང་བཞིན་དང་བྲལ་བའི་གཏན་ཚིགས་གྲུབ་བོ། །ཞེས་གསུངས་པ་སོགས། མདོར་ན་ཐེག་པ་ཆེན་པོ་སེམས་ཙམ་པའི་གཞུང་རྣམས་སུ། ཤེས་དང་ཤེས་བྱ་ཐམས་ཅད་བདག་མེད་པར་གཏན་ལ་ཕབ་པ་སོ་སོའི་གཞུང་ན་གསལ་བ་ལྟར་ཡིན་ནོ། །དེས་ན་རྟོག་གེ་འབར་བའི་རྣལ་འབྱོར་སྤྱོད་པ་བའི་དེ་ཁོ་ན་ཉིད་གཏན་ལ་དབབ་པ་ལ་འཇུག་པ་སྟེ་ལེའུ་ལྔ་པར། ཐེག་པ་ཆེན་པོ་ཉིད་ཀྱི་སློབ་དཔོན་ཐོགས་མེད་དང་། དབྱིག་གཉེན་ལ་སོགས་པ་གཞན་དག་ནི། དེ་བཞིན་གཤེགས་པས་ལུང་བསྟན་ཅིང༌། ས་རབ་ཏུ་བརྙེས་པའི་འཕགས་པ་ཀླུ་སྒྲུབ་ཀྱིས་ཡང་དག་པར་རྟོགས་པའི་ཐེག་པ་ཆེན་པོའི་དོན་གྱི་ལུགས་གཞན་དུ་འདྲེན་པར་བྱེད་ཅིང་། ངོ་ཚ་དང་ཁྲེལ་མེད་པ། དོན་རྣམ་པར་མི་ཤེས་པ་དེ་བཞིན་དུ། རྣམ་པ་ཤེས་ཤིང་མཁས་པར་ང་རྒྱལ་བྱེད་པ་དག འདི་སྐད་སྨྲ་སྟེ། དེ་ཁོ་ན་ཉིད་ཀྱི་བདུད་རྩིར་འཇུག་པ་སྟེ། རབ་ཏུ་འཇུག་པ་དེ་ནི་བདག་ཅག་ཁོ་ནས་ལེགས་པར་བསྟན་པ་ཡིན་གྱི། དབུ་མར་སྨྲ་བ་པ་རྣམས་ཀྱིས་ནི་མ་ཡིན་ཞེས་ཟེར་རོ། །ཞེས་དང་། ཟླ་བས། དབུ་མ་ལ་འཇུག་པའི་བཤད་པ་བརྩམས་པའི་དགོས་པའི་སྐབས་སུ། གལ་ཏེ་གནས་བརྟན་དབྱིག་གཉེན་དང་། ཕྱོགས་ཀྱི་གླང་པོ་དང་། ཆོས་སྐྱོང་ལ་སོགས་པ། བསྟན་བཅོས་རྣམས་ཀྱི་མཛད་པ་པོ་བྱོན་ཟིན་པར་གྱུར་པ་དེ་དག་གིས་ཀྱང་། ཡི་གེ་ཙམ་ཐོས་པས་འཇིགས་ཏེ། རྟེན་ཅིང་འབྲེལ་བར་འབྱུང་བའི་དོན་ཕྱིན་ཅི་མ་ལོག་པར་སྟོན་པ་འདི་ཡོངས་སུ་སྤངས་སམ་ཞེ་ན། དེ་སྐད་དུ་སྨྲའོ། །ཞེས་གསུངས་པ་དག་ནི། སློབ་དཔོན་ཆེན་པོ་དེ་དག་གིས། ཐ་སྙད་གནས་ཚུལ་དུ་གཉིས་སྟོང་གི་ཤེས་པ་རང་རིག་རང་གསལ་རྩལ་འདོན་མཛད་པའི་སྐབས་ཀྱི་འདོད་པ་དགག་པ་སྟེ། སློབ་དཔོན་ཆེན་པོ་དེ་དག་གིས། སྐབས་དེར་གཟུང་འཛིན་གཉིས་ཀྱིས་སྟོང་པའི་གཞན་དབང་ཉིད་གནས་ཚུལ་དབང་བཙན་དུ་བྱས་ནས་བཤད་ཅིང་། མཐར་དོན་དམ་གཏན་འབེབས་སྐབས་སུ་དེ་ཉིད་སྣང་ཚུལ་དབང་བཙན་དུ་བྱས་ནས། ཡོངས་གྲུབ་ཁོ་ན་དོན་དམ་དུ་འདོད་པའི་ཕྱིར་རོ།།
རང་ལུགས་ཀུན་མཁྱེན་རྣམ་གསུམ་གྱི་གཞུང་དུ། སེམས་ཙམ་པ་ལ་བཀའ་ཡི་སེམས་ཙམ་པ་དང་། གྲུབ་མཐའི་སེམས་ཙམ་པ་ཞེས་གཉིས་སུ་ཕྱེ་བ་ཞིག་དེ་སྔོན་མཇལ་མ་མྱོང་ཞིང་། གལ་ཏེ་དེ་ལྟ་བུའི་ཐ་སྙད་སྦྱར་དགོས་ན། མི་ཕམ་པས། མདོ་སྡེ་རྒྱན་འགྲེལ་ཐེག་མཆོག་བདུད་རྩིའི་དགའ་སྟོན་གྱི་ལེའུ་བདུན་པ་ལས། དེ་ནི་སེམས་ཙམ་གྱི་གྲུབ་མཐའ་སྨྲ་བ་མངོན་པའི་ང་རྒྱལ་ཅན་དག་སེམས་ཙམ་གྱི་སྐབས་སུ་ཕྱི་དོན་མེད་ཀྱི། སེམས་རྫས་སུ་ཡོད་ཅེས་པ། ཐག་པ་སྦྲུལ་གྱིས་སྟོང་ཡང་ཐག་པས་མི་སྟོང་པ་ལྟར། ཐ་སྙད་ཀྱི་དབང་དུ་བྱས་ཏེ་ཁས་ལེན་ཚུལ་ཡིན་པར་མ་གོ་ནས། གཉིས་སྟོང་གི་རྣམ་ཤེས་ལ་དོན་དམ་པར་བདེན་གྲུབ་ཏུ་ཞེན་པའི་གྲུབ་མཐའ་སུན་དབྱུང་བ་ཡིན་གྱི། སངས་རྒྱས་ཀྱིས་བསྟན་པའི་སེམས་ཙམ་གྱི་ལམ་ཚུལ་བཞིན་མངོན་པར་རྟོགས་པའི་འཕགས་པ་ཐོགས་མེད་ཀྱི་དགོངས་པ་བཀག་པ་མིན་པར་སྨྲའོ། །ཞེས་གསུངས་པ་ལྟར། ཐེག་ཆེན་སེམས་ཙམ་པ་དང་། སེམས་ཙམ་པ་མངོན་པའི་ང་རྒྱལ་ཅན་གཉིས་སུ་ཕྱེ་བའི་དོན་བཞིན་འཛིན་དགོས་པར་མངོན་ནོ།།

རྩོམ་སྒྲིག་པ། དབུ་མ་རྒྱན་གྱི་སྤྱི་དོན་དང་། བརྒལ་ལན་རྣམ་གསུམ་བཅས་ལས། མཐར་ཐུག་ལ་ཐལ་རང་གཉིས་དགོངས་པ་གཅིག་ཡིན་ཚུལ་ལུང་རིགས་ཀྱིས་རྒྱས་པར་བསྒྲུབས་འདུག་ན། དེ་ཀུན་མཁྱེན་རོང་ཀློང་རྣམ་གཉིས་ཀྱི་གཞུང་དང་མཐུན་མིན་དང་། མཐུན་ན་རོང་ཀློང་རྣམ་གཉིས་ཀྱི་གཞུང་དུ་ཚུལ་ཇི་ལྟར་གསུངས་ཡོད་དམ་ལགས།

མཁན་སྤྲུལ་དགེ་འདུན་རབས་རྒྱས། ཀུན་མཁྱེན་མི་ཕམ་པས། མདོ་སྡེའི་རྒྱན་འགྲེལ་ཐེག་མཆོག་བདུད་རྩིའི་དགའ་སྟོན་ལེའུ་བདུན་པར། ལུགས་འདིས་གཉིས་སྟོང་གི་ཤེས་པ་དེ་ལ་བདེན་གྲུབ་ཀྱི་དངོས་པོ་དང་། མཚན་མ་མེད་པར་ཤིན་ཏུ་རྟོགས་རིགས་པའི་ཕྱིར། དབུ་སེམས་ཀྱི་ཤིང་རྟ་ཆེན་པོ་དག་མཐར་ཐུག་གི་དགོངས་པ་མཐུན་པར་གཟུང་བར་བྱའོ། །ཞེས་གསུངས་པ་བཞིན། དབུ་མ་རྒྱན་གྱི་རྣམ་བཤད་དང་། ཤེར་འགྲེལ་བརྒལ་ལན་དང་བཅས་པའི་ནང་ནའང་། དབུ་མའི་སློབ་དཔོན་ཆེན་པོའམ། ཤིང་རྟ་ཆེན་པོ་རྣམས་མཐར་ཐུག་དགོངས་པ་གཅིག་པར་བཞེད་ཀྱི། སེམས་ཙམ་མངོན་པའི་ང་རྒྱལ་ཅན་དང་། དོན་དམ་རིགས་པས་དཔྱད་བཟོད་དུ་འདོད་པའི་རང་རྒྱུད་པ་དག་ནི་དེ་ལྟར་མི་བཞེད་དོ། །དེས་ན་ཀུན་མཁྱེན་ཀློང་ཆེན་པས་ཀྱང་། ཡིད་བཞིན་མཛོད་འགྲེལ་ལེའུ་བཅུ་གཉིས་པ་ལས་རང་རྒྱུད་གོང་མ་དང་། གྲུབ་མཐའ་མཛོད་ལེའུ་གསུམ་པ་ལས་དོན་དམ་རིགས་ཤེས་ཀྱི་ཡུལ་དུ་མི་འདོད་པའི་རང་རྒྱུད་པའི་སློབ་དཔོན་དག མཐར་ཐུག་རྣམ་གྲངས་མིན་པའི་དོན་གཏན་ལ་ཕབ་པར་གསུངས་པས་ཀྱང་། དེ་དག་མཐར་ཐུག་ཐལ་འགྱུར་བ་དང་དགོངས་མཉམ་དུ་བཞེད་པར་གྲུབ་བོ། །ཀུན་མཁྱེན་རོང་ཟོམ་པས། མན་ངག་ལྟ་ཕྲེང་གི་འགྲེལ་པ་སོགས་ན་དབུ་མ་པའི་གྲུབ་མཐའ་འཆད་སྐབས། མདོ་སྡེ་སྤྱོད་པའི་དབུ་མ་པ་དང་། རྣལ་འབྱོར་སྤྱོད་པའི་དབུ་མ་པ་གཉིས་ཀས། རྣམ་གྲངས་མིན་པའི་དོན་དམ་མཐའ་ཀུན་བྲལ་གྱི་སྟོང་པ་ཉིད་གནས་ལུགས་མཐར་ཐུག་ཏུ་བཞེད་པར་གསུངས་པ་ལས་ཀྱང་། དེ་གཉིས་ཀྱི་མཐར་ཐུག་གི་དགོངས་པ་སྤྲོས་བྲལ་དུ་འབབ་པར་གསུངས་པའང་དཔོག་ནུས་ཏེ། ལྟ་བའི་བརྗེད་བྱང་ལས། དེ་ལ་སྒྱུ་མ་ལྟ་བུ་ནི། ཕྱི་ནང་གི་དངོས་པོར་སྣང་བ་རྣམས་ལ། རིགས་པ་དམ་པས་གཞལ་ཞིང་བརྟགས་ན། ཡང་དག་པའི་དངོས་པོ་ཡང་མི་རྙེད་ལ། མངོན་སུམ་དུ་དམིགས་པས་གཞལ་ན་རྒྱུ་དང་འབྲས་བུའི་དངོས་པོར་ཡང་དེ་བཞིན་དུ་བདེན་ཏེ། བདེན་པ་འདི་གཉིས་ཀ་ཡང་ཁྱད་དུ་གསོད་དུ་མི་རུང་བས། བསྡུས་ན་དངོས་པོ་རྣམས་ཀྱི་ཆོས་ཉིད་ནི། ངོ་བོ་ཉིད་སྒྱུ་མ་ལྟ་བུའི་ཆོས་ཉིད་ནི་བདེན་ནོ་ཞེས་འདོད་དོ། །ཞེས་གསུངས་པ་ནི། རང་རྒྱུད་འོག་མ་སྒྱུ་མ་རིགས་གྲུབ་པའི་འདོད་པ་ལྟར་བསྟན་པ་ཡིན་ལ། དེ་ཉིད་ལས། རབ་ཏུ་ཤིན་ཏུ་མི་གནས་པ་ནི། ཆོས་ཐམས་ཅད་ལ་མིང་དང་བརྡ་དང་ཐ་སྙད་ཀྱི་མཚན་ཉིད་སྣ་ཚོགས་སུ་བསྟན་ཅིང༌། རྣམ་པར་བཞག་ཀྱང་ཇི་ལྟ་བུའི་མཚན་ཉིད་དུའང་གནས་པ་མི་འགྲུབ་སྟེ། རགས་པ་ཨ་ཅད་ཆེས་ཀྱི། ཐ་ན་རབ་ཏུ་ཕྲ་བ་ཞེའམ། ཤིན་ཏུ་ཟབ་པའི་གནས་གཅིག་ལ་ཡང་མི་གནས་མི་རྟེན་པས། རབ་ཏུ་ཤིན་ཏུ་མི་གནས་པ་ཞེས་བྱའོ། །འདི་ནི་ཤེས་བྱ་ཡོངས་སུ་གཅོད་པའི་དུས་ནའང་འདི་ལྟར་གཅོད་ལ། སངས་རྒྱས་ཀྱི་སའི་དུས་ནའང་། ཆོས་ཀྱི་དབྱིངས་རྣམ་པར་དག་པ་སྤྲོས་པ་ཡོངས་སུ་ཞི་བའི་མཚན་ཉིད་དུ་འདོད་དོ། །ཞེས་གསུངས་པ་ནི། རང་རྒྱུད་གོང་མ་གཉིས་དང་། གཞུང་ཕྱི་མོའི་དབུ་མ་པ་དག་སྤྲོས་བྲལ་བཞེད་པར་གསུངས་པར་གྲུབ་སྟེ། དེ་ཉིད་ལས། དབུ་མ་རྣམ་གཉིས་ཀུན་རྫོབ་ཀྱི་ཚུལ་མི་མཐུན་པ་ལ། ལུང་དང་རིགས་པ་འགངས་ཆེ་བ་ནི། རྒྱུད་དང་མདོ་སྡེ་སྤྱིའི་གཞུང་དང༌། རིགས་པ་སྤྱིའི་ཚུལ་དང༌། དབུ་མའི་མཁན་པོ་གཞུང་ཕྱི་མོ་མཛད་པའི་སློབ་དཔོན་ཀླུ་སྒྲུབ་དང༌། ཨཱརྱ་དེ་ཝའི་གཞུང་ལྟར་ན་ཡང་། རྣལ་འབྱོར་སྤྱོད་པའི་དབུ་མའི་གཞུང་དོན་ཆེ་བར་སྣང་ངོ༌། །དབུ་མའི་གཞུང་གི་ཆོས་ཐམས་ཅད་དོན་དམ་པར་སྤྲོས་པ་དང་བྲལ་བ། ཡང་དག་པའི་ཀུན་རྫོབ་ཀྱི་དབང་ལ། ཀུན་ནས་ཉོན་མོངས་པ་དང༌། རྣམ་པར་བྱང་བའི་ཆོས་སྤང་བ་དང་། བླང་བར་བྱ་བའི་དོན་སོ་སོ་བྱ་བ་བྱེད་པ་རྫས་སུ་ཡོད་དོ། །ཞེས་འདོད་པ་ལ། ཞེས་གསུངས་པས། དབུ་མའི་སློབ་དཔོན་ཆེན་པོ་དག་མཐར་ཐུག་སྤྲོས་བྲལ་གཏན་ལ་ཕེབས་ཡོད་པ་བཞེད་པར་མངོན་ནོ། །དེང་སང་ཡོངས་ཁྱབ་ཏུ་ཁོང་གི་གསུང་པོད་གཉིས་ལས་མཇལ་རྒྱུ་མེད་ལ། དེར་དབུ་མ་ཐལ་འགྱུར་བ་དང་། རང་རྒྱུད་པ་ཞེས་གསལ་པོར་བཤད་པ་མེད་མོད། དེ་ནི་དབུ་མ་ལ་འཇུག་པ་ཐོག་མར་བོད་སྒྱུར་གནང་མཁན་ནག་ཚོ་ཚུལ་ཁྲིམས་རྒྱལ་བ་དང་། པ་ཚབ་ཉི་མ་གྲགས་པ་གཉིས་ཀ་ཁོང་དང་དུས་མཉམ་པས། སྐབས་དེར་གཞུང་དེ་བསྒྱུར་ཟིན་དགོས་ཀྱང་། ཡུལ་དུས་ཀྱི་རྐྱེན་པས་དར་ཁྱབ་དེ་ཙམ་བྱུང་མེད་པའང་ཡིན་སྲིད་དོ།།

རྩོམ་སྒྲིག་པ། དབུ་མ་རྒྱན་གྱི་སྤྱི་དོན་ལས། གཞུང་འདིར་ཡང་། དངོས་པོ་ཀུན་གྱི་རང་བཞིན་ནི། །རིགས་པའི་ལམ་གྱི་རྗེས་འབྲངས་པར། །ཞེས་པ་ནས། ཀུན་རྫོབ་པར་འགྱུར་ཡང་དག་མིན། །ཞེས་པའི་བར་གྱི་དོན། དཔལ་ལྡན་ཟླ་བ་དང་དགོངས་པ་གཅིག་དང་དབྱངས་གཅིག་ཏུ་འགྱུར་བ་ཡིན་ནོ། །ཞེས་སོགས་ཀྱིས། རང་རྒྱུད་པས་མཐར་ཐུག་ལ་ཐལ་འགྱུར་པ་དང་མཐུན་པར། ཁས་ལེན་ཀུན་བྲལ་གྱི་སྒོ་ནས་ལྟ་བ་གཏན་ལ་ཕབ་པར་གསུངས་ནའང་། རང་འགྲེལ་དང་། དཀའ་འགྲེལ་དག་ལས། དེའི་ཐད་དུ་དོན་དམ་པ་ན་ཞེས་དོན་དམ་གྱི་སྒྲ་སྦྱར་གནང་འདུག་པས། དེའི་ཐད་ནས་དགོངས་ཚུལ་ཇི་ལྟར་ལགས།

མཁན་སྤྲུལ་དགེ་འདུན་རབས་རྒྱས། སྤྱིར་དོན་དམ་པར་ན་ཞེས་པའི་སྒྲ་བྱུང་བ་ཙམ་གྱིས། དོན་དམ་གྱི་ཁྱད་པར་སྦྱར་བའི་ངེས་པ་མེད་དེ། དབུ་མའི་རྒྱན་ལས། ཡང་དག་ཏུ་ན་སྤྲོས་པ་ཡི། །ཚོགས་རྣམས་ཀུན་ལས་དེ་གྲོལ་ཡིན། །ཞེས་ཡང་དག་ཅེས་བྱུང་བ་ནི། དོན་དམ་ཡང་དག་ཏུ་གྱུར་པའམ། དོན་དམ་མཚན་ཉིད་པར་གྱུར་པའམ། དོན་དམ་མཐར་ཐུག་ཏུ་གྱུར་པ་ནི་སྤྲོས་བྲལ་ཡིན་ཞེས་པའི་དོན་ཏེ། དབུ་མ་རྒྱན་གྱི་རང་འགྲེལ་ལས། དོན་དམ་པ་ནི། དངོས་པོ་དང་། དངོས་པོ་མེད་པ་དང་། སྐྱེ་བ་དང་། མི་སྐྱེ་བ་དང་། སྟོང་པ་དང་། མི་སྟོང་པ་ལ་སོགས་པ་སྤྲོས་པའི་དྲ་བ་མཐའ་དག་སྤངས་པའོ། །ཞེས་དང་། དབུ་མ་རྒྱན་གྱི་རྣམ་བཤད་འཇམ་དབྱངས་བླ་མ་དགྱེས་པའི་ཞལ་ལུང་ལས། དངོས་པོ་ཡོད་པ་དགག་པའི་དོན་དམ་དེ་ཅིའི་ཕྱིར་དོན་དམ་དངོས་མ་ཡིན། མཐར་ཐུག་པའི་དོན་དམ་མཚན་ཉིད་པ་དེ་ལས་བོགས་དབྱུང་དུ་མི་སྲིད་པ་གང་ཡིན་སྙམ་ན། དངོས་པོ་དགག་བྱ་རྣམ་པར་བཅད་པ་འདི་ནི། ཡོད་པ་བསལ་བའི་གཞན་སེལ་རྟོག་པའི་གཟུགས་བརྙན་ཙམ་ཡིན་པས་སྤྲོས་པ་ལས་མ་འདས་ལ། ཡང་དག་པ་མཐར་ཐུག་གི་དོན་དུ་ན་ཡོད་མེད་ཡིན་མིན་ལ་སོགས་པའི་མཐར་འཛིན་གྱི་སྤྲོས་པ་ཡི་ཚོགས་རྣམས་ཀུན་ལས་ཀྱང་། དོན་དམ་མཚན་ཉིད་པ་དེ་ནི་རྣམ་པར་གྲོལ་བ་ཡིན་ནོ། །ཞེས་གསུངས་པ་ལྟར་ལ། ཀུན་རྫོབ་དང་དོན་དམ་པའི་བདེན་པ་བསྟན་པའི་མདོ་བམ་པོ་དང་པོ་ལས། ལྷའི་བུ། དོན་དམ་པར་ན། དོན་དམ་པའི་བདེན་པ་ནི། ལུས་དང་། ངག་དང་། ཡིད་ཀྱི་ཡུལ་གྱི་རང་བཞིན་དུ་འགྱུར་ན་ནི། དེ་དོན་དམ་པའི་བདེན་པ་ཞེས་བྱ་བའི་གྲངས་སུ་མི་འགྲོ་སྟེ། ཀུན་རྫོབ་ཀྱི་བདེན་པ་ཉིད་དུ་འགྱུར་རོ། །འོན་ཀྱང་ལྷའི་བུ། དོན་དམ་པར་ན། དོན་དམ་པའི་བདེན་པ་ནི། ཐ་སྙད་ཐམས་ཅད་ལས་ཡང་དག་པར་འདས་པ། བྱེ་བྲག་མེད་པ། མ་སྐྱེས་པ། མ་འགགས་པ། སྨྲ་བར་བྱ་བ་དང༌། སྨྲ་བ་དང་། ཤེས་པར་བྱ་བ་དང༌། ཤེས་པ་དང་བྲལ་བའོ། །ཞེས་མདོ་སྡེ་དག་ལས་ཀྱང་དེ་ལྟར་གསུངས་ཤིང་། དབུ་མ་ལ་འཇུག་པའི་སེམས་བསྐྱེད་པ་དྲུག་པ་ལས། འདི་ལྟར་གཟུགས་དང་། ཚོར་བ་ལ་སོགས་པ་འདི་དག་ནི། ཅི་བདག་ལས་སྐྱེ་བ་ཞིག་གམ། ཅི་གཞན་ལས་སྐྱེ་བ་ཞིག་ཅེས་བྱ་བ་དེ་ལྟ་བུ་ལ་སོགས་པ་རྣམ་པར་དཔྱད་པ་ན། དོན་དམ་པར་མ་སྐྱེས་པ་དང་མ་འགགས་པའི་ཕྱིར། རང་བཞིན་ཅན་ལས་ཚུ་རོལ་ཏེ་གཞན་དུ་གྱུར་པའི་ཆ་སྐྱེ་བ་ལ་སོགས་པ་ཅན་ལ་གནས་པ་མ་ཡིན་ཏེ། ཞེས་ཐལ་འགྱུར་བའི་གཞུང་དུའང་དོན་དམ་གྱི་སྒྲ་དེ་འདྲ་གསུངས་པ་ཡོད་དོ། །དེས་ན་དགག་བྱར་དོན་དམ་གྱི་ཁྱད་པར་སྦྱར་མིན་ནི། དོན་དམ་གྱི་སྒྲ་སྦྱར་ཡོད་མེད་ཙམ་མིན་པར། བློས་འཛིན་ཚུལ་གྱི་སྟེང་ནས་བཞག་དགོས་ཏེ། དོན་དཔྱོད་རིགས་པས་དཔྱད་ཀྱང་ཐ་སྙད་དུ་མི་ཁེགས་པའི་ཐ་སྙད་རང་མཚན་གྱིས་གྲུབ་པ་དང་། ཐ་སྙད་ཚད་གྲུབ་བཞེད་མིན་ལས་ཤེས་དགོས་པས་སོ།།

རྩོམ་སྒྲིག་པ། ངེས་ཤེས་རིན་པོ་ཆེའི་སྒྲོན་མེ་ལས། འཕགས་ཡུལ་དཔལ་ལྡན་ཟླ་བ་དང་། །བོད་ན་རོང་ཟོམ་ཆོས་བཟང་གཉིས། །དགོངས་པ་གཅིག་དང་དབྱངས་གཅིག་གིས། །ཀ་དག་སྟོང་པ་ཆེན་པོར་བསྒྲུབས། །ཞེས་གསུངས་པའི་དགོངས་པ་གཅིག་པ་དེ། མདོ་སྔགས་ཀྱི་ལྟ་བ་གང་གི་ཐོག་ནས་དགོངས་པ་གཅིག་པ་ཡིན། རོང་ཟོམ་པས་སྔགས་ཀྱི་སྐབས་ནས་བསྟན་པའི་ཀ་དག་གཏན་ལ་ཕབ་པ་དེ་དང་། དཔལ་ལྡན་ཟླ་བའི་དགོངས་པ་གཅིག་ཚུལ་གསུངས་པ་ཡིན་ན། རོང་ཟོམ་ཆེན་པོས། མདོ་ཡི་ལྟ་བ་གཏན་ལ་འབེབས་ཚུལ་ཟླ་བ་གྲགས་པ་དང་མི་མཚུངས་པ་ལགས་སམ། དགོངས་ཚུལ་གསུང་རོགས།

མཁན་སྤྲུལ་དགེ་འདུན་རབས་རྒྱས། ཟླ་བ་གྲགས་པས། སྟོང་པ་ཆེན་པོ་དང་། རོང་ཟོམ་ཆེན་པོས། ཀ་དག་བཤད་པ་གཉིས་དོན་གཅིག་ཏུ་གྱུར་ཚུལ་ནི། དབུ་མ་འཇུག་པ་ལས་བཤད་པའི་སྤྲོས་བྲལ་དབུ་མ་ཆེན་པོ་ཇི་ལྟ་བ་བཞིན་དུ། ཐེག་ཆེན་ཚུལ་འཇུག་གི་ལེའུ་གསུམ་པ་དང་། བཞི་པ། ལྔ་པ་གསུམ་གར་ཀ་དག་གི་དོན་བཤད་པ་ན་སྤྲོས་བྲལ་ཉིད་རྩལ་འདོན་བྱས་ཡོད་པ་དང་། ལྟ་བའི་བརྗེད་བྱང་ལས། ད་ནི་གསང་སྔགས་ཀྱི་གཞུང་ལས་གྲགས་པའི་ལྟ་བ་ཅུང་ཟད་བརྗོད་པར་བྱ་སྟེ། དོན་དམ་པར་སྐྱེ་འགག་མེད་པར་འདོད་པ་ནི་དབུ་མ་དང་མཐུན་ནོ། །ཀུན་རྫོབ་ཏུ་ཕུང་པོ་ཁམས་དང་སྐྱེ་མཆེད་སྒྱུ་མ་ཙམ་དུ་ལྟ་བའང་མཐུན་ནོ། །ཞེས་དང་། རབ་ཏུ་གནས་པ་ཇི་ལྟར་བྱ་བའི་གཞུང་གི་བཤད་སྦྱར་ལས། གསུམ་པ། དབུ་མ་དང་སྒོ་མཐུན་པའི་རྫོགས་པའི་རྣལ་འབྱོར་གྱི་ཚུལ་གྱིས་བདག་གི་དེ་ཁོ་ན་ཉིད་ནི། རྣལ་འབྱོར་སྤྱོད་པ་རྣམས་ཀྱིས་ཡོངས་སུ་དག་པའི་ཡེ་ཤེས་རང་རིག་པ་ཙམ་འདི། ཡང་དག་པར་ཡོད་པར་འདོད་པ་ཡང་ཀུན་ཏུ་བརྟགས་པ་ཙམ་སྟེ། ཕྱི་ནང་གི་དངོས་པོ་འདི་དག་ནི། རྒྱུ་རྐྱེན་རྟེན་འབྲེལ་ཙམ་ལས་སྐྱེ་བར་དམིགས་པས། ཡང་དག་པར་ན་གཅིག་དང་དུ་མའི་ངོ་བོ་ཉིད་བློས་ཕྱེ་ན་རྙེད་པ་མ་ཡིན་པས། ཆོས་ཐམས་ཅད་ནི་སྤྲོས་པ་ཉེ་བར་ཞི་བའི་མཚན་ཉིད་དེ། ཞེས་སོགས་ཀ་དག་བཤད་པའི་སྐབས་ཀུན་ཏུ་དེ་ལྟར་བྱུང་། འོན་ཀྱང་དེས་རོང་ཟོམ་ཆེན་པོས་མདོའི་དབུ་མའི་དོན་གཞན་དུ་བཤད་དགོས་པའང་མེད་དེ། སྣང་བ་ལྷར་སྒྲུབ་ལས། དབུ་མ་པས། དོན་དམ་པར་ཆོས་ཐམས་ཅད་ལ་ཡོད་པ་དང་མེད་པ་ལ་སོགས་ཏེ་མཐའ་ཐམས་ཅད་དང་བྲལ་ཏེ། སྤྲོས་པ་ཡོངས་སུ་བཅད་པའོ། །ཞེས་འདོད་པ་དང་། ཞེས་དང་། ལྟ་བའི་བརྗེད་བྱང་ལས། དབུ་མ་པ་ནི། ཡིད་ཀྱང་དོན་དམ་པར་རྫས་སུ་མེད་དེ། ཡང་དག་པར་ན་ཆོས་ཐམས་ཅད་གདོད་མ་ནས་མ་སྐྱེས་པ་ངོ་བོ་ཉིད་མེད་པ། སྤྲོས་པ་ཐམས་ཅད་ཉེ་བར་ཞི་བའི་མཚན་ཉིད་དུ་འདོད་དོ། །ཞེས་དང་། ཞེས་སོགས་ཀྱིས་གྲུབ་པའི་ཕྱིར་རོ།།

རྩོམ་སྒྲིག་པ། མཐའ་དོན་སྐུ་ཉིད་ཀྱིས་ང་ཚོའི་བཅར་འདྲི་དང་ལེན་གནང་བར་ཐུགས་རྗེ་ཆེ་ཞུ་བ་དང་འབྲེལ། ལས་དང་པོ་བ་ཞིག་གི་ངོས་ནས། ཀུན་མཁྱེན་ཡབ་སྲས་ཀྱི་གཞུང་ལུགས་ལ་ཐོག་མར་ཐོས་བསམ་གྱི་གོམས་འདྲིས་བྱེད་སྟངས་དང་། གོང་ཞུས་ཀྱི་དྲི་བ་དག་གིས་མ་འཐུས་པའི་དགོངས་འཆར་དམིགས་བསལ་བ་དེ་འདྲ་ཡོད་ན་གསུང་རོགས།

མཁན་སྤྲུལ་དགེ་འདུན་རབས་རྒྱས། ལས་དང་པོ་བས་ཀུན་མཁྱེན་རྣམ་གསུམ་གྱི་གཞུང་ལུགས་ལ་གོམས་འདྲིས་དགོས་ན། དེ་དག་གི་གཞུང་ལུགས་དངོས་ཀྱི་ཚིག་དོན་རེ་རེ་བཞིན། བློ་གྲོས་རང་རྐྱ་ཐུབ་པ་ཞིག་གིས་ཐོས་བསམ་བྱེད་པ་གལ་ཆེ། དེའང་གོང་ཞུས་ལྟར། སྔ་འགྱུར་རང་གཞུང་ན་བཤད་པའི་གྲུབ་མཐའ་སྨྲ་བ་བཞིའི་ཁྱད་པར་སོགས། དེང་དུས་ཀྱི་ཡོངས་གྲགས་དང་མི་མཐུན་པ་ཤིན་ཏུ་མང་བས། ཡོངས་གྲགས་ཀྱི་གོ་བ་ཅུང་ཙམ་ཆགས་ཡོང་དུས། དེས་ཁོང་གསུམ་གྱི་གཞུང་ལ་ཕར་བཀབ་ན། རང་ལུགས་ཐུན་མིན་གྱི་བཞེད་མཚམས་གང་ཡང་ངེས་དཀའ་ལ། དེ་བས་ན་གཞན་ཟེར་རྗེས་བརྗོད་ཙམ་མིན་པར། རང་གི་རིགས་པ་དཔང་པོར་བྱས། རྒྱ་གཞུང་ཁུངས་ཐུབ་དག་ལ་གཏུགས་ཏེ་ཚིག་དོན་རེ་རེ་བཞིན་ཞིབ་པར་དཔྱད་ན། ད་གཟོད་ཁོང་གསུམ་གྱི་ཐུན་མིན་བཞེད་མཚམས་དག་མ་འདྲེས་པར་འབྱེད་ནུས་ཀྱི། གཞན་དུ་དཀའ་བར་སེམས་སོ།།
མཐར་མ་ཡུམ་སློབ་གླིང་གི་དགེ་སློབ་ཡོངས་དང་། སྔ་འགྱུར་རིག་མཛོད་རྩོམ་སྒྲིག་པ་ཡོངས་ཀྱི་བསྟན་འགྲོར་སྨན་པའི་བཞེད་དོན་ལྷུན་གྱིས་འགྲུབ་པའི་སྨོན་འདུན་ལན་བརྒྱར་ཞུའོ།།

སྤྱི་ལོ་ ༢༠༡༨ ཟླ་ ༡༠ ཚེས་ ༡༦ ཉིན་དགེ་འདུན་རབས་རྒྱས་ཀྱིས་ཕུལ།