རང་སྣང་གཉིས་ཀྱི་སྐོར་ལ་རོབ་ཙམ་དཔྱད་པའི་རི་མོ་བཟང་པོ།

ལོ་རིམ་དགུ་པའི་སློབ་གཉེར་བ། ར་ཀེས།

ཁྱད་ཆོས་ཆེ་བ་དྲུག་གིས་མངོན་པར་འཕགས་པའི་གསང་ཆེན་སྔ་འགྱུར་བ།།
ཐེག་དགུའི་རྩེ་མོ་རྫོགས་པ་ཆེན་པོ་པདྨའི་རིང་ལུགས་དྲི་བྲལ་བ།།
མ་ནོར་མ་བཅོས་སྙན་པའི་དབྱངས་ཀྱིས་གསུང་གི་ང་རོ་སྒྲོག་བྱེད་པའི།།
དགོངས་བརྡ་སྙན་བརྒྱུད་ཡབ་སྲས་བརྒྱུད་པར་བཅས་ལ་གུས་པས་སྙིང་ནས་འདུད།།

ངོ་བོ་ཀ་དག་ཆོས་དབྱིངས་སྟོང་གསལ་འགྱུར་མེད་ཡེ་ཤེས་སྐུ།།
རང་བཞིན་གསལ་བ་འགག་པ་མེད་པའི་འདུས་མ་བྱས་པའི་གསུང་།།
ཐུགས་རྗེ་རིས་མེད་ཀུན་ལ་ཁྱབ་པའི་གཡོ་བ་མེད་པའི་ཐུགས།།
མ་སྐྱེས་མི་འགག་བྲི་གང་བྲལ་བའི་དབྱིངས་ལ་གུས་ཕྱག་འཚལ།།

ཞེས་མཆོད་པར་བརྗོད་པའི་མེ་ཏོག་སྔོན་དུ་ཐོར་ཏེ་གང་ཞིག་གླེང་བར་བྱ་བའི་ཆོས་ཀྱི་རིམ་པ་ནི། ཕྱོགས་བཅུའི་མུན་སེལ་ལས།¹ རྫོགས་པ་ཆེན་པོ་ཨ་ཏི་ཡོ་ག་རྣམས་ཕྱི་ནང་གསང་བ་གསུམ་དུ་སྣང་བའི། གསང་བ་ལ་ཡང་བསྐྱེད་རྫོགས་གཉིས་སུ་ཕྱེ་བའི་སེམས་དང་ཡེ་ཤེས་སུ་རང་སྣང་བའི་དཀྱིལ་འཁོར་བསྟན་པ་དང་། བསྐྱེད་པ་དང་རྫོགས་པ་ལ་མི་ལྟོས་པར་སེམས་ཉིད་ཡེ་ནས་སངས་རྒྱས་པའི་རང་བཞིན་དུ་བསྟན་པ་དང་། ཡེ་ཤེས་རང་སྣང་བའི་ངོ་བོར་སངས་རྒྱས་པའི་རང་བཞིན་དུ་བསྟན་པ་གསུམ་ལས། འདིར་བསྐྱེད་རྫོགས་གཉིས་སུ་མེད་པ་སེམས་དང་ཡེ་ཤེས་སུ་རང་སྣང་བའི་དཀྱིལ་འཁོར་སྒྱུ་འཕྲུལ་དྲྭ་བ་མངོན་པར་བྱང་ཆུབ་པ་ཉིད་སྟོན་པར་བྱེད་དོ། །ཞེས་གསུངས་པ་ལྟར། སེམས་རང་སྣང་དང་ཡེ་ཤེས་རང་སྣང་གི་སྐོར་འདི་ཉིད་ཡིན་ནོ།།

དེ་ལ་རྩ་བའི་ས་བཅད་ཀྱི་དབང་དུ་བཏང་ན། ཐོག་མར་དགེ་བ་ཀླད་ཀྱི་དོན། བར་དུ་དགེ་བ་གཞུང་གི་དོན། མཐའ་མར་དགེ་བ་མཇུག་གི་དོན་བཅས་གསུམ་དུ་གནས་པ་ལས།

དང་པོ་ཐོག་མར་དགེ་བ་ཀླད་ཀྱི་དོན།

དེ་ལ་འདིར་སྤྱིར་སེམས་རང་སྣང་དང་ཡེ་ཤེས་རང་སྣང་གི་ངོ་བོ་ངོས་གཟུང་བ་ལ་ཆ་རྐྱེན་ལྟ་བུར་གྱུར་པའི་སྐབས་འདིར་བསྟན་པའི་སེམས་དང་ཡེ་ཤེས་ཀྱི་ངོ་བོ་ངོས་གཟུང་བ་ལ་གཉིས་ཏེ། སེམས་ཀྱི་ངོ་བོ་ངོས་གཟུང་བ་དང་། ཡེ་ཤེས་ཀྱི་ངོ་བོ་ངོས་གཟུང་བ་གཉིས་ལས། དང་པོ་སེམས་ཀྱི་ངོ་བོ་ནི། མ་རིག་པ་ཁྱབ་བྱེད་དུ་ཡོད་པ་གང་ཞིག་གཟུང་འཛིན་ཅན་དུ་སོང་བའི་ཤེས་པ་སྟེ། ཐེག་མཆོག་མཛོད་ལས།² ཡུལ་ཡུལ་ཅན་གཟུང་འཛིན་དུ་སྐྱེས་པའི་ཤེས་པ་གང་ཞིག་མ་རིག་པ་ཁྱབ་བྱེད་དུ་ཡོད་པ། ཞེས་དང་། སེམས་ཉིད་ངལ་གསོའི་འགྲེལ་ཆེན་ལས།³ རང་རིག་པའི་ཡེ་ཤེས་ལ་གཟུང་འཛིན་འཁྲུལ་པས་རྒྱུ་བྱས་ནས་ཉོན་མོངས་པའི་དྲྭ་བས་གཡོགས་པའི་ཚེ་ནི་སེམས་ཞེས་བརྗོད་དེ། རྟོག་དཔྱོད་མི་དགེ་བའི་ས་པས་བསྡུས་པ་ཡིན་པའི་ཕྱིར་རོ། །ཞེས་དང་། ཚིག་དོན་རིན་པོ་ཆེའི་མཛོད་ལས།⁴ སེམས་གང་ཡིན་འཁོར་བའི་ཆོས་ཏེ་ལས་དང་བག་ཆགས་ཀྱི་རང་བཞིན་དྲི་མར་སྐྱེས་པའི་སྐྱོན། ཞེས་དང་། དེ་བཞིན་དུ། གསང་སྙིང་སྤྱི་དོན་འོད་གསལ་སྙིང་པོ་ལས།⁵ རང་རྩལ་ལས་གཡོས་པ་དེ་ཉིད་རྐྱེན་ལས་གོལ་ཏེ་གཞི་དང་མི་མཐུན་པར་གཟུང་འཛིན་ཅན་དུ་སོང་ན་སེམས་ཞེས་བྱ་སྟེ། འཁྲུལ་པ་ཡིན་ཞིང་འཁོར་བའི་བག་ཆགས་ཐམས་ཅད་ཀྱི་གཞི་འཛིན་པ་རྩྭ་སོག་གི་གཟེབ་ལྟ་བུའོ། །ཞེས་གསུངས་པ་ལྟར་རོ།།

གཉིས་པ་ཡེ་ཤེས་ཀྱི་ངོ་བོ་ནི། གཟུང་འཛིན་གྱི་ཀུན་ཏུ་རྟོག་པ་དང་བྲལ་བས་ཡུལ་རིག་པའི་མཁྱེན་ཆར་གནས་པ་སྟེ། སེམས་ཉིད་ངལ་གསོའི་འགྲེལ་ཆེན་ལས།⁶ གཟུང་འཛིན་ཉེ་བར་ཞི་བས་ཡུལ་རིག་པ་ནི་ཡེ་ཤེས་ཞེས་བྱ་སྟེ། དཔལ་ཕྲེང་གི་མདོ་ལས། གང་ལ་གཟུང་བ་དང་འཛིན་པས་དབྱེ་ན་སྤྱོས་ཏེ་ཡུལ་ལ་རྟོག་པ་ནི་འཁོར་བའི་སེམས་སོ། །གང་ལ་གཟུང་བ་དང་འཛིན་པ་མེད་པས་དོན་རིག་པ་ནི་རྣམ་པར་གྲོལ་བའི་ཡེ་ཤེས་སོ་ཞེས་པས་འགྲུབ་བོ། །ཞེས་དང་། ཐེག་མཆོག་མཛོད་ལས།⁷ སོ་སོ་རང་གི་རིག་པ་ཡེ་ནས་མཁྱེན་ཆར་གནས་པ་སྟེ། ཞེས་དང་། ཡེ་ནས་གནས་པའི་དོན་རྟོགས་ཤིང་ཤེས་པ་སྟེ། རང་ཤར་ལས། ཡེ་ནས་རང་བཞིན་ལྷུན་གྱིས་གྲུབ། །དེ་ནས་རྟོགས་པ་མངོན་དུ་གྱུར། །ཡེ་ཤེས་ངེས་ཚིག་དེ་བཞིན་ནོ། །ཞེས་དང། ཚིག་དོན་རིན་པོ་ཆེའི་མཛོད་ལས།⁸ ཡེ་ཤེས་གང་ཡིན་མྱ་ངན་ལས་འདས་པའི་ཆོས་ཏེ་ལས་དང་བག་ཆགས་བསྲེགས་པས་མེ་དང་འདྲ་ཞིང་ཀུན་ཏུ་རྟོག་པ་ཐམས་ཅད་དང་བྲལ་བ་སྟོང་གསལ་ནམ་མཁའི་རང་བཞིན་ཅན་ཏེ། ཞེས་གསུངས་པ་ལྟར་སྐབས་འདིར་བསྟན་གྱི་སེམས་དང་ཡེ་ཤེས་ངོ་བོ་ཡིན་ནོ།།

གཉིས་པ་བར་དུ་དགེ་བ་གཞུང་གི་དོན།

འདི་ལ་གཉིས་ཏེ། སེམས་རང་སྣང་དང་ཡེ་ཤེས་རང་སྣང་གི་ངོ་བོ་ངོས་གཟུང་བ་དང་། དེའི་དོན་མཐའ་དཔྱོད་པ་གཉིས་ཡོད་པ་ལས། དང་པོ་ལ་གཉིས་ཏེ། སེམས་རང་སྣང་གི་ངོ་བོ་ངོས་གཟུང་བ་དང་། ཡེ་ཤེས་རང་སྣང་གི་ངོ་བོ་ངོས་གཟུང་བ་གཉིས་ལས།

དང་པོ་སེམས་རང་སྣང་གི་ངོ་བོ་ནི། བག་ཆགས་སད་པའི་སྟོབས་ཀྱིས་སྣང་བ་སྣ་ཚོགས་སུ་ཤར་བ་སྟེ། དེ་ལྟར་ཡིན་པ་འདི་ཡང་། ཕྱོགས་བཅུའི་མུན་སེལ་ལས།⁹ ཐམས་ཅད་རང་སྣང་ཡིན་པས་ངོ་མཚར་བ་བསྟན་པའི་ཕྱིར་ཨ་ཧོ་ཞེས་སོ། །ཉེ་བར་ལེན་པའི་ཕུང་པོ་ལྔ་དང་དེས་རྒྱུ་བྱས་ཏེ་འཁོར་བའི་གནས་སྐབས་ན་འཁྲུལ་སྣང་སྣ་ཚོགས་པ་སྲིད་པ་ཁམས་གསུམ་གྱི་རྩ་བར་གྱུར་པའི་ཉེས་དམིགས་ཐམས་ཅད་ནི་ང་དང་བདག་ཏུ་རྟོག་ལས་འཕྲོས་ཏེ། འཁོར་བར་འཁྲུལ་དུས་ན་ལྷ་ལ་སོགས་པའི་འགྲོ་བ་རྒྱུད་དྲུག་སོ་སོའི་སྣང་བ་ལ་སྐྱེ་བ་དང་སྲོག་གི་དབང་པོ་འགགས་པས་འཆི་བ་དང་། རང་རང་གི་ལུས་སྣ་ཚོགས་དང་བདུད་རྩི་དང་བུ་རམ་ཤིང་ལ་སོགས་པའི་ལོངས་སྤྱོད་སྣ་ཚོགས་དང་ལྷའི་གནས་ལ་སོགས་པའི་སོ་སོའི་ཡུལ་དུ་སྣང་བ་སྣ་ཚོགས་པ་དང་། འཆི་འཕོ་ལྟུང་བ་ལ་སོགས་པ་སྡུག་བསྔལ་གྱི་འཁྲུལ་འཁོར་དང་། ལ་སོགས་པའི་ཁོངས་ནས་བདེ་བ་དང་བར་མའི་སྣང་བ་དཀར་དམར་སྣ་ཚོགས་སུ་སྣང་བ་འདི་ཐམས་ཅད་འགྲོ་བ་དེ་དག་གི་མ་རིག་པས་བསྐྱེད་པའི་ལོག་རྟོག་བག་ཆགས་འཁྲུལ་པའི་སེམས་ཀྱི་རང་སྣང་རྨི་ལམ་ལྟ་བུ་ཉིད་ལས་ཕྱི་རོལ་དོན་གཞན་ཐ་དད་དུ་གྲུབ་པ་ཅི་ཡང་མེད་དོ། །ཞེས་དང་། དེ་བཞིན་དུ། རྒྱ་ཆེར་འགྲེལ་ལས།¹⁰ ཕྱི་གཟུང་བའི་ཡུལ་ལོག་པར་རྟོག་པ་ཉིད་ལ་ནང་འཛིན་པའི་སེམས་ཀྱིས་ལོག་པར་རྟོག་པ་ཉིད་སྤྱོད་ཀྱིས་ཀྱང་། གཞན་ལོགས་ཤིག་ཏུ་སེམས་འཁྲུལ་པས་བློ་ཕྱིན་ཅི་ལོག་ཏུ་གཡོ་བ་ཡང་ཅི་ཡང་ཡོད་པ་མ་ཡིན་ནོ། །ཞེས་བྱའོ། །ཅིའི་ཕྱིར་ཞེ་ན། ཡུལ་གྱི་རྣམ་པ་ཐམས་ཅད་ནི། སེམས་འཁྲུལ་པས་ནན་གྱིས་བཏགས་པ་ཡིན་ཏེ། སེམས་འཁྲུལ་པས་ཡུལ་འཁྲུལ་པ་མེད་པ་ལ་ཡོད་པར་ནན་གྱིས་བཏགས་པ་ཡིན་གྱི། ཡུལ་ལོགས་ཤིག་ཏུ་གྲུབ་པ་དང་། སེམས་མ་འཁྲུལ་པར་རང་དབང་དུ་ཡོད་པ་ནི་ནམ་ཡང་མ་མྱོང་ངོ་། །འོ་ན་ལོག་པར་རྟོག་པ་དེ་ཉིད་ལ་རྒྱུ་དང་འབྲས་བུ་དང་། རྒྱུ་འབྲས་བུ་འབྲེལ་བར་བྱེད་པ་ནི་ཡོད་དམ་ཞེ་ན། ལོག་རྟོག་རྒྱུ་འབྲས་རྒྱུན་ཉིད་ཀྱང་། །ཞེས་བྱ་བ་གསུངས་ཏེ། དེ་ལ་ཕྱིན་ཅི་ལོག་གི་རྟོག་པའི་རྒྱུན་ནི། ཉོན་མོངས་པ་ཅན་གྱི་ཡིད་བདག་ཏུ་རྟོག་པ་ཅན་ཡིན་ཏེ། ཅིའི་ཕྱིར་ཞེ་ན། སྲིད་རྩའི་ཉེས་དམིགས་བདག་ཏུ་རྟོག་ལས་འཕྲོས། །ཞེས་གསུངས་པའི་ཕྱིར་རོ། །འབྲས་བུ་ནི་ཁམས་གསུམ་འགྲོ་བ་རིགས་དྲུག་གི་ཉོན་མོངས་པའི་ཕུང་པོ་ཇི་སྙེད་པ་ལ་བྱ་སྟེ། ཅིའི་ཕྱིར་ཞེ་ན། རྒྱུད་དྲུག་སྐྱེ་འགག་ལུས་དང་ལོངས་སྤྱོད་དང་། །གནས་དང་སྡུག་བསྔལ་འཁྲུལ་འཁོར་ལ་སོགས་པ། །ལོག་རྟོག་ཉིད་ལས་གཞན་དུ་ཅི་ཡང་མེད། །རྒྱུན་ནི་སེམས་དང་སེམས་ལས་བྱུང་བའི་ལས་ཀྱི་བག་ཆགས་རྒྱུའི་དུས་ན་མི་མངོན་ལ་འབྲས་བུའི་དུས་ན་གསལ་བའི་མཚན་ཉིད་ཅན་ལ་བྱའོ། །ཞེས་གསུངས་པ་ལྟར་དོན་ལ་གནས་སོ།།

གཉིས་པ་ཡེ་ཤེས་རང་སྣང་གི་ངོ་བོ་ནི། གཟུང་འཛིན་གྱི་བག་ཆགས་ཡོངས་སུ་ཟད་པའི་སྟོབས་ཀྱིས་སྣང་བའི་དག་པ་རབ་འབྱམས་ཏེ། དེ་ཡང་ཕྱོགས་བཅུའི་མུན་སེལ་ལས།¹¹ ཆོས་ཐམས་ཅད་རྣམ་པ་ཀུན་ཀྱི་མཆོག་དང་ལྡན་པའི་སྟོང་པ་ཉིད་འཁོར་འདས་ཡེ་ནས་སངས་རྒྱས་པའི་རང་བཞིན་གང་ཟག་དང་ཆོས་ཀྱི་བདག་མེད་ཡེ་མཁྱེན་རང་གི་རིག་པ་ལ་མངའ་བརྙེས་པའི་ཐུགས་རང་བྱུང་གི་ཡེ་ཤེས་ཏེ། དེ་ལ་སྣང་བའི་ཆོས་རྣམས་ལ་ཕྱི་གཟུང་བའི་ཡུལ་གཞན་དུ་དམིགས་པར་བྱ་བ་དང་། ནང་འཛིན་པའི་སེམས་བདག་ཏུ་དམིགས་པར་བྱེད་པ་གཉིས་སུ་མེད་པར་ཡེ་ཤེས་ཀྱི་དྲན་པས་དབང་སྒྱུར་བར་བྱེད་དོ། །དེ་ལྟར་དབང་སྒྱུར་བའི་ཆོས་གཞན་ལས་འཕགས་པས་ངོ་མཚར་ཞིང་རྨད་དུ་བྱུང་བའི་སྐུ་གསུམ་དང་ཡེ་ཤེས་ཆེན་པོའི་གསུང་ཐེག་པར་སྣང་བ་དང་ཐུགས་མཁྱེན་པ་གཉིས་དང་ཡོན་ཏན་ཚད་མེད་པ་དང་འཕྲིན་ལས་ལྷུན་གྱིས་གྲུབ་པ་དང་ཞིང་ཁམས་བསམ་གྱིས་མི་ཁྱབ་པ་སོགས་པ་ཡང་། སངས་རྒྱས་ཉིད་ཀྱི་ཡེ་ཤེས་ཀྱི་རང་སྣང་ལས་ཕྱོགས་གཞན་ན་རང་མཚན་དུ་གྲུབ་པ་མེད་དེ། ཡེ་ཤེས་དེ་ཉིད་སྐུ་དང་ཞིང་ཁམས་དང་འཕྲིན་ལས་ལ་སོགས་པར་སྣང་བ་བསམ་གྱིས་མི་ཁྱབ་པ་དེ་ལྟར་སྣང་བ་ཡིན་ཏེ། རྨད་བྱུང་རྒྱལ་པོ་ལས། སངས་རྒྱས་སྐུ་དང་ཡེ་ཤེས་ཞིང་ཁམས་དང་། །ཡེ་ཤེས་ཡོན་ཏན་འཕྲིན་ལས་ཇི་སྙེད་པ། །ཡེ་ཤེས་དེ་ཉིད་དེ་ལྟར་སྣང་བ་ཡིན། །གཞན་ནས་མ་ཡིན་དེ་ལྟར་ལྷུན་གྱིས་གྲུབ། །ཅེས་སོ། །དེ་ལྟར་ཐམས་ཅད་རང་སྣང་ཆེན་པོར་བཀོད་པ་ལས་གཞན་མ་ཡིན་ནོ་ཞེས་རང་བཞིན་རྡོ་རྗེ་གསང་བའི་རྒྱུད་ཀྱི་ཚིག་ཏུའོ།།

དེ་བཞིན་དུ་རྒྱ་ཆེར་འགྲེལ་ལས།¹² ཉིད་ལ་དབང་སྒྱུར་ཉིད་སྤྱོད་ཕྱིར། །ཞེས་བྱ་བ་ལ་སོགས་པ་གསུངས་ཏེ། འདི་ཡང་ཕྱི་གཟུང་བའི་ཡུལ་རྣམ་པར་དག་པ་སྟོང་པ་ཉིད་ཀྱི་ཆོས་ཉིད་སྒྱུ་མ་ལ། ནང་འཛིན་པའི་སེམས་རྣམ་པར་དག་པ་རང་རིག་པའི་ཡེ་ཤེས་སྒྱུ་མ་ཉིད་ཀྱིས་དམིགས་བྱ་དང་དམིགས་བྱེད་མེད་པར། ངོ་མཚར་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དཀྱིལ་འཁོར་དུ་དབང་བསྒྱུར་ཞིང་། ཆོས་ཐམས་ཅད་ཡེ་ཤེས་རྣམ་པར་དག་པའི་ཞིང་ཁམས་སུ་ལོངས་སྤྱོད་པའི་ཕྱིར། བདག་དང་གཞན་དང་། རྟོག་པའི་དབང་ཡང་དག་པའི་རྣམ་པར་དག་པར་འགྱུར་བས། གཞུང་འདི་ནི་བླ་ན་མེད་པའི་ཐེག་པའི་མཆོག་ཏུ་ངེས་པ་ཡིན་ནོ། །ཞེས་བྱའོ། །ཞེས་དང་། འདིར་ནི་ཕྱི་དང་ནང་ཀུན་གཞི་བག་ཆགས་དང་བཅས་པ་ཐམས་ཅད་དོན་དམ་པ་ཆོས་ཉིད་སྟོང་པ་ཉིད་ཀྱི་ངོ་བོར་བསྟན་ལ། དོན་དམ་པ་ཀུན་རྫོབ་ཏུ་རྫོགས་པ་ཆེན་པོའི་དཀྱིལ་འཁོར་དུ་ཡེ་ནས་སངས་རྒྱས་པ་འདྲ་བར་གནས་པ་བསྟན་པ་ཡིན་ཏེ། དེའི་ཕྱིར་ཡང་། སྟོང་ཉིད་བདག་མེད་ཡེ་མཁྱེན་སྐུ་གསུང་ཐུགས། །དམིགས་བྱ་དམིགས་བྱེད་མེད་པར་དྲན་དབང་སྒྱུར། །ངོ་མཚར་སྐུ་གསུང་ཡོན་ཏན་ཞིང་ཁམས་ལས། །གཞན་ན་མེད་དེ་དེ་ཉིད་དེ་ལྟར་ཡིན། །ཞེས་པའི་ཕྱིར། ཉིད་ལ་དབང་སྒྱུར་ཉིད་སྤྱོད་ཕྱིར། །བདག་དང་གཞན་དང་རྟོག་པའི་རྒྱུན། །རྣམ་དག་བླ་མེད་ཐེག་པའི་མཆོག །ཅེས་གསུངས་པ་ཡིན་ནོ། །ཞེས་གསུངས་པ་ལྟར་དེའི་ཐོག་ལ་ཀུན་མཁྱེན་རོང་ཟོམ་ཆེན་པོའི་དཀོན་ཅོག་འགྲེལ་དང་སྒེག་པའི་རྡོ་རྗེའི་འགྲེལ་པ་སྤར་ཁབ་དེ་བཞིན་དུ་ལོ་ཆེན་རིན་པོ་ཆེའི་གསང་བདག་དགོངས་རྒྱན་དང་ཞལ་ལུང་སོགས་ལའང་རང་སྣང་གཉིས་ཀྱི་དོན་བཞེད་ཚུལ་ལ་རྗོད་བྱེད་ཚིག་གི་བརྗོད་ཚུལ་ལ་ཁྱད་པར་ཙམ་ལས་བརྗོད་བྱ་དོན་གྱི་ཆར་མཁས་གྲུབ་དེ་དག་གི་དགོངས་པ་གཅིག་ཏུ་གནས་པ་ཡིན་པས། འདིར་ཡིག་ཚོགས་མང་དྲགས་པའི་སྐྱོན་དུ་འགྱུར་བས་རེ་ཞིག་དེ་དག་གི་ལུང་འགོད་ཐབས་བྲལ་བས་རྒྱས་པར་གཟིགས་འདོད་མཆིས་ན་གོང་གི་གཞུང་དག་ལ་གཟིགས་གནང་བར་ཞུ། མདོར་ན་སེམས་དང་སེམས་རང་སྣང་དང་ཡེ་ཤེས་དང་ཡེ་ཤེས་རང་སྣང་གཉིས་པོ་ནི་གཙོ་བོ་ཡུལ་དང་ཡུལ་ཅན་གྱི་ལྡོག་ཆ་ནས་བཞག་པ་ཡིན་སྙམ། དེ་དག་གི་དོན་ལ་དཔྱད་པའི་ཁུལ་ཙམ་འོག་ཏུ་བྱས་ཡོད་པ་དེར་གཟིགས་པར་འཚལ་ལོ།།

གཉིས་པ་དེའི་དོན་མཐའ་དཔྱོད་པ་ལ་གཉིས་ཏེ། སེམས་རང་སྣང་གི་དོན་ལ་མཐའ་དཔྱོད་པ་དང་། ཡེ་ཤེས་རང་སྣང་གི་དོན་ལ་མཐའ་དཔྱོད་པ་གཉིས་ལས། དང་པོ་སེམས་རང་སྣང་གི་དོན་ལ་མཐའ་དཔྱོད་པ་ལ་དྲི་བ་འགོད་པ་དང་དེའི་ལན་ཐུན་མོང་དུ་བསྟན་པ་ནི། སེམས་ལ་སྣང་ན་སེམས་རང་སྣང་ཡིན་པས་ཁྱབ་པ་ཡོད་དམ་མེད་ཅེ་ན། སེམས་ལ་སྣང་ན་སེམས་རང་སྣང་ཡིན་པས་ཁྱབ། དེ་བཞིན་དུ་སེམས་ཀྱི་སྣང་བ་དང་མ་དག་པའི་སྣང་བའམ་འཁྲུལ་སྣང་ཡིན་ན་སེམས་རང་སྣང་ཡིན་པས་ཁྱབ་སྟེ། བག་ཆགས་སད་སྟོབས་ཀྱིས་སྣང་བ་ཡིན་པས་ཁྱབ་པའི་ཕྱིར་རོ། །སེམས་ཉིད་ངལ་གསོའི་འགྲེལ་ཆེན་ལས།¹³ འདི་ལྟར་མེ་ལོང་དུ་བཞིན་གྱི་གཟུགས་བརྙན་ཤར་བ་ན། མེ་ལོང་དྭངས་པའི་ངོས་གཟུགས་བརྙན་འཆར་བའི་རྟེན་དུ་རུང་བ་དང་། བཞིན་ལ་རྣམ་པ་འཆར་བའམ་བཏོད་བྱེད་ཀྱི་ནུས་པ་ཡོད་པའི་རྐྱེན་ལས་རང་གི་བཞིན་ཇི་ལྟ་བར་སྣང་དུས། བཞིན་གྱི་གཟུགས་བརྙན་དེ་བྱད་ཀྱང་མ་ཡིན། བྱད་ལས་གཞན་གྱི་རྣམ་པ་བཏོད་བྱེད་ཀྱང་མེད་པ་བཞིན་དུ་སྣ་ཚོགས་སུ་འཁྲུལ་ངོར་སྣང་བ་འདི་དག་རྒྱུ་རྐྱེན་འཁྲུལ་པའི་རྟེན་ཅིང་འབྲེལ་བར་འབྱུང་བའི་རྐྱེན་གྱིས་སྣང་དུས། སྣང་ཡུལ་རི་ལ་སོགས་པ་སྣ་ཚོགས་འདི་དག་སེམས་ཀྱང་མ་ཡིན། སེམས་ཀྱི་བག་ཆགས་འཁྲུལ་པ་ལས་སྣང་བ་མ་གཏོགས་དོན་གཞན་བདེན་པར་གྲུབ་པ་ཡང་མེད་པས་འཁྲུལ་སྣང་གི་རྣམ་པ་སྟེ། རབ་རིབ་ཅན་ལ་སྐྲ་ཤད་འཛག་པ་ལྟར་སྣང་བ་དང་མཚུངས་པ་མེད་བཞིན་སྣང་བའོ། །ཞེས་གསུངས་སོ། །དེ་བཞིན་དུ། ཚིག་དོན་རིན་པོ་ཆེའི་མཛོད་ལས།¹⁴ དེ་ལ་སེམས་ཀྱི་ཡུལ་འཁྲུལ་སྣང་འཁོར་བའི་ཆོས་ཏེ་བསྡུ་ན་གཟུགས་སྒྲ་དྲི་རོ་རེག་དང་ཆོས་ཏེ་དྲུག་གོ །འདི་དག་སེམས་ཀྱི་བག་ཆགས་ལས་སྐྲ་ཤད་ཀྱི་རྣམ་པ་ལྟར་སྣང་བ་སྟེ། གང་ལ་སྣང་ན་འཁྲུལ་བའི་སེམས་ལ་སྣང་བའོ། །ཞེས་གསུངས་སོ།།

ཡང་སེམས་རང་སྣང་ཡིན་ན་སེམས་དང་རྫས་གཅིག་དང་ཐ་དད་གང་རུང་ཡིན་པས་ཁྱབ་པ་ཡོད་དམ་མེད་ཅེ་ན། སེམས་རང་སྣང་ཡིན་ན་སེམས་དང་རྫས་གཅིག་དང་ཐ་དད་གང་རུང་ཡིན་པས་མ་ཁྱབ་སྟེ། ཕྱི་རོལ་གྱི་སྣང་བ་གཟུགས་སྒྲ་དྲི་རོ་སོགས་སེམས་རང་སྣང་ཡིན་ཡང་སེམས་དང་རྫས་གཅིག་དང་ཐ་དད་གང་ཡང་མ་ཡིན་པའི་ཕྱིར་རོ། །དེ་དག་ནི་སེམས་ཀྱི་ཆོ་འཕྲུལ་ལས་སྣང་བའམ་སེམས་ཀྱིས་ཕར་བཏགས་པ་ཙམ་ལས་ཕྱི་ནང་གང་དུའང་ངོ་བོ་ཉིད་ཀྱིས་གྲུབ་པ་མེད་པས་སོ། །གསང་འགྲེལ་ཕྱོགས་བཅུའི་མུན་སེལ་ལས།¹⁵ དེ་ལྟར་འཁོར་བར་བདེ་སྡུག་དུ་མས་གདུངས་ཀྱང་གནས་ལུགས་ལ་ནམ་མཁའ་བཞིན་དུ་འཆིང་བྱེད་སུས་ཀྱང་འགྲོ་བ་ཀུན་མ་བཅིངས་ཤིང་། བཅིངས་པ་ལྟར་སྣང་བའི་ཉོན་མོངས་ཀྱང་དོན་ལ་ཡོད་པ་མ་ཡིན་པའི་ཕྱིར་རོ། །འོ་ན་འདི་ལྟར་བཅིངས་པ་ལྟར་སྣང་བ་གང་ལས་བྱུང་ཞེ་ན། གློ་བུར་བའི་རྣམ་རྟོག་བདག་ཏུ་འཛིན་པ་ཡིས་དོན་མེད་པར་འཁྲུལ་པ་བཟོས་པ་ཡིན་ཏེ། དཔེར་ན་འགའ་ཞིག་ནན་ནམ་ཆེད་ཀྱིས་མདུན་གྱི་ནམ་མཁའ་ལ་ཐག་པ་ཅིག་བྱུང་བ་བློས་བཟོས་ནས། དེ་ལ་མདུད་པ་བཅིང་གྲོལ་དུ་མ་འདོར་ཞིང་བྱེད་པ་ལྟར། རང་གི་སེམས་ཉིད་གདོད་ནས་དག་པ་ནམ་མཁའ་ལྟ་བུ་ལ། དགག་སྒྲུབ་གཟུང་འཛིན་དུ་མར་བྱས་པས་འཁོར་བའི་འཁྲུལ་པ་ལྟར་སྣང་བའོ། །ཞེས་དང་། སེམས་ཉིད་ངལ་གསོའི་འགྲེལ་ཆེན་ལས།¹⁶ དེའང་འདི་ལྟར་མ་དག་པའི་སྣང་བ་དང་། དེར་འཛིན་པའི་ཤེས་པ་ཐམས་ཅད་བད་ཀན་རབ་རིབ་ཅན་གྱི་མིག་ལམ་དུ་སྐྲ་ཤད་འཛག་པ་ལྟར་སྣང་ལ་དུས་དེ་ཉིད་ནས་ཡོད་མ་མྱོང་བ་སྟེ། ཞེས་སོགས་ནས། དེའང་རྨི་ལམ་གྱི་འཁྲུལ་སྣང་གཉིད་དུ་འགྲོ་ཀ་དང་སད་པ་གཉིས་ཀ་ན་མེད་ཀྱང་བར་དེར་སྣང་བ་ལྟར། ད་ལྟར་གྱི་འགྲོ་དྲུག་འཁྲུལ་སྣང་འདི་ཡང་དང་པོ་སེམས་ཉིད་ཡེ་ནས་དག་པ་སྙིང་པོའི་ཁམས་ལ་མེད་ཅིང་། ད་གཟོད་འཁྲུལ་པ་ཤིན་ཏུ་དག་པ་སངས་རྒྱས་པའི་དུས་སུའང་མེད་ཀྱང་བར་འདིར་སྣང་བ་ཡང་མེད་བཞིན་དུ་སྣང་བས་སྐྱེ་འགག་གནས་གསུམ་དུ་མ་གྲུབ་པ་ཡིན་ནོ། །ཡིད་བཞིན་མཛོད་འགྲེལ་པདྨ་དཀར་པོ་ལས།¹⁷ ཁོ་བོ་ཅག་ནི་སེམས་ལ་སྣང་བའི་འཁྲུལ་པ་དྷ་དུ་ར་ལ་སོགས་པའི་སྣང་བ་ལྟར་ཕྱི་ནང་གང་ཡང་མ་ཡིན་གང་དུའང་མ་གྲུབ་ཀྱང་མེད་བཞིན་སྣང་བ་གཞི་མེད་རྩ་བྲལ་བར་འདོད་པས་རང་བཞིན་མེད་པར་སྨྲ་བ་ཡིན་ནོ། །ཞེས་དང་། དེ་བཞིན་དུ། མཛོད་ལྡེའི་ཟིན་བྲིས་ལས།¹⁸ ཕྱི་མའི་གནས་ལུས་སོགས་རང་སྣང་དངོས་མ་ཡིན་ཞེས་པའི་ཐད། སེམས་རང་སྣང་དངོས་ནི་སེམས་རང་དང་རྫས་གཅིག་ལ་དེ་དག་རིགས་ལྔ་ཡུམ་ལྔ་སོགས་ཡིན་ཏེ། དེ་ཡེ་ཤེས་ཀྱི་རང་སྣང་དངོས་ཀྱང་ཡིན་ནོ། །སེམས་ཀྱིས་ཕར་བཞག་པའི་སྣང་ཙམ་སེམས་ཅན་ཐུན་མོང་ལ་རིགས་འདྲ་ཞིག་སྣང་བའི་ཆ་དེར་སེམས་ཀྱི་སྣང་ཡུལ་ཞེས་བཤད་ལ་དེ་ཉིད་ལས་ཀྱིས་བདག་འབྲས་ཐུན་མོང་ལས་བྱུང་བའི་ཡུལ་གྱི་ཆ་ཡིན་པས་སེམས་དང་གཅིག་པའི་རྫས་མིན་ལ། ཡེ་ཤེས་ཀྱི་རྫས་སུའང་མེད་པས་རང་སྣང་དངོས་མིན་ཡང་དང་པོ་བྱུང་བའི་ཁུངས་ཡེ་ཤེས་ཉིད་ལས་གཞན་མེད་པས་ཡེ་སྣང་གི་ཕྱོགས་སུ་བསྡུས་པ་ཡིན་ལ། སྣང་ཡུལ་རང་ཉིད་ལ་རྫས་དང་ངོ་བོ་མེད་པས་འཁྲུལ་པས་བཏགས་པའི་སྣང་བ་ཙམ་དུ་ཟད་དོ། །ཞེས་གསུངས་སོ།།

གཉིས་པ་ཡེ་ཤེས་རང་སྣང་གི་དོན་ལ་མཐའ་དཔྱོད་པ་ལ་གཉིས་ཏེ། དྲི་བ་འགོད་པ་དང་དེའི་ལན་ཐུན་མོང་དུ་བསྟན་པ་ནི། ཡེ་ཤེས་རང་སྣང་ཡིན་ན་ཡེ་ཤེས་དང་གཅིག་ཡིན་པས་ཁྱབ་པ་ཡོད་དམ་མེད་ཅེ་ན། ཡེ་ཤེས་རང་སྣང་ཡིན་ན་ཡེ་ཤེས་དང་གཅིག་ཡིན་པས་ཁྱབ་སྟེ། ཡེ་ཤེས་རང་སྣང་ཡིན་ལ་ཡེ་ཤེས་ཉིད་ལས་གཞན་དུ་གྱུར་པ་མེད་པའི་ཕྱིར་རོ། །མཛོད་ལྡེ་ལས།¹⁹ འདི་དག་གི་སྐབས་སུ་ཡེ་ཤེས་རང་སྣང་ཞེས་བཤད་པ་ནི། ཡེ་ཤེས་ཉིད་ལས་གཞན་དུ་མ་གྱུར་པའི་སྣང་བ་སྟེ། ཞེས་དང་། གསང་འགྲེལ་ཕྱོགས་བཅུའི་མུན་སེལ་ལས།²⁰ ཡེ་ཤེས་དེ་ཉིད་སྐུ་དང་ཞིང་ཁམས་དང་ཕྲིན་ལས་ལ་སོགས་པར་སྣང་བ་བསམ་གྱིས་མི་ཁྱབ་པ་དེ་ལྟར་སྣང་བ་ཡིན་ཏེ། ཞེས་དང་། དཀོན་ཅོག་འགྲེལ་ལས།²¹ ངོ་མཚར་སྐུ་གསུམ་ཡོན་ཏན་ཞིང་ཁམས་ལས། །གཞན་ན་མེད་དེ་དེ་ཉིད་དེ་ལྟར་ཡིན། །ཞེས་པ་སྟེ། ཡེ་ཤེས་དེ་ཉིད་དེ་ལྟ་བུར་སྣང་བའམ། དེའི་བྱིན་རླབས་སོ་ཞེས་བཤད་པར་བྱའོ། །ཞེས་གསུངས་སོ། །འོན་ཀྱང་ཡེ་ཤེས་ཡིན་ན་ཡེ་ཤེས་རང་སྣང་ཡིན་པས་མ་ཁྱབ་སྟེ། འཆར་གཞིའི་ལྡོག་ཆ་ནས་བཞག་པའི་ཡེ་ཤེས་དོན་དམ་དང་ནང་གསལ་ཕྲ་བའི་རང་བྱུང་གི་ཡེ་ཤེས་ནི་ཡེ་ཤེས་ཡིན་ཡང་ཡེ་ཤེས་རང་སྣང་མ་ཡིན་པའི་ཕྱིར་ཏེ། རང་སྣང་གཉིས་པོ་ནི་གཙོ་བོ་ཕྱི་གསལ་ལམ་གཞི་ལས་གཞི་སྣང་ཤར་བའི་ལྡོག་ཆ་ནས་བཞག་པ་ཡིན་པ་གང་ཞིག་དེ་ནི་ཡེ་ཤེས་རང་གི་དབྱིངས་ཁོ་ན་ལས་གཞན་མི་སྣང་བ་དང་སྣང་བ་བཞི་མཐར་ཕྱིན་པའི་སྐབས་ཡིན་པས་སོ། །མཛོད་ལྡེའི་ཟིན་བྲིས་ལས།²² རིག་པ་ནང་གསལ་ལྟར་ན་ཡེ་ཤེས་རང་གི་དབྱིངས་ཁོ་ན་ལས་གཞན་མི་སྣང་བ་དང་། ཕྱི་གསལ་ལྟར་ན་ཡེ་ཤེས་རང་སྣང་གི་ཆོས་ཐམས་ཅད་རང་སྣང་དུ་མཐོང་བ་ལས་གཞན་དུ་མི་སྣང་བས་ན་རང་རིག་ཅེས་བྱ། ཞེས་དང་། གསང་འགྲེལ་ཕྱོགས་བཅུའི་མུན་སེལ་ལས།²³ དེ་ལྟར་སྣང་བའི་ཞིང་ཁམས་ཀྱང་གནམ་གང་གི་ཟླ་བ་ལྟར་དབྱིངས་ཆོས་སྐུའི་ཞིང་དུ་ཐིམ་པས་ཕྱི་རོལ་དུ་སྣང་ཆར་མེད་ལ་ནང་གསལ་དུ་མཁྱེན་ཆར་མ་འགགས་པ་ནི་རང་བཞིན་གཅིག་དང་དུ་མ་དང་བྲལ་བ་ཡི་ཆོས་སྐུ་མཐའ་དང་དབུས་མེད་པའི་དེ་བཞིན་ཉིད་སྤྲོས་པ་ཐམས་ཅད་ཞི་བའི་དབྱིངས་ན། ཕྱིར་སྣང་ཐིམ་པར་བཞུགས་པའི་ལོངས་སྐུའི་ཆ་དེ་ཉིད་སངས་རྒྱས་ཀྱིས་ཀྱང་ཕན་ཚུན་མི་གཟིགས་ཏེ་ཤིན་ཏུ་ཕྲ་བའི་རང་བྱུང་གི་ཡེ་ཤེས་དེ་ཉིད་གང་དུའང་གནས་པ་མེད་པར་ཞི་བའི་དབྱིངས་ན་སྣང་བ་སྟེ་གནས་པའི་ཕྱིར་རོ། །དེ་སྐད་དུའང་རྨད་བྱུང་རྒྱལ་པོ་ལས། ཆོས་ཀྱི་དབྱིངས་ཀྱི་ཕོ་བྲང་ན་དུས་གསུམ་གྱི་སངས་རྒྱས་ཐམས་ཅད་གཅིག་གིས་གཅིག་མི་གཟིགས་པའི་ཚུལ་གྱིས་བཞུགས་ཏེ། །ཞེས་སོ། །དེའང་ཁ་ཅིག་འགྲོ་དྲུག་གིས་མི་མཐོང་ལ་སངས་རྒྱས་ཀྱིས་གཟིགས་པར་འདོད་པ་ནི་གཞུང་གི་དགོངས་པ་མ་ཡིན་ནོ། །འདིར་སྣང་བ་བཞི་མཐར་ཕྱིན་པའི་སྐབས་ཡིན་ཏེ། ཞེས་སོགས་གསུངས་སོ།།

དེ་བཞིན་དུ། ཡེ་ཤེས་རང་སྣང་ཡིན་ན་དག་པའི་སྣང་བ་ཡིན་པས་ཁྱབ་སྟེ། བག་ཆགས་ཡོངས་སུ་ཟད་པའི་སྟོབས་ཀྱིས་སྣང་བ་ཡིན་པས་ཁྱབ་པའི་ཕྱིར་རོ། །དེ་ཡང་སྤྱི་དོན་འོད་གསལ་སྙིང་པོ་ལས།²⁴ གློ་བུར་འཁྲུལ་པའི་བག་ཆགས་ཐམས་ཅད་ཟད་པ་ན་དེས་བསྐྱེད་པའི་སྣང་བའང་མི་མངའ་མོད། གདོད་མའི་གཞི་དབྱིངས་ཀྱི་རང་མདངས་མ་འགགས་པའི་སྣང་བ་ལྷུན་གྱིས་གྲུབ་པ་ནི་ནམ་ཡང་ལྡོག་པར་མི་སྲིད་དེ་ངོ་བོ་ཉིད་ཀྱིས་བྲལ་མི་རུང་བའི་ཕྱིར་རོ། །དེ་ལྟར་ན་བསླད་པ་དང་བྲལ་བའི་ཡེ་ཤེས་ཀྱི་རང་སྣང་དག་པ་ལྟར་དོན་ལ་གནས་པར་ཤེས་པར་བྱའོ། །ཞེས་དང་། དེ་བཞིན་དུ། དེ་ཉིད་ལས།²⁵ དེས་ན་རང་སེམས་དྲི་མ་དག་པའི་རིམ་པར་དང་མཚུངས་པར་སངས་རྒྱས་ཀྱི་ཆོ་འཕྲུལ་དང་བྱིན་རླབས་ཇེ་མངོན་དུ་སོང་བ་ཡིན་ལ། མཐར་དྲི་མ་ཡོངས་སུ་དག་ནས་གནས་ལུགས་མངོན་དུ་གྱུར་པ་ན་སངས་རྒྱས་ཐམས་ཅད་ཀྱང་རང་ཉིད་དང་། རང་ཉིད་ཀྱང་སངས་རྒྱས་ཐམས་ཅད་དེ་དུས་གསུམ་གྱི་སངས་རྒྱས་ཀུན་དང་གཉིས་སུ་མེད་པའི་ཆོས་ཉིད་ཡེ་ཤེས་ཀྱི་སྐུ་བརྙེས་པ་ཡིན་ནོ། །ཞེས་གསུངས་པ་ལྟར་རོ།།

འོན་ཀྱང་དག་པའི་སྣང་བ་ཡིན་ན་ཡེ་ཤེས་རང་སྣང་ཡིན་པས་མ་ཁྱབ་སྟེ། སློབ་ལམ་པར་ལྷ་སྐུ་དང་ཞིང་ཁམས་སོགས་སྣང་བ་འདི་དག་པའི་སྣང་བ་ཡིན་ཡང་ཡེ་ཤེས་རང་སྣང་མ་ཡིན་པའི་ཕྱིར་ཏེ། བག་ཆགས་དང་བཅས་པའི་སྟོབས་ཀྱིས་སྣང་བ་ཡིན་པའི་ཕྱིར། དེ་ཆོས་ཅན། བག་ཆགས་དང་བཅས་པའི་སྟོབས་ཀྱིས་སྣང་བ་ཡིན་ཏེ། དགེ་བའི་བག་ཆགས་སད་སྟོབས་ཀྱིས་སྣང་བ་ཡིན་པའི་ཕྱིར་རོ། །དེ་ལྟར་ཡིན་པ་འདི་ཡང་། སྣང་བ་ལྷར་སྒྲུབ་ལས།²⁶ ལྷར་སྣང་བ་དེ་དག་ཀྱང་བག་ཆགས་དང་བཅས་པའི་སེམས་ཀྱི་རྣམ་པ་སྣང་བ་ཡིན་པས་སེམས་ཉིད་དུ་བསྡུས་པའོ། །དེ་ལ་བག་ཆགས་ཀྱི་རྒྱུས་ཇི་ལྟར་སྣང་ཞེ་ན། དེ་ལ་འཛིན་པ་གཉིས་ཀྱི་བག་ཆགས་ནི། དེ་ཡང་ཡུལ་དང་ཡུལ་ཅན་དུ་སྣང་བར་འགྱུར་རོ། །དཀར་པོ་ལས་ཀྱི་བག་ཆགས་ཀྱིས་ནི་མཚན་དང་དཔེ་བྱད་ལ་སོགས་པས་བརྒྱན་པ་ཁྱད་པར་ཅན་དུ་སྣང་བ་འགྱུར། ཞེས་གསུངས་སོ།།

མདོར་ན་ཡེ་ཤེས་རང་སྣང་ཡིན་ན་སངས་རྒྱས་ཀྱི་སྣང་བ་ཡིན་པས་ཁྱབ་པ་དེ་བཞིན་དུ་དག་པའི་སྣང་བ་ཡིན་ན་ཡེ་ཤེས་རང་སྣང་ཡིན་པས་མ་ཁྱབ་པ་སོགས་དང་། དེའི་སྟོབས་ཀྱིས་སེམས་རང་སྣང་ཡིན་ན་སེམས་ཅན་གྱི་སྣང་བ་ཡིན་པས་ཁྱབ་པ་དང་དེ་བཞིན་དུ་སེམས་རང་སྣང་ཡིན་ན་མ་དག་པའི་སྣང་བ་ཡིན་པས་མ་ཁྱབ་པ་སོགས་ང་དང་ང་འདྲ་བའི་བློ་དམན་པ་དག་ལ་དཔྱད་པའི་ས་བོན་ཙམ་དུ་ཅི་ནས་ཀྱང་འགྱུར་སྙམ་ནས་བྲིས་པའོ།།

གསུམ་པ་མཐའ་མར་དགེ་བ་མཇུག་གི་དོན།

དེ་ལ་ཁོ་བོས་མཇུག་གཏམ་བརྗོད་པ་དང་དེ་ལྟར་བགྱིས་པའི་དགེ་རྩ་གཞན་དོན་དུ་བསྔོ་བ་ཐུན་མོང་དུ་བསྟན་པ་ནི། དེ་ཡང་རྩ་རྒྱུད་གསང་སྙིང་གི་ལེའུ་གསུམ་པའི་བརྗོད་དོན་གཙོ་བོ་སེམས་རང་སྣང་དང་ཡེ་ཤེས་རང་སྣང་འདི་ལྟ་བུ་བརྗོད་བྱ་ཟབ་ཅིང་རྒྱ་ཆེ་བ་སྨྲ་བསམ་བརྗོད་མེད་ཀྱི་རང་བཞིན་ལ་ཁོ་བོ་ལྟ་བུ་སྐྱེས་སྦྱངས་ཀྱི་ཤེས་རབ་དབེན་པའི་བློ་དམན་པས་གླེངས་པ་ནི་བཞད་གད་ཀྱི་གནས་སུ་ཅི་ནས་ཀྱང་གྱུར་མོད། འོན་ཀྱང་རིག་བྱེད་ཀྱི་གཏམ་རྒྱུད་ནང་གསལ་བ་ལྟར་རྒྱ་མཚོ་བསྲུབས་པ་ལས་ཟླ་བ་ཐོན་པའི་དཔེ་བཞིན་མདོ་སྔགས་ཀྱི་གཞུང་ལུགས་རབ་འབྱམས་རྒྱ་མཚོ་ལྟ་བུ་བསྲུབས་པ་ལས་བྱུང་བའི་རིའི་རྒྱལ་པོ་རི་རབ་ལྟར་གཡོ་བ་མེད་པའི་ངེས་ཤེས་རིན་པོ་ཆེ་ལ་མངའ་དབང་བསྒྱུར་པའི་མཐོ་སློབ་འདི་ལ་བཀའ་དྲིན་གྱི་ཕུང་པོ་གཞལ་དུ་མེད་པའི་ཡོངས་འཛིན་དགེ་བའི་བཤེས་གཉེན་རྣམས་ཀྱི་བཀའ་དྲིན་དང་ཁོང་རྣམ་པའི་སྐྱབས་འོག་ཏུ་ཚུད་ནས་ལོ་ཤས་རིང་ཐོས་བསམ་བྱས་པའི་ས་བོན་ལ་བརྟེན་ནས་དཀར་པོ་ལས་ཀྱི་བག་ཆགས་རང་རྒྱུད་ལ་འཇོག་པའི་ཆེད། ཅུང་ཟད་ཙམ་འབྲི་ཁུལ་བྱས་པ་འདི་ལ་བརྗོད་བྱ་དང་རྗོད་བྱེད་གཉིས་ཀའི་ཐོག་ལ་ནོར་བ་དང་འཁྲུལ་པ་མང་དག་ཅིག་ཡོད་པ་སྨོས་མ་དགོས། དེ་ལ་ཡེ་ཤེས་ཀྱི་སྤྱན་དང་ལྡན་པའི་བརྒྱུད་གསུམ་གྱི་བླ་མ་ཡི་དམ་མཁའ་འགྲོའི་ཚོགས་དང་འཆད་རྩོད་རྩོམ་གསུམ་གྱི་རྩལ་ཕུན་སུམ་ཚོགས་པ་འགྲན་ཟླ་དང་བྲལ་བའི་མཁན་སློབ་དགེ་བའི་བཤེས་གཉེན་རྣམས་དང་དམ་ཚིག་གཅིག་པའི་སྤུན་གྲོགས་ཡོངས་ཀྱི་སྤྱན་སྔར་མཐོལ་ཞིང་བཟོད་པར་གསོལ་ལོ།།

སླར་སྨྲས་པ།

དེ་ལྟར་བགྱིས་པ་དག་ལ་དགེ་བ་ཅི་མཆིས་ན།།

ནམ་མཁའི་མཐར་ཐུག་མཐའ་ཡས་སེམས་ཅན་ཐམས་ཅད་ཀྱི།།

སྒོ་གསུམ་སྒྲིབ་དག་འཁྲུལ་སྣང་རབ་ཏུ་ཞི་མཛད་ཅིང་།།

མ་འབད་བཞིན་དུ་གདོད་མའི་ས་ལ་ཕྱིན་པར་ཤོག །

སརྦ་མངྒ་ལཾ། དགེའོ།།

1. དཔལ་བརྩེགས་པར་མ། ཐཱའི་ཝན་བསྐྱར་དཔར་མ། དེབ་ཕྲེང་ ༢༣ ཤོག་ངོས་ ༥༥ པར་གསལ།
2. དཔལ་བརྩེགས་པར་མ། ཐཱའི་ཝན་བསྐྱར་དཔར་མ། དེབ་ཕྲེང་ ༡༧ སྟོད་ཆ། ཤོག་ངོས་ ༥༢༠ པར་གསལ།
3. སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༡ ལོའི་པར་མ། སྟོད་ཆ། དེབ་གཟུགས། ཤོག་ངོས་ ༡༤ པར་གསལ།
4. དཔལ་བརྩེགས་པར་མ། ཐཱའི་ཝན་བསྐྱར་དཔར་མ། དེབ་ཕྲེང་ ༡༩ ཤོག་ངོས་ ༨༨ པར་གསལ།
5. སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། དེབ་གཟུགས། ཤོག་ངོས་ ༡༤༦ པར་གསལ།
6. སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༡ ལོའི་པར་མ། སྟོད་ཆ། དེབ་གཟུགས། ཤོག་ངོས་ ༡༥ པར་གསལ།
7. དཔལ་བརྩེགས་པར་མ། ཐཱའི་ཝན་བསྐྱར་དཔར་མ། དེབ་ཕྲེང་ ༡༧ སྟོད་ཆ། ཤོག་ངོས་ ༥༣༠ པར་གསལ།
8. དཔལ་བརྩེགས་པར་མ། ཐཱའི་ཝན་བསྐྱར་དཔར་མ། དེབ་ཕྲེང་ ༡༩ ཤོག་ངོས་ ༨༨ པར་གསལ།
9. དཔལ་བརྩེགས་པར་མ། ཐཱའི་ཝན་བསྐྱར་དཔར་མ། དེབ་ཕྲེང་ ༢༣ ཤོག་ངོས་ ༡༨༢ པར་གསལ།
10. Shechen Tantra Series 9 ལེའུ་གསུམ་པའི་ཤོག་ངོས་ ༥ པར་གསལ།
11. དཔལ་བརྩེགས་པར་མ། ཐཱའི་ཝན་བསྐྱར་དཔར་མ། དེབ་ཕྲེང་ ༢༣ ཤོག་ངོས་ ༡༨༣ པར་གསལ།
12. Shechen Tantra Series 9  ལེའུ་གསུམ་པའི་ཤོག་ངོས་ ༥ པར་གསལ།
13. སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༡ ལོའི་པར་མ། དེབ་གཟུགས། སྨད་ཆ། ཤོག་ངོས་ ༩༡ པར་གསལ།
14. དཔལ་བརྩེགས་པར་མ། ཐཱའི་ཝན་བསྐྱར་དཔར་མ། དེབ་ཕྲེང་ ༡༩ ཤོག་ངོས་ ༨༩ པར་གསལ།
15. དཔལ་བརྩེགས་པར་མ། ཐཱའི་ཝན་བསྐྱར་དཔར་མ། དེབ་ཕྲེང་ ༢༣ ཤོག་ངོས་ ༡༣༦ པར་གསལ།
16. སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༡ ལོའི་པར་མ། དེབ་གཟུགས། སྟོད་ཆ། ཤོག་ངོས་ ༤༧༣ པར་གསལ།
17. སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། དེབ་གཟུགས། སྟོད་ཆ། ཤོག་ངོས་ ༡༣ པར་གསལ།
18. དཔལ་ཡ་ཆེན་ཨོ་རྒྱན་བསམ་གཏན་གླིང་གི་པར་མ། དེབ་གཟུགས། སྟོད་ཆ། ཤོག་ངོས་ ༡༤༥ པར་གསལ།
19. སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། དེབ་གཟུགས། ཤོག་ངོས་ ༤༡ པར་གསལ།
20. དཔལ་བརྩེགས་པར་མ། ཐཱའི་ཝན་བསྐྱར་དཔར་མ། དེབ་ཕྲེང་ ༢༣ ཤོག་ངོས་ ༡༨༣ པར་གསལ།
21. སི་ཁྲོན་མི་རིགས་དཔེ་སྐྲུན་ཁང་གི་པར་མ། ཀུན་མཁྱེན་རོང་ཟོམ་ཆོས་བཟང་གི་གསུང་འབུམ། པོད་དང་པོ། ཤོག་ངོས་ ༡༣༣ པར་གསལ།
22. དཔལ་ཡ་ཆེན་ཨོ་རྒྱན་བསམ་གཏན་གླིང་གི་པར་མ། དེབ་གཟུགས། སྨད་ཆ། ཤོག་ངོས་ ༢༡༡  པར་གསལ།
23. དཔལ་བརྩེགས་པར་མ། ཐཱའི་ཝན་བསྐྱར་དཔར་མ། དེབ་ཕྲེང་ ༢༣ ཤོག་ངོས་ ༣༤༣ པར་གསལ།
24. སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། དེབ་གཟུགས། ཤོག་ངོས་ ༦༣ པར་གསལ།
25. སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། དེབ་གཟུགས། ཤོག་ངོས་ ༡༨༦ པར་གསལ།
26.   སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༦ ལོའི་པར་མ། དེབ་གཟུགས། ཤོག་ངོས་ ༡༢༩ པར་གསལ།