མཁན་པོ་ཚེ་དགའ་དབང་རྒྱལ། རྣམ་གྲོལ་གླིང་།
རིན་ཆེན་རྣམ་ལྔ་དབུ་ལ་བརྒྱན།།
དར་དང་གོས་ཆེན་སྐུ་ལ་གསོལ།།
ཕྱག་ན་ལྷ་ཡི་པི་ཝང་བསྣམས།།
ཆུ་སྐྱེས་པདྨའི་གདན་ལ་བཞུགས།།
གནག་སྣུམ་སྐྲ་ལོ་ལན་བུ་ཅན།།
མཁུར་ཚོས་དམར་ལ་བཀྲག་མདངས་རྒྱས།།
ཚེམས་ཕྲེང་དཀར་པོ་དུང་ལྟར་འཚེར།།
སྒེག་མོའི་ལང་ཚོའི་ཆ་ཀུན་རྫོགས།།
ཞལ་རས་ཟླ་བའི་དཀྱིལ་འཁོར་ལ།།
འཛུམ་མདངས་གེ་སར་སྦྲང་རྩི་རྒྱས།།
རི་དྭགས་མིག་ཅན་བའི་རྫི་མ།།
མཚར་སྡུག་ལང་ཚོའི་དཔལ་འབར་མ།།
བཅུ་དྲུག་ལང་ཚོ་སྨིན་ལེགས་མ།།
མིག་འཕྲུལ་ལྟ་བུའི་གཡོ་ལྡན་མ།།
འདོད་ལྡན་ཀུན་ཀྱི་ཡིད་འཕྲོག་མ།།
འགྲོ་ཀུན་དགའ་བའི་གཟུགས་ཅན་མ།།
སྙན་ངག་ཀུན་ཀྱི་མཛོད་འཆང་མ།།
གསུང་སྙན་འགྱུར་ཁུགས་སྟོང་ལྡན་མ།།
སྙན་ཚིག་འབུམ་གྱི་གཏེར་མཛོད་མ།།
སྒྲ་ཡི་ལྷ་མོ་མཆོག་བརྙེས་མ།།
རྣ་བར་འཇེབས་པའི་དབྱངས་ཅན་མ།།
མིག་དབང་འཕྲོག་པའི་མེ་ཏོག་མ།།
ཡིད་དགའ་སྟེར་བའི་རིག་ལྡན་མ།།
ཀུན་ལ་སྙན་པའི་ཚངས་དབྱངས་མ།།
རྒྱན་དང་ཆ་ལུགས་སྣ་ཚོགས་སྤྲས།།
སྙན་པའི་སྒྲ་དབྱངས་ལྷང་ལྷང་སྒྲོག།།
སྒྲ་ལ་ཆགས་པའི་སྐྱེ་འགྲོ་ལ།།
དགོས་འདོད་སྩོལ་བའི་ནོར་བུ་ལགས།།
ངག་གི་དངོས་གྲུབ་མཆོག་བརྙེས་མ།།
སྙན་ཚིག་འབུམ་གྱི་འབྱུང་ཁུངས་མ།།
དབྱངས་ལ་མོས་པའི་ལས་ཅན་ལ།།
དགོངས་བརྒྱུད་རྟོགས་པ་འཕོ་བར་མཛད།།
ལང་ཚོའི་མེ་ཏོག་ཕྱི་ནས་མཛེས།།
སྙིང་རྗེའི་སྒྲོན་མེ་ནང་ནས་འབར།།
མགྲིན་པའི་སྦུགས་ན་གླུ་དབྱངས་ཅན།།
ངག་གི་སྒྱུ་རྩལ་ཀུན་གསལ་མ།།
དུང་སེམས་ལྷ་མོ་མཆོད་པའི་ཡུལ།།
སྨྲ་བའི་མགྲིན་བཟང་བདག་ལ་སྩོལ།།
མི་ཟད་ངག་གི་གཏེར་སྒོ་ནས།།
འདོད་འཇོའི་སྙན་ཚིག་ཤར་ཤར་ཕོབ།།
ལོངས་སྤྱོད་རྫོགས་པའི་འཁོར་ལོ་ན།།
ཚངས་པའི་སྲས་མོ་རྟག་ཏུ་བཞུགས།།
མགྲིན་པའི་རྩ་མདུད་རབ་གྲོལ་ནས།།
གསུང་དབྱངས་དྲུག་ཅུའི་དངོས་གྲུབ་སྩོལ།།
འགྱུར་མེད་དད་སེམས་ཀུ་མུད་ལ།།
མཚོ་བྱུང་དགྱེས་པའི་འོད་ཟེར་ཕོག།།
མ་རིག་ལོ་འདབ་རབ་བསལ་ནས།།
མཁྱེན་གཉིས་སྦྲང་རྩི་ཅི་གར་འཇོ།།
དགེ་ལེགས་དབྱངས་ཀྱི་སྟོང་གཟུགས་མ།།
རང་སྣང་དག་པའི་དབྱིངས་ནས་བཞེངས།།
སྒྲ་ལ་དུང་བའི་འགྲོ་བ་ལ།།
སྙན་འགྱུར་ངག་གི་དངོས་གྲུབ་སྩོལ།།
