འཇམ་མགོན་མི་ཕམ་རྣམ་རྒྱལ་རྒྱ་མཚོ།
བླ་མ་འཇམ་པའི་དབྱངས་ལ་ཕྱག་འཚལ་ནས།།
གཞན་ཕན་སེམས་ཀྱིས་གྲོས་འདེབས་གཏམ་ཞིག་གླེང་།།
རང་བློ་ནང་བཀུག་རང་དོན་ཤེས་པ་ཡི།།
སྐྱེ་བོ་འགའ་ཞིག་སྲིད་ན་འདི་དོན་སོམས།།
སེམས་ཅན་ཐམས་ཅད་རང་བདེ་འདོད་པ་ལས།།
ལམ་ལོག་ལམ་གོལ་གྱུར་པས་བདེ་འབྲས་བྲལ།།
བོད་ཕྲུག་སྤྲེལ་ཚ་ཅོལ་ཆུང་གསར་ངས་ཆེ།།
འདོད་ཐག་ཉེ་ཞིང་བློ་རྒྱ་ཆུང་བའི་ཕྱིར།།
ལམ་མཆོག་མདོ་སྔགས་ཉམས་ལེན་འདོད་རྣམས་ཀྱང་།།
ཚེ་འདི་ཆེད་བཟུང་དྲེགས་པ་གཙོ་བོར་བསྟེན།།
རྒྱལ་དབང་པདྨའི་གསུང་གི་སྐབས་འགའ་རུ།།
ཡེ་ཤེས་ལྷ་ནི་བྱིན་རླབས་རྒྱ་ཆེ་ཡང་།།
ལས་དང་སྐལ་ལྡན་མིན་ལ་སྒྲུབ་ཐག་རིང་།།
འཇིག་རྟེན་ལྷ་འདྲེ་སྒྲུབ་ཐག་ཉེ་བའི་ཕྱིར།།
ལས་བཅོལ་དགོས་པ་ཕྲལ་གྱི་ལས་འགའ་ལ།།
དགོངས་ཏེ་གསུང་པ་དེ་ལྟར་ཡིན་མོད་ཀྱི།།
རྣམ་པ་ཀུན་ཏུ་འདི་ཕྱིར་མི་བསླུ་པའི།།
ཡེ་ཤེས་ལྷ་ཡི་བསྙེན་སྒྲུབ་གལ་ཆུང་དུ།།
བཏང་ནས་དྲེགས་པ་མཆོད་བསྟོད་སྒྲུབ་པ་རྣམས།།
ཤིན་ཏུ་ནོར་བའི་གཡང་སར་རྡོག་འཆལ་ནས།།
འདི་མེད་ཕྱི་མེད་ལག་སྟོང་འཁྱམས་མཐོང་སྟེ།།
བློ་ལ་འཕྲིག་གཟུང་ཚིག་གསུམ་སྙིང་ལ་བཞག།།
འདི་དོན་ལེགས་པར་དཔྱད་ནས་བདེན་ནམ་རྫུན།།
རང་གི་བློ་ཡི་སྟེང་དུ་ཡིད་ཆེས་བྱོས།།
ཚེ་འདིར་འབྱོར་དང་གྲགས་དང་དགྲ་ཐུལ་པའི།།
རེ་འདོད་ཞེ་ལ་བརྣག་ནས་དྲེགས་པ་གང་།།
ཉིན་འདོན་མཚན་འདོན་རྔ་བརྡུང་འུར་ཆོམ་གྱི།།
བརྩོན་པ་ཚེ་གཅིག་བསྟེན་ནུས་རྣམས་ལ་ལྟོས།།
དེ་དག་ཇི་ལྟ་ཇི་ལྟར་བརྩོན་ན་ཡང་།།
འབྱོར་པ་དག་ཀྱང་ཕལ་ལས་དབུལ་མཐོང་ལ།།
གྲགས་ལྡན་དགྲ་མེད་གྱུར་ནའང་ཇི་ལྟར་མཐོང་།།
དེ་ལྟར་མ་འབད་སྡོད་རྣམས་དེ་ལས་བཟང་།།
འདི་འདྲ་བཏོན་བཏོན་སྒྲུབ་སྒྲུབ་འབྲས་བུ་ལ།།
ཇི་ལྟར་ལེགས་པའི་རྩེ་མོར་ཕྱིན་ན་ཡང་།།
རྟ་རྐུན་ནོར་རྐུན་རེ་ཟུང་སོོད་པ་དང་།།
མནོག་ཆུང་གྲོང་གི་གཏོ་དཔོན་ཙམ་ཞིག་འགྲུབ།།
དེ་ལས་རྒྱ་ཆེ་རབ་ཀྱི་དངོས་གྲུབ་ཞིག།
དེ་སྔ་ཐོབ་པ་ཡོད་དམ་ད་ལྟ་དང་།།
ད་གཟོད་དུ་ཡང་འབྱུང་སྙམ་ཁོ་ཐག་ཆོད།།
དེ་འདྲའི་ཚེགས་ཆེ་དོན་ཆུང་བརྩོན་པ་ལ།།
དེ་ཙམ་འབད་པ་དེ་བས་ཞག་ཤས་ཞིག།
བློ་སྦྱོང་སེམས་དང་འབྲེལ་བའི་དགེ་སྦྱོར་ཞིག།
བྱས་ན་འདི་ཕྱིར་དོན་འབྲས་མི་ཆེའམ།།
དོན་ཆེན་བཞག་ནས་དོན་ཆུང་འབད་དེས་ཅི།།
བྱ་བ་ཅི་བྱས་བསམ་པར་རག་ལས་ཤིང་།།
དགེ་རྩ་ཆེ་ཆུང་མི་ལྟོས་བསྔོ་བ་ཡིས།།
ཐེག་གསུམ་འབྲས་བུར་སྨིན་ཚུལ་ཐ་དད་གསུངས།།
དེ་བས་ནང་གི་འདུན་པ་ལེགས་བརྟགས་ན།།
དྲེགས་པ་མཆོད་དགའ་ཚེ་འདིའི་བསམ་པས་བྱས།།
ཚེ་འདིར་དངོས་གྲུབ་གཞན་ལས་ཁྱད་འཕགས་ཞིག།
མཐོང་རྒྱུ་མེད་བཞིན་ཡོད་དོ་སྙམས་རློམ་ནས།།
ཡང་ཡང་དེ་སྒྲུབ་ཡང་ཡང་རང་མགོ་འཁོར།།
ལས་ཀྱིས་རྙེད་པའི་བདེ་འབྱོར་ཅུང་ཟད་ཞིག།
བྱུང་ན་ལྷ་མཆོད་པ་ལས་བྱུང་ངོ་ཟེར།།
མི་འདོད་གང་བྱུང་ལྷ་མ་དགའ་བར་བརྟག།
དོན་དུ་བདེ་སྐྱིད་འབྱོར་པའི་སྐབས་ཀྱང་ཉུང་།།
དྲེགས་པ་མི་མཆོད་ལྷ་འདྲེ་མ་བརྔན་ཀྱང་།།
ཆོས་དང་སྲིད་ཀྱི་མངོན་པར་མཐོ་བ་དང་།།
ནད་མེད་ཚེ་ཪིང་བདེ་བར་ལྡན་རྣམས་ལྟོས།།
ཁྱེད་ལ་དེ་ལས་ལྷག་པོར་བྱུང་ངམ་སེམས།།
དགྲ་ལ་བསམ་ནས་རྟག་ཏུ་དྲག་པོའི་སྔགས།།
བཟླ་བ་རྣམས་ལ་དགྲ་སྲིད་རྒྱུན་དུ་ལྡང་།།
གཅོད་ལོག་འདྲེར་འཛིན་ཅན་ལ་རང་སྣང་གི།
རྟག་ཏུ་འདྲེ་ཡིས་འཚེ་བ་རྒྱུན་མི་འཆད།།
དེ་ཕྱིར་ཚེ་འདི་གཙོར་བཟུང་ལས་སྒྲུབ་ཀྱང་།།
ཚེ་འདིར་བདེ་བ་གཞན་ལས་ཉུང་མཐོང་ནས།།
རང་མགོ་རང་བསྐོར་དོན་མེད་བརྩོན་པ་ལ།།
རང་རློམས་མ་བྱེད་སེམས་འཕྲིག་གཞུག་ཅིག་ཨང་།།
རྡོ་རྗེ་འཆང་དང་པད་འབྱུང་ལ་སོགས་པས།།
བཀའ་བགོས་ཆོས་སྐྱོང་དྲེགས་པ་ཆེན་པོ་རྣམས།།
བསྟན་དང་བསྟན་འཛིན་སྲུང་མ་ཡིན་མོད་ཀྱི།།
དེ་དག་ཡི་དམ་བརྟེན་པའི་ཁོར་ཡུག་ཏུ།།
དུས་ཀྱི་མཆོད་པ་ཙམ་ཞིག་བཞག་ནས་སུ།།
དམ་ཚིག་སྲུང་ན་དེ་དག་ཤུགས་ཀྱིས་འདུ།།
དགོས་པ་བྱུང་ན་ཕྲིན་ལས་བཅོལ་བས་ཆོག།
ཡི་དམ་ལས་ལྷག་དྲེགས་པ་སྒྲུབ་མི་བྱ།།
བཀའ་གདམས་ཞུས་ལན་ནོར་བུའི་ཕྲེང་བ་ལས།།
མཐུ་ཆེན་འདོད་པས་བེ་ཧར་སོགས་སྒྲུབ་ཀྱང་།།
མཆོད་མཆོད་ནོངས་པ་གཅིག་གིས་འཇོམས་བྱས་ཏེ།།
དབུགས་ལེན་བྱས་ནས་ངན་སོང་འགྲིམ་མཐོང་གསུངས།།
ཤེས་བྱའི་ཁོངས་ནས་རྒྱལ་བ་ལས་ལྷག་པའི།།
མཁྱེན་བརྩེ་ནུས་པ་ཆེ་ཞིང་མྱུར་བ་མེད།།
འདི་ལ་ལན་གཅིག་ཡིད་ཀྱིས་གསོལ་བཏབ་ཀྱང་།།
འདི་ཕྱི་ཀུན་ཏུ་མི་བསླུ་ངེས་པ་ཉིད།།
དེ་བས་ལྷག་པར་དྲེགས་པ་སྒྲུབ་དགའ་ན།།
སྔགས་པ་འདྲེས་ཁྱེར་དངོས་གྲུབ་པྲ་ཡས་ནས།།
སྟུ་དགའ་མཐུ་དགའི་ངང་ཚུལ་ཙམ་ཞིག་གིས།།
འདི་མེད་ཕྱི་མེད་སྐྱ་མིན་སེར་མིན་འགྱུར།།
རང་རྒྱུད་ཆོས་ལྡན་བསྐྱེད་རྫོགས་གདེང་ལྡན་ན།།
ཆོས་སྐྱོང་དྲེགས་པ་མ་སྒྲུབ་རང་བཞིན་འཁོར།།
དད་དང་དམ་ཚིག་ལམ་གྱི་གདེང་མེད་ན།།
དྲེགས་པ་བསྒྲུབ་ཀྱང་ནམ་མཁར་ལག་ཡུག་འདྲ།།
མཆོད་ཅིང་བསྟོད་ན་ཅུང་ཟད་འཁོར་མོད་ཀྱི།།
བསོོད་ནམས་དམན་ལ་འཇིག་རྟེན་དྲེགས་པ་དེས།།
དངོས་གྲུབ་རྒྱ་ཆེ་སྦྱིན་པར་མི་ནུས་པའི།།
སྔར་གྱི་ལོ་རྒྱུས་ཚད་མ་མང་དུ་སྣང་།།
གལ་ཏེ་ནུས་སོ་སྙམས་ན་དྲེགས་པ་ལ།།
མཆོད་བསྒྲུབ་འབད་འབད་བརྩོན་བརྩོན་ཁྱེད་རང་གི།
སྐུ་མདོག་ཕྱག་མཚན་ཉམས་འགྱུར་ངོམས་དང་ཤེས།།
གཞན་ལས་ཁྱད་འཕགས་བྱུང་ན་ཁྱེད་བདེན་ནོ།།
རྒྱལ་བཙན་ལ་སོགས་དྲེགས་པ་མཆོད་རྣམས་ལ།།
དང་པོར་དེ་ཡི་རིགས་གཏོགས་འདྲེ་རྣམས་འདུ།།
འཁུ་ལྡོག་མང་ཞིང་ཕྱི་ནང་རྩུབ་ཉམས་ཆེ།།
དེ་དང་དེ་འདྲའི་ངང་དུ་མི་ཚེ་འཛད།།
དད་དང་དམ་ཚིག་བསྐྱེད་རྫོགས་གདེང་མེད་ན།།
དྲེགས་པའི་གཙོ་བོ་ཆོས་སྐྱོང་ཆེན་པོ་རྣམས།།
ཚུལ་བཞིན་ཉེ་ཞིང་དངོས་གྲུབ་སྟེར་བ་ཉུང་།།
དེ་དག་བདེན་མིན་སྒྲུབ་པ་པོ་ལ་ལྟོས།།
སྒྲིབ་སྦྱང་རྣམ་དཀར་དགེ་ཚོགས་ལ་འབད་ཅིང་།།
བསམ་བཟང་ཚུལ་ལྡན་དགེ་སྦྱོང་རྣམས་ལ་ལྟོས།།
འདི་བདེ་ཕྱི་བདེ་འཚུབ་ཉུང་བདེ་འབྱོར་ཆེ།།
དེ་བས་ཁྱེད་རང་ལྷག་ན་ཁྱེད་ལེགས་སོ།།
ཚེ་གང་རྒྱུན་མཆོད་དངོས་གྲུབ་འདི་ཞེས་མེད།།
ཞག་གཅིག་མཆོད་བསྐང་ཆག་ན་ཆད་པ་གཅོད།།
དེ་འདྲའི་རང་སེམས་འཚུབ་ཀྱིིི་ཡོ་ལང་ལ།།
རྒྱུན་མར་འཁྱམས་པས་ཅི་བྱ་དེ་བས་ནི།།
བདེ་བའི་སྟན་ལ་རང་སེམས་ཟོ་ལྷོད་དེ།།
བསམ་པ་དང་བས་མ་ཎི་འབྲུ་དྲུག་སྔགས།།
བརྒྱ་ཕྲག་ཙམ་ཞིག་བགྲང་བ་བཟང་མཐོང་སྟེ།།
འདོན་རྒྱུ་བཟང་ལ་བསམ་པ་བཟང་ཕྱིར་རོ།།
ཚེ་འདི་གཙོར་བྱས་འདི་ལ་སྐྱབས་རྣམས་ཀྱིས།།
དངོས་གྲུབ་མྱུར་པོར་རེ་བའི་དྲེགས་པ་ལ།།
བརྟེན་བརྟེན་བསྒྲུབ་བསྒྲུབ་བྱས་ཀྱང་ཚེ་འདི་ཉིད།།
མ་ལོ་མ་ཉན་ངང་དུ་འདའ་བ་མཐོང་།།
ལྷ་མཆོད་འདྲེ་བཀར་རྣམ་རྟོག་རྦ་རླབས་ཅན།།
ཁབ་ཙམ་རྙེད་ཚེ་སྟ་རེ་ཙམ་ཞིག་འཆང་།།
དུས་ཀུན་མི་བདེ་བྲེལ་དང་རྙེད་ཚོལ་དང་།།
ཟ་ཐབས་གྱོན་ཐབས་ཆགས་བཞིན་གནས་པ་མང་།།
བྱས་བྱས་ཚེ་འདི་གཙོར་བཟུང་ཆེད་ཡིན་པས།།
མཐོང་བའི་ཆོས་ལ་སྒྲུབ་འབྲས་མ་མཐོང་ན།།
འཇིག་རྟེན་ཕ་རོལ་རྣམས་སུ་དེའི་འབྲས་བུ།།
མྱོང་བ་དེ་ནི་དེ་བས་རྫུན་མིན་ནམ།།
རྒྱལ་བའི་བཀའ་ཉན་དྲེགས་པ་ཆེ་རྣམས་ཀྱིས།།
ས་ལམ་བར་ཆད་སེལ་ཞེས་གྲགས་མོད་ཀྱི།།
ཕྱི་མའི་འབྲས་བུ་ཁྱོད་ཀྱིས་དོན་གཉེར་ན།།
རྒྱལ་བ་ལས་ལྷག་དྲེགས་པ་ཅི་སྟེ་ཡིན།།
རྒྱལ་བ་མཆོག་དང་ས་བཅུའི་དབང་ཕྱུག་རྣམས།།
གང་འདུལ་ཆོས་སྐྱོང་རྣམ་པར་བསྟན་པས་ན།།
ཡི་དམ་ལྷ་དང་བཟང་ངན་མ་དམིགས་ཕྱིར།།
དེ་ཉིད་མཆོད་ལ་འགལ་བ་མེད་སྙམས་ན།།
མཆོད་ལ་འགལ་བ་བདག་གིས་མི་བརྗོད་ཀྱང་།།
རྒྱལ་བ་མཆོག་དང་ས་བཅུའི་དབང་ཕྱུག་ལས།།
ལྷག་པར་ཆོས་སྐྱོང་དྲེགས་པ་སྒྲུབ་ཁྱོད་ལ།།
བཟང་ངན་དབྱེ་བའི་བློ་གྲོས་མ་བྱུང་ངམ།།
དད་དང་བསམ་པ་བཟང་པོ་ཡི་དམ་ལྷར།།
ཅི་ཙམ་བསྟེན་ཀྱང་ཉེས་མེད་བདེ་ལེགས་འཕེལ།།
འཇིག་རྟེན་རང་རྒྱུད་དྲེགས་པ་ཕལ་མོ་ཆེ།།
རྒྱུད་རྩུབ་ཕྱིར་ན་བརྟེན་པའི་གནད་དང་ནི།།
གོང་ནོན་གཉེན་པོའི་སྟོབས་ཀྱིས་མ་ཆུན་ན།།
འཁུ་ལྡོག་ཆེ་ཞིང་རྣལ་འབྱོར་སྲོག་ལ་རྒོལ།།
དེ་ཕྱིར་གནད་ཡིག་མི་ཤེས་དྲེགས་པ་ནི།།
བསྟེན་མི་བྱ་ཞེས་གུ་རུ་པདྨས་གདམས།།
དེང་སང་རིག་འཛིན་བརྒྱུད་པའི་ཐ་ཚིག་ལ།།
གནས་པའི་ཆོས་སྐྱོང་རྒྱལ་པོ་རྣམས་ལས་ཀྱང་།།
གློ་བུར་འདྲེ་རྒོད་སྒྲུབ་ལ་ཆེས་དགའ་བས།།
ཀྱེ་མ་སྙིགས་མའི་དུས་ཀྱི་བློ་གྲོས་ལྟོས།།
རྒྱལ་བ་ལས་ཀྱང་ཆོས་སྐྱོང་དྲེགས་པ་དང་།།
དེ་ལས་ཀྱང་ནི་འཇིག་རྟེན་རང་རྒྱུད་པ།།
དེ་བས་གློ་བུར་གདུག་རྩུབ་ཆེ་བའི་འདྲེ།།
ལྷ་ཡི་གཙོ་བོར་འཛིན་པ་ཀྱེ་མ་འཁྲུལ།།
གཏན་བདེ་ཐར་བ་མཆོག་ལས་ཚེ་འདི་དང་།།
ཡེ་ཤེས་ལྷ་མཆོག་ལས་ཀྱང་འཇིག་རྟེན་པ།།
སྒྲུབ་པའི་ཚུལ་ལ་དགའ་བའི་འདི་དག་གིས།།
སྒྲུབ་པོ་དེ་ཡི་རྣམ་ཐར་སྲང་ལ་བཏེགས།།
ཆོས་སྐྱོང་ཕལ་ཆེར་ཡེ་ཤེས་ལྷ་ཉིད་ཀྱང་།།
རང་གི་བསམ་པས་གདུག་རྩུབ་རང་རྒྱུད་པར།།
བཟུང་ནས་ཚེ་འདིའི་ཆེ་ཐབས་སྒྲུབ་པའི་བློས།།
མཆོད་ཅིང་བསྒྲུབ་པ་ཕལ་ཆེར་ལོག་ལམ་སོང་།།
རྒྱལ་ཀུན་ཡེ་ཤེས་འཇམ་དཔལ་ཁྲོས་པའི་སྐུ།།
གཤིན་རྗེ་གཤེད་ལས་ལྷག་པའི་ལྷ་གཞན་མེད།།
འོན་ཀྱང་བསམ་པ་ལོག་པས་སྒྲུབ་པ་ཡིས།།
ཙན་ཀྵ་ཉིད་ཉམས་པའི་ལོ་རྒྱུས་བཞིན།།
དྲེགས་པ་རང་རྒྱུད་བསྒྲུབ་པའི་བསམ་སྦྱོར་ཅན།།
འཇིག་རྟེན་དྲེགས་པ་ཕལ་གྱིེས་རྒྱུད་བརླམ་ནས།།
རང་རྒྱུད་བསམ་སྦྱོར་ཇེ་བས་ཇེ་རྩུབ་ལ།།
རང་ཕུང་གཞན་བརླག་འདི་ཕྱིར་སྡུག་བསྔལ་མཐོང་།།
མུ་འགོད་་་་་
ཁུངས་གཏུག་སའི་ཡིག་ཆ།
ཡེ་ཤེས་སྡེའི་པར་མ། འཇམ་མགོན་བླ་མ་མི་ཕམ་རིན་པོ་ཆེའི་བཀའ་འབུམ། ལུགས་ཀྱི་བསྟན་བཅོས་དང་གཏམ་ཚོགས་རྣམ་ཐར་གཞུགས་བྱང་དཀར་ཆག་དང་བཅས་ཀྱི་སྐོར་ལས་བཏུས།
