འཇམ་མགོན་མི་ཕམ་རྣམ་རྒྱལ་རྒྱ་མཚོ།
སྔོན་ཚེ་བོན་གྱིས་དམར་མཆོད་བྱས་དུས་དང་།།
ད་ལྟ་ནག་ཕྱོགས་གཞི་བདག་ཤ་ཁྲག་གིས།།
བརྔན་པ་རྣམས་ཀྱིས་སྟོང་གྲོགས་བྱེད་ཚུལ་གྱིས།།
ཆོ་འཕྲུལ་ཕྲ་མོ་མཐོང་ནས་དགའ་བ་ལྟར།།
འཇིག་རྟེན་ལྷ་འདྲེ་མཆོད་པའི་ལག་རྗེས་ལ།།
ལུང་བསྟན་མཐུ་རྟགས་ཅུང་ཟད་བྱུང་བ་ཡིས།།
ལྷ་སྲུང་འཁོར་ཞེས་བླུན་རྣམས་ཡ་མཚན་ནས།།
ཡང་ཡང་མཆོད་བྱས་ཐ་མར་དམྱལ་བར་འཁྲིད།།
རྟགས་དང་ཆོ་འཕྲུལ་མི་ཡི་ཚེ་རྐུ་བ།།
མཁའ་ལ་རྒྱུ་བའི་ཡི་དྭགས་རྣམས་ཀྱང་ནུས།།
དེ་ཙམ་ཞིག་ལ་ལྷ་མཆོད་དངོས་གྲུབ་ཅེས།།
བློ་དང་ལྡན་པ་སུ་ཞིག་ཡ་མཚན་བྱེད།།
འཇིག་རྟེན་མཁའ་འགྲོ་ཤ་ཟ་ཡི་དྭགས་ཀྱིས།།
ཅོལ་ཆུང་སྒྲུུབ་པ་པོ་རྣམས་མངོན་ཤེས་དང་།།
གྲུབ་རྟགས་ཕྲ་མོས་བསླུས་ནས་ཉམས་འགྱུར་ཞེས།།
སྔ་འགྱུར་མན་ངག་ལས་ཀྱང་ཡང་ཡང་གསུངས།།
ལྷ་དང་དམ་ཅན་བསྒྲུབ་པའི་ལག་རྗེས་ལ།།
འདི་དང་ཕ་རོལ་ཆོས་དང་མི་འགལ་ཞིང་།།
ཕན་དང་བདེ་བའི་འབྲས་བུ་རྒྱ་ཆེ་བ།།
རང་གིར་གྱུར་ན་ཡང་དག་སྒྲུབ་པོ་ཡིན།།
བྱས་སོ་སྒྲུབ་པོ་བདག་གི་བྱ་བ་འདི།།
ཡིན་ནོ་ལེགས་སོ་སྙམ་དུ་མངོན་བརློམས་ཀྱིས།།
འདི་ཕྱིའི་ཕུང་ཀྲོལ་རྒྱུ་དང་ལེགས་པའི་གཞི།།
མི་དཔྱད་གྱི་ནར་འཁྱམས་རྣམས་ཤིན་ཏུ་བླུན།།
རྒྱལ་དབང་པདྨས་ཟབ་མོའི་གཏེར་རྣམས་སུ།།
དྲག་པོའི་སྔགས་དང་དྲེགས་པ་བསྒྲུབ་པའི་ཐབས།།
ཡང་ཡང་བསྟན་བྱས་འདི་དག་སྒྲུབ་ཅེས་པར།།
རྗེས་སུ་གདམས་ཕྱིར་བསྒྲུབ་པར་འདོད་ཅེ་ན།།
རིག་འཛིན་མཆོག་དེས་ཟབ་མོའི་གཏེར་རྣམས་སུ།།
དྲག་སྔགས་དྲེགས་པའི་བསྒྲུབ་ཐབས་གསུང་མོད་ཀྱི།།
འདི་དག་བསྟན་པ་བསྲུང་བའི་ཡན་ལག་ཏུ།།
ཐབས་མཁས་སྙིང་རྗེར་ལྡན་པས་སྤྱོད་ཅེས་གསུངས།།
གཙོ་བོར་ཐེག་པ་ཆེན་པོའི་གཞུང་ལུགས་ཀྱི།།
བྱང་ཆུབ་སེམས་གཉིས་བསྐྱེད་དང་རྫོགས་པ་དང་།།
ཁྱད་པར་འོད་གསལ་རྡོ་རྗེ་རྩེ་མོའི་ལམ།།
ཉམས་ལེན་གནད་ཀྱི་ཆོས་གཏེར་བགྲང་ཡས་གསུངས།།
མཐོང་ཐོས་དྲན་རེག་དོན་དང་ལྡན་པ་ཡི།།
ཟབ་མོའི་ཆོས་མཛོད་དེ་རྣམས་བཞག་ནས་སུ།།
དྲག་སྔགས་དྲེགས་པ་ལོག་པར་བསྒྲུབ་པ་ཡི།།
དོ་གལ་འདི་ཀོ་ཁྱོད་ལ་སུ་ཡིས་བཀལ།།
གདུག་ཅན་འགྲོ་ལ་ཤིན་ཏུ་སྙིང་རྗེ་ཞིང་།།
རྒྱལ་བསྟན་རིན་ཆེན་སྲོག་ལས་ཕངས་པ་དང་།།
རང་འདོད་ཞེན་འཁྲིས་མེད་གང་ཤུགས་སྒྲོལ་གྱི།།
དགོངས་སྤྱོད་ཚད་དུ་ཕྱིན་པ་ཉིན་སྐར་ཙམ།།
རང་ཉིད་གཅེས་འཛིན་གཞན་ལ་གནོད་པའི་བློས།།
སྒྲོལ་པའི་དགོངས་སྤྱོད་མེད་པར་དམོད་ངན་གྱིས།།
དྲག་སྔགས་དུག་མདའ་གང་བྱུང་འཕེན་པ་དེ།།
སྒྲོལ་བ་ལོག་པའི་བརྟུལ་ཞུགས་ཉིད་དུ་གསུངས།།
གསང་བ་སྔགས་ཀྱི་སྦྱོར་སྒྲོལ་ཟབ་མོ་ལ།།
དགོངས་སྤྱོད་ཟབ་མོའི་གནད་དང་མི་ལྡན་པར།།
རང་གར་ཞུགས་ན་ལོག་ལམ་འགྱུར་རོ་ཞེས།།
རྒྱལ་དབང་རིག་འཛིན་བརྒྱུད་པའི་ལུང་ལས་གདམས།།
ཚེ་འདིར་གློག་གི་ཟློས་གར་ལྟ་བུ་ལ།།
བདག་བདེ་འདོད་རྣམས་སྔགས་ཀྱི་ལམ་སྒྲུབ་ན།།
འདི་ཕུང་ཕྱི་ཕུང་སྒྲུབ་པར་མི་འཚལ་གྱི།།
འདི་སྐྱིད་ཕྱི་བདེ་བསྒྲུབ་པར་ཅིས་མི་རིགས།།
དེ་བས་དྲེགས་པ་མཆོད་བསྒྲུབ་མི་རུང་ཉེས།།
བཀག་པ་མིན་མོད་ཡི་དམ་བསྙེན་བསྒྲུབ་དང་།།
རྣམ་དཀར་དགེ་བའི་ཕྱོགས་ལ་བརྩོན་པའི་ཞོར།།
ཅུང་ཟད་ཙམ་ལས་ཆེད་གཏད་བརྩོན་མི་བྱ།།
དེ་བཞིན་དྲག་པོའི་སྔགས་དང་དྲག་པོའི་ལས།།
ཟབ་མོ་སྔགས་ཀྱི་དགོངས་སྤྱོད་ལྡན་གྱུར་ན།།
ལས་དང་རིག་སྔགས་ཀུན་ལས་ཟབ་མོད་ཀྱི།།
ཕལ་ཆེར་ཚེ་འདིའི་ཆེད་དུ་རྩོམ་པ་མེད།།
དེ་ལྟར་གྱུར་ན་སྔགས་ལོག་སྤྱོད་པ་ཡིས།།
འདི་དང་ཕྱི་མར་རྩུབ་མོའི་རྣམ་སྨིན་ཆ།།
ཡང་དང་ཡང་མྱོང་དེ་ལ་དགོས་པ་ཅི།།
དེ་བས་འདི་བདེ་ཕྱིས་བདེ་མི་དགའ་འམ།།
དྲེགས་པ་མ་བསྟེན་དྲག་སྔགས་མ་བསྒྲུབ་ཀྱང་།།
ཁ་རོག་འདུག་རྣམས་དགྲ་འདྲེས་མི་འཚེ་མང་།།
དྲེགས་པ་བསྟེན་ཅིང་དྲག་སྔགས་བསྒྲུབ་རྣམས་ཀྱང་།།
དགྲ་དང་བགེགས་ཀྱིས་འཚེ་བ་མེད་པ་མིན།།
སེམས་ཅན་གཞན་གྱི་ཀླད་པའི་ནད་ཙམ་ཞིག།།
བསལ་འདོད་ཕན་སེམས་ཡོན་ཏན་རྒྱ་ཆེ་ཞེས།།
རྒྱལ་བའི་བཀའ་ལས་བྱུང་ཕྱིར་བསམ་བཟང་གི།།
རྣམ་དཀར་ཅུང་ཟད་ཙམ་ཀྱང་འབྲས་བུ་ཆེ།།
རང་སྣང་དགྲ་ལའང་དགྲ་འདྲེའི་དོགས་པ་ཡིས།།
དགྲ་སོད་བགེགས་འདུལ་དམོད་ངན་བསམ་ངན་ལ།།
ཉིན་མཚན་རྒྱུན་མར་གོམས་པའི་ཞེ་སྡང་ཅན།།
འདི་སྐྱིད་ཕྱི་བདེའི་གོ་སྐབས་ཇི་ལྟར་འབྱུང་།།
དེ་བས་རྒྱུ་འབྲས་བསླུ་བ་མེད་པ་འདི།།
རྒྱལ་པོའི་གསུང་གི་ནང་ན་ཉམས་ལེན་ཆོས།།
མེད་མི་རུང་བ་གཅིག་པུར་ཤེས་བྱས་ནས།།
རང་བདེ་འདོད་རྣམས་དགེ་བའི་རྒྱུ་ལ་འབོད།།
རང་ལ་བདེ་འབྲས་སྨིན་པའི་རྒྱུ་ཡོད་ན།།
ལྷ་མཆོད་འདྲེ་བརྡུང་མི་དགོས་རང་བསམ་འགྲུབ།།
རང་ལ་བདེ་བའི་སྐལ་བ་མི་ལྡན་པས།།
ལྷ་མཆོད་འདྲེ་བཀར་བརྒྱ་ཕྲག་བརྩོན་ཀྱང་ཅི།།
དེ་ཕྱིར་དྲེགས་པ་མཐུ་རྩལ་ཅན་རྣམས་ལ།།
ལུང་བཞིན་དམ་ཚིག་ལྡན་པའི་རྣལ་འབྱོར་པས།།
གཞུང་བཞིན་མཆོད་དང་སྒྲུབ་པའང་བཟང་མོད་ཀྱང་།།
དེ་བས་རྩ་གསུམ་ལྷ་ལ་བསྟེན་པ་གལ།།
ཚོགས་གཉིས་ཡོངས་རྫོགས་རྒྱལ་དང་རྒྱལ་བའི་སྲས།།
བདག་ཉིད་ཆེན་པོ་རྣམས་ཀྱི་མཚན་ཙམ་ཞིག།།
དྲན་པ་དེ་ཡང་འདི་ཕྱིེར་དོན་ཆེ་བས།།
སྐྱིད་ཀྱང་སྡུག་ཀྱང་དེ་ལ་ཡིད་རྟོན་ཕེར།།
མཆོད་མཆོད་བརྟེན་བརྟེན་ཚེ་གང་འབད་ན་ཡང་།།
དངོས་གྲུབ་མ་མཐོང་འཁུ་ལྡོག་མཐོང་བ་ཡི།།
འཚུབ་སྣང་རྦ་ལ་འཕྱོ་ཞིང་སྔགས་གཟུགས་པ།།
ཕལ་ཆེར་རང་སྣང་ལྷ་འདྲེས་བརླམ་སྟེ་འཁྱམས།།
གསོན་པའི་དུས་སུ་འབད་པ་རྒྱ་ཆེ་ཡང་།།
དབུལ་ཞིང་བདེ་འབྲས་ཉུང་བཞིན་ཚེ་ཟད་ནས།།
འཕེན་པའི་དབང་གིས་ལྷ་འདྲེའི་གཡོག་ཏུ་སྐྱེས།།
གྲོང་ཁྱེར་ཉུལ་ཞིང་ཟ་འདྲེ་བྱེད་ལ་རྒྱུ།།
དེ་ལྟར་ཡི་དམ་བཟླས་པ་ཐུན་གཅིག་དང་།།
བློ་སྦྱོང་བྱང་སེམས་རྣམ་དཀར་དགེ་ཚོགས་ལ།།
སྔ་དྲོ་གཅིག་གི་ཉམས་ལེན་མི་ནུས་པར།།
རྒྱུན་དུ་རྔ་བརྡུང་ལྷ་འདྲེ་མཆོད་དགའ་ཅན།།
ཁྱོད་ཀྱིས་འདི་ཙམ་བརྩོན་པའི་འབྲས་བུ་དེ།།
ཚེ་འདིའི་ཆེད་དུ་ཡིན་ན་ཚེ་འདི་ལ།།
འདི་བྱུང་འདི་ཐོན་མེད་ན་ཚེ་ཟད་ནས།།
འཆི་ཚེ་ཁྱེད་ལ་ལག་རྗེས་ཅི་འདུག་སོམས།།
གལ་ཏེ་དེ་འདྲའི་གྲོང་སྔགས་ཁ་ཅིག་གིས།།
མཐུ་དང་སྔགས་ཀྱི་སྙན་གྲགས་ཅུང་ཟད་ཞིག།།
ཐོབ་ཀྱང་གྲོགས་ཆུང་གཅིག་ན་ངོ་མཐོ་ཙམ།།
དེ་བས་ལྷག་པའི་ཡ་མཚན་ཅུང་ཟད་མེད།།
དེ་ལྟར་དོན་ཆུང་ཆེད་དུ་འབད་པའི་ཚབ།།
རྣམ་དག་ཆོས་ལམ་འབད་ན་འདི་དང་ཕྱིར།།
དེ་བས་རྒྱ་ཆེའི་བདེ་དང་གྲགས་པ་རྒྱས།།
དེ་ཕྱིར་རང་མདོ་ཆུང་བ་མིན་ནམ་སོམས།།
བདག་ནི་རང་གི་སྔོན་གྱི་བག་ཆགས་དང་།།
སྔ་རབས་རྣམས་ཀྱི་ཨ་ཕའི་ཁ་ལྟ་ཡི།།
དྲེགས་པ་མཆོད་དང་དྲག་སྔགས་སྒྲུབ་པ་ལ།།
ཤིན་ཏུ་མོས་ཤིང་བརྩོན་པ་ཡིན་མོད་ཀྱི།།
བླ་མ་འཇམ་པའི་དབྱངས་ཀྱི་ཐུགས་རྗེ་ལས།།
རེས་གཅིག་བློ་ཡི་བསམ་དཔྱོད་ལེགས་ཤར་ནས།།
དྲག་པོའི་སྔགས་ཀྱི་ལས་རྒྱུན་འཛུད་སྙམས་སོགས།།
དོན་མེད་བསམ་དཔྱོད་འགའ་ཞིག་འདོར་བློ་སྐྱེས།།
སྙིགས་མའི་སྐྱེ་བོ་ཚེ་འདི་ཆེད་འཛིན་རྣམས།།
དྲག་སྔགས་ཤེས་ན་གཞན་གནོད་འབའ་ཞིག་རྩོམས།།
བསྟན་པ་བསྲུང་བའི་ལྕགས་རིར་མི་འགྱུར་གྱི།།
རང་ཕུང་གཞན་ཕུང་ཧ་ལ་ལམ་བསྐྱུར་འདྲ།།
དེ་སྔ་གསང་སྔགས་རྙིང་མའི་ཆོས་སྡེ་ལ།།
དྲག་སྔགས་སྣ་ཚོགས་ཟབ་རྒྱས་བྱུང་མོད་ཀྱི།།
ཕལ་ཆེར་རང་འདོད་ཁོ་ནས་གཞན་གནོད་རྒྱུར།།
སོང་གིས་དགོས་དུས་བསྟན་པ་སྲུང་མ་མཐོང་།།
བློ་སྦྱོང་གཙོར་བྱེད་བཀའ་གདམས་བསྟན་འཛིན་རྣམས།།
དྲག་སྔགས་གནོད་སྦྱོར་མེད་ཀྱང་བསྟན་པ་འཕེལ།།
བོན་དང་རྙིང་མ་དྲག་སྔགས་ལས་སྦྱོར་ལ།།
དགའ་ཡང་བསྟན་པ་དེ་རྒྱས་བྱུང་ངམ་ཅི།།
རྒྱུ་འབྲས་བསླུ་མེད་རྒྱལ་བའི་རང་ལམ་ཡིན།།
བསམ་སྦྱོར་དགེ་བ་རང་ཕན་གཞན་ཕན་ཡིན།།
གཞན་ཕན་ཚུལ་འཇམ་འདི་བཟང་ཕྱི་བཟང་ཡིན།།
དེ་དག་ཨེ་བདེན་སྔར་བྱུང་རྣམས་ལ་ལྟོས།།
དེ་བས་རང་ཕན་བསྟན་ཕན་འདོད་རྣམས་ཀྱིས།།
བསམ་པ་བཟང་པོ་བྱང་ཆུབ་སེམས་བསྐྱེད་ལ།།
སྦྱོར་བ་བཟང་པོ་ཡང་དག་ཆོས་བརྩོན་དང་།།
གནད་མེད་རང་འདོད་དྲག་སྔགས་སྒྲུབ་པ་དང་།།
དྲེགས་པ་མཆོད་ལས་བརྒྱ་སྟོང་འགྱུར་གྱིས་འཕགས།།
རང་སྐྱིད་གཞན་སྐྱིད་ཆོས་སྲིད་རིགས་རྒྱུད་དང་།།
བཀྲ་ཤིས་ལས་མཐའ་བཙན་ཞིང་ཀུན་དང་མཐུན།།
བསམ་སྦྱོར་རྩུབ་མོའི་ཆོས་སྲིད་རིགས་རྒྱུད་འཛད།།
འདི་ནི་ཁ་ཙམ་མིན་པར་སྙིང་ནས་བརྗོད།།
དོན་ལ་བདེན་ནམ་རྫུན་པ་ལེགས་པར་དཔྱོད།།
བསམ་སྦྱོར་འཇམ་རྩུབ་ཅན་གྱི་མི་རྣམས་ལྟོས།།
དཔེ་དང་གཏན་ཚིགས་དུ་མས་འདི་དོན་སོམས།།
ཚིག་ནི་གང་ཤར་སྡེབ་སྦྱོར་སྤང་སྟེ་བྲིས།།
འདི་དོན་འདི་འདྲར་གནས་ཞེས་བློ་ཡིས་དཔྱོད།།
ལག་ལེན་འདི་དང་འདི་ལྟར་བཏབ་མཛོད་དང་།།
ཁྱེད་ཅག་ནམ་ཡང་བདེ་ནས་བདེ་བར་འགྲོ།།
དེ་སྐད་མི་ཕམ་ཞེས་གྲགས་རྟོག་གེ་བ།།
རྟོག་པའི་རྦ་ལ་གཡེངས་བཞིན་སྤང་ཀློག་གི།།
བྱ་བ་མང་བསྟེན་འབྲས་བུ་གཡེལ་བ་དེས།།
གཞན་ཕན་བསམ་པས་གློ་བུར་ཉིད་དུ་བྲིས།།
བསམ་པ་བཟང་པོའི་རྩ་བ་ལས་བྱུང་ཞིང་།།
སྦྱོར་བ་བཟང་པོས་ཡི་གེར་བཀོད་པ་འདིས།།
དུས་མཐའི་ལམ་ལོག་གནས་སུ་གོམ་འཆལ་བ།།
མང་ཞིག་དོན་ལྡན་ཆོས་དང་འཕྲད་པར་ཤོག།།
རབ་ཚེས་ས་ཁྱི་ཟླ་ ༡༡ ཚེས་ ༢༢ ལ་རྫ་རྒྱལ་འཕེན་པོའི་རི་ཞོལ་རྫ་རྒྱལ་དགོན་ཞེས་གྲགས་པར་བྲིས་པ་དགེའོ། །མངྒ་ལཾ།
ཁུངས་གཏུག་སའི་ཡིག་ཆ།
ཡེ་ཤེས་སྡེའི་པར་མ། འཇམ་མགོན་བླ་མ་མི་ཕམ་རིན་པོ་ཆེའི་བཀའ་འབུམ་ལུགས་ཀྱི་བསྟན་བཅོས་དང་གཏམ་ཚོགས་རྣམ་ཐར་གཞུགས་བྱང་དཀར་ཆག་དང་བཅས་ཀྱི་སྐོར་ལས་བཏུས་ཤིང་། མ་དཔེ་སོར་བཞག་ལས་བཅོས་བསྒྱུར་ཅི་ཡང་བྱས་མེད།
