སློབ་དཔོན་བཤད་སྒྲུབ་ཉིན་བྱེད།
ལ་སྟོད་ལྷོ་རུ་མཁས་དབང་གྲངས་ཀ་མེད།།
སྐར་མ་བཞིན་དུ་གྲངས་ཀ་རྒྱག་ཚོད་མེད།།
སངས་རྒྱས་བླ་མའི་བཟོ་ལྟ་ང་དང་མཚུངས།།
འཁྲུངས་ཙམ་ཉིད་ནས་ཞལ་འབག་རང་ཆས་ཤིག།
མཁས་ཚུལ་གླེང་ན་ཧ་ལས་ཧོན་འཐོར་ཏེ།།
གཏེར་སྟོན་ཐོག་མའི་མཚན་ཡང་ཁོང་གིས་བཞེས།།
བློ་གྲོས་བརྟན་པ་མ་མོའི་འོ་མས་གསོས།།
བཙུན་ཆུང་ལུ་གུ་ཟེར་དོན་རྒྱུ་མཚན་བྱུང་།།
གང་འཚམས་ཤིག་ནས་རིག་པའི་མེ་དྲོད་རྒྱས།།
དཔང་ལོ་ཟེར་ཞིང་ལོ་ཙཱའི་བ་དན་འཕྱར།།
གྲུབ་ཆེན་ཨོ་རྒྱན་པ་དེ་དིང་རིར་འཁྲུངས།།
དིང་རིར་མ་ཟད་ང་དང་ཁྱིམ་མཚེས་རེད།།
ཧོར་འཇིགས་འབོད་པས་མདོ་སྨད་ཡུལ་དུ་འཐེན།།
མཁས་པ་རྐུན་མ་རྒྱག་སྟངས་དེ་འདྲ་རེད།།
ཤོང་སྟོན་ལོ་ཙཱའི་གཤིས་ཀ་ང་དང་འདྲ།།
བརྙས་སྨོད་མཐོང་ཆུང་རྩ་ནས་འགྲོ་ས་མེད།།
གྱོང་པོ་ལོས་ཡིན་སྙན་གཞུང་བོད་ལ་བསྒྱུར།།
དེ་ཡི་སྟོབས་ཀྱིས་ང་ཡང་མཁས་དབང་ཆགས།།
མི་ཕམ་དགེ་ལེགས་མཁས་པའི་མཁས་པ་རེད།།
མཁས་པ་ལོས་ཡིན་དཎྜིའི་དགོངས་རྒྱན་བརྩམས།།
བསྟན་བཅོས་དེ་ལ་དམིགས་བསལ་དགའ་བ་ཡོད།།
ཡུལ་ལུང་གཅིག་པའི་ཞེན་ཁོག་ཡིན་པ་འདྲ།།
གངས་རིའི་ལྗོངས་ན་མཁས་པ་ལུག་ཁྱུ་བཞིན།།
ཕྱོགས་ལས་རྣམ་རྒྱལ་མིང་ཅན་བོ་དོང་ཙམ།།
གླེགས་བམ་རི་བོ་བརྩེག་མཁན་བོ་དོང་ཙམ།།
ང་ཚོ་ཕ་ཡུལ་གཅིག་པའི་ཉམས་བཟང་ལགས།།
འཁོར་ལོ་སྡོམ་པའི་མན་ངག་ཅེས་བྱ་སོགས།།
བསྟན་འགྱུར་ནང་གི་པོད་གྲངས་མང་བསྒྱུར་བ།།
ལོ་ཙཱ་ཆེན་པོ་རྨ་བན་ཆོས་འབར་ནི།།
ང་དང་འདྲ་བའི་བྱས་རྗེས་འཇོག་མཁན་ཞིག།
ཇོ་མོ་ཞྭ་ཆུང་སྐྱེས་འབྲས་ལེགས་དྲགས་ཏེ།།
དམ་པ་སངས་རྒྱས་དབང་ཡོན་བླང་རབས་འདུག།
དེ་འདྲ་བདེན་ན་བདག་ནི་ངོ་ཡང་ཚ།།
མཛེས་མ་ཁོང་ལ་མཐོང་ཆུང་བྱས་འདུག་གོ།
རྒྱལ་བ་ཡང་དགོན་རས་པ་ཞི་བ་འོད།།
ངམ་རྫོང་རས་པ་སྤྱན་མངའ་རིན་ཆེན་ལྡན།།
མཛེས་མའི་ཡང་མཛེས་“མ་གཅིག་ཞ་མ་”སོགས།།
ག་རེ་བཤད་ཀྱང་ཕ་ཡུལ་གཅིག་པ་རེད།།
ཁྱེད་ཅག་འཇོན་པ་ང་ཡི་གཟི་བརྗིད་ཡིན།།
