ཞབས་དཀར་ཚོགས་དྲུག་རང་གྲོལ།
ཉིན་གཅིག་སློབ་མ་རྣམས་ལ་རང་སྐྱོན་དུག་གི་ཚེར་མ་རང་གིས་འདོན་པའི་མན་ངག་རྒྱ་ཁབ་རྣོན་པོ་འདི་བྱིན་ནོ། །ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་དང་། ཁྱད་པར་རང་གི་རྩ་བའི་བླ་མ་རྣམས་ཀྱིས་མི་མངོན་དབྱིངས་ནས་ཐུགས་ཁྲེལ་རུང་། རེ་ཞིག་བདག་གི་བྱ་སྤྱོད་ངན་པ་འདི་ལ་ཡེ་ཤེས་སྤྱན་གྱིས་གཟིགས་ནས་ཕྱིན་ཆད་ཆོས་བཞིན་ནུས་པར་བྱིན་གྱིས་བརླབ་ཏུ་གསོལ།
འོ་མཁས་བཙུན་བཟང་གསུམ་གྱི་ཡོན་ཏན་གང་ཡང་མེད་པའི་བླ་བཙོངས་ཕྱི་ལྡིར་ལ་ནང་སྟོང་པ་སྔགས་པའི་རྔ་ཁོག་དང་འདྲ་བ་ཁྱོད་བློ་ཁ་ནང་དུ་ཁུག་ལ་བསམ་བློ་ཡག་པོ་ཞིག་ཐོངས་དང་། ཁྱོད་ཆོས་པ་ཡིན་ཁུལ་བྱེད་ཀྱིན་འདུག་པ། ཁྱོད་ལ་དལ་འབྱོར་གྱི་མི་ལུས་རིན་པོ་ཆེ་ཐོབ། བླ་མ་དུས་གསུམ་གྱི་སངས་རྒྱས་དང་མཇལ། ཟབ་པ་དང་རྒྱ་ཆེ་བའི་ཆོས་ནི་ཐོབ། ཆོས་ཀྱི་སྒོར་ཞུགས་ནས་ཡུན་རིང་པོ་ཞིག་སོང་། ད་སྔ་ཡན་ཆད་ལ་ཉམས་ལེན་ཅི་འདྲ་བྱས། ཉམས་རྟོགས་ཅི་ཙམ་ཤར་ཤོད་དང་། རང་གི་སེམས་ལ་འཛིན་རྒྱུ། གཞན་གྱི་མི་ལ་བཤད་རྒྱུ་གཉིས་ཀ་མེད་རུང་། རང་གི་སེམས་ལ་འཛིན་རྒྱུ་ཞིག་ཡོད་དགོས། ཆོས་ཀྱི་ནང་ན། ཆོས་པ་རབ་ལ་ཞག་བསྐྱེད། འབྲིང་ལ་ཟླ་བསྐྱེད། ཐ་མ་ལ་ཡང་ལོ་བསྐྱེད་ཐོན་ཡོང་གསུངས་ན། ཁྱོད་ལ་ཞག་བསྐྱེད་ཡོང་གིན་འདུག་གམ། ཟླ་བསྐྱེད་ཡོང་གིན་འདུག དེ་མ་བྱུང་ཡང་ལོ་བསྐྱེད་ཐོན་འདུག་གམ་ལྟོས་དང་། ཡར་བསྐྱེད་ལས་མར་བསྐྱེད་ཆེན་པོ་འདྲ་བྱུང་མེད་དམ། ཡང་ཐོས་རྟགས་ཞི་ཞིིང་དུལ་བ་ཡིན། སྒོམ་རྟགས་ཉོན་མོངས་ཆུང་བ་ཡིན། གསུངས་པས། ཁྱོད་ལ་སྔར་བས་སྒོ་གསུམ་ནི་དུལ་ཙམ་བྱུང་འདུག ཉོན་མོངས་པ་ཆུང་དུ་སོང་ཡོད་མེད། ཆུང་དུ་མ་སོང་ཡང་ཆེ་རུ་སོང་། མང་དུ་སོང་། ཐུ་རུ་སོང་འདྲ་མེད་དམ་ལྟོས་དང་། ཡང་ཆོས་པ་རབ་འཆི་བ་ལ་བྲོད། འབྲིང་མི་འཚེར། ཐ་མ་མི་འགྱོད་པ་གསུངས་པ་ཁྱོད་ད་ལྟ་འཆི་ན་བྲོད་པ་ཞིག་བྱུང་ངམ། ཡང་ན་མི་འཚེར་བ་ཞིག་ཡོད་དམ། དེ་མ་བྱུང་ཡང་མི་འགྱོད་པ་ཞིག་དགོས་ཀྱང་། ཁྱོད་ཀྱི་བྱ་སྤྱོད་འདི་ལ་བལྟས་ན། སང་གནངས་ལྟ་བུ་ཞིག་ལ་བྱུང་ན། འགྱོད་པ་སྐྱེ་བཞིན་འཆི་དགོས་པ་འདྲ་མི་ཡོང་ངམ།
ཨ་རྫིའི་སོམས་དང་། ཡང་། ཚེ་འདི་ལ་ཞེན་ན་ཆོས་པ་མིན་གསུངས་པས། ཁྱོད་ཀྱི་སེམས་ཚེ་འདིའི་ལྟོ་གོས་དང་། གཉེན་ཉེ་བ་ལ་ཞེན་ནས་དེ་ཞེ་ཕུགས་སུ་བཞག་སྟེ། བླ་མ་དཀོན་མཆོག་གི་རྫས། དགེ་འདུན་པའི་དཀོར། གཤིན་ཟས་དད་ཟས་ཀྱི་མེ་མ་མུར་ཐམས་ཅད་ཕྱོགས་ཕྱོགས་ནས་བསྡུས་ཏེ་རང་གི་ཁ་ལ་བརྒྱབ་པས་མི་ཆོག གཉེན་ཉེ་བ་ཐམས་ཅད་ཀྱི་ཁ་ནང་དུ་བརྒྱབ་ནས་རང་གཞན་ཐམས་ཅད་ཀྱི་རྒྱུད་བསྲེག་ཕོད་དམ། སངས་རྒྱས་ཀྱི་བཀའ་ལས། དཀོར་ཟས་འདི་ལྕགས་གོང་མེ་འབར་བ་ཁར་བཅུག་པ་ལས་ཉེས་པ་ཆེ་བར་གསུངས་པས། ཁྱོད་ལ་སངས་རྒྱས་ཀྱི་གསུང་དེ་མི་བདེན་པའི་ཁུངས་དང་། བརྩི་མི་དགོས་པའི་གདེང་ཞིག་ཡོད་དམ། ཡང་། ལོང་པའི་དྲུང་ན་མིག་ལྡན་ལྟར། །སངས་རྒྱས་བྱང་ཆུབ་སེམས་དཔའ་རྣམས། །རྟག་ཏུ་སྒྲིབ་མེད་སྤྱན་གྱིས་གཟིགས། །སྤྱོད་ངན་ཕག་ཏུ་མ་བྱེད་ཨང་། །གསུངས་པས། མི་དྲན་དགུ་དྲན་མི་བྱེད་དགུ་བྱེད། ཉོན་མོངས་ཀྱི་གོང་བུ་སྡིག་པའི་ཁྲེས་པོ། ལྟུང་བའི་ཕད་བུ། དཀོར་གྱི་རྐྱལ་པ། ཆོས་བརྒྱད་ཀྱི་ཁོལ་པོ། དགེ་བའི་ཕྱོགས་ལ་བོང་ཆད་གྱེན་ལ་དེད་པ་ལྟ་བུ། མི་དགེ་བའི་ཕྱོགས་ལ་རི་གཟར་གྱི་འབབ་ཆུ་ལྟ་བུ། ཁྱོད་ཚེ་འདི་ལ་ཤི་སྤར་འཐམས་ནས་དུས་དེ་རིང་ཉི་མ་ཕན་ཆད་ལ། ལུས་ངག་ཡིད་གསུམ་དུག་གསུམ་གྱི་དབང་དུ་སོང་། མི་དགེ་བ་བཅུ་ཁོ་ནས་དུས་འདས་ཀྱང་། ད་དུང་ཆོས་པ་ཡིན་ཁུལ་བྱེད་པའི་ཧམ་པ་ཆེན་པོ་འདི་དེང་སང་གི་སྐྱེ་བོ་མི་ནག་པ་རྣམས་ལ་འགྲོ་ཡང་། སྒྲིབ་མེད་ཡེ་ཤེས་ཀྱི་སྤྱན་དང་ལྡན་པའི་བླ་མ་དཀོན་མཆོག་ལ་འགྲོའམ་མི་འགྲོ་སོམས་དང་།
ཡང་སངས་རྒྱས་ཀྱིས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཉོན་མོངས་བརྒྱད་ཁྲི་བཞི་སྟོང་འདུལ་བའི་གཉེན་པོར་གསུངས་ལ། བླ་མས་ཀྱང་ཆོས་ཅི་བྱེད་ནའང་ཉོན་མོངས་པ་ཅི་ཐུལ་གྱིས་ཞེས་ཅི་ཙམ་ཞིག་གསུངས། གྲོགས་ཀྱང་བཟང་པོ་འགའ་རེས་ཅི་ཙམ་ཞིག་བཤད་དེ་རྣམས་ཀྱི་ཚིག་ལ་ཡང་རྩི་འཇོག་མེད་པར། ད་ནི་ཞེ་སྡང་གི་མེ་འབར། འདོད་ཆགས་ཀྱི་ཆུ་འཁྲུགས། གཏི་མུག་གི་མུན་པ་འཐིབས། ང་རྒྱལ་གྱི་རིི་གཟེངས། ཕྲག་དོག་གི་རླུང་འཚུབ། སེར་སྣའི་མདུད་པ་དམ་དུ་དམ་དུ་སོང་ཡོད་པ་འདི་ལ་ལྟོས་དང་། གཞན་ཕར་ཞོག ད་ཁྱོད་ཀྱིས་ཚིག་ངན་དམ་དུམ་ཞིག་རྣ་བས་སུ་གོ་ན། དེ་ཡང་མི་བཟོད་པར་ཁྱོད་ཀྱི་ངོ་མདངས་འགྱུུར་ལུགས། ཁ་ངན་ཚིག་ངན་རྒྱག་ལུགས་འདི་གཅིག་པུ་ལ་ལྟོས་དང་། འདི་འདྲ་ཁྱོད་ལ་གྱིས་ཞེས། བླ་མས་མ་གསུངས་གྲོགས་ཀྱིས་མ་བཤད། འདི་ཁྱོད་ཀྱིས་དྲན་ནམ། ཡང་ན་འདི་འདྲ་གྱིས་ཞེས་ཁྱོད་ལ་འདྲེ་ཞིག་གིས་བཤད་དམ། དེ་མིན་ཁྱོད་ཀྱི་སྙིང་ལ་གདོན་ཅི་ཞིག་ཞུགས་སོང་། ཁྱོད་མྱོས་འདྲ་མེད་དམ། ད་ཕྱིན་ཆད་འདི་འདྲ་བྱས་ན་ཁྱོད་ཚེ་འདིར་སྡུག་ལ་ཕྱི་མར་དམྱལ་བར་འགྲོ་བ་རིན་བྱིན་ནས་ཉོས་པ་ཡིན་མོད། ཁྱོད་ཀྱིས་བླ་མའི་ཞབས་དྲངས། གྲོགས་ཀྱི་མཚང་བརྗོད། ཆོས་པའི་བླ་འཚོང་། བསྟན་པའི་མིག་རྐྱེན་ལ་གནོད་པ་འདི་འདྲ་བྱེད་དགོས་པའི་རྒྱུ་མཚན་ཅི་ཡོད་ཤོད་དང་། ཡང་། གང་ལ་ལེ་ལོ་གཅིག་ཡོད་པ། །དེ་ལ་ཆོས་ཀུན་མེད་པ་ཡིན། །གསུངས་པས་ཁྱོད་ནི་མཚན་གང་བོར་རོ་ཉལ་བྱས། ཉིན་གང་པོར་རྣམ་གཡེང་བྱས། དགེ་སྦྱོར་ཡུད་ཙམ་རེ་བྱས་ནས་གྲུབ་ཐོབ་འོང་དུ་རེ་བ་ཁྱོད་ཀྱིི་ཧམ་པ་ལ་ལྟོས་དང་། ཧེ་ཧེ། ཁྱོད་ལ་ཆོས་ཀྱི་དྲི་མས་མ་གོས་ཚར་འདུག སྙིང་ནས་ཆོས་ཤིག་བྱེད་ན། ཟ་དགའ་འཐུང་སྐྱིད། རྣམ་གཡེང་ལེ་ལོ་བྱེད་ལ་མ་དགའ་བར། ཉིན་པར་གྱི་ལྟོ་དང་། མཚན་མོའི་གཉིད་ཆོག་ལ་ཉམས་ལེན་ལ་རེམ་ཞིག
ཡང་གསང་སྔགས་ཀྱི་སྒོར་ཞུགས་ནས་ཉམས་སུ་བླངས་ན་རབ་ཚེ་གཅིག་ལུས་གཅིག་ལ་སངས་རྒྱས། འབྲིང་འཆི་ཁ་བར་དོར་གྲོལ། ཐ་མས་ཀྱང་དམ་ཚིག་མ་ཉམས་ན་སྐྱེ་བ་བདུན་ནམ་བཅུ་དྲུག་ཚུན་ཆད་ལ་སངས་རྒྱས་ཞེས་རྡོ་རྗེ་འཆང་གིས་གསུངས་ཀྱང་། ཁྱོད་ཀྱིས་དམ་ཚིག་མི་བསྲུུང་བར། ཇ་སུན་རེའི་མཐོ་དམན་ལ་བལྟས་ནས། ང་ཐུགས་ལ་མ་བཏགས་ཟེར། བླ་མ་ལ་དད་ལོག་དང་། ཚིག་རེ་རེའི་མཐོ་དམན་ལ་བལྟས་ནས། ང་ལ་དེ་འདྲ་བཤད་དགོས་པའི་འོས་མེད་ཅེས་གྲོགས་མཆེད་ལ་ཁོང་ཁྲོ་བྱེད་པ་འདི་གཅིག་པུ་ལ་ལྟོས། དམ་ཚིག་མི་བསྲུང་བ་དེ་ཁྱོད་སངས་རྒྱས་འགྲོ་སྙམ་ནས་འཇིགས་པ་ཡིན་ནམ། མ་བསྲུངས་ན་དམ་ཉམས་ཀྱི་མིས་མཆོད་པ་ཕུལ་ཡང་མི་བཞེས་ཤིང་། འཆི་རྐྱེན་ངན་པས་གློ་བུར་དུ་ཤི་ན་རྡོ་རྗེའི་དམྱལ་བར་སྐྱེ་བ་དང་། དེ་དང་ལྷན་དུ་ལུང་པ་གཅིག་གི་ཆུ་འཐུང་ཚད་ཀྱང་ཉམས་གྲིབ་ཀྱིས་ནོན་ནས་དམྱལ་བར་འགྲོ་ཞེས་རྡོ་རྗེ་འཆང་སོགས་ཀྱིས་གསུངས་པ་གོང་བཞིན་དུ། ད་དུང་དམ་ཚིག་དང་སྡོམ་པ་མི་བསྲུང་བར་ཆལ་ལེ་ཆོལ་ལེ་བྱེད་པ་འདི། ཁྱོད་ཀྱིས་རྡོ་རྗེ་འཆང་གིས་གསུངས་པ་དེ་མི་བདེན་སྙམ་པ་ཡིན་ནམ། ཡང་ན་རྡོ་རྗེ་འཆང་གི་གསུང་མི་བརྩི་བ་དེ་ཁྱོད་རྡོ་རྗེ་འཆང་ལས་ས་ཚོད་མཐོ་བ་ཞིག་ཡིན་ནམ། ཡང་ན་ཕོ་ཚོད་ཆེ་བ་ཞིག་ཡིན་ནམ། ཡང་ན་གདོན་གྱིས་ཟིན་ནས་སྙིང་ཁོག་ན་མེད་པ་ཞིག་ཡིན་ནམ། དེ་རྣམས་གང་རུང་ཞིག་ལས་མ་འདས། ད་ཁྱོད་དམྱལ་བར་འགྲོ་ཡང་། འགྲོ་ཞོར་ལ་ལུང་པ་གཅིག་གི་ཆུ་འཐུང་ཚད་པོ་དམྱལ་བར་ཁྲིད་ནས་མ་འགྲོ་བར་འཇོག་རོགས་གྱིས། ཡུལ་ཁམས་ཐམས་ཅད་མ་བརླག་ཅིག དེ་རྣམས་ལ་གོ་རྒྱུ་ཨེ་བྱུང་། ད་དུང་མི་གོ་རྣ་བར་མི་འགྲོ །སེམས་ལ་མི་འཐད་པར་འདུག་ན། ཁོག་པར་གདོན་ཆེན་པོ་འཇིགས་སུ་རུང་བ་ཞིག་ཞུགས་ཡོད་པ་ཐག་ཆོད་པས། ད་རེ་ཞིག་གི་བར་དུ་སུས་ཀྱང་ཐུལ་བར་མི་འདུག ཨ་རྫིའི་འཇིགས་པ་ལ་ཅི་དྲག ད་ཁྱོད་འཇིག་རྟེན་མི་ཡི་ཁྱུ་ནས་སྔར་ཐོན་ཚར་འདུག ཆོས་པའི་གྲལ་ནས་རོ་ལྟར་བུད་འདུག ད་ཕྱིན་ཆད་སླར་རོ་འཚངས་བརྒྱབ་ནས་ཡང་བསྟན་པ་ནང་ནས་གཤིག་གིན་མི་སྡོད་པར་ཕྱི་རོལ་མུ་སྟེགས་པ་ལྟ་བུའི་རྗེས་སུ་སོང་ཞིག དེ་ལ་ཡང་འགྲོ་མ་ཐུབ་ན་སུག་བཞི་ས་ལ་བཙུགས་ནས། ཁྱི་དང་དུད་འགྲོའི་རྩར་ཕྱིན་ལ། དེའི་ཁྱུ་ལ་ཨེ་འདྲེས་ཤིག་ལྟོས། དེ་རིང་གི་ཉི་མ་ཕར་བཟུང་ནས། ཆོས་པ་དང་འཇིག་རྟེན་མི་ཡི་ཁྱུ་ནས་ཁྱོད་རང་བཏོན་པ་ཡིན་པས་མ་སྡོད་ཅིག ཆོས་དང་འཇིག་རྟེན་གཉིས་ཀྱི་ཁ་ལྟ་བཟོ་ལྟ་གང་ཡང་མེད་བཞིན་དུ། ད་དུང་མི་ཡི་གྲལ་ལ་ཡར་བསྙེགས་ན། ཀུན་གྱིས་དེའི་གདོང་ལ་མཆིལ་མ་ཐོབ་ཅིག ཁྱོད་ཀྱི་གདོང་གི་ཀོ་བ་དེ་འབྲོང་གི་ཀོ་བ་ཡིན་ནམ། ཡང་ན་ཀོ་བ་ཉིས་བརྩེག་གམ། ཡང་ན་དཔྲལ་ཀོ་ཤིན་ཏུ་མཐུག་པ་ཞིག་ཡིན་ན་མ་གཏོགས་ངོ་མི་ཚའམ།
འོ་ད་ནི་མི་ལ་ངོ་ཚ་ཡོད། སྙིང་ལ་རུས་པ་ཡོད། མགོ་ན་ཀླད་པ་ཡོད། རང་གི་རང་ལ་ཤ་ཚ་ཡོད་པ་ཞིག་ཡིན་ན། སྔར་སྤྱོད་ལ་འགྱོད་པ་སྐྱེ་རན་འདུག་གོ །ད་སྤྱོད་ལ་ཡར་བསྐྱེད་འདོན་རན་འདུག་གོ །རན་པར་མ་ཟད་ཕྱིས་གྲབས་འདུག་གོ །སྐྱེས་པ་ཐམས་ཅད་འཆི་ལུགས་ལ་ལྟོས་ཤིག བསགས་པ་ཐམས་ཅད་འཛད་ལུགས་ལ་ལྟོས་ཤིག འདུས་པ་ཐམས་ཅད་བྲལ་ལུགས་ལ་ལྟོས་ཤིག གང་ལའང་སྙིང་པོ་མེད་ལུགས་ལ་ལྟོས་ཤིག བལྟས་ནས་སྙིང་པོ་ཡོད་པ་ཞིག་བྱེད་ན། བློ་ཕུགས་ཆོས་ལ་གཏོད་ཅིག ཆོས་ཕུགས་སྤྲང་ལ་གཏོད་ཅིག སྤྲང་ཕུགས་ཤི་ལ་གཏོད་ཅིག ཤི་ཕུགས་གྲོག་པོ་སྐམ་པོ་ལ་གཏོད་ཅིག དམན་པའི་ས་ཟུངས་ཤིག ཧྲུལ་པོའི་གོས་གྱོན་ཅིག གྱོང་ལྟོ་གོས་གཏམ་གསུམ་ལ་ཐོངས་ཤིག ན་བུན་གོས་ལྟར་གྱོན་ཅིག བྲག་ཕུག་ཞྭ་ལྟར་བསྟེན་ཅིག རྟག་ཏུ་རིའི་བུ་གྱིས་ཤིག ཆོས་བྱས་པའི་ལག་རྗེས་གྲུབ་རྟགས་ལ་སྒོ་གསུམ་ཞི་ཞིང་དུལ་བ་དགོས། རང་རྒྱུད་ཉོན་མོངས་ཆུང་བ་དགོས། ཆོས་གང་ཤེས་ཚད་ཐམས་ཅད་ཉོན་མོངས་པའི་གཉེན་པོར་ཐོངས་ལ། དུས་དེ་རིང་ནས་བཟུང་སྔར་ལྟར་ཉོན་མོངས་པ་གང་ཡང་ལན་པར་མི་གཏོང་བར། ཆགས་སྡང་ཁོང་ཁྲོ་སོགས་གང་སྐྱེས་ཀྱང་དེ་མ་ཐག་གཉེན་པོས་འབུར་འཇོམས་གྱིས་ཤིག རེམ་ཞིག ཐུལ་ཅིག ཆོམས་ཤིག སུན་ཕྱུངས་ཤིག མགོ་ནོན་ཅིག རྩ་བ་ནས་ཐོན་ཅིག མདོར་ན་ཁྱོད་ཀྱི་སྔར་གྱི་བྱ་སྤྱོད་ཉེས་ཚར་འདུག་པས། ད་ཕྱིན་ཆད་བླ་མའི་བཀའ་བཞིན་ཆོས་བཞིན་འདུལ་བ་བཞིན་གྱིས་ཤིག
མི་མངོན་དབྱིངས་ནས་བླ་མ་ཡིས། །མི་ངན་བདག་ལ་གཟིགས་སུ་གསོལ། །ཤིག་ལ་མཛུབ་མོ་འཛུགས་པ་བཞིན། །རང་གི་སྐྱོན་ལ་འཛུབ་མོ་འཛུགས། །རྐང་བའི་ཚེར་མ་འདོན་པ་བཞིན། །རང་སྐྱོན་སྒོ་རུ་འདོན་པར་བྱ། །ཁྱོད་ནི་དལ་འབྱོར་མི་ལུས་ཐོབ། །བླ་མ་དུས་གསུམ་སངས་རྒྱས་མཇལ། །ཟབ་ཅིང་རྒྱ་ཆེའི་གདམས་པ་ཐོབ། །ཐོས་དོན་བསྒོམས་པའི་ལག་རྗེས་ལ། །སྒོ་གསུམ་ཞི་ཞིང་དུལ་དགོས་ཀྱང་། །དུལ་དུ་མ་སོང་སྡུག་ཏུ་སོང་། །ཉོན་མོངས་ཆུང་དུ་འགྲོ་དགོས་ཀྱང༌། །ཆུང་དུ་མ་སོང་ཆེ་རུ་སོང་། །སེམས་ལ་ཡར་བསྐྱེད་ཐོན་དགོས་ཀྱང་། །ཡར་བསྐྱེད་མ་ཐོན་མར་བསྐྱེད་ཐོན། །དད་ཟས་དཀོར་གྱི་རྐྱལ་བ་འདྲ། །རོ་ཉལ་བྱེད་པའི་གླང་དང་འདྲ། །འདོད་ཆགས་ཆེ་བའི་བྱ་དང་འདྲ། །ཞེ་སྡང་ཆེ་བའི་སྦྲུལ་དང་འདྲ། །གཏི་མུག་ཆེ་བའི་ཕག་དང་འདྲ། །ང་རྒྱལ་ཆེ་བའི་སེང་གེ་འདྲ། །ཕྲག་དོག་ཆེ་བའི་ཁྱི་དང་འདྲ། །སེར་སྣ་ཆེ་བའི་ཡི་དྭགས་འདྲ། །སྡུག་ལ་རྔམས་པའི་ཤན་པ་འདྲ། །ཤ་ཁྲག་ཟ་བའི་སྲིན་པོ་འདྲ།།
བླ་མ་དུས་གསུམ་སངས་རྒྱས་ལ། །མཆི་མ་འཁྲུགས་པའི་དད་པ་མེད། །དམ་གཙང་རྡོ་རྗེ་མཆེད་ལྕམ་ལ། །ལྷ་རུ་མཐོང་བའི་དག་སྣང་མེད། །མ་གྱུར་སེམས་ཅན་ཐམས་ཅད་ལ། །བ་སྤུ་གཡོ་བའི་སྙིང་རྗེ་མེད། །ཟབ་དང་རྒྱ་ཆེའི་གདམས་པ་ལ། །ཉམས་སུ་ལེན་པའི་བརྩོན་འགྲུས་མེད། །དད་གུས་མེད་པའི་དམ་དྲེད་པོ། །དག་སྣང་མེད་པའི་ཁྲེལ་མེད་པོ། །སྙིང་རྗེ་མེད་པའི་སྙིང་རུལ་པོ། །ཉམས་ལེན་མེད་པའི་སྙོམ་ལས་པོ། །རང་སྐྱོན་མི་མཐོང་དམུས་ལོང་བོ། །གཞན་སྐྱོན་བརྗོད་པའི་ལྕེ་བདེ་བོ། །དམྱལ་བའི་གཏིང་རྡོ་འགུལ་མེད་པོ། །ཆོས་མེད་སྡིག་པའི་ལས་བསོག་པའི། །ལས་ངན་ཚབས་ཅན་ཁྱོད་འདྲ་ཞིག །བླ་མ་དུས་གསུམ་སངས་རྒྱས་ཀྱི། །ཞབས་འདྲེན་བྱེད་པ་ཁྱོད་འདྲ་ཞིག །དམ་གཙང་རྡོ་རྗེ་མཆེད་ལྕམ་གྱི། །རྐང་འདྲེན་བྱེད་པ་ཁྱོད་འདྲ་ཞིག །སངས་རྒྱས་བསྟན་པའི་མིག་རྐྱེན་ལ། །གནོད་པའི་བསྟན་བཤིག་ཁྱོད་འདྲ་ཞིག །ཆོས་པའི་གཟུགས་བཟུང་ཆོས་མིན་བྱེད། །ཆོས་པའི་མཚང་བརྗོད་ཁྱོད་འདྲ་ཞིག །སྲོག་མ་ཆད་པའི་མི་རོ་ཞིག།།འདྲེས་མ་ཁྱེར་བའི་སྨྱོན་པ་ཞིག །མི་གླུད་ཁྱོད་འདྲ་གང་ནས་བྱུང་། །ལྟས་ངན་ཁྱོད་འདྲ་གང་ནས་བྱུང་། །བཟའ་བཏུང་གཏི་མུག་རོ་ཉལ་བྱས། །ཁྱོད་ཀྱི་བརྩོན་འགྲུས་འདི་ལ་ལྟོས། །དགེ་བའི་ཕྱོགས་ལ་བོང་ཆད་བཞིན། །ཁྱོད་ལ་འགྲོ་རྒྱུ་མེད་ལ་ལྟོས། །སྡིག་པའི་ཕྱོགས་ལ་འབབ་ཆུ་འདྲ། །ཁྱོད་ནི་གཞན་ལས་མགྱོགས་ལ་ལྟོས། །ཚིག་ངན་ཙམ་རེའང་མི་བཟོད་པར། །ཁྱོད་ཀྱི་ངོ་མདངས་འགྱུར་ལ་ལྟོས། །ཉེས་ལྟུང་ཀུན་གྱི་ཕད་བུ་ཁྱོད། །ཁྱོད་ཀྱི་སྡོམ་པ་སུ་ལ་བསྐྱལ། །སྡིག་པའི་འཁྲེས་པོ་འཁུར་མཁན་ཁྱོད། །ཁྱོད་ཀྱི་དགེ་བ་གང་ན་ཡོད། །སྐྱོན་གྱི་ཕུང་པོ་ཆེན་པོ་ཁྱོད། །ཁྱོད་ཀྱི་ཡོན་ཏན་སུ་ཡིས་འཕྲོག །འཇིག་རྟེན་ཆོས་བརྒྱད་ཁོལ་པོ་ཁྱོད། །ཁྱོད་ཀྱི་ལྷ་ཆོས་གང་ནས་བྱས། །ཆོས་པའི་བཟོ་ལྟ་མེད་པ་ཁྱོད། །ཁྱོད་ནི་ངོ་ཡང་མི་ཚའམ། །མཇུག་མ་མེད་པའི་ཁྱི་རྒན་ཁྱོད།།
ད་ནི་ཁྱི་ཡི་གྲལ་དུ་སོང་། །ཡ་སོ་ཅན་གྱི་བ་གླང་ཁྱོད། །ཡང་ན་དུད་འགྲོའི་ཁྱུ་ཞིག་སྙོགས། །གལ་ཏེ་མི་འགྲོ་འདུག་འདོད་ན། །སྔར་གྱི་དེ་འདྲ་བྱེད་ཕོད་དམ། །ད་ནི་མི་ལ་ངོ་ཚ་ཡོད། །ཁོག་པའི་ནང་ན་སྙིང་ཞིག་ཡོད། །མགོ་བོའི་ནང་ན་ཀླད་པ་ཡོད། །རང་ལ་ཤ་ཚ་ཞིག་ཡོད་ན། །སྔར་བྱས་རྣམས་ལ་འགྱོད་པ་སྐྱེད། །ད་སྤྱོད་རྣམས་ལ་ཡར་བསྐྱེད་ཐོན། །འདོན་པར་མ་ཟད་ཕྱིས་གྲབས་འདུག །སྐྱེས་པ་ཐམས་ཅད་འཆི་ལ་ལྟོས། །བསགས་པ་ཐམས་ཅད་འཛད་ལ་ལྟོས། །འདུས་པ་ཐམས་ཅད་འབྲལ་ལ་ལྟོས། །གང་ལའང་སྙིང་པོ་མེད་ལ་ལྟོས། །སྙིང་པོ་མེད་པའི་བྱ་བ་སྤོངས། །སྙིང་པོའི་ལྷ་ཆོས་བྱེད་འདོད་ན། །བླ་མའི་གསུང་དང་རྒྱལ་བའི་བཀའ། །བཞིན་དུ་ད་ནི་འབད་པར་རིགས། །བླ་མ་དཀོན་མཆོག་ཐུགས་རྗེ་གཟིགས། །སྔར་གྱི་བྱ་བ་ཉེས་ནས་གདའ། །སྙིང་ནས་འགྱོད་པས་བཤགས་སྡོམ་བྱ། །ཆོས་བཞིན་ནུས་པར་བྱིན་གྱིས་རློབས། །འདུལ་བ་བཞིན་དུ་ནུས་པར་ཤོག །མདོ་སྡེ་བཞིན་དུ་སྤྱོད་པར་ཤོག །མངོན་པ་བཞིན་དུ་བྱེད་པར་ཤོག །གསང་སྔགས་བཞིན་དུ་བསྒྲུབ་པར་ཤོག །
ཅེས་མན་ངག་རྒྱ་ཁབ་རྣོན་པོ་འདི་སློབ་བུ་རྣམས་ཀྱི་ལག་ཏུ་གཏད་ནས། ད་ཕྱིན་ཆད་རྣམ་དཔྱོད་ཤེས་རབ་ཀྱི་མིག་གིས་ལྟོས་ལ། རང་ལ་སྐྱོན་མཚང་གི་ཚེར་མ་ཟུག་ཚད་ཐམས་ཅད་རང་གིས་ཐོན་བྱས་པས། ཁོང་རྣམས་ཀྱིས་ཀྱང་དེ་བཞིན་བཏོན་པས་སྡུག་བསྔལ་ཟུག་རྔུ་བསྐྱེད་པའི་སྐྱོན་གྱི་དུག་ཚེར་ཐམས་ཅད་ཐོན་ནས། རིང་པོར་མ་ལོན་པར། རི་ཁྲོད་དབེན་པའི་དགའ་ཚལ་ནས་ཆོས་མཐུན་གྱི་ཞབས་བྲོ་རྒྱག་ནུས་པ་བྱུང་ངོ༌། །ཞབས་དཀར་ཚོགས་དྲུག་རང་གྲོལ་པས་སོ།།
ཁུངས་གཏུགས་སའི་ཡིག་ཆ།
ནང་བསྟན་དཔེ་ཚོགས་ལྟེ་གནས། WA1KG1789 གསེར་ཐང་བླ་རུང་ལྔ་རིག་ནང་བསྟན་སློབ་གླིང་གི་པར་མ།
