ཞེ་ཆེན་རྒྱལ་ཚབ་འགྱུར་མེད་པདྨ་རྣམ་རྒྱལ།
ཡང་བཅོམ་ལྡན་འདས་ཡུལ་ཨོ་ཏ་ལར་བསོད་སྙོམས་ལ་གཤེགས་པའི་ཚེ། དབུལ་མོ་རྒན་མོ་ཞིག་བུམ་པ་ཐོགས་ཏེ་ཆུ་ལེན་དུ་ཕྱིན་པ་ན། དེས་བཅོམ་ལྡན་འདས་ཀྱི་སྐུ་རྒྱང་མ་ནས་མཐོང་བས། བཅོམ་ལྡན་འདས་ལ་བུ་ཡི་འདུ་ཤེས་སྐྱེས་ཏེ་ཆུ་བུམ་དེར་བཞག་ནས་ལག་གཉིས་བརྐྱངས་ནས་བརྒྱུགས་ཏེ། ངའི་བུ་དང་ཕྲད་དོ་ཞེས་ཟེར་ནས་མགུལ་ལ་འཁྱུད་པར་བརྩམས་པ་ན་དགེ་སློང་རྣམས་ཀྱིས་དེ་བཀག་པས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བུད་མེད་འདི་མ་དགག་ཅིག གལ་ཏེ་བུད་མེད་འདི་དེ་བཞིན་གཤེགས་པའི་མགུལ་ནས་འཁྱུད་དུ་མ་བཅུག་ན། ཁ་ནས་ཁྲག་དྲོན་མོ་སྐྱུགས་ཏེ་འཆི་བར་འགྱུར་རོ། །དེ་ནས་དེ་ཐོས་པ་དང་མ་བཀག་པར་བཞག་གོ །
དེ་ནས་དེས་བཅོམ་ལྡན་འདས་ཀྱི་མགུལ་ན་འཁྱུད་ནས་ཆོས་ཉན་པའི་ཕྱིར་མདུན་དུ་འཁོད་པ་ལ། བཅོམ་ལྡན་འདས་ཀྱིས་ཆོས་བསྟན་པས་བུད་མེད་དེ་སྟན་དེ་ལ་འཁོད་བཞིན་དུ་རྒྱུན་དུ་ཞུགས་པའི་འབྲས་བུ་ཐོབ་ནས། སླར་རབ་ཏུ་བྱུང་བར་གསོལ་བས་གནང་སྟེ། སྐྱེ་དགུའི་བདག་མོ་ཆེན་མོ་ལ་གཏད་ནས་བསྙེན་པར་རྫོགས་པས་རིང་པོར་མ་ལོན་པར་དགྲ་བཅོམ་པ་མངོན་ཏུ་བྱས་ཏེ། བཅོམ་ལྡན་འདས་ཀྱིས་དགེ་སློང་མ་རྣམས་ལ་མདོའི་ལུང་དཔོག་པར་མཛད་ནས་ནང་དུ་ཡང་དག་འཇོག་ལ་བཞུགས་པའི་ཚེ། དགེ་སློང་མ་རྣམས་ལ་འདིས་བརྡ་སྤྲོད་པར་བྱེད་པས། བཅོམ་ལྡན་འདས་ཀྱིས་དགེ་སློང་དག་ངའི་ཉན་ཐོས་ཀྱི་དགེ་སློང་མ་མདོ་རྣམ་པར་འབྱེད་པ་རྣམས་ཀྱི་མཆོག་ནི་འདི་ལྟ་སྟེ། དགེ་སློང་མ་ཀ་ཙང་ཀ་ལ་འདི་ཡིན་ནོ་ཞེས་ལུང་བསྟན་ཏེ། དེར་དགེ་སློང་རྣམས་ཐེ་ཚོམ་དུ་གྱུར་ཏེ་ལས་ཀྱི་རྒྱུ་གསོལ་བ་ན། འདི་ནི་ངའི་སྐྱེ་བ་ལྔ་བརྒྱའི་མར་གྱུར་པས། སྔོན་གྱི་བག་ཆགས་ཀྱི་གཞི་ཡོད་པས་ད་ལྟར་བུར་འདུ་ཤེས་ཏེ་རྒྱུག་གོ །དེ་ཉིད་ད་ལྟར་གྱི་བསྐྱེད་ཡུམ་དུ་མི་འགྱུར་བ་རྒྱུ་གཉིས་ཀྱིས་ཏེ། སྒྱུ་འཕྲུལ་ཆེན་མོས་སངས་རྒྱས་ཀྱི་ཡུམ་དུ་སྨོན་ལམ་བཏབ་པ་དང་། འདི་ཉིད་ཀྱིས་ཐམས་ཅད་དུ་བྱང་ཆུབ་སེམས་དཔའ་ངེས་འབྱུང་དང་སྦྱིན་པའི་བར་ཆད་བྱས་པས་ཐུགས་དབྱུང་བས། ཕྱིན་ཆད་འདི་བདག་གིས་མར་མ་གྱུར་ཅིག་ཅེས་སྨོན་ལམ་མཛད་པས་སོ། །དེ་ལྟར་ངེས་འབྱུང་དང་སྦྱིན་པའི་གེགས་སུ་གྱུར་པས། ད་ལྟར་དབུལ་མོར་གྱུར་པ་དང་རྒས་ནས་གདོད་རབ་ཏུ་བྱུང་བར་གྱུར་པའོ། །ད་ལྟར་དགྲ་བཅོམ་ཐོབ་ཅིང་མདོ་རྣམ་འབྱེད་དུ་ལུང་བསྟན་པའི་རྒྱུ་ནི། སྔོན་འོད་སྲུང་གི་དུས་སུ་དགེ་སློང་མར་གྱུར་ཏེ། དེ་རབ་ཏུ་བྱུང་བའི་མཁན་མོ་དེ་འོད་སྲུང་གིས་མདོ་རྣམ་པར་འབྱེད་པའི་མཆོག་ཏུ་ལུང་བསྟན་པ་ཡིན་པས། དགེ་སློང་མ་དེས་ཚེ་གཅིག་ཏུ་ཚངས་པར་སྤྱོད་པ་སྤྱད་ནས། འཆི་ཁར་དེ་དང་ཚུལ་མཐུན་པའི་སྨོན་ལམ་བཏབ་པར་གསུངས་སོ། །འདིས་ནི་རབ་ཏུ་བྱུང་བ་དང་སྦྱིན་པའི་གེགས་བྱས་པའི་ཉེས་དམིགས་དང་། ཚངས་པར་སྤྱོད་པ་དང་སྨོན་ལམ་གྱི་འབྲས་བུ་མི་བསླུ་བར་བསྟན་པ་ཡིན་ནོ།།
ཁུངས་གཏུགས་སའི་ཡིག་ཆ། ཞེ་ཆེན་རྒྱབ་ཚབ་འགྱུར་མེད་པདྨ་རྣམ་རྒྱལ་གྱིས་མཛད་པའི་<<མདོ་ལས་བྱུང་བའི་གཏམ་རྒྱུད་སྣ་ཚོགས།>>ཞེས་པ་ལས་སྔ་འགྱུར་རིག་མཛོད་རྩོམ་སྒྲིག་པས་བཏུས།
