འཇམ་མགོན་མི་ཕམ་རྣམ་རྒྱལ་རྒྱ་མཚོ།
དྲན་པས་འཁྲུལ་སྣང་འཁོར་བའི་མུན་སེལ་བ།།
འཇམ་དཔལ་ཉིན་མོར་བྱེད་པས་དགེ་ལེགས་སྩོལ།།
དེང་སང་དུས་ངན་སྡུག་བསྔལ་སྣ་ཚོགས་བདོ།།
སྐྱེ་བོ་རྣམས་ཀྱང་མི་དྲང་ཆགས་སྡང་ཆེ།།
ཅི་ལ་བསམས་ཀྱང་ཡིད་སྐྱོ་མང་དུས་འདིར།།
གང་དུ་བསྡད་ཀྱང་མཐུན་རྐྱེན་འབྱོར་དཀའ་ལ།།
གང་ལྟར་བྱས་ཀྱང་སྐྱེ་བོ་མི་མགུ་ཞིང།།
གང་ལྟར་བསམས་ཀྱང་དགེ་སྦྱོར་མི་འཕེལ་བས།།
ཕྱི་རོལ་དངོས་ལ་བསམ་དཔྱོད་མི་མང་བར།།
རང་སེམས་འདུལ་ཞིང་སྒྱུ་མའི་ལམ་ཁྱེར་ལ།།
ཉམས་ལེན་གནད་དུ་བསྣུན་པ་ཁོ་ན་གལ།།
མིག་གིས་གང་མཐོང་གཟུགས་བརྙན་ལྟ་བུ་སྟེ།།
བརྟག་ན་གཞི་མེད་མ་བརྟག་ཉམས་དགར་སྣང།།
རྟོག་པ་དེ་རྗེས་འབྲང་ན་ཆགས་ཤིང་འཆིང་།།
རང་དགར་བསྐྱུར་ན་ཕན་གནོད་ཅི་ཡང་མེད།།
དེ་བས་གཟུགས་སུ་སྣང་ངོ་ཅོག་ཀུན་ལ།།
སྒྱུ་མ་རྨི་ལམ་ལྟ་བུའི་བློ་བཞག་ནས།།
བྱུང་ཡང་མི་དགའ་འགག་ཀྱང་མི་སྡུག་པར།།
ཕན་གནོད་རྩིས་གདབ་བྲལ་བར་བོར་ལ་ཐོང།།
རྣ་བས་གང་ཐོས་བྲག་ཆ་ལྟ་བུ་སྟེ།།
བརྟག་ན་གཞི་མེད་མ་བརྟག་ཉམས་དགར་སྣང།།
དེ་བས་རྣ་བས་ཐོས་ཚད་གཏམ་རྣམས་ལ།།
སྒྱུ་མ་རྨི་ལམ་ལྟ་བུའི་བློ་བཞག་ནས།།
བཟང་བརྗོད་དགའ་དང་ངན་བརྗོད་མི་དགའ་མེད།།
ཕན་གནོད་རྩིས་གདབ་བྲལ་བར་བོར་ལ་ཐོང།།
ཡིད་ལ་གང་ཤར་བར་སྣང་སྨིག་རྒྱུ་འདྲ།།
བརྟག་ན་གཞི་མེད་མ་བརྟག་ཉམས་དགར་སྣང།།
དེ་བས་ཡིད་ལ་གང་ཤར་རྣམ་རྟོག་ལ།།
སྒྱུ་མ་རྨི་ལམ་ལྟ་བུའི་བློ་བཞག་ནས།།
བཟང་རྟོག་དགའ་དང་ངན་རྟོག་མི་འགའ་མེད།།
ཕན་གནོད་རྩིས་གདབ་བྲལ་བར་བོར་ལ་ཐོང།།
དེས་མཚོན་སྣང་སྲིད་འཁོར་འདས་ཆོས་རྣམས་ཀུན།།
སྒྱུ་མ་རྨི་ལམ་ཇི་བཞིན་བདེན་གྲུབ་མེད།།
རྟོག་པའི་དབང་གིས་ཕན་གནོད་རེ་དོགས་འཁྲུལ།།
ད་ནི་རྟོག་མེད་བླང་དོར་མེད་པར་ཞོག།།
སྣང་བ་འདི་ཀུན་སྣང་བའི་དུས་ཉིད་ན།།
བདེན་བདེན་ཡོད་ཡོད་ལྟ་བུར་མངོན་ན་ཡང།།
སྐད་ཅིག་མི་རྟག་གློག་དང་སྤྲིན་ལྟ་བུར།།
རིམ་པས་འགྱུར་ཞིང་ཐ་མར་འགག་པ་སྟེ།།
ཕྱི་ཡི་ཆགས་གནས་འཇིག་དང་ནམ་ཟླའི་དུས།།
ནང་གི་རྒན་གཞོན་དར་རྒུད་བདེ་སྡུག་སོགས།།
ངེས་མེད་གཡོ་བ་འདི་དོན་ལེགས་བསམ་ནས།།
རྟག་འཛིན་བདེན་འཛིན་མ་ཆེ་སྒྱུ་མར་ལྟོས།།
ཐོག་མེད་དུས་ནས་ད་ལྟ་ཡན་ཆད་དུ།།
རང་གཞན་བདེ་སྡུག་ཅི་སྣང་སྒྱུ་མ་འདྲ།།
གར་སོང་མེད་དེ་དེང་སང་ཕན་གནོད་བྲལ།།
ད་ལྟ་མ་འོངས་སྣང་ཚད་དེ་དང་འདྲ།།
ལེགས་པར་དཔྱད་ན་འཁོར་འདས་བདེ་སྡུག་གི།
སྣང་བ་སྣ་ཚོགས་མི་འདྲ་ཅི་སྣང་ཡང།།
རྟོག་པའི་དབང་གིས་བཞག་པ་ཙམ་ཞིག་ལས།།
ངོ་བོ་ཉིད་མེད་སྒྱུ་མ་རྨི་ལམ་འདྲ།།
དེ་དོན་ཤེས་ནས་དོན་མེད་རང་སྡུག་གི །
འབྱུང་གནས་རྣམ་པར་རྟོག་པའི་མཚང་མཐོང་སྟེ།།
དགའ་སྡུག་རེ་དོགས་སྤོང་ལེན་རྩོལ་བ་བརྒྱ།།
ཆུ་ལ་རི་མོ་བཞིན་དུ་ཞིག་དེ་སྐྱིད།།
ཐོག་མེད་འཁྲུལ་པའི་གཞན་དབང་སོང་སོང་བས།།
རེ་ཞིག་བསྒོམས་ཀྱང་ཇི་བཞིན་འབྱོང་དཀའ་ཡང།།
མ་བརྗེད་གོམས་ན་གོམས་པ་ཇེ་ཆགས་ནས།།
འདི་ལྟར་རྟེན་འབྱུང་སྣང་བ་བསླུ་མེད་རྣམས།།
སྣང་ཡང་ནམ་མཁའི་ངང་ན་སྨིག་རྒྱུ་བཞིན།།
སེམས་ཉིད་གཉུག་མའི་ཀློང་ན་རྩལ་སྣང་དུ།།
འཁོར་འདས་སྒྱུ་མའི་སྣང་བ་སྣ་ཚོགས་སྟོན།།
རྟོོག་པས་མ་བཅངས་རང་སར་རང་གྲོལ་ཡིན།།
འགྱུར་མེད་གཤིས་ཀྱི་གནས་ལུགས་རིག་པའི་ངང།།
འགྱུ་བའི་རྩལ་སྣང་རང་གྲོལ་ཝ་ལེ་བ།།
རང་བྱུང་ཤེས་རབ་མིག་ལྡན་རྣལ་འབྱོར་ལ།།
འཇིགས་དང་སྡུག་བསྔལ་མུན་པ་རྩད་ནས་མེད།།
ཨེ་མ་ཧོ། འཇམ་དཔལ་གཞོན་ནུ་སྙིང་ལ་ཡེ་གནས་པའི།།
བྱིན་རླབས་རྡོ་རྗེ་སྒྱུ་མའི་ཆོ་འཕྲུལ་གྱི།།
གདམས་པ་འདི་ཡིས་སྐལ་ལྡན་སྐྱེ་བོ་ཀུན།།
རང་ཤར་རང་གྲོལ་དགོངས་པ་མཐོང་གྱུར་ཅིག།།
ས་ཕག་ཟླ་ ༨ ཚེས་ ༡༣ ལ་རྫ་རྡོ་རྗེ་འཕན་ཕྱུག་གི་རི་ཞོལ་དུ་མི་ཕམ་འཇམ་དཔལ་དགྱེས་པས་བྲིས་པ་མངྒལཾ།།
ཁུངས་གཏུག་སའི་ཡིག་ཆ།
ནང་བསྟན་དཔེ་ཚོགས་ལྟེ་གནས། W2DB1631 མི་ཕམ་གསུང་འབུམ་ལྕགས་པར་མ། «གཏམ་ཚོགས་ཐོར་བུའི་རིགས་ཕྱོགས་གཅིག་ཏུ་བསྒྲིགས་པ་ལེགས་བཤད་ནོར་བུའི་བང་མཛོད།» ཅེས་པ་ལས་བཏུས།
