ལོ་རིམ་བརྒྱད་པའི་སློབ་གཉེར་བ། ཆོས་དབྱིངས་བླ་མ།
གཞན་ཕན་དོན་ལ་འཛེམ་བག་མེད་པར་རང་དོན་དོར་བའི་སྐྱེས་ཆེན་ཏེ།།
དགྲ་གཉེན་མི་ཤེས་ཀུན་ལ་བྱམས་དང་བརྩེ་བ་གནང་མཁན་བླ་མ་ཞིག།།
ཆོས་བརྒྱད་བྲལ་ནས་བརྩོན་པ་ཆེན་པོས་འགྲོ་བའི་ཚོགས་ལ་དམ་ཆོས་སྦྱིན།།
རྒྱལ་བའི་རིང་ལུགས་འཛིན་ལ་མཁས་པ་དྲིན་ཆེན་བླ་མར་གུས་པས་འདུད།།
ཅེས་དྲིན་ཆེན་བླ་མ་རྣམས་ལ་མཆོད་བརྗོད་དང་བཀའ་དྲིན་རྗེས་སུ་དྲན་པའི་ཐོག་ནས་གང་ཞིག་གླེང་བར་བྱ་བ་དམ་པའི་ཆོས་ཀྱི་རིམ་པ་ནི། རྩ་རྒྱུད་གསང་བ་སྙིང་པོའི་ལེའུ་གཉིས་པར།1བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་གསུངས་པ་ལས་འཕྲོས་ཏེ་གཞི་རྒྱུད་སྐོར་ཡིན་ལ། དེ་ཡང་ཀུན་མཁྱེན་ཆེན་པོ་རིག་འཛིན་འཇིགས་མེད་གླིང་པས་2གསུངས་པ་ལྟར། སྙིགས་མའི་དུས་འདིར་གསང་བ་སྔགས་ཀྱི་ལམ་ལ་ཉམས་བཞེས་གནང་མཁན་རྣམས་ཀྱིས། གཞི་ལམ་འབྲས་བུའི་གནད་ལ་རྨོངས་པའི་ལྟ་བ་ཕྱོགས་འཛིན་གྱིས་བློས་སྔགས་རྒྱུད་ཟབ་པ་དང་རྒྱ་ཆེ་བའི་དོན་རྣམས་ཇི་བཞིན་དུ་ཤེས་པ་ནི་ཉིན་མོའི་སྐར་མ་ཙམ་རེད། ཅེས་པ་ལྟར་བདག་འདྲ་བློ་དམན་པ་དག་གི་སྤྱོད་ཡུལ་མིན་པ་དང་། ཀ་དག་དང་ལྷུན་གྲུབ་ཟུང་འཇུག་འོད་གསལ་རྫོགས་པ་ཆེན་པོའི་གནད་འདི་ཉིད་རྟོག་དཔྱོད་ཀྱི་དཔེ་དང་སྨྲ་བརྗོད་ཀྱི་ཚིག་གིས་མི་མཚོན་ན་ཡང་། ཀུན་མཁྱེན་དམ་པ་རྣམས་ཀྱི་གཞུང་བཟང་ཡིད་བཞིན་ནོར་བུའི་ཁུངས་ལུང་མན་ངག་རྣམས་ལ་བློ་བཅོལ་ནས་རང་ནུས་ཅི་ལྕོགས་ཀྱིས་བྲི་བར་བྱ་སྟེ། རྒྱུད་ཉི་ཟླ་ཁ་སྦྱོར་ལས།3ང་ཡི་རྒྱུད་འདི་སུས་བཟུང་བ། །འཇིག་རྟེན་ཕན་པའི་འབྲས་བུ་དང་། །ངེས་པར་སྣང་བའི་ས་ཐོབ་སྟེ། །སྐུ་གསུམ་ལ་ཡང་ལོངས་སྤྱོད་དོ། །ཞེས་གསུངས་པ་དང་མཐུན་པར་བདག་གཞན་སེམས་ཅན་རྣམས་ལ་ཐར་པའི་ས་བོན་འཐོབ་པའི་སླད་དུ་སྐབས་འདིར་རྩ་བའི་ས་བཅད་དྲུག་གི་སྒོ་ནས་རིམ་བཞིན་གླེང་བར་བྱ་སྟེ།
དང་པོ། གཞི་རྒྱུད་ཀྱི་དོན་ཤེས་པའི་ཕན་ཡོན།
འཁོར་བ་དང་མྱང་འདས་ཀྱིས་བསྡུས་པའི་ཆོས་ཐམས་ཅད་རྒྱུ་གང་ལས་བྱུང་བ་ཤེས་ནུས་པ་དང་། ཁམས་གསུམ་སེམས་ཅན་ཀུན་ཀྱིས་འཁོར་བ་ཐོག་མ་མེད་པ་ནས་གཞི་རྒྱུད་ཀྱི་དོན་ཇི་ལྟ་བ་བཞིན་དུ་ངོ་མ་ཤེས་ནས་འཁོར་བར་ཇི་ལྟར་འཁྱམས་ཚུལ། མ་ཟད་ཤིན་ཏུ་ཟབ་མོའི་གནས་ལུགས་ངོ་བོ་ཉིད་ཀྱི་གཞི་དེ་ཉིད་ངོ་ཤེས་ནས་ཆོས་སྐུའི་ཀློང་དུ་ཇི་ལྟར་གྲོལ་ཚུལ་གྱི་གནད་རྣམས་ཤེས་པའི་དགོས་པ་ཡོད། དེ་ལྟར་ཡང་ཚིག་དོན་མཛོད་ལས།4འོན་ཀྱང་རང་ངོ་ཤེས་པའི་གྲོལ་རྐྱེན་བྱེད་པའི་ཆ་ནས་གྲོལ་གཞི་ཞེས་བཏགས་ལ། མ་ཤེས་ན་འཁྲུལ་རྐྱེན་བྱེད་པའི་ཆ་ནས་འཁྲུལ་གཞི་ཞེས་བཏགས་པ་ཡིན་ནོ། །ཞེས་དང་མདོ་ཏིང་འཛིན་རྒྱལ་པོ་ལས།5ནམ་ཞིག་འཇིག་རྟེན་ཁམས་འདི་བྱུང་བ་དང་། །བྱུང་ནས་ཞིག་སྟེ་འཇིག་རྟེན་ཁམས་འདི་མེད། །ཇི་ལྟར་སྔོན་བཞིན་ཕྱིས་ཀྱང་དེ་བཞིན་ཏེ། །ཐོག་མ་གང་ལས་བྱུང་བ་བརྟག་པར་བགྱི། །ཞེས་གསུངས་སོ།།
གཞན་ཡང་གཞིའི་གནས་ལུགས་ཕྱིན་ཅི་མ་ལོག་པར་ཇི་ལྟ་བ་བཞིན་ཤེས་ན། ཉན་རང་ལ་སོགས་པའི་ལམ་ངན་ལས་མི་གོལ་བ་དང་། ངེས་པ་དོན་གྱི་མདོ་རྒྱུད་ཀུན་ལ་ལྟ་བའི་མིག་མཆོག་ཐོབ་ནས་དེ་དག་གི་དོན་ལ་མཁས་པར་འགྱུར་བ་ཡིན། དེ་ཡང་ཡིད་བཞིན་མཛོད་ལས།6ཡང་ཟབ་ལྟ་བའི་མཐར་ཐུག་འདི་ཤེས་པས། །གོལ་སྒྲིབ་ལས་གྲོལ་རྟག་ཆད་ཀུན་དང་བྲལ། །སྒྲུབ་པ་དོན་ཡོད་མྱུར་དུ་འཚང་རྒྱ་ཞིང་། །མདོ་རྒྱུད་ཀུན་ལ་ལྟ་བའི་མིག་དང་ལྡན། །དེ་ཕྱིར་གནས་ལུགས་འོད་གསལ་མཁྱེན་པར་མཛོད། །ཅེས་དང་ཀུན་མཁྱེན་རིག་འཛིན་འཇིགས་མེད་གླིང་པས།7སྙིགས་མའི་དུས་ན་རྫོགས་ཆེན་སྒོམ་པ་རྣམས། །གཞི་ལམ་འབྲས་བུའི་གནད་ལ་རྨོངས་གྱུར་བས། །འདོད་ཁའི་ལྟ་སྒོམ་མཐོན་པོ་ཕྱོགས་འཛིན་པས། །ཡིད་དཔྱོད་སྒྲོག་ལས་གྲོལ་བ་ཉིན་སྐར་ཙམ། །ཞེས་གསུངས་པ་ལྟར་གཞི་ལམ་འབྲས་བུའི་གནད་ལ་མི་རྨོངས་པ་དང་ཆོས་ཐམས་ཅད་གང་ལས་བྱུང་བ་ཡིན་པ་ཤེས་པའི་ཁེ་ཕན་ཡོད། གསང་སྙིང་མཛོད་ཀྱི་ལྡེ་མིག་ལས།8ཆོས་ཐམས་ཅད་ཀྱི་འབྱུང་གནས་སུ་གྱུར་པ་གཞི། ཞེས་དང་། དེ་ཉིད་ལས།9 ཏིལ་ལ་མར་ཡོད་པར་ཤེས་ན་བཏག་བཙག་གི་ངལ་བ་ལ་མི་འཛེམ་པར་ཞུགས་ནས་མར་འཐོབ་པ་བཞིན་དུ་རང་རྒྱུད་ལ་སངས་རྒྱས་ཀྱི་བསྒྲུབ་གཞི་མཐར་ཐུག་ཡོད་ཚུལ་དང་། དེའི་ཁྱད་ཆོས་ལེགས་པར་ཤེས་ན་དེ་ཉིད་ཤིན་ཏུ་རྣམ་དག་འབྲས་བུའི་གནས་སྐབས་དང་རྣམ་པ་མཐུན་པར་ལམ་དུ་བྱས་ནས་ཡར་ལྡན་དུ་འཁྱེར་བའི་ཐབས་མཁས་ཀྱི་གནད་ལ་ངེས་པ་རྙེད་ནས་བརྩོན་པས་སྒྲུབ་ནུས་ཤིང་། དེས་མཐར་ཐུག་གི་འབྲས་བུ་འགྲུབ་པའི་ཕྱིར་རོ། །ཞེས་དང་མཁས་པའི་ཚུལ་ལ་འཇུག་པའི་སྒོ་ལས།10དེ་ལྟར་རྟོགས་ན་ཆོས་འདི་དག་རྟེན་འབྲེལ་གྱི་སྣང་བ་བསླུ་མེད་ཙམ་ལས། བདག་དང་གཞན་དང་གཉིས་ཀ་དང་རྒྱུ་མེད་ལས་མ་བྱུང་བས་མ་སྐྱེས་པ། དུས་དང་དབང་ཕྱུག་སོགས་བྱེད་པོས་མ་བྱས་པ། སྲོག་དང་གང་ཟག་དང་བྱེད་པ་པོ་དང་བདག་དང་ཆོས་ཀྱི་ངོ་བོ་མེད་པ། གསོག་དང་གསོབ་དང་རང་བཞིན་མེད་པར་ཤེས་ནས། བདག་སྔོན་དང་ད་ལྟ་ཕྱི་མར་ཇི་ལྟར་གྱུར་པའི་མཐའ་ལ་རྟོག་པ་སོགས་ཀྱི་གཡོ་བ་དང་བྲལ་ཏེ་ཕྱིས་མི་སྐྱེ་བར་བྱེད་པའི་བཟོད་པ་དང་ལྡན་པ་དེ་ལ་སངས་རྒྱས་རྣམས་ཀྱིས་བླ་མེད་བྱང་ཆུབ་ཏུ་ལུང་སྟོན་པར་འགྱུར་རོ། །ཞེས་གསུངས་པ་ལྟར་ཆོས་ཐམས་ཅད་ཀྱི་འབྱུང་གནས་གང་ལས་བྱུང་བའི་གནད་དང་། རང་རྒྱུད་ལ་སངས་རྒྱས་ཀྱི་བསྒྲུབ་གཞི་མཐར་ཐུག་ཡོད་ཚུལ་རྣམས་ཤེས་ནུས་པའི་དགོས་པ་ཡོད་དོ།།
གཉིས་པ། བཀའ་བསྟན་དག་ལས་གཞི་རྒྱུད་ཀྱི་ངོ་བོ་འཇོག་ཚུལ་དང་། དེའི་འཕྲོས་དོན་འགའ་ཞིག་བཤད་པ་གཉིས་ལས། དང་པོ་ནི།
རྩ་རྒྱུད་གསང་སྙིང་ལེའུ་གཉིས་པར།11བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། ཞེས་གསུངས། སྤྱི་དོན་འོད་གསལ་སྙིང་པོ་ལས།12འདི་ལྟར་སྣང་སྲིད་ཀྱིས་བསྡུས་པའི་ཆོས་ཐམས་ཅད་ཡེ་ནས་སྐུ་གསུང་ཐུགས་ཀྱི་དཀྱིལ་འཁོར་དུ་དག་ཅིང་། མཚན་མ་མཐའ་དག་དང་བྲལ་བས་ན་སོ་སོར་རིས་སུ་མ་ཆད་པར་མཉམ་པ་ཉིད་ཆེན་པོར་སངས་རྒྱས་པ་ནི་གཞི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ཞེས་བྱའོ། །གསང་སྙིང་སྤྱི་དོན་མཛོད་ཀྱི་ལྡེ་མིག་ལས།13ཆོས་ཐམས་ཅད་ཀྱི་འབྱུང་གནས་སུ་གྱུར་པ་གཞི་རྒྱུད་ཀྱི་མཚན་ཉིད་དོ། །དེ་ལ་ཡང་གཙོ་བོའི་དོན་གནས་ལུགས་ངོ་བོ་ཉིད་ཀྱི་གཞི་དང་། ཞར་བྱུང་འཁྲུལ་པ་བཏགས་པའི་གཞི་སྟེ་གཉིས་ལས། དང་པོ་ནི། གསང་བདག་དགོངས་རྒྱན་ལས།14བཅིངས་གྲོལ་མེད་པའི་གནས་ལུགས་རང་རིག་པ་བྱང་ཆུབ་ཀྱི་སེམས་བདེན་པ་དབྱེར་མེད་བློའི་སྤྱོད་ཡུལ་དང་བྲལ་བར་ཡེ་ནས་གནས་པ། ཞེས་དང་། སྤྱི་དོན་འོད་གསལ་སྙིང་པོ་ལས།15གཉིས་ཆོས་ཀྱི་ཚུལ་ཀུན་དང་བྲལ་བས་ན་རྒྱ་ཆད་ཕྱོགས་ལྷུང་མེད་པ་དང་བདེན་པ་གཉིས་དབྱེར་མེད་པའི་རང་བཞིན་དུ་བཞུགས་པ་ནི་གནས་ལུགས་ངོ་བོ་ཉིད་ཀྱི་གཞི་ཞེས་བྱ། ཞེས་དང་། རྒྱུད་སྒྱུ་འཕྲུལ་དྲྭ་བ་ཆེན་པོ་ལས།16ཨེ་མ་ཧོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །བདག་དང་བདག་གིར་སོ་སོར་འཛིན། །སུས་ཀྱང་མ་བཅིངས་བཅིངས་མེད་དེ། །བཅིང་བར་བྱ་བ་ཡོད་མ་ཡིན། །རྣམ་རྟོག་བདག་ཏུ་འཛིན་པ་ཡིས། །ནན་གྱིས་མཁའ་ལ་མདུད་པ་འདོར། །ཞེས་པ་ལྟར་རོ། །ཡང་ཀློང་དྲུག་པ་ལས།17ཐོག་མ་བབས་ཀྱི་གྲུབ་པའི་གཞི། །ཡོད་ནི་གཅིག་ལས་མེད་པ་ལ། །འཁྲུལ་བར་སྣང་བའི་ཕྱོགས་དག་ནས། །རྟོག་ཚོགས་རྣམས་ཀྱི་གཏན་ཕབ་ན། །རིམ་པ་བདུན་གྱི་ཚུལ་དུ་གནས། ཞེས་དང་། ཁྱུང་ཆེན་ལས།18བརྟགས་ན་མེད་ལ་བཞག་ན་ལེགས་པ་འབྱུང་བ་ཆེ། །མངོན་སུམ་མི་སྣང་ཆགས་པས་ཆ་ལུགས་ཀུན་ལ་སྟོན། །བདག་དང་གཞན་དུ་བྲལ་བའི་སྟོན་མཁན་རིན་ཆེན་མཛོད། །ཅེས་སོ།།
གཉིས་པ་འཁྲུལ་པ་བཏགས་པའི་གཞི་ནི། ཡིད་བཞིན་མཛོད་ལས།19ཐོག་མའི་འོད་གསལ་བདེ་གཤེགས་སྙིང་པོ་ཉིད། །དོན་གྱི་ཀུན་གཞི་རང་བཞིན་འདུས་མ་བྱས། །ཡེ་ནས་རྣམ་དག་ཉི་མཁའ་ལྟ་བུ་ལས། །མ་རིག་ཀུན་བརྟགས་གློ་བུར་སྒྲིབ་པའི་སྤྲིན། །གཟུང་འཛིན་འཁྲུལ་པའི་བག་ལ་ཉལ་ལངས་པས། །ཡུལ་དང་དོན་དང་ལུས་སུ་བག་ཆགས་ཏེ། །རིག་པའི་རང་བཞིན་འོད་གསལ་སྙིང་པོ་བསྒྲིབ། ཞེས་གསུངས། གསང་སྙིང་སྤྱི་དོན་མཛོད་ཀྱི་ལྡེ་མིག་ལས།20གནས་ལུགས་ཀྱི་རང་ཞལ་འགེབས་ཤིང་སྒྲིབ་པར་བྱེད་པའི་ཞེན་སྣང་ནི་ཕྱིན་ཅི་ལོག་ཏུ་སྒྲོ་བཏགས་ནས་འཁོར་བ་ཕྲ་རགས་ཀྱི་རྟེན་དུ་གྱུར་པས་འཁྲུལ་པ་བཏགས་པའི་གཞི་ཞེས་བྱའོ། །སྤྱི་དོན་འོད་གསལ་སྙིང་པོ་ལས།21གཞི་དེ་ཉིད་ཇི་ལྟ་བ་བཞིན་དུ་མ་རྟོགས་པར་འཁྲུལ་པ་གློ་བུར་བས་བསླད་ནས་ཕྱིན་ཅི་ལོག་ཏུ་སྣང་ཞིང་ཞེན་པ་ལ་འཁྲུལ་པ་བཏགས་པའི་གཞི་ཞེས་གསུངས་སོ།།
གཉིས་པ་དེ་ལས་འཕྲོས་ནས་ཐོག་མའི་གཞིའི་སྐོར་ཅུང་ཟད་གླེང་བ། དེ་ཡང་རྫོགས་ཆེན་སྙིང་གི་མེ་ལོང་ལས།22 གཞིའི་ཆོས་ཐམས་ཅད་ངོ་བོ་རང་བཞིན་ཐུགས་རྗེ་གསུམ་དུ་ཤེས་པར་གྱིས་ཤིག དེ་ཡང་ངོ་བོའི་ཆོས་ཐམས་ཅད་སྟོང་པར་ཤེས་པར་གྱིས་ཤིག རང་བཞིན་གྱི་ཆོས་ཐམས་ཅད་གསལ་བར་ཤེས་པར་གྱིས་ཤིག ཐུགས་རྗེའི་ཆོས་ཐམས་ཅད་ཀུན་ཁྱབ་པར་ཤེས་པར་གྱིས་ཤིག ཅེས་གསུངས་པ་ལྟར་གཞི་རང་གི་ངོ་བོ་ལ་འཁོར་བ་མྱང་འདས་བླང་དོར་ལ་སོགས་མཚན་མ་མཐའ་དག་མེད་པ་རྟག་པའི་མཐའ་ལས་གྲོལ་བ་ངོ་བོ་སྟོང་པ་ཡིན་པ་དང་། ངོ་བོ་ཀ་ནས་དག་ཀྱང་རང་བཞིན་ལ་སྐུ་གསུང་ཐུགས་ཀྱི་ཡོན་ཏན་ཐམས་ཅད་ལྷུན་གྲུབ་ཏུ་གནས་པས་ཆད་མཐའ་ལས་གྲོལ་བ་རང་བཞིན་འོད་གསལ་བ་དང་། ཐུགས་རྗེ་རྣམ་པར་མི་རྟོག་པའི་ཡེ་ཤེས་རང་བཞིན་མཁྱེན་ཆ་མ་འགག་པར་མཚན་ཉིད་ལྔ་ལྡན་དུ་བཞུགས་པ། རང་བཞིན་ཤུགས་ཀྱིས་སེམས་ཅན་གྱི་ཁམས་རྗེས་སུ་བཟུང་བས་གཉིས་ཀའི་མཐའ་ལས་གྲོལ་བ་ཐུགས་རྗེ་སྤྲུལ་པའི་སྐུའོ། །དེ་ལྟར་ཡང་ཐལ་འགྱུར་ལས།23ཐོག་མའི་ངོ་བོ་རང་བཞིན་དང་། །ཐུགས་རྗེ་རྣམ་པ་གསུམ་དུ་གནས། །དེ་ཡང་ངོ་བོ་སྐུར་གནས་པ། །ཆོས་དང་ལོངས་སྤྱོད་སྤྲུལ་པའི་ཆར། །མ་ཕྱེ་འབྱེད་པ་མེད་པའི་ཚུལ། །ཞེས་དང་། ཀུན་མཁྱེན་རིག་འཛིན་འཇིགས་མེད་གླིང་པས།24 གཞི་ཡི་ཆོས་ཉིད་ཀྱང་། ངོ་བོ་རང་བཞིན་ཐུགས་རྗེ་གསུམ་དུ་རྫོགས། ཞེས་དང་། སྨོན་ལམ་སྟོབས་པོ་ཆེ་ལས།25ཀུན་གྱི་གཞི་ནི་འདུས་མ་བྱས། །རང་བྱུང་ཀློང་ཡངས་བརྗོད་དུ་མེད། །འཁོར་འདས་གཉིས་ཀའི་མིང་མེད་དོ། །དེ་ཉིད་རིག་ན་སངས་རྒྱས་ཏེ། །མ་རིག་སེམས་ཅན་འཁོར་བར་འཁྱམས། །ཞེས་དང་། དེ་ཉིད་ལས། ལྷན་ཅིག་ཀུན་བཏགས་མ་རིག་གཉིས། །སེམས་ཅན་ཀུན་གྱི་འཁྲུལ་གཞི་ཡིན། །ཞེས་གསུངས་སོ།།
དེ་དང་གཞིའི་འོད་གསལ་མངོན་དུ་འགྱུར་པའི་དུས་ནི། གཞིའི་སྐབས་སུ་ནི། ཡེ་ཤེས་དེས་གང་ཞིག་གསལ་ན་རང་ཡུལ་ཐུན་མིན་དབྱིངས་གསལ་བ་ལས་མི་གཡོ་ཡང༌། དབྱིངས་ཀྱི་ཕྱོགས་དེ་རྒྱ་ཆུང་བའི་ཚུལ་གྱིས་གསལ་བ་ཙམ་ལས་ཕྱོགས་ཐམས་ཅད་ནས་ཐམས་ཅད་དུ་གསལ་བ་མིན་ཏེ། ཡེ་ཤེས་དེ་དང་འདུ་འབྲལ་མེད་པའི་ཡེ་རླུང་ཕྲ་བ་དེ་ཐོག་མེད་ཀྱི་བག་ཆགས་མཐུག་པོས་བསླད་དེ་ལས་རླུང་རགས་པར་མཆེད་པའི་སྐབས་ཡིན་པའི་ཕྱིར། གཉིད་དང༌། བརྒྱལ་བ་དང༌། སྙོམས་འཇུག་གི་སྐབས་རྣམས་སུ་སྲབ་མོའི་ཚུལ་གྱིས་མངོན་དུ་གྱུར་པ་ཡོད་མོད། ཇི་བཞིན་ཤར་བ་ནི་འཆི་བའི་སྐབས་ཁོ་ན་སྟེ། དེ་ཡང་དྲོད་སྐྱེས་སོགས་འཆི་བའི་ཚེ་དེ་ཙམ་མི་ཤར། མངལ་སྐྱེས་ཁམས་དྲུག་ལྡན་གྱི་མི་ལ་རྩ་རླུང་རགས་པ་ཡོད་པས། དེའི་ཕུང་པོ་འགག་སྟོབས་ཀྱིས་འོད་གསལ་མངོན་དུ་གྱུར་ཡང༌། མེ་ཆུ་དང་འཕྲད་ཚེ་ཤི་བ་བཞིན། ཕུང་པོ་སྡུད་སྟོབས་ཀྱིས་ཀུན་རྟོག་འགགས་ནས་དབང་མེད་དུ་ཤར་བ་ཡིན། དེ་ཡང་དབྱིངས་མཐར་ཐུག་ལ་གསལ་ཆ་ཞན་པོ་ཞིག་ཡིན་ཏེ། བག་ཆགས་ཀྱི་དབང་གིས་ཡེ་རླུང་དུ་མ་སད་པའི་ཕྱིར། དེས་ན་གཞི་ཡི་དུས་སུ་དབྱིངས་ཤུགས་ཆེ་བ་དང༌། ལམ་སྟོབས་ཀྱིས་ཀུན་རྟོག་བསྡུས་ཏེ་ཤར་བ་ནི། ཡེ་རླུང་སད་དེ་གསལ་ཆ་ཤེས་རབ་ཏུ་མཆེད་པས་དབྱིངས་ཡེ་མཉམ་པའི་དོན་འོད་ཅིག་མཉམ་བཞག་ཏུ་ཤར་ཡང༌། གཡོ་བའི་བག་ཆགས་མ་སྤངས་བའི་དབང་གིས་རྗེས་ཐོབ་མ་དག་པར་སྣང་བའི་རེས་འཇོག་ཅན་ཡིན་ལ། གཡོ་བ་ལྷག་མེད་དུ་དག་པ་ནས་སངས་རྒྱས་པ་ཡིན་ཏེ། སེམས་ཅན་ནས་སངས་རྒྱས་ཀྱི་བར་དུ་ཤར་སོ་རྒྱུན་མ་ཆད་པར་འགྲོ་བ་ནི་དེ་ཉིད་གཅིག་པུ་ཡིན་ནོ།།
གསུམ་པ། མདོ་སྔགས་གཉིས་ཀྱི་འཁོར་བ་གྲུབ་ཚུལ་དང་། གཞི་ངོས་འཛིན་གྱི་ཁྱད་པར་གཉིས་ལས། དང་པོ་ནི།
མདོ་མཚན་ཉིད་ཐེག་པར་སེམས་བྱུང་མ་རིག་པ་ཉིད་འཁོར་བའི་རྩ་བར་གསུངས། དེ་ཡང་རྟེན་འབྲེལ་ལུགས་འབྱུང་ལས་འཁོར་བ་དང་ལུགས་ལྡོག་ལས་མྱང་འདས་གསུངས། མདོ་སྡེ་རྒྱན་འགྲེལ་ཐེག་མཆོག་བདུད་རྩིའི་དགའ་སྟོན་ལས།26ཉན་ཐོས་པའི་གཞུང་ལས་རྟེན་ཅིང་འབྲེལ་འབྱུང་སྐྱེ་ཞིང་འགག་པའི་ཆོས་ཅན་ལུགས་འབྱུང་གིས་འཁོར་བ་དང་། ལུགས་ལས་ལྡོག་པས་མྱང་འདས་སུ་བཤད་དོ། །ཞེས་དང་། དེ་ལྟར་ལུགས་འབྱུང་གི་རྟེན་འབྲེལ་འཁྲུལ་པ་དག་ནི་རྒྱུ་མེད་རྐྱེན་མེད་ལས་བྱུང་བ་མིན་ཏེ། ཐེག་པ་འོག་མ་དག་གིས་སེམས་བྱུང་མ་རིག་པ་དེ་འཁོར་བའི་རྩ་བར་འདོད་དེ། སྤྱི་དོན་འོད་གསལ་སྙིང་པོ་ལས།27དེ་ལ་འཁྲུལ་པ་དེ་དག་རྒྱུ་མེད་པར་འབྱུང་མི་སྲིད་པས་འདིའི་རྩ་བ་གང་ཡིན་སྙམ་ན། ཐུན་མོང་གི་ཐེག་པར་སེམས་བྱུང་མ་རིག་པ་ཉིད་འཁོར་བའི་རྩ་བར་གསུངས་ལ། ཞེས་གསུངས་པ་ལྟར་མཁས་འཇུག་ལས།28ནང་གི་རྟེན་འབྲེལ་ལ་རྒྱུ་དང་འབྲེལ་བ་ནི་ཡན་ལག་བཅུ་གཉིས་ཏེ། གང་ཞེ་ན་མདོ་ལས། རྟེན་ཅིང་འབྲེལ་བར་འབྱུང་བ་ཞེས་བྱ་བ་ནི་འདི་ལྟ་སྟེ། འདི་ཡོད་པས་ན་འདི་བྱུང་ལ། འདི་སྐྱེས་པའི་ཕྱིར་འདི་སྐྱེ་བ་སྟེ། གང་འདི་མ་རིག་པའི་རྐྱེན་གྱིས་འདུ་བྱེད་རྣམས་དང་། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་སོགས་ནས། དེ་བཞིན་དུ་མིང་དང་གཟུགས་དང༌། སྐྱེ་མཆེད་དྲུག རེག་པ། ཚོར་བ། སྲེད་པ། ལེན་པ། སྲིད་པ། སྐྱེ་བ། རྒ་ཤིའི་བར་དུ་སྦྱར་ཞིང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང༌། འཁྲུག་པ་རྣམས་བྱུང་སྟེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འབྱུང་བར་འགྱུར་རོ། །དེ་ལ་མ་རིག་པ་འགགས་པས་འདུ་བྱེད་འགགས་སོགས་ནས། སྐྱེ་བ་འགགས་པས་རྒ་ཤི་དང་མྱ་ངན་སོགས་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འགག་པར་འགྱུར་རོ། །ཞེས་གསུངས་སོ། །གསང་བ་སྔགས་ཀྱི་ཐེག་པར་ལས་རླུང་ཕྲ་མོའམ་ཕྲ་བའི་ཁུ་རྡུལ་རླུང་གསུམ་གྱི་བྱེད་ལས་སྣང་གསུམ་འཕོ་བའི་བག་ཆགས་ལ་གསུངས། དེ་ལྟར་སྤྱི་དོན་འོད་གསལ་སྙིང་པོ་ལས།29སྔགས་རྒྱུད་ལས་ནི་སེམས་དེ་ཡང་གཟུང་འཛིན་དུ་གཡོ་བའི་རྐྱེན་ལས་རླུང་ཕྲ་མོའམ། ཕྲ་བའི་ཁུ་རྡུལ་རླུང་གསུམ་གྱི་བྱེད་ལས་སྣང་གསུམ་འཕོ་བའི་བག་ཆགས་སུ་གསུངས་ཤིང་། དེ་འདྲའི་རླུང་སེམས་ཤིན་ཏུ་ཕྲ་བའི་རྩ་བའང་གདོད་མའི་རང་སྣང་མ་འགགས་པ་ལས་བྱུང་བས་ན། ཐེག་པ་ཐམས་ཅད་ཀྱི་གཞི་བཤད་པ་ཀུན་རྫོགས་ཆེན་གྱི་གཞི་ལ་མཐར་ཐུག་པ་ཤེས་པར་བྱའོ། །ཞེས་དང་། གསང་བ་སྙིང་པོ་ལས།30གདོད་མའི་གནས་ལུགས་སེམས་ཉིད་འོད་གསལ་བ་བདེ་གཤེགས་སྙིང་པོའི་ངང་ལས་འཁྲུལ་ལོ། །དེའང་བདེ་གཤེགས་སྙིང་པོ་ནི་སེམས་ཉིད་འོད་གསལ་བ་སྐུ་གསུམ་འདུ་འབྲལ་མེད་པའི་ངོ་བོར་གནས་པ་དེ་ཉིད་ཡིན་ནོ། །ཞེས་དང། ཡང་དེ་ཉིད་ལས།31རྐྱེན་གང་གིས་འཁྲུལ་ན་སེམས་ཅན་རང་རང་གི་རྣམ་པར་རྟོག་པ་རང་ཤར་དུ་བྱུང་བས་རྒྱུ་བྱས་པའི་ལས་ཀྱིས་འཁོར་བའི་གྲོང་ཁྱེར་ཆེན་པོ་འདི་རང་སྣང་རྨི་ལམ་ལྟར་སྤྲུལ་ལོ། །དེའང་ལྷ་ལ་སོགས་པའི་འགྲོ་བ་སྣ་ཚོགས་པའི་ལུས་དང་དེ་དག་གི་འདོད་པའི་ལོངས་སྤྱོད་དང་། མཐོ་རིས་ལ་སོགས་པའི་གནས་དང་རང་རང་གི་བདེ་བ་དང་སྡུག་བསྔལ་ལ་སོགས་པ་དུ་མར་སྣང་བ་ལ། འགྲོ་བ་རྣམས་ང་ཞེས་བདག་ཏུ་འཛིན་པ་དང་ངའི་ཡོ་བྱད་ཅེས་པ་ལ་སོགས་པ་བདག་གིར་བྱེད་པས་སོ་སོར་གཟུང་འཛིན་གཉིས་སུ་འཛིན་པས་ནམ་ཡང་འཁོར་བ་ལས་མི་གྲོལ་བར་འགྱུར་རོ། །ཞེས་གསུངས་པ་རྣམས་ནི་མདོ་སྔགས་གཉིས་འཁོར་བ་གྲུབ་ཚུལ་ཙམ་མོ། །གཉིས་པ་གཞི་ངོས་འཛིན་གྱི་ཁྱད་པར་ནི། སྙིང་པོ་བསྟན་པའི་མདོ་དང་སྔགས་རྒྱུད་གཉིས་ཀྱི་གཞི་ངོས་འཛིན་ཚུལ་ཁྱད་པར་ནི་། སྤྱི་དོན་འོད་གསལ་སྙིང་པོ་ལས།32 དེ་ལྟ་བུའི་གཞི་དེ་ཉིད་ལ་སྟོང་པ་ཉིད་ཀྱི་ཆ་ནས་རྒྱལ་བའི་ཡུམ་ལ་སོགས་པ་ལས་ཆོས་ཀྱི་དབྱིངས་དང་། ཡང་དག་པའི་མཐའ་དང་། དེ་བཞིན་ཉིད་ལ་སོགས་པའི་མིང་གིས་བསྟན་ཅིང་། སྐུ་དང་ཡེ་ཤེས་ཀྱི་སྣང་བ་དང་བཅས་པའི་ཆ་ནས་སྙིང་པོ་བསྟན་པའི་མདོ་ལ་སོགས་པ་ནས་དེ་བཞིན་གཤེགས་པའི་སྙིང་པོ་ཞེས་པའི་མིང་གིས་བསྟན་ལ། ངེས་དོན་སྔགས་ཀྱི་ཐེག་པ་འདིར་ནི་སྣང་སྟོང་བདེན་པ་དབྱེར་མེད་དག་མཉམ་ཆེན་པོའི་བདག་ཉིད་གདོད་མ་གཞི་ཡི་དཀྱིལ་འཁོར་ཞེས་བྱའོ། །དེ་བཞིན་དུ། སྡོམ་གསུམ་རྣམ་ངེས་རིག་འཛིན་འཇུག་ངོགས་ལས།33དེ་ལ་བསྟན་བཅོས་རྣམས་སུ་རིགས་ཞེས་བཤད་ཅིང་གྲུབ་མཐའི་དབང་གིས་འདོད་པ་མི་འདྲ་བ་ཡོད་དེ། བྱེ་སྨྲས་སྲིད་པ་དང་སྲིད་པའི་ཡོ་བྱད་ལ་མ་ཆགས་པའི་སེམས་བྱུང་ཆོག་ཤེས་པ་ལ་འཕགས་པའི་རིགས་སུ་འདོད། མདོ་སྡེ་པས་སེམས་ཀྱི་ས་བོན་ཟག་མེད་ཀྱི་ཡེ་ཤེས་འབྱུང་རུང་གི་ནུས་པ་ལ་འདོད། སེམས་ཙམ་པས་ཐོག་མེད་ནས་སེམས་རྒྱུད་ལ་གནས་པའི་ཟག་མེད་ཀྱི་ཆོས་བསྐྱེད་པར་བྱེད་པའི་ནུས་པ་ཆོས་ཉིད་ཀྱིས་ཐོབ་པ་ལ་འདོད། དེ་ཐམས་ཅད་འདུས་བྱས་ཏེ་དངོས་པོར་སྨྲ་བའི་ལུགས་སོ། །དབུ་མ་པས་ནི་དྲི་བཅས་དེ་བཞིན་ཉིད་ལ་འདོད་པ་ཕལ་ཆེར་མཐུན་ཡང་ངོས་འཛིན་ལུགས་མི་འདྲ་བ་མང་དུ་སྣང་མོད། འདིར་ཐེག་ཆེན་ཐུན་མོང་མ་ཡིན་པའི་ལུགས་ལྟར་ན། སེམས་ཉིད་ཡེ་ནས་རྣམ་པར་དག་པ་འདུས་མ་བྱས་པའི་ཡེ་ཤེས་སྟོང་གསལ་འཕོ་འགྱུར་མེད་པར་གནས་པ་ནི་བདེ་གཤེགས་སྙིང་པོ་སྟེ། ཏིང་འཛིན་རྒྱལ་པོའི་མདོ་ལས། དག་པ་དྭངས་བ་འོད་གསལ་བ། །མི་འཁྲུགས་འདུས་མ་བྱས་པ་ཉིད། །བདེ་བར་གཤེགས་པའི་སྙིང་པོ་སྟེ། །ཡེ་ནས་གནས་པའི་ཆོས་ཉིད་དོ། །ཞེས་གསུངས་ལ། སྙིང་པོ་དེ་ཡང་རྒྱུད་བླ་མར།34 རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་གསུངས་སོ། །སྔགས་རྒྱུད་སྐབས་ལ་ཆོས་ཉིད་མཐར་ཐུག་པ་གནས་ལུགས་ངོ་བོ་ཉིད་ཀྱི་གཞི་འམ་རང་བཞིན་ལྷུན་གྲུབ་ཀྱི་དཀྱིལ་འཁོར་ལ་བཞེད་དོ། །དེ་ལྟར་ཡང་སྡོམ་གསུམ་རྣམ་ངེས་རིག་འཛིན་འཇུག་ངོགས་ལས།35རྡོ་རྗེ་ཐེག་པར་གཞི་རྒྱུད་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ཞེས་གྲགས་ཏེ། མི་འགྱུར་བའི་བདེ་ཆེན་དང་རྣམ་ཀུན་མཆོག་ལྡན་གྱི་སྟོང་ཉིད་དབྱེར་མི་ཕྱེད་པའི་སེམས་ཀྱི་ཆོས་ཉིད་ལ་བཤད་ཅིང༌། ཁྱད་པར་དུ་ཨ་ཏི་ཡོ་གར་སེམས་ཀྱི་ཆོས་ཉིད་རིག་པ་སྟོང་གསལ་གྱི་ངོ་བོ་ལ་སྐུ་དང་ཡེ་ཤེས་ཀྱི་ཆོས་ཐམས་ཅད་ཉི་མ་དང་འོད་ཟེར་བཞིན་འདུ་འབྲལ་མེད་པར་ཡོངས་སུ་རྫོགས་པས་རྫོགས་པ་ཆེན་པོའོ།།
བཞི་པ། གཞི་སྣང་འཁོར་འདས་གང་ཡིན་མིན་སྐོར།
དེ་ལ་ཁ་ཅིག་གིས་དེ་འཁོར་འདས་གང་ཡང་མ་ཡིན་ཏེ། དེ་གཉིས་སུ་འཁྲུལ་གྲོལ་དུ་བྱེད་པའི་གཞི་མ་ངེས་པའི་སྣང་བ་ཡིན་པའི་ཕྱིར། ཚིག་དོན་མཛོད་ལས།36གཞི་ནས་འཕགས་པའི་རིག་པ་ས་བོན་ལྟ་བུ་གྲོལ་འཁྲུལ་གང་བྱེད་མ་ངེས་པས་མ་སྨིན་པའི་རིག་པ་ཞེས་བྱ་སྟེ། ཞེས་སོགས་དང་། མུ་ཏིག་ཕྲེང་བར།37གཞི་སྣང་ཆེན་པོ་ཤོང་རེ་ཆེ། །འཁོར་འདས་གཉིས་པོ་འབྲེལ་རེ་མཁས། །ཞེས་དང་། རང་ཤར་ལས།38 གཞི་མ་ངེས་པ་ཞེས་བྱ། གཞི་སྣ་ཚོགས་སུ་འཆར་བ་ཞེས་ཀྱང་བྱའོ། །ཞེས་གསུངས་པའི་ཕྱིར་འཁོར་འདས་འབྱུང་བའི་སྒོ་དང༌། འཁོར་འདས་ད་གདོད་འབྱུང་བའི་རྐྱེན་དང་། རིག་མ་རིག་སྟོབས་མཚུངས་ཀྱི་སྐབས་འཁོར་འདས་གཉིས་ཀྱི་འབྱུང་གཞི་ཡིན་པས་གང་ཡང་མ་ཡིན་ནོ་ཟེར་ན། ལུང་དེ་དག་ནི་གཞི་ལས་འཕགས་པའི་རིག་པ་དེ་འཁྲུལ་གྲོལ་གང་དུའང་འགྱུར་ཆོག་པ་ཙམ་ལ་དགོངས་པ་ཡིན་གྱི་ཁོ་རང་འཁོར་འདས་གང་རུང་ལས་མ་འདས་ཏེ། གངས་རི་གཅིག་ལས་དཀར་སྣང་དང་སེར་སྣང་ཅི་རིགས་པ་བྱུང་རུང་སྣང་གཞི་དེ་ལས་གང་རུང་དུ་ངེས་པ་བཞིན་ནོ། །མདོར་ན། གཞི་ནས་འཕགས་པའི་རིག་པ་ཡིན་ན། རང་སྣང་ངོ་ཤེས་མ་ཤེས་གང་རུང་ཡིན་པས་ཁྱབ་སྟེ། ཀུན་ཏུ་བཟང་པོས་རང་སྣང་དུ་ཤེས་པ་གཞི་ནས་འཕགས་པའི་སྐད་ཅིག་དང་པོ་ལ་ཡིན་པ་གང་ཞིག འཁོར་བའི་སེམས་ཅན་གྱིས་རང་ངོ་མ་ཤེས་པའི་མ་རིག་པ་ཡང་དེའི་དུས་ནས་གཞག་དགོས་པའི་ཕྱིར། དེ་ལྟར་མིན་ན་དངོས་འགལ་བར་ན་ཕུང་གསུམ་པ་ཡོད་པར་ཐལ་བ་སོགས་ཀྱང་བཟློག་མེད་འབབ་པར་གྱུར་རོ། །དེས་ན་སྤྱི་དོན་འོད་གསལ་སྙིང་པོ་ལས།39རང་རྩལ་ལས་གཡོས་པ་དེ་ཉིད་རྐྱེན་ལས་གོལ་ཏེ་གཞི་དང་མི་མཐུན་པར་གཟུང་འཛིན་ཅན་དུ་སོང་ན་སེམས་ཞེས་བྱ་སྟེ་འཁྲུལ་པ་ཡིན་ཞིང་འཁོར་བའི་བག་ཆགས་ཐམས་ཅད་ཀྱི་གཞི་འཛིན་པ་རྩྭ་སོག་གི་གཟེབ་ལྟ་བུའོ། །ཕྱིན་ཅི་མ་ལོག་པར་ཤར་ན་ཡེ་ཤེས་ཞེས་བྱ་སྟེ། ཇི་ལྟར་ན་མེ་དང་འདྲ་བར་གཟུང་འཛིན་འཁོར་བའི་བག་ཆགས་ཚང་ཚིང་ལྟ་བུ་རྣམས་སྲེག་པར་བྱེད་ཅིང་རྣམ་པར་གྲོལ་བར་བྱས་པས་ན་འདི་གཉིས་གནད་མ་ལོག་པ་གལ་ཆེའོ། །ཞེས་དང་། ཆོས་རྗེ་ཡིད་བཞིན་ནོར་བུས།40གཞི་ནས་འཕགས་པའི་རིག་པ་ལ་རང་ངོ་ཤེས་མ་ཤེས་གང་ཡང་མིན་པའི་རིག་ཙམ་པོའོ། །ཟེར་བ་འདི་དེང་སང་ཤིན་ཏུ་མང་སྟེ་ད་དུང་བརྒལ་བར་འདོད་ན་སླར་ཡང་སྤྲོས་པས་ཆོག་གོ །ཞེས་གསུངས་པ་ལྟར་རོ།།
ལྔ་པ། ཆོས་སྐུ་ཀུན་ཏུ་བཟང་པོས་གཞི་རྒྱུད་ངོ་ཤེས་ནས་ཇི་ལྟར་གྲོལ་ཚུལ།
གདོད་མའི་མགོན་པོ་ཆོས་སྐུ་ཀུན་ཏུ་བཟང་པོས་ཁྱད་ཆོས་དྲུག་གིས་གཞི་སྣང་ངོ་ཤེས་ནས་སྐད་ཅིག་གཅིག་ལ་མངོན་པར་རྫོགས་ཏེ་སངས་རྒྱས་སོ། །དེ་ལྟར་ཡང་ཡོན་ཏན་མཛོད་ལས།41དེ་ཚེ་གཞི་སྣང་མཐོང་བའི་སྐད་ཅིག་མར། །དང་པོའི་སངས་རྒྱས་ཀུན་ཏུ་བཟང་པོ་དེས། །སྣང་བ་འཁྲུལ་པར་མ་མཆེད་རང་སྣང་དུ། །རིག་པས་ལུང་མ་བསྟན་གྱི་གཞི་ལས་འཕགས། །གཞི་ཉིད་འབྲས་བུ་སྨིན་པའི་ཤེས་རབ་ཀྱིས། །སྐད་ཅིག་གཅིག་ལ་བྱེ་བྲག་རབ་ཏུ་ཕྱེད། །ཕྱེད་ཐོག་ཤེས་རབ་ཉིད་ཀྱང་སྐུར་སྨིན་པ། །གཞན་བྱུང་རྐྱེན་ལ་མ་ལྟོས་རང་སར་གནས། །སྐུ་དང་ཡེ་ཤེས་རྒྱ་མཚོའི་བདག་ཉིད་དུ། །སྐད་ཅིག་གཅིག་ལ་མངོན་པར་སངས་རྒྱས་སོ། །ཞེས་དང་། དེ་ཉིད་ཀྱི་འགྲེལ་པ་ཟབ་དོན་སྣང་བྱེད་ཉི་མའི་འོད་ཟེར་ལས།42 ཐོག་མའི་དབྱིངས་ལས་ལྷུན་གྲུབ་ཀྱི་ནང་གདངས་ཕྱིར་འཕགས་ཏེ་ཐུགས་རྗེའི་རིག་པ་མ་རིག་པའི་ཆར་ལྡོག་པའི་འགོ་བརྩམས་པ་དེ་ཡི་ཚེ་ན་གཞི་སྣང་རང་བཞིན་མེད་པར་མཐོང་བའི་སྐད་ཅིག་མ་དེར་ཁྱད་ཆོས་དྲུག་གི་ཚུལ་དུ་གྲོལ་ཏེ། སངས་རྒྱས་ཐམས་ཅད་ལས་སྔོན་རོལ་བའི་སྟོན་པར་བཞུགས་པའི་དང་པོའི་སངས་རྒྱས་ཀུན་ཏུ་བཟང་པོ་དེས་ཇི་ལྟར་མཐོང་ཞིང་གྲོལ་བའི་ཁྱད་ཆོས་དྲུག་ནི། འདི་ལྟར་རང་ངོར་སྣང་བ། གཞི་ལས་འཕགས་པ། བྱེ་བྲག་ཕྱེད་པ། ཕྱེད་ཐོག་ཏུ་གྲོལ་བ། གཞན་ལས་མ་བྱུང་བ། རང་སར་གནས་པ་རྣམས་སོ། །ཞེས་དང་། འཇམ་དཔལ་སྒྱུ་འཕྲུལ་དྲྭ་བ་ལས།43 སྐད་ཅིག་གཅིག་གིས་བྱེ་བྲག་ཕྱེད། །སྐད་ཅིག་གཅིག་གིས་རྫོགས་སངས་རྒྱས། །ཞེས་དང་། ཡེ་ཤེས་གསང་བ་ལས།44རང་བཞིན་མི་གཡོ་ལྷུན་རྫོགས་ཤིང་། །སྤྱོད་ཡུལ་ཀུན་ཏུ་བཟང་པོ་སྟེ། །ཞེས་དང། རྨད་བྱུང་རྒྱལ་པོའི་རྒྱུད་ལས།45ཐོག་མ་ཀུན་གྱི་སྔོན་རོལ་ཏུ། །རང་སྣང་གཞི་ལ་མཐར་ཕྱིན་ཏེ། །སྔར་སངས་སྔ་ནས་རྒྱས་པའི་ཕྱིར། །ཐོག་མའི་ཀུན་ཏུ་བཟང་པོ་ནི། །འཁོར་འདས་ཀུན་གྱི་སྟོན་པར་ཤར། །ཞེས་སོ། །དེའང་ཆོས་ཉིད་སྟོང་པའམ་རང་བཞིན་གྱི་སེམས་ཉིད་ལ་ཟེར་བ་མ་ཡིན་གྱི། སངས་རྒྱས་ཐམས་ཅད་ལ་ཡང་ཐར་བའི་ལམ་སྟོན་པས་གདོད་མའི་མགོན་པོ་ཞེས་བྱ་བ་ཡིན་ཏེ། ཀུན་བྱེད་ལས་ཀྱང་། རྒྱལ་བ་ཀུན་ལས་ང་སྔའི་ཕྱིར། །སྐུ་གསུམ་སྟོན་པའི་ཕ་མར་ཤར། །ཞེས་དང་། སྟོན་པའི་སྟོན་པ་ཀུན་བྱེད་རྒྱལ་པོ་ངས། །ང་ལས་བྱུང་བའི་སྟོན་པ་སྐུ་གསུམ་ལ། །ཞེས་སོ། །སྟོན་པ་འདི་ཡོད་པས་འཁོར་འདས་གདོད་མར་གྲོལ་བའི་ལམ་སྟོན་པ་བྱུང་སྟེ། དུས་གསུམ་གྱི་རྒྱལ་བ་བྱུང་བ་ཡིན་ནོ།།
དེ་ལྟར་མ་ཡིན་ན་འཇིག་རྟེན་དུ་སངས་རྒྱས་འབྱུང་བའང་མི་རིགས་ཏེ། ཐམས་ཅད་སེམས་ཅན་དུ་མཉམ་པ་ལ་གཅིག་གིས་གཅིག་ལ་ལམ་སྟོན་པ་མི་ཤེས་པ་ཉིད་དང་། ལ་ལ་སངས་རྒྱས་ཤིང་ལ་ལ་འཁོར་བ་མི་རིགས་སོ། །ཐུན་མོང་གི་ཐེག་པ་ལས་ཐོག་མཐའ་མེད་པར་བཤད་པ་ནི་དུས་དང་ཆོས་ཉིད་ལ་དགོངས་པ་དང། ཁྱད་པར་དབུ་མ་ནས། འཁོར་འདས་རང་བཞིན་མ་གྲུབ་པས་དེ་ལ་ཐོག་མཐའ་མེད་དེ་དེ་ནམ་མཁའ་བཞིན་ཞེས་འབྱུང། ཡང་སངས་རྒྱས་དང་སེམས་ཅན་སོ་སོར་དང་པོ་ནས་བྱུང་ན་འཁོར་འདས་གཞི་ཐ་དད་པས་ཐུགས་རྗེའི་འབྲེལ་པ་མི་འཇུག་པར་འགྱུར། དེས་ན་ལུགས་འདི་ནི་གསང་སྔགས་བླ་ན་མེད་པའི་རྒྱུད་སྡེ་གོང་མར་ཤིན་ཏུ་གསལ་བར་གསུངས་ཤིང་སློབ་དཔོན་ཆེན་པོ་པདྨ་དང་། བི་མ་ལས་ལེགས་པར་གཏན་ལ་ཕབ་པ་ཡིན་ཏེ། འདིར་ཡང་དེ་ལ་ཕྱག་བྱེད། ཞེས་གསུངས་པ་ལྟར་ཐོག་མའི་མགོན་པོ་ཆོས་སྐུ་ཀུན་ཏུ་བཟང་པོ་ནི་ཤིན་ཏུ་ཡང་དབང་པོ་རྣོན་པོའི་རྣོན་པོ་ཡིན་པས་གཞི་ལ་གཞི་སྣང་ཤར་བ་དང་ལྷན་དུ་གནས་ལུགས་ངོ་བོ་ཉིད་ཀྱི་གཞིའི་དོན་ཇི་བཞིན་དུ་མཁྱེན་པས་དེའི་ཀློང་དུ་གྲོལ་བའོ།།
དྲུག་པ། གཞི་རྒྱུད་ཀྱི་སྐོར་ལ་རང་ཉིད་ཀྱི་ལྟ་ཚུལ་བརྗོད་པ།
གདོད་མའི་མགོན་པོ་ཆོས་སྐུ་ཀུན་ཏུ་བཟང་པོས་གཞི་ལས་གཞི་སྣང་ཤར་བ་དང་སྐད་ཅིག་ཉིད་ལ་གྲོལ་བ་དང་། རང་རེ་སེམས་ཅན་རྣམས་དེ་ངོ་མ་ཤེས་ནས་འཁོར་བར་འཁྱམས་ཚུལ་གཉིས་ཀྱི་གཞི་སྣང་ཤར་ཚུལ་ལ་ཁྱད་མེད་ཀྱང་། དེ་དེ་བཞིན་དུ་རྟོགས་མ་རྟོགས་ཀྱི་ཁྱད་པར་ཙམ་མོ། །དེ་ཡང་དཔེར་ན་གང་ཟག་གཅིག་གིས་ཐག་ཁྲ་ལ་སྦྲུལ་དུ་སྣང་བ་དང་། གཅིག་གིས་ཐག་པ་སྣང་བ་གཉིས་ཡུལ་རང་ངོས་ནས་འཁྲུལ་མ་འཁྲུལ་རྣམ་གཞག་མེད་ན་ཡང་། དེ་སྣང་བའི་ཤེས་པ་ལ་ཁྱད་བྱུང་བ་ལྟར། གཞི་རྒྱུད་རང་བཞིན་ལྷུན་གྲུབ་ཀྱི་དཀྱིལ་འཁོར་རང་ངོར་གྲོལ་མ་གྲོལ་གྱི་མཐའ་ལས་འདས་པ་ཡིན་ཡང་དེ་འཛིན་གྱི་སྣང་བ་ལ་ཁྱད་ཡོད་པ་བཞིན་ནོ། །དེ་འདྲ་བའི་གཞི་དེ་ལ་བྱེ་བྲག་སྨྲ་བ་ནས་བཟུང་སྟེ་ཐེག་པ་ཀུན་ཀྱིས་ངོས་འཛིན་ལུགས་འདྲ་མིན་ཡོད་ཀྱང་མདོར་བསྡུས་ན། སློབ་དཔོན་ཉི་འོད་སེང་གེའི་རྒྱ་ཆེར་འགྲེལ་ནང་དུ་གསལ་བ་ལྟར་འགྲོ་བ་སེམས་ཅན་ཀུན་དེ་བཞིན་གཤེགས་པའི་སྙིང་པོ་ཅན་ཡིན་ནོ། །དེ་གང་ལ་བྱ་ན་དོན་དམ་པའི་བྱང་ཆུབ་སེམས་ལ་བྱ་སྟེ། རང་གི་སེམས་ཀྱི་ཆོས་ཉིད་ལའོ།།
དེ་ལྟར་ཡིན་ན་སེམས་ཅན་ཀུན་སངས་རྒྱས་སུ་མ་གྱུར་པ་ཅིའི་ཕྱིར་ཞེ་ན། དཔེར་ན་འོ་མའི་རང་བཞིན་མར་ཡིན་ཡང་མ་བསྲུབས་ན་མར་མེད་པ་བཞིན་སེམས་ཅན་གྱི་རང་བཞིན་སངས་རྒྱས་ཡིན་ཡང་མ་བསྒྲུབས་ན་འཚང་མི་རྒྱའོ། །གནས་ལུགས་ལ་སེམས་ཅན་དང་སངས་རྒྱས་གཉིས་ཡེ་ནས་སངས་རྒྱས་པའི་ངོ་བོ་དང་མཚན་ཉིད་དུ་ཡང་གཅིག་ཅིང་དབྱེར་མེད་པ་ཡིན་པ་ལས་སེམས་ཅན་ནི་མ་རིག་པ་རྣམ་པར་རྟོག་པས་འགྲོ་བ་རིས་བསམ་གྱིས་མི་ཁྱབ་པར་སྨིན་ཅིང་འཁྱམས་པ་དང་། དེ་བཞིན་གཤེགས་པ་ལ་ནི་ཤེས་རབ་ཀྱི་རལ་གྲིས་མ་རིག་པའི་སྒོ་ངའི་སྦུབས་བརྟོལ་ནས། ཡེ་ཤེས་སྣང་བ་ཆེན་པོ་དང་ལྡན་པའི་ཆོས་ཉིད་ཡིན་ནོ། །གཞན་ཡང་སྤྱི་དོན་འོད་གསལ་སྙིང་པོ་ལས46གསུངས་པ་ལྟར་གདོད་མའི་གཞི་དབྱིངས་ནི་ངོ་བོ་ཀ་ནས་དག་པ་ཡིན་ཡང་རང་བཞིན་ལྷུན་གྲུབ་ཀྱི་སྣང་བ་དང་མི་འབྲལ་བར་ཟུང་འཇུག་ཡིན་པའི་གནད་ཀྱིས། གནས་ཚུལ་བཞིན་རྟོགས་ན་སངས་རྒྱས། མ་རྟོགས་ན་སེམས་ཅན་འབྱུང་རུང་སྟེ། དཔེར་ན་སེམས་ཞེས་བྱ་བ་སྤྱིར་བཏང་དུ་ཡུལ་རིག་པར་བྱེད་པའི་བདག་ཉིད་ཅན་མིན་ན་འཁྲུལ་ཡང་མི་སྲིད་ལ། མ་འཁྲུལ་པའི་དོན་རྟོགས་པའང་མི་སྲིད་མོད། སེམས་ནི་ཡུལ་འཛིན་པའི་ངང་ཚུལ་ཅན་ཡིན་པས་ན། དེས་ཡུལ་གྱི་རང་བཞིན་ཇི་ལྟ་བ་བཞིན་དུ་བཟུང་བ་ཐག་པ་ལ་ཐག་པར་འཛིན་པ་དང་། རྐྱེན་གྱིས་གོལ་ཏེ་ཕྱིན་ཅི་ལོག་ཏུ་བཟུང་བ་ཐག་པ་ལ་སྦྲུལ་དུ་འཛིན་པ་གཉིས་སྲིད་པ་བཞིན་དུ། གདོད་མའི་རིག་གདངས་མ་འགགས་པ་ཉིད་ཀྱིས་ལྷུན་གྱིས་གྲུབ་པའི་རང་སྣང་ལ་ཡུལ་དུ་བཟུང་བའི་གཟུང་འཛིན་འཁྲུལ་པའི་ས་བོན་ལས་སྲིད་པའི་སྣང་བ་རྒྱ་འབྱམས་སུ་མཆེད་པའི་ཚེ་ན། ཆུ་ཉིད་ཆབ་རོམ་འབའ་ཞིག་ཏུ་གྱུར་པ་ལྟར། འདི་ལྟར་གང་དང་ཅི་སྣང་བ་ཐམས་ཅད་ལ་གཟུང་འཛིན་ཐ་མལ་དུ་སྣང་ཞིང་ཞེན་པའི་ངོར་དག་མཉམ་ཆེན་པོའི་དོན་མི་སྣང་ལ། ཕྱིན་ཅི་ལོག་ཏུ་དམིགས་པའི་བློ་དེ་ཡང་ཡེ་ཤེས་ཀྱི་ཚུལ་དང་མི་མཐུན་པས། རང་བཞིན་གཞིར་གནས་ཀྱི་དོན་བག་ལ་ཞ་སྟེ་མི་སྣང་བར་འཁྲུལ་པ་འབའ་ཞིག་གི་ཚུལ་དུ་སྣང་ངོ་། །ཞེས་གསུངས་སོ།།
སླར་སྨྲས་པ།
རྣམ་དག་བསྟན་པ་དར་བ་དཔལ་ཡུལ་དགོན། །རྒྱལ་བའི་རྣམ་འཕྲུལ་བྱོན་པ་མཁའ་སྤྱོད་ཞིང་།།
འབྲེལ་ཚད་བྱང་ཆུབ་ལམ་འདྲེན་འདུས་སྡེ་བཅས། །ཆོས་གླིང་འདི་ཉིད་སྲིད་མཐར་བརྟན་གྱུར་ཅིག།།
- དཔལ་བརྩེགས་པར་མ། ཐཱའི་ཝན་བསྐྱར་དཔར་མ། དེབ་ཕྲེང་། ༢༣ ཤོག་ངོས་ ༦ ཡིག་ཕྲེང་ ༧ པར་གསལ།
- སི་ཁྲོན་མི་རིགས་དཔེ་སྐྲུན་ཁང་། རྫོགས་པ་ཆེན་པོའི་གནད་གསུམ་ཤན་འབྱེད། ཤོག་ངོས ༤༠༤ པར་གསལ།
- རྒྱུད་ལུང་འདི་དཔལ་བརྩེགས་པར་མ། ཐཱའི་ཝན་བསྐྱར་དཔར་མ། གྲུབ་མཐའ་མཛོད། ཤོག་ངོས་ ༢༩༣ པར་དྲངས་ཡོད།
- ཡེ་ཤེས་སྡེའི་པར་མ། ཤོག་ངོས་ ༧༩ པར་གསལ།
- སྡེ་དགེ་པར་མ། ( D, Vol Da Fol 28 b6
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། སྨད་ཆ། ཤོག་ངོས་ ༢༥༥ པར་གསལ།
- སི་ཁྲོན་པར་མ། རྫོགས་ཆེན་གནད་གསུམ་ཤན་འབྱེེད། ཤོག་ངོས་ ༤༠༤ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། ཤོག་ངོས ༣༥-༡ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། ཤོག་ངོས ༣༤-༣ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༦ ལོའི་པར་མ། ཤོག་ངོས་ ༣༥-༢༠ པར་གསལ།
- དཔལ་བརྩེགས་པར་མ། ཐཱའི་ཝན་བསྐྱར་དཔར་མ། དེབ་ཕྲེང་། ༢༣ ཤོག་ངོས་ ༦ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། ཤོག་ངོས་ ༡༥ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། ཤོག་ངོས་ ༣༥ པར་གསལ།
- གསང་སྙིང་མཛོད་ལྡེ། སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། ཤོག་ངོས་ ༣༥ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། ཤོག་ངོས་ ༡༥ པར་གསལ།
- དཔལ་བརྩེགས་པར་མ། ཐཱའི་ཝན་བསྐྱར་དཔར་མ། དེབ་ཕྲེང་། ༢༣ ཤོག་ངོས་ ༦ པར་གསལ།
- ཚིག་དོན་མཛོད། དཔལ་བརྩེགས་པར་མ། ཕྱི་ལོ་ ༢༠༡༢ ལོའི་ཐཱའི་ཝན་བསྐྱར་དཔར་མ། དེབ་ཕྲེང་། ༢༣ ཤོག་ངོས། ༥ པར་གསལ།
- ཚིག་དོན་མཛོད། སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༠ ལོའི་པར་མ། ཤོག་ངོས་ ༡༧༤ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། དེབ་གཟུགས། སྟོད་ཆ། ཤོག་ངོས་ ༥ ༡༥ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། ཤོག་ངོས་ ༤༢ ༤ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། ཤོག་ངོས་ ༡༦-༡༢ པར་སལ།
- ཟབ་དོན་རྒྱ་མཚོའི་སྤྲིན། དཔལ་བརྩེགས་པར་མ། ཐཱའི་ཝན་བསྐྱར་དཔར་མ། དེབ་ཕྲེང་། ༧ ཤོག་ངོས་ ༢༣༦-༡༡ པར་གསལ།
- ལུང་འདི་ཉིད་དཔལ་བརྩེགས་པར་མ། ཕྱི་ལོ་ ༢༠༡༢ ཐཱའི་ཝན་བསྐྱར་དཔར་མ། ཚིག་དོན་མཛོད། དེབ་ཕྲེང་། ༡༩ ཤོག་ངོས་ ༡༥ པར་དྲངས་ཡོད།
- ཡོན་ཏན་མཛོད། སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༨ ལོའི་པར་མ། ཤོག་ངོས་ ༨ པར་གསལ།
- ཆོས་སྤྱོད་ཀྱི་རིམ་པ། སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༣ ལོའི་པར་མ། ཤོག་ངོས་ ༡༤༥ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༡ ལོའི་པར་མ། ཤོག་ངོས ༡༧- ༩ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། ཤོག་ངོས་ ༡༧-༢༠ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༦ ལོའི་པར་མ། ཤོག་ངོས་ ༣༡- ༡༩ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། ཤོག་ངོས་ ༡༨ – ༡ པར་གསལ།
- གསང་སྙིང་ལུང་ཕྱོགས་བསྒྲིགས། སྔ་འགྱུར་རིག་མཛོད་རྩོམ་སྒྲིག་ལྷན་ཁང་གི་པར་མ། ཤོག་ངོས་ ༢༠༧ -༡༥ པར་གསལ།
- གསང་སྙིང་ལུང་ཕྱོགས་བསྒྲིགས། སྔ་འགྱུར་རིག་མཛོད་རྩོམ་སྒྲིག་ལྷན་ཁང་གི་ཕྱི་ལོ་ ༢༠༢༡ ལོའི་པར་མ། ཤོག་ངོས་ ༢༠༨-༡༡ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། ཤོག་ངོས་ ༡༦ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༡ ལོའི་པར་མ། ཤོག་ངོས་ ༦ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༤ ལོའི་པར་མ། ཤོག་ངོས་ ༡༨ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༡ ལོའི་པར་མ། ཤོག་ངོས་ ༧ པར་གསལ།
- ཡེ་ཤེས་སྡེ་པར་མ། ཤོག་ངོས་ ༨༣ པར་གསལ།
- ལུང་འདི་ཡེ་ཤེས་སྡེ་པར་མ། ཚིག་དོན་མཛོད། ཤོག་ངོས་ ༨༡ པར་དྲངས་ཡོད།
- ཆོས་རྗེ་ཡིད་བཞིན་ནོར་བུས་རྫོགས་ཆེན་གཞིའི་དཔྱད་པ། བླ་རུང་པར་མ། ཤོག་ངོས་ ༣༢ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། ཤོག་ངོས་ ༡༤༦-༡༧ པར་གསལ།
- རྫོགས་ཆེན་གཞིའི་དཔྱད་པ། ཆོས་རྗེ་ཡིད་བཞིན་ནོར་བུས། ཤོག་ངོས་ ༤༡ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༨ ལོའི་པར་མ། ཤོག་ངོས་ ༣༠-༡༣ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༨ ལོའི་པར་མ། ཤོག་ངོས་ ༣༠-༡༩ པར་གསལ།
- ཡེ་ཤེས་སྡེ་པར་མ། ཤོག་ངོས་ ༩༥ པར་གསལ།
- ཕྱོགས་བཅུའི་མུན་སེལ། དཔལ་བརྩེགས་པར་མ། ཐཱའི་ཝན་བསྐྱར་དཔར་མ། དེབ་ཕྲེང་། ༢༣ ཤོག་ངོས་ ༦༡ པར་གསལ།
- ཕྱོགས་བཅུའི་མུན་སེལ། དཔལ་བརྩེགས་པར་མ། ཐཱའི་ཝན་བསྐྱར་དཔར་མ། དེབ་ཕྲེང་། ༢༣ ཤོག་ངོས་ ༦༡ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༨ ལོའི་པར་མ། ཤོག་ངོས་ ༡༦ པར་གསལ།
