ལོ་རིམ་བརྒྱད་པའི་སློབ་གཉེར་བ། ཆོས་དབྱིངས་བླ་མ།
ཤེས་རིག་གི་དཔའ་རྩལ་རྒྱས་ས། ལེགས་བཤད་ནོར་བུའི་བང་མཛོད། བདེ་སྡུག་གི་ཚོར་རླབས་འཕྱོ་ས། ཀུན་ཀྱིས་བསྟོད་བསྔགས་བྱེད་ས། ང་ཡི་ཡིད་སྨོན་ཤོར་ས། པདྨའི་རང་མདངས་བརྒྱུད་ནས་ཀློག་པ་པོ་ཁྱེད་ཅག་ལ། ང་ཚོའི་གཅེས་ནོར་དབྱངས་གསལ་སོ་བཞིའི་ཚབ་བྱས་ནས་འཚམས་འདྲི་ཞུ་བ་དང་འབྲེལ། ལས་དང་པོ་བ་རྣམས་ལ་ཅུང་ཟད་ཕན་པའི་རེ་འདོད་རྣམས་ཚིག་གི་ལོ་མ་མང་པོས་མ་བརྒྱན་པར་དོན་གྱི་སྙིང་པོ་ལྟར་བརྗོད་དོན་གཙོ་བོ་རྣམས་བྲི་བར་སྤྲོའོ།།
དང་པོ། དཔེ་དེབ་ཉོ་རྒྱུ་ལ་འཚེར་སྣང་དང་ཁ་པར་ཉོ་རྒྱུ་ལ་སྤྲོ་སེམས།
སློབ་ཕྲུག་རང་ལ་ཉེ་བར་མཁོ་བའི་དཔེ་དེབ་དང་སྨྱུ་གུ་སོགས་ཉོ་རྒྱུ་ལ་ཧ་ཅང་འཚེར་སྣང་དང་སྒོར་མོ་ལ་ཕངས་སེམས་བྱེད་ཀྱི་རེད། མ་ཟད་ང་ཚོ་ལ་བཀའ་དྲིན་ཆེ་བའི་ཕྱག་དཔེ་བླུ་ཡོན་ཁང་གི་ལས་བྱེད་སོགས་མཚམས་རེ་ཤག་ནང་ལ་དཔེ་དེབ་འཚོང་དུ་ཡོང་དུས། ཚོང་དཔོན་སྒོ་ཐེམ་ནང་དུ་མ་སླེབས་གོང་ལག་པ་གཡུག་གཡུག་བྱས་ནས་མི་དགོས་མི་དགོས་ཟེར་བ་དང་། ད་དུང་རྣམ་འགྱུར་ཡང་ཡི་དམ་ཁྲོ་བོའི་སྐུར་བཞེངས་མཁན་སློབ་ཕྲུག་རེ་ཟུང་མེད་པ་ཡང་མ་རེད། ཧ་ཧ་ཧ། སྐུ་རྩེད་ཞུས་ཡིན། སློབ་ཕྲུག་ང་ཚོས་ཁ་པར་ཡར་རྒྱས་གཏོང་བ་ལ་ཕངས་སེམས་མེད་ཅིང་ཚོང་ཁང་ནང་ལ་ཉོ་མཁན་ཡང་འཚང་ཁ་ཤིག་ཤིག་མཐོང་རྒྱུ་ཡོད། འོན་ཀྱང་སྒོར་མོ་དེ་དག་གི་རྒྱབ་ལྗོངས་ལ་བསམས་ན་དཀའ་ཚེགས་དང་འབད་བརྩོན་ཇི་ཙམ་ལས་བྱུང་བ་བཤད་མི་དགོས། ནང་མི་སྦྱིན་བདག་རྣམས་ཀྱི་རེ་འདོད་གཙོ་བོ་ནི་ང་ཚོའི་ཀུན་སྤྱོད་དང་ཤེས་ཡོན་ཡར་རྒྱས་བྱུང་ན་བསམ་པ་དང་། ང་ཚོ་དེ་ལས་ལྡོག་ནས་ཁ་པར་འགྲན་སྡུར་བྱས་ཏེ་འདུག་པ་ཡིན་ན། ཨོ་རྒྱན་པདྨའི་བཀའ་ཐང་ལས།1བོད་ལ་དྲིན་ཆེན་བྱས་ཀྱང་དྲིན་མི་གོ།
ཞེས་གསུངས་པ་བཞིན་དུ་ང་ཚོ་ཡང་དེ་ལྟར་མི་འགྱུར་རམ། ཁ་པར་གྱིས་རིན་ཆེན་དུས་ཚོད་རྣམས་ཆུད་ཟོས་སུ་གཏོང་བ་ཀུན་ཀྱིས་ཤེས་གསལ་ཡིན། དེ་ཡང་རང་ཉིད་དང་འབྲེལ་བའི་དཔེ་གཅིག་འདིར་བཀོད་ན། རེས་གཟའ་ཉི་མའི་ཞོགས་པ་ཞིག་ལ་གུས་པ་རང་ཉིད་སྒྲ་དབྱངས་གླིང་2གི་ཁང་ཐོག་ལྕགས་ཤོག་འོག་ཏུ་དུག་སློག་སྐམ་དུ་འགྲོ་སྐབས། སྔོན་འགྲོ་འཛིན་གྲྭའི་སློབ་ཕྲུག་གསར་པ་མི་རྫིག་པོ་ཞིག་གིས་ཐབ་ཚང་ནས་ཇ་དང་རྩམ་པ་གཉིས་ཁུར་ནས་ངའི་འཁྲིས་སུ་བསྡད་ཅིང་ཇ་དང་རྩམ་པ་གཉིས་ས་ལ་བཞག་སོང་། དེ་ནས་འབའ་ཁུག་ནས་ཁ་པར་ཡར་བཏོན་ཅིང་ལག་གཉིས་ཀྱིས་བཟུང་ནས་ཧ་ཅང་བྲེལ་ཚུབ་ཚུབ་ངང་རྩེད་མོར་གཡེངས། ངས་དེའི་གྲུ་ཟུར་ནས་ཡག་པོ་ལྟ་ཞིབ་བྱེད་དུས། ཕོར་པ་ནང་གི་རྩམ་པ་ཐོག་ལ་མར་རྡོག་རྡོག་ཆེན་པོ་ཞིག་ཀྱང་མིག་ལ་གསལ་ལེར་མཐོང་བྱུང་། དེ་དུས་ཁོ་བོའི་བསམ་བློར་ཆོས་གླིང་འདིའི་བཀའ་དྲིན་ལྷག་ཏུ་དྲན་བྱུང་། གང་ཡིན་ཞེ་ན་ཤེས་རིག་མ་ཟད་འཚོ་བའི་ཡོ་བྱད་སོགས་ལ་རིན་མེད་ངང་ཅི་བདེར་ལོངས་སུ་སྤྱོད་རྒྱུ་ཡོད་པ་ནི་ཧ་ཅང་སྐྱིད་པོ་རེད་དྲན་བྱུང་། དེ་ལྟར་ལྕམ་སྲིང་ཨ་ཅག་བདེ་ཆེན་3གྱི་ཞལ་རྒྱུན་ནི། རིན་པོ་ཆེ་ཁོང་རང་གིས་བཤད་གྲྭ་བ་རྣམས་ལ་དཔེ་ཤག་གནང་གི་ཡོད་ས་རེད་བ། ང་ཚོ་བོད་ལ་ཡིན་ན་ནི་དགོན་པ་ལ་ཕར་ཕུལ་ན་མ་གཏོགས་ཚུར་སྤྲོད་མཁན་ཡོད་མ་རེད་བ། སོགས་ནས། ད་གང་ལྟར་ང་རང་ནི་ཆོས་ཡག་པོ་ཞིག་བྱེད་ཀྱི་ཡིན། རྣམ་གྲོལ་གླིང་དགོན་པ་འདི་ལས་སྐྱིད་པ་ཞིག་ཕལ་ཆེར་ཡོད་ས་མི་འདུག ཅེས་གསུངས་པ་བཞིན་ནོ།།
དེ་ནས་རང་ཉིད་མར་བབས་ཤིང་ཞོགས་ཟས་ཟ་དུས། འཛིན་གྲོགས་ཁ་ཤས་དང་ལྷན་དུ་ཆོས་རྭའི་རྡོ་ལེབ་ཐོག་ལ། གུང་སེང་ཡིན་པས་ཕྱི་རྒྱལ་གྱི་དམག་འཁྲུག་སྐོར་ལ་ཇུས་གཏོགས་མེད་པའི་སྐད་ཆ་འདྲ་མིན་བཤད་ནས་ཆུ་ཚོད་དགུ་པ་བར་དུ་དེར་ལྷག། དེའི་རྗེས་སུ་ཤག་ལ་ཕྱིན་ཏེ་རང་ཉིད་ཀྱི་དགའ་ཕྱོགས་མཁས་པའི་ལེགས་བཤད་འགའ་བོད་ཡིག་ཏུ་བསྒྱུར་ཁུལ་བྱས། སླར་ཡང་དེ་སྔོན་ཁང་ཐོག་གི་དུག་སློག་སྐམ་སར་སོང་ཡིན། དེར་ང་ཧང་སང་བ་དང་ཁྱད་མཚར་བ་ཞིག་ལ། དེ་སྔོན་ཁ་པར་བརྩེས་ནས་བསྡད་ཡོད་པའི་སློབ་ཕྲུག་དེ་ད་དུང་ཁ་པར་དང་བྲལ་མེད་ཅིང་། ཇ་དང་རྩམ་པ་དེ་ཡང་མ་མཆོད་པར་རང་འཇགས་ལྷག་འདུག ཡིན་ན་ཡང་རྩམ་པ་ནང་གི་མར་རྡོག་རྡོག་ཆེན་པོ་དེ་བཞུར་ཚར་འདུག དེ་ནི་རྒྱ་གར་ཚ་བའི་དབང་གིས་ལོས་ཡིན། སྐུ་རྩེད་ཞུས་ཡིན། དེ་ལྟར་ག་ལ་ཡིན་ངས་ཁོང་ལ་སྐད་ཆ་འདྲི་དུས། ཁོང་གིས་གད་མོ་དགོད་བཞིན། “ཨ་ཏཱ་4མར་དེ་ནི་ཁྭ་ཏ་ཡིས་ཁྱེར་ཚར་སོང་ཟེར།” ཧ་ཧ་ཧ། སློབ་ཕྲུག་དེ་ཡང་ཧ་ཅང་སྣང་བ་སྐྱིད་པོ་ཞིག་འདུག
བར་སྐབས་ཀྱི་ཚིགས་བཅད་ངལ་གསོ་མ།
དངུལ་ཁུག་ནང་གི་གན་དྷི5ཕྱི་ལ་ཤོར།།
རྣམ་གཡེང་བསླུ་བྲིད་ཁ་པར་ནང་དུ་སླེབས།།
གཞན་ལ་བུ་ལོན་མང་པོ་དེ་ཡིན་སྲིད།།
ནང་མི་སུན་པོ་བཟོ་མཁན་དེ་རང་རེད།།
ཕ་མའི་ཕྱག་མཐིལ་ས་ཞིང་ནང་ལ་ཟད།།
བུ་ཕྲུག་ལག་ཏུ་ཁ་པར་རྫིག་པོ་ཁུར།།
རེ་བ་ཆེན་པོས་བུ་ཕྲུག་མི་ཡུལ་བཏང་།།
མི་ཡུལ་དགོན་དུ་སྐྱིད་ཉལ་མ་བྱེད་ཨང་།།
གཉིས་པ། ཕ་མའི་བཀའ་དྲིན་དྲན་ནས་དེ་ལྟ་བུའི་ཀུན་སྤྱོད་དོར་དགོས།
རྐང་གཉིས་མི་རུ་སྐྱེས་པའི་རྗེས་ལ་ཕ་མ་མེད་པ་ནི་སུ་ཞིག་ཀྱང་མེད་ལ། ཕ་མ་དེ་རྣམས་ནི་ཧ་ཅང་གི་བཀའ་དྲིན་ཆེ་བ་ཤ་སྟག་ཡིན། བདག་ཅག་གིི་སྟོན་པས་ཀྱང་ཆོས་ཀྱི་སྙིང་པོ་བྱང་ཆུབ་ཀྱི་སེམས་ཡིན་གསུངས་པ་དང་། དེ་ཡང་ཕ་མ་གཉིས་ལ་གཙོ་བོར་དཔེར་བཞག་ནས་རྒྱལ་བའི་གསུང་རབ་ཐོག་མཐའ་བར་གསུམ6་དུ་གསལ་པོར་གསུངས་ཡོད། དེ་དང་ཇོ་བོ་རྗེ་ལྷ་གཅིག་གི་ཞལ་ནས་ཀྱང་།7 ཐག་རིང་གི་མགྲོན་པོ། ཡུན་རིང་གི་ནད་པ། ཕ་མ་རྒས་འཁོགས་སོགས་ལ་བྱམས་པོར་བྱས་ན་སྟོང་ཉིད་སྙིང་རྗེའི་སྙིང་པོ་ཅན་བསྒོམ་པ་དང་འདྲ་བར་གསུངས། བཅོམ་ལྡན་འདས་ཀྱིས་ཀྱང་ཡུམ་གྱི་དྲིན་ལན་བསབ་ཕྱིར་དུ་སུམ་ཅུ་རྩ་གསུམ་གྱི་ལྷ་ཡུལ་དུ་བྱོན་ནས་ཆོས་གསུངས། བུས་ཕྲག་པ་གཡས་གཡོན་གཉིས་སུ་ཕ་མ་གཉིས་ཁུར་ཏེ་ས་ཆེན་པོ་ལ་བསྐོར་བ་བྱེད་པ་ཙམ་གྱི་ཞབས་ཏོག་བསྒྲུབས་ཀྱང་ཕ་མའི་དྲིན་ལན་མི་འཁོར་ཞིང་ཕ་མ་ཆོས་ལ་བཙུད་ན་དྲིན་ལན་འཁོར་བར་གསུངས་པས་དུས་རྟག་ཏུ་ལུས་དང་ངག་དང་ཡིད་ཀྱི་སྒོ་ནས་ཕ་མའི་ཞབས་ཏོག་བསྒྲུབ། བློ་ཆོས་ལ་འགྱུར་བའི་ཐབས་ལ་འབད། ཅེས་དང་། གཞན་ཡང་ཨོ་རྒྱན་ཆེན་པོས།8རྒས་པ་ཡིད་མུག་མ་འཇུག་བཀུར་སྟིས་སྐྱོངས། །ཞེས་གསུངས་པ་བཞིན་ནོ།།
དེ་ཡང་སྒྲུང་ཞིག་གི་ལམ་ནས་ཞུས་ན། ལོ་སྔོན་མ་རང་ཉིད་གཅོང་བརྡ་རྡུང་མཁན་ནམ། ཆོས་གླིང་འདིར་ཡོངས་གྲགས་ལ་ཏིང་ཏིང་བླ་མ་ཞེས་འབོད་པའི་ལས་འགན་དེ་ང་རང་ལ་ཁེལ། ཏིང་ཏིང་དེའི་ཉེ་འགྲམ་ན་ལྕང་སྡོང་མཚར་སྡུག་ལྡན་པ་ཞིག་གི་སྟེང་ལ་ཁྭ་ཏ་ཕོ་མོ་གཉིས་རྒྱུན་དུ་ཡོང་ཞིང་ཕན་ཚུན་བར་མ་བཅོས་པའི་བརྩེ་དགའ་ལ་རོལ་ཞིང། ཉིན་གཅིག་དེ་གཉིས་ཧ་ཅང་བྲེལ་འཚུབ་ངང་བྱ་ཚང་བཟོ་བཞིན་འདུག། དེ་གཉིས་ཀྱིས་འབད་འབུངས་ཆེན་པོས་མཆུ་ཏོ་ནང་ལ་རྩྭ་རྐང་རེ་རེ་བྱས་ཏེ་ཚང་བཟོས། ཐེངས་ཤིག་ནི་ཁྭ་ཏ་མོ་ཡིས་ལྕགས་སྐུད་རིང་པོ་ཞིག་ཁ་ནང་ལ་ཁྱེར་ནས་སླེབས་སོང་། དེེ་ཡལ་ག་ཞིག་ལ་ཐོགས་དུས་གཅིག་གིས་ཡར་འཐེན། གཅིག་གིས་འོག་ནས་འཕུལ་འཕུལ་འདྲ་བྱས་ནས་མཐར་ཚང་དེ་ལེགས་གྲུབ་བྱུང་། དེ་ནས་བཟུང་ཁྭ་ཏ་མོ་དེ་ནད་པ་ཉལ་སར་ལྷག་པ་བཞིན་དུ་མང་ཆེ་བ་དེར་གབ་ནས་བསྡད་པ་དང་། ཕོ་ཡིས་ཟས་རྣམས་ཁྱེར་ནས་མོ་ལ་བྱམས་པས་སྐྱོང་བཞིན་ཡོད། དེེ་ལྟར་ཉིན་ཤས་རྗེས་ལ་དེར་སྒོ་ང་ཁ་ཤས་བཏང་འདུག། དེ་གཉིས་ཀྱིས་རྒྱུན་ཆད་མེད་པར་རིམ་བཞིན་ཆཪ་རླུང་སོགས་གང་ལ་ཡང་འཛེམ་བག་མེད་པར་ལྟ་སྐྱོང་འོག་ཕྱིས་སུ་བྱིའུ་ཡང་བཙས་སོང།
སྐྱོ་གདུང་གི་ཉི་མ་གཅིག
སེམས་སྐྱོ་བའི་ཉིན་མོ་ནི་ཐུན་མཚམས་ཤིག་ལ་དང་པོ་འབྲུག་སྐད་གྲགས་པ་དང་གློག་འོད་འཁྱུག། དེ་ནས་གློ་བུར་དུ་ཆར་བ་ཤུགས་ཆེར་བབས་ནས་ཁྭ་ཏ་གཉིས་ཀྱི་གཟུགས་པོ་ཡོང་རྫོགས་སྦངས་ཏེ་ཧ་ཅང་སྙིང་རྗེ་བའི་གནས་སུ་གྱུར། ད་དུང་དེའི་ཐོག་ལ་རླུང་འཚུབ་དྲག་པོ་ལངས་ཤིང་ཤིང་སྡོང་ཡང་ཆག་ལ་ཁད་བྱས་ཀྱང་། ཁྭ་ཏ་གཉིས་ནི་བྱིའུ་རྣམས་ལ་སྲུང་སྐྱོབ་ཆེད་དེ་ལས་འཕུར་ཙམ་ཡང་མ་བྱས། དེའི་ཉིན་རྗེས་མར་ཁྭ་ཏ་དང་བྱིའུ་རྣམས་ཀྱང་མཐོང་རྒྱུ་མེད་ཅིང་ངའི་བསམ་བློར་ཁ་སང་གི་ཆར་རླུང་དྲག་པོའི་དབང་གིས་རེད་བསམས་སོང་། ཡིན་ན་ཡང་སྟབས་ལེགས་པ་ཞིག་ལ་དེ་གཉིས་ཐག་རིང་དུ་མ་སོང་བར། བཤད་གྲྭའི་ལྷ་ཁང་ཆུང་བའི་གཡོན་ཕྱོགས་ཀྱི་ཤིང་སྡོང་གི་རྩེ་མོར་གནས་སྤོས་ཚར་འདུག། ཁྭ་ཏ་གཅིག་གི་མགོ་ལ་སྤུ་མང་ཙམ་བུད་ཡོད་པ་དང་། ངས་རྒྱུན་དུ་དེ་གཉིས་ལ་ཟས་ལྷག་འདྲ་སྤྲད་པ་ལ་བརྟེན་ཁྭ་ཏ་གཉིས་ཀྱིས་ཀྱང་ཕལ་ཆེར་ང་ངོ་ཤེས་པ་ལྟ་བུ་བྱེད་ཀྱི་འདུག བར་སེང་དུས་གཅིག་ང་རང་ཁྭ་ཏ་གཉིས་ཡོད་སའི་ཤིང་སྡོང་དེའི་ཉེ་འགྲམ་ལ་བསྡད་ཡོད། ཁྭ་ཏ་གཅིག་གིས་མཆུ་ཏོ་ནང་ལ་འབུ་སྲིན་ཁ་ཤས་ཁྱེར་ནས་བྱིའུ་གཅིག་ལ་སྤྲད། དེ་བཞིན་དུ་གཉིས་པ་གསུམ་པ་རྣམས་ལ་རིམ་བཞིན་མ་ཆད་མ་ལྷག་པར་ཀུན་ལ་འདྲ་མཉམ་དང། དེ་ལྟར་ལན་མང་བྱས་ནས་ཐར་ཨ་མ་རང་ཉིད་ཀྱིས་བྱིའུ་རྣམས་ཀྱི་བྱ་སྐྱག་ཆུང་ཆུང་རྣམས་བཟས་སོང་། དེའི་སྐབས་ལ་དྲིན་ཅན་ཕ་མ་གཉིས་དང་ཀུན་བཟང་བླ་མའི་ཞལ་ལུང་ནང་གི་གསུང་འདི་ཡིད་ལ་ལྷང་ངེར་དྲན་བྱུང་།
དེ་ཡང་ཀུན་བཟང་བླ་མའི་ཞལ་ལུང་ལས།9 དེས་ན་བྱམས་པ་ཚད་མེད་པ་བྱ་མས་བྱེའུ་གསོ་བ་ལྟ་བུ་ཞེས་བྱ་སྟེ། བྱ་མས་བྱེའུ་གསོ་བའི་ཚེ། དང་པོ་ཚང་འཇམ་ཞིང་བདེ་བར་བཅས་དེ་ནས་ཀྱང་གཤོག་པས་བཀབ། དྲོད་ལ་བཅར། སྤྱོད་ལམ་ཐམས་ཅད་འཇམ་པོའི་སྒོ་ནས་བྱེའུ་དེ་འཕུར་མ་སོང་གི་བར་དུ་སྐྱོང་བ་དང་འདྲའོ། །ཞེས་གསུངས་སོ། །དེ་ལྟར་བྱིའུ་རྣམས་ཀྱི་ཕ་མས་ཀྱང་བུ་ཕྲུག་ལ་བཅོས་མིན་གྱི་བྱམས་བརྩེ་བཀའ་དྲིན་ཆེ་ན། ང་ཚོའི་ཕ་མ་རྣམས་ནི་སྨྲ་མི་དགོས་པ་རེད་བསམས་པ་དང་། གཞན་ཡང་གསུང་རབ་ནང་སེམས་ཅན་ཀུན་ཀྱི་རྒྱུད་ལ་བདེ་གཤེགས་སྙིང་པོ་ཡོད་གསུངས་བ་ལ་རང་ཉིད་ཀྱིས་ཡིད་ཆེས་ལྷག་ཏུ་སྐྱེས། དེ་ཡང་རྒྱུད་བླ་མ་ལས།10རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་གསུངས་པ་དང་གཞན་ཡང་། མདོ་ལས་བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ། །ཅེས་སོགས་གསུངས་པ་བཞིན་ནོ།།
ཕ་མ་གཉིས་ནི་ང་ཚོའི་ཐོག་མའི་དགེ་རྒན་ཡང་རེད།
དེ་ཡང་སློབ་ཕྲུག་ཆུང་ཆུང་ཞིག་གིས་༸གོང་ས་སྐྱབས་མགོན་མཆོག་ལ་དྲི་བ་འདི་འདྲ་ཞིག་དྲིས་སོང་། “གོང་ས་མཆོག་ཁྱེད་རང་གི་མི་ཚེ་འདིའི་ནང་གི་གྲོགས་པོ་ཡག་ཤོས་དེ་སུ་ཡིན་དགོངས་ཀྱི་ཡོད།” དེའི་ལན་དུ། “ང་ལ་གྲོགས་པོ་ཡག་པོ་ཧ་ཅང་མང་པོ་ཡོད། བྱས་ཙང་གྲོགས་པོ་ཡག་ཤོས་དེ་སུ་ཡིན་ལབ་རྒྱུ་ལ་ཧ་ཅང་ཁག་པོ་འདུག ཡིན་ན་ཡང་མི་གཅིག་ཡོད་རེད། དེ་ནི་ང་རང་དང་ཧ་ཅང་སེམས་ཐག་ཉེ་བའི་ཨ་མ་ཁོང་རེད། ངས་རྒྱུན་དུ་ཤོད་ཀྱི་ཡོད། ངའི་བྱམས་བརྩེའི་དགེ་རྒན་ཐོག་མ་ནི་ཨ་མ་ཁོང་རེད། ཁོང་གི་ངོ་གདོང་ལ་ནམ་ཡང་ཁོང་ཁྲོ་ལང་བ་མཐོང་རྒྱུ་མེད། དཔེ་ཡག་པོ་ཡོད། ཨ་མ་ཁོང་གཞི་འཇམ་པོ་དང་ལྷན་དུ་གནས་དུས་ཧ་ཅང་སྐྱིད་པོ་ཡོད། ཡིན་ན་ཡང་པ་ལགས་ཁོང་ཨ་མ་འདྲ་བོ་ཡོད་མ་རེད། ཧ་ཧ་ཧ། བདག་ལ་ཁོང་གི་ཕྱག་ནས་ཉེས་རྡུང་ཕྱག་དབང་ཐེངས་མང་པོ་རག་མྱོང་ཡོད་རེད། ཧ་ཧ་ཧ།”11 ཞེས་གསུངས་ནས་ལན་སྐྱོན་གནང་སོང་།
བདག་ཅག་གིས་སྟོན་པས་ཀྱང་། “ཆུང་བྱིས་པའི་སྐབས་ཕ་མ་གཉིས་ང་ཚོ་ལ་ཇི་ཙམ་གྱི་ཉེ་བར་མཁོ་ཡོད་པ་བཞིན། ཕ་མ་ལོ་ན་རྒས་དུས་དེ་ཙམ་གྱི་བུ་ཕྲུག་ཀྱང་དགོས་མཁོ་ཡོད་པ་ང་ཚོས་ཤེས་པར་བྱ་བ་གལ་ཆེའོ། །”12ཞེས་གསུངས། དེས་ན་རྒྱུན་དུ་ཁ་པར་སོགས་ལ་རྣམ་གཡེང་བྱས་ནས་མི་འདུག་པར། རང་གཞན་ཕ་མའི་དོན་དུ་ཅི་ནས་ཀྱང་སློབ་སྦྱོང་ལ་འབད་བརྩོན་བྱ་དགོས། མ་ཟད་མཁན་སློབ་དགེ་སྐོས་རྣམས་ཀྱིས་རྒྱུན་དུ་སྐུལ་མ་བྱེད་མི་དགོས་པར། རང་ཉིད་ལ་མིའི་མཚན་ཉིད་ལྡན་པ་ཞིག་བཟོ་རྒྱུ་ནི་ངའི་བསམ་ཚུལ་ཙམ་ཡིན་ནོ།།
དེ་ཡང་ས་པཎ་གྱི་ཞལ་ནས།13སྨྲས་ཤིང་བསྐུལ་བར་གྱུར་བ་ན། །དུད་འགྲོ་ལ་ཡང་གོ་བ་སྐྱེ། །མ་སྐུལ་གཞན་གྱིས་མ་སྨྲས་པར། །བསམ་པས་ཤེས་ན་མཁས་པ་ཡིན། །ཞེས་གསུངས་པ་བཞིན་ནོ།།
སླར་སྨྲས་པ།
སངས་རྒྱས་ས་ལ་སེམས་བསྐྱེད་ཡོད་མེད་དང་།།
ཉན་རང་བདག་མེད་རྟོགས་དང་མ་རྟོགས་ལ།།
ལུང་དང་རིགས་པའི་གཤོག་རྩལ་རྒྱས་ན་ཡང་།།
བྱམས་ལྡན་ཕ་མའི་བཀའ་དྲིན་མ་རྗེད་ཨང་།།
རྙེད་པར་དཀའ་བའི་མི་ལུས་བཟང་པོ་ཐོབ།།
མཇལ་བར་དཀའ་བ་དམ་པའི་ཆོས་དང་མཇལ།།
དེ་འདྲའི་སྐལ་བཟང་ཡང་ཡང་མི་ཐོབ་པས།།
ཕ་མའི་དོན་དུ་འབད་བརྩོན་ཅི་ནས་དགོས།།
ཕ་མ་བྱམས་ལྡན་ནད་མེད་ཚེ་རིང་ཤོག།།
ཕ་མ་འགྲོ་དྲུག་དམ་ཆོས་ཐོས་པར་ཤོག།།
ཕ་མའི་དྲིན་ལན་མྱུར་དུ་འཇལ་བར་ཤོག།།
ཕ་མའི་དོན་དུ་ཆོས་ལ་གཞོལ་བར་ཤོག།།
དགེའོ།།
- སྔ་འགྱུར་ནམ་ཁྱུང་ཞལ་འདོན་ཕྱོགས་བསྒྲིགས། ཤོག་ངོས་ ༣༠༠ པར་གསལ།
- བཤད་གྲྭའི་ཆོས་གླིང་འདིར་གཙོ་བོ་གྲྭ་ཤག་གླིང་ལྔ་ཡོད་པའི་ནང་གསེས་ཤིག་གི་མིང་ཡིན།
- ༸སྐྱབས་རྗེ་གྲུབ་དབང་པདྨ་ནོར་བུ་རིན་པོ་ཆེའི་སྲིང་མོ་ཡིན། རྣམ་གྲོལ་གླིང་གི་ངག་རྒྱུན་ལོ་རྒྱུས། ཤོག་ངོས་ ༡༦༥ པར་གསལ།
- ཨ་ཏཱ་ནི་ཅོ་ཅོ་ལ་གོ བྱ་ཁྭ་ཏ་ལ་ཆོས་གླིང་འདིར་ཡོངས་གྲགས་སུ་ཨབ་ལ་བརྗོད།
- རྒྱ་གར་གྱི་སྒོར་མོ་ལ་གོ དེའི་མདུན་ངོས་ལ་གན་དྷིའི་སྐུ་པར་ཡོད་པས་སོ།།
- ངའི་འདི་ཕྱི་སྐྱབས་མགོན་དྲིན་ཆེན་རྩ་བའི་བླ་མ་༸མཆོག་སྤྲུལ་པདྨ་རིག་རྩལ་རིན་པོ་ཆེའི་ཞལ་ནས་ཐོས།
- ཀུན་བཟང་བླ་མའི་ཞལ་ལུང་། སི་ཁྲོན་མི་རིགས་དཔེ་སྐྲུན་ཁང་། ཕྱི་ལོ་ ༢༠༠༣ ལོའི་པར་མ། དེབ་ཕྲེང་ཇ་པ། ཤོག་ངོས་ ༣༢༡ པར་གསལ།
- ཀུན་བཟང་བླ་མའི་ཞལ་ལུང་། སི་ཁྲོན་མི་རིགས་དཔེ་སྐྲུན་ཁང་། ཕྱི་ལོ་ ༢༠༠༣ ལོའི་པར་མ། དེབ་ཕྲེང་ཇ་པ། ཤོག་ངོས་ ༣༢༡ པར་གསལ།
- ཀུན་བཟང་བླ་མའི་ཞལ་ལུང་། སི་ཁྲོན་མི་རིགས་དཔེ་སྐྲུན་ཁང་། ཕྱི་ལོ་ ༢༠༠༣ ལོའི་པར་མ། དེབ་ཕྲེང་ཇ་པ། ཤོག་ངོས ༣༢༣ པར་གསལ།
- སྔ་འགྱུར་རིག་མཛོད་རྩི་འཕྲུལ་སྡེ་མཚན་གྱི་ཕྱི་ལོ་ ༢༠༡༤ ལོའི་པར་མ། དེབ་གཟུགས། ཤོག་ངོས་ ༡༨ པར་གསལ།
- གསུངས་འདི་ནི་ངོ་དེབ་ཚང་དུ་ཨིན་སྐད་ལ་ཡོད་པ་དེ་ཕབ་སྟེ་བསྒྱུར།
- གསུང་འདི་ནི་ ( jatavnigeeta ) དྲ་ཚིགས་ནས་ཕབ་སྟེ་བསྒྱུར་བ་ཡིན།
- ས་སྐྱ་ལེགས་བཤད། སི་ཁྲོན་མི་རིགས་དཔེ་སྐྲུན་ཁང་། དེབ་གཟུགས། ཤོག་ངོས་ ༩ པར་གསལ།
