ཞེ་ཆེན་རྒྱལ་ཚབ་འགྱུར་མེད་པདྨ་རྣམ་རྒྱལ།
ཡང་སྟོན་པ་མཉན་ཡོད་ན་བཞུགས་པའི་ཚེ། ཡུལ་དེ་ན་ཁྱིམ་བདག་མཛའ་བཤེས་གཉིས་ཡོད་པ་དེས། ཕྱིན་ཆད་སོ་སོར་བུ་དང་བུ་མོ་དག་བྱུང་ན་དེ་གཉིས་གཉེན་བྱེད་པར་ཆད་པ་ལས། ཕྱིས་ཤིག་ན་གཅིག་ལ་ཁྱེའུ་དང་། གཅིག་ལ་བུ་མོ་མཛེས་ཤིང་ལྟ་ན་སྡུག་པ་རེ་བཙས་ནས་སོ་སོས་བཙས་སྟོན་བྱས་སོ།།
དེ་ནས་བུ་མོ་དེ་ཆེར་སྐྱེས་པ་ན་སངས་རྒྱས་ཀྱི་བསྟན་པ་ལ་དད་པ་རྙེད་ནས་རབ་ཏུ་བྱུང་བར་འདོད་པ་དང་། དེའི་ཕ་མས་སྔར་གྱི་མཛའ་བཤེས་དེ་ལ་སྦྲན་ནས་ཡུལ་ཆོས་དང་མཐུན་པར་བག་མར་བྱིན་ནོ། །དེའི་འོག་ཏུ་བུ་མོ་དེ་བྲོས་ནས་དགེ་སློང་མའི་གཙུག་ལག་ᨮང་དུ་ཕྱིན་ནས་རབ་ཏུ་བྱུང་ཞིང་བསྙེན་པར་རྫོགས་སོ། །དེར་མཁན་མོས་ཀྱང་དེ་ལ་ལུང་ཕོག་ནས་དེས་ཀྱང་བརྩོན་པས་དགྲ་བཅོམ་པ་ཉིད་མངོན་དུ་བྱས་ཏེ་རྫུ་འཕྲུལ་ཡང་གྲུབ་བོ། །དེ་ནས་ཁྱིམ་བདག་གི་ཁྱེའུ་དེས་ཀྱང་ཆུང་མ་བྲོས་པར་མཐོང་ནས་འཚོལ་ཞིང་ཕྱིན་པས། དགེ་སློང་མའི་གཙུག་ལག་ཁང་དུ་བསམ་གཏན་ལ་གནས་པར་མཐོང་ནས་དེས་ལག་པ་ནས་བཟུང་བར་བྱས་པ་དང་། དེ་སྟེང་གི་ནམ་མཁའ་ལ་འཕགས་ཏེ་འབར་བ་ལ་སོགས་པའི་ཆོ་འཕྲུལ་བསྟན་པས། ཁྱེའུ་དེ་ཡང་ཤས་ཆེར་དགའ་བ་སྐྱེས་ཏེ་དེའི་ཞབས་ལ་ཕྱག་བྱས་ཏེ་བཟོད་པར་གསོལ་ནས་ཆོས་ཉན་པར་འཁོད་པ་ན། དེེས་ཀྱང་ཁམས་དབང་བསམ་པ་དང་མཐུན་པར་ཆོས་བསྟན་པས་ཁྱེའུ་དེ་དང་གཞན་སྐྱེ་བོ་མང་པོ་དེར་འཚོགས་པ་དག་གིས་སྟན་དེ་ལ་འཁོད་བཞིན་དུ་བདེན་པ་མཐོང་ངོ་། །དེ་ནས་ཁྱེའུ་དེས་ཀྱང་ཕ་མ་ལ་གནང་བ་ཞུས་ནས་རབ་ཏུ་བྱུང་ཞིང་བརྩོན་པས་དགྲ་བཅོམ་པའི་གོ་འཕང་ཐོབ་བོ། །དེར་དགེ་སློང་རྣམས་ཀྱིས་དེ་གཉིས་ཀྱི་ལས་ཀྱི་རྒྱུ་དྲིས་པ་ན། བཅོམ་ལྡན་འདས་ཀྱིས། སྔོན་སངས་རྒྱས་འོད་སྲུང་གི་དུས་སུ་ཝཱ་རཱ་ཎ་སཱི་ན་ཁྱིམ་བདག་ཁྱོ་ཤུག་གཉིས་སུ་གྱུར་ཏེ། བུ་མོ་དེ་སྔར་ལྟར་བྲོས་ནས་རབ་ཏུ་བྱུང་ཞིང་། དེ་ལ་བརྟེན་ནས་ཁྱིམ་ཐབ་ཀྱང་རབ་ཏུ་བྱུང་སྟེ་གཉིས་ཀས་ཚངས་པར་སྤྱད་ནས། དགེ་སློང་མ་དེས་འཆི་ཁར་མ་འོངས་པ་ན་སངས་རྒྱས་ཤཱཀྱ་ཐུབ་པའི་བསྟན་པ་ལ་རབ་ཏུ་བྱུང་ནས་དགྲ་བཅོམ་པའི་འབྲས་བུ་ཐོབ་པར་སྨོན་ལམ་བཏབ་བོ། །དེར་སྔར་གྱི་ཁྱིམ་ཐབ་ཀྱིས། དེའི་ཚེ་ན་ཡང་ང་ཉིད་ཁྱོད་ཀྱི་ཁྱིམ་ཐབ་ཏུ་གྱུར་ཏེ། ཁྱོད་ཁོ་ན་ལ་བརྟེན་ནས་བདག་གིས་ཀྱང་སངས་རྒྱས་མཉེས་པ་དང་ཆོས་ཐོས་ནས་འབྲས་བུ་ཐོབ་པར་ཤོག་ཅིག་ཅེས་སྨོན་ལམ་བཏབ་པས་ད་ལྟར་ཡང་དེ་བཞིན་དུ་གྱུར་པར་གསུངས་སོ།། །།
ཁུངས་གཏུགས་སའི་ཡིག་ཆ།
ཞེ་ཆེན་རྒྱལ་ཚབ་འགྱུར་མེད་པདྨ་རྣམ་རྒྱལ་གྱིས་མཛད་པའི་«མདོ་ལས་བྱུང་བའི་གཏམ་རྒྱུད་སྣ་ཚོགས།»ཞེས་པ་ལས་སྔ་འགྱུར་རིག་མཛོད་རྩོམ་སྒྲིག་པས་བཏུས།
