འཇམ་མགོན་མི་ཕམ་རྣམ་རྒྱལ་རྒྱ་མཚོ།
བླ་མ་འཇམ་པའི་དབྱངས་ལ་ཕྱག་འཚལ་ནས།།
རང་ཕྱོགས་ཡུལ་མི་རྣམས་ལ་གྲོས་ཤིག་འདེབས།།
ལུགས་ཀྱི་ཆོས་ལས་རྒྱ་ཆེར་བཤད་ན་ཡང་།།
དམན་པས་གོ་དཀའ་འདི་ཙམ་འཕྲལ་དུ་ཕན།།
ཡུལ་མི་ཐམས་ཅད་སྐྱིད་ཡ་སྡུག་རོགས་ཡིན།།
ཁེ་ཕམ་རྒྱལ་ཁ་བརྩད་ཀྱང་དོན་སྒོ་ཆུང་།།
འཐབ་རྩོད་ཉུང་ལ་ཕན་ཐོགས་མང་བར་གྱིས།།
དེ་ལྟར་བྱས་ན་རང་སྐྱིད་རོགས་ཀྱང་སྐྱིད།།
བཟའ་ཚང་མི་རྣམས་སྐྱིད་སྡུག་མཉམ་ཁུར་ཡིན།།
བློ་སེམས་མཐུན་ན་རང་བདེ་རོགས་ཀྱང་སྐྱིད།།
ཁ་འཐབ་མང་ན་རང་སྡུག་རོགས་ཀྱང་སྡུག།
ཡུད་ཙམ་འདུས་ཚེ་ཅི་དགའ་ཅི་སྐྱིད་བྱ།།
ཡུལ་མི་མཐུ་བསྡོང་རང་ཕྱོགས་བསྲུང་དགོས་པས།།
འཐེན་ཁྱེར་མ་མང་བློ་སེམས་གཅིག་ཏུ་བསྟུན།།
རང་རྐྱ་ཁེར་ཕེར་སུས་ཀྱང་མི་འོང་བས།།
རང་དོན་རོགས་དོན་མཉམ་སྲུང་བྱས་ན་ལེགས།།
ཕན་པ་བྱེད་ལ་འོས་ཚོད་དྲིན་གཟོ་གྱིས།།
བཟང་ངོ་མེད་ན་སུས་ཀྱང་ཕན་མི་འདོགས།།
མི་སྲུན་བླུན་པོ་ཅི་ལྟར་འོས་པས་འདུལ།།
ངན་པ་རང་དབང་ཆེ་ན་ཡུལ་དེ་རྒུད།།
ཅུང་ཟད་ཙམ་གྱིས་དགའ་སྡུག་མི་སྐྱེན་པར།།
སེམས་ཕུག་འཇམ་ན་ཐམས་ཅད་མཛའ་བཞིན་དགའ།།
བུད་མེད་ངན་མ་བཞིན་དུ་དབྱེན་གྱི་ཁར།།
མ་ཉན་བློ་རྒྱུད་བརྟན་ན་དུས་ཀུན་བདེ།།
ཡོད་པོས་མེད་ལ་གཡར་པོ་ཁུངས་བཟུང་གྱིས།།
དེ་ལྟར་བྱས་ན་ཡོད་པོ་ཀུན་གྱིས་རྩི།།
མེད་པོས་ཡོད་ལ་རོགས་དང་མངག་གཞུག་གིས།།
དེ་ལྟར་བྱས་ན་མེད་ཀྱང་གཡར་ཁུངས་རྙེད།།
རང་ཤེས་རོགས་ཤེས་བསམ་དཔྱོད་མེད་པ་ཡི།།
རང་འདོད་ཆེ་བའི་ཡུལ་དེ་བག་མི་ཕེབ།།
བསམ་བཟང་ཤེས་པ་ཅན་གྱི་མི་མང་ན།།
ཡུལ་དེ་བདེ་ཞིང་དམ་པའི་སྐྱེ་བོས་བསྟེན།།
ཤེས་ཅན་ཡོན་ཏན་ཡོད་པ་ཀུན་གྱིས་ཁུར།།
ཤེས་མེད་བསམ་རྒྱ་ཆུང་བ་གྱི་ནར་ཞོག།
སྟོན་པའི་རྗེས་འཇུག་ཇི་ལྟར་ཞན་ཀྱང་མཆོད།།
སྙོམས་ཆུང་མ་ནུས་པ་ལ་ཅི་ཕན་བྱོས།།
བཟང་ཕྱུག་སུ་བྱུང་རང་ཡུལ་བསོད་ནམས་ཡིན།།
དེ་ལ་ཕྲག་དོག་བྱས་ན་རང་ཡུལ་བརླག།
ངན་དབུལ་སུ་བྱུང་ལས་ཀྱི་བསྐོས་ཐང་ཡིན།།
དེ་ལ་དམན་སྡང་བྱེད་ན་ཐ་ཤལ་རྟགས།།
མཉམ་དུ་འགྲོགས་ན་རེད་དང་མ་རེད་བརྒྱ།།
སུ་ལའང་འབྱུང་ཕྱིར་ཡུལ་མི་བཟའ་ཚང་ལ།།
ཉེས་པ་ཅུང་ཟད་ཙམ་ལ་མི་འཐབ་པར།།
བྱམས་པས་བསྐྱང་ན་སླར་ཡང་མཛའ་བར་འགྱུར།།
རྗེ་བོ་འཁུར་ཞིང་ཡུལ་མི་བློ་མཐུན་ལ།།
དཀོན་མཆོག་གསུམ་ལ་བཀུར་སྟི་ཆེ་བ་དང༌།།
ཡ་རབས་བྱ་བར་དགའ་ཞིང་བསམ་དཀར་ཅན།།
གང་དུ་མང་བའི་ཡུལ་དེ་དར་བར་འགྱུར།།
རྐུ་ཁྲམ་རྫུན་གསུམ་སྤང་བ་ཀུན་ཡིད་ཆེས།།
རྩི་འཚོ་སྐྱོང་གསུམ་མཁས་ན་ཀུན་དང་མཐུན།།
བསགས་གཏོང་ཚོང་གསུམ་ཤེས་ན་འབྱོར་པ་འཕེལ།།
དཔའ་གཉེན་ཚོད་གསུམ་ལྡན་ན་ཀུན་གྱིས་རྩི།།
རང་རྒྱུད་དྲང་ན་ནམ་མཁའི་ལྷ་ཡང་མགུ།
མི་གཞི་བཟང་ན་ཐམས་ཅད་གཉེན་ལྟར་འདུན།།
བསམ་པ་བཟང་ན་རང་གི་ལས་ལམ་དགེ།
ཤེས་པ་ཡོད་ན་རང་ལ་ཕུན་སུམ་ཚོགས།།
བློ་ཁོག་ཡངས་ན་འཐབ་རྩོད་ཉུང་ཞིང་སྐྱིད།།
གཞན་ལ་གང་ཕན་བྱས་ན་རང་ཉིད་བདེ།།
དཀོན་མཆོག་གསུམ་ལ་དད་ན་འདི་ཕྱིར་ལེགས།།
བསོད་ནམས་ཚོགས་བསགས་བྱས་ན་བསམ་པ་འགྲུབ།།
ཅིས་ཀྱང་འཆི་ངེས་ལས་འབྲས་བསླུ་མེད་པས།།
རང་མཁོས་གང་ཡོད་དགེ་སྒྲུབ་སྡིག་སྤང་གྱིས།།
བླང་དོར་འབྱེད་པ་དམ་ཆོས་ཐོས་ལས་འབྱུང་།།
དམ་པ་བསྟེན་ཞིང་དམ་ཆོས་ཉན་ན་དགེ།
དེ་བས་དེ་ལྟར་བཤད་པ་ཇི་བཞིན་དུ།།
སེམས་ལ་བླང་ན་ཕན་དང་བདེ་བ་འཕེལ།།
ཡུལ་གྱི་བདེ་ཐབས་ཅི་ཞིག་དགོས་ཞེས་སུ།།
འདྲི་བ་དེ་ལ་འདི་ལྟར་སྟོན་པར་གྱིས།།
མེ་སྤྲེལ་ཟླ་ ༠༢ ཚེས་ ༢༠ ལ་མི་ཕམ་པས་བྲིས་པ་དགེ་ལེགས་འཕེལ།
ཁུངས་གཏུགས་སའི་ཡིག་ཆ།
ནང་བསྟན་དཔེ་ཚོགས་ལྟེ་གནས། W2DBI6631
རྫོང་གསར་ཤིང་པར། མི་ཕམ་བཀའ་འབུམ། པོད་ ༢༣ གཏམ་ཚོགས་ཐོར་བུའི་རིགས་ཕྱོགས་གཅིག་ཏུ་བསྒྲིགས་པ་ལེགས་བཤད་ནོར་བུའི་བང་མཛོད། ཤོག་གྲངས་ ༢༧༡-༢༧༤
