ལོ་རིམ་བརྒྱད་པའི་སློབ་གཉེར་བ། ངག་དབང་བློ་གྲོས།
དང་བའི་དད་པས་གོང་མའི་ཡོན་ཏན་དྲན།།
འདོད་པའི་དད་པས་བླང་དོར་གནས་ལ་འཇུག།
ཡིད་ཆེས་དད་པས་རྒྱུ་འབྲས་ཐེ་ཚོམ་སེལ།།
དང་འདོད་ཡིད་ཆེས་དད་ལ་སྐྱབས་སུ་མཆིས།།
རྣམ་དཔྱོད་དང་ཤེས་ཡོན་གྱི་ན་ཚོད་མ་སྨིན་ཀྱང་མཆོག་གསུམ་གཙུག་ཏུ་བཀུར་ཞིང་ལས་འབྲས་ལ་ཡིད་ཆེས་ཤིང་དད་པའི་ས་བོན་མ་རུལ་ཙམ་མཆིས་པའི་སེར་མིང་ངས་དེ་རིང་རྩོམ་རྩལ་རིག་པའི་ཅང་ཤེས་རྟ་ཕོའི་བང་རྩལ་གློད་སའི་ཐང་ཆེན་«པདྨའི་རང་མདངས་»འདིའི་བརྒྱུད་ནས་ཁ་རྩང་དེ་རིང་གི་ཆོས་པ་བདག་དང་བདག་འདྲ་བའི་དད་པ་དག་སྣང་གི་སྐོར་ལ་ཚིག་གསུམ་ཞུ་འདོད་བྱུང་།
དེ་ཡང་བདག་ཅག་གི་སྟོན་པ་དང་དམ་པ་གོང་མ་རྣམས་ཀྱིས་གསུངས་པ་ལྟར་དད་པ་ནི་དམ་ཆོས་ཀྱི་གཞི་རྟེན་དང་བྱིན་རླབས་ཀྱི་འབྱུང་གནས་དོན་དམ་འཇལ་བྱེད་ཀྱི་བདག་རྐྱེན་བཅས་ཀྱི་རང་བཞིན་དང་ངོ་བོར་གནས་ལ། དེས་ན་ཐབས་མཁས་ལ་ཐུགས་རྗེ་མངའ་བའི་བདག་ཅག་གི་སྟོན་པའི་རྗེས་འཇུག་སྤྱི་དང་། བྱེ་བྲག་ཏུ་བཀའ་བསྟན་གྱི་གཞུང་ལུགས་རབ་འབྱམས་ལ་ཐོས་བསམ་སྒོམ་གསུམ་གྱི་སྒོ་ནས་བརྩོན་པའི་གང་ཟག་གི་རྒྱུད་ལ་དད་པའི་དྲི་བསུང་མ་འཐུལ་ན་མཐོང་སྣང་དུ་མཛེས་མཛེས་དང་ལེགས་ལེགས་སུ་མཐོང་སྲིད་ཀྱང་དོན་དུ་ཆོས་པའི་མིང་ཙམ་ལས་ཆོས་པ་རྣམ་དག་ཅིག་ཆགས་མི་སྲིད་དེ། ཡིད་བཞིན་མཛོད་འགྲེལ་ལས།1སྐལ་མེད་རྣམས་ལ་དད་པ་ཅུང་ཟད་མེད། །དེ་ཡི་སྐྱོན་ནི་ཤིན་ཏུ་མཐའ་ཡས་ལྡན། །ཞེས་པ་ལྟར་ཁ་རྩང་དེ་རིང་སྐལ་མེད་ཁ་ཅིག དད་པའི་ས་བོན་རུལ་ཞིང་དག་སྣང་གི་བློ་མིག་ལྡོངས་ནས་ལོག་རྟོག་གི་རྦ་རླབས་འཕྱུར་ཏེ་ཤེས་འཆལ་གྱི་བདུད་སྤྲིན་འཁྲིགས་ནས་ཉེས་བཤད་ཀྱི་དྲག་ཆར་འབེབས་པའི་རྟོག་གེ་མགོ་མཁྲེགས་ཅན་སོས་ཀའི་སྤང་ལ་ཤ་མོང་བཞིན་བརྡོལ་ཏེ།
དེ་ཡང་ཉེར་གཅིག་པའི་དུས་ཀྱི་དཀྱོག་མཚམས་འདིར་ནང་པ་རུ་ཁས་འཆེ་བའི་རྟོག་གེ་ཤེས་འཆལ་འགའ་ཞིག དད་པའི་ས་བོན་རུལ་ཞིང་དག་སྣང་གི་བློ་མིག་ལྡོངས་ནས་རྒྱལ་བའི་གསུང་རབ་དང་བླ་མའི་སྐུ་པར། དེ་བཞིན་ངུར་སྨྲིག་གི་ཆོས་གོས་རྣམ་གསུམ་སོགས་ལ་དད་གུས་དག་སྣང་སྤུ་ཙམ་ཡང་མེད་པར་སྡིག་པ་མིག་བཙུམ་གྱི་སྒོ་ནས་སྲང་ལམ་དང་གད་སྙིགས་བླུག་སྣོད་དུ་འདོར་ཕོད་ཅིང་། བླ་སྤྲུལ་སྐྱེས་ཆེན་དམ་པ་རྣམས་དང་དེ་བཞིན་འདི་ཕྱིའི་ལམ་སྟོན་དགེ་བའི་བཤེས་གཉེན་སོགས་ལའང་དད་པ་དག་སྣང་གཞག་རྒྱུའི་ཚབ་ཏུ་མངོན་སུམ་འཛེམ་མེད་ཀྱིས་ཁ་གཏོང་མཁན་དངོས་ཤུགས་བརྒྱུད་གསུམ་ནས་ཐོན་ཡོང་བ་ནི་ཉེན་ཚབས་ཆེ་བའི་འགོས་ནད་ཅིག་ཏུ་འཁུམས།
དེའི་ཕྱིར་མཆོག་གསུམ་གཙུག་ཏུ་བཀུར་ཞིང་ལས་འབྲས་དཔང་དུ་བཞག་སྟེ་དོན་གཉིས་ཀྱི་དཔལ་ལ་ལོངས་སུ་སྤྱོད་པའི་དཔེ་ཆ་བ་ང་ཚོ་དེ་འདྲའི་ལམ་ལོག་ཏུ་མི་འགྲོ་རྒྱུ་ཅི་ནས་ཀྱང་ཡིད་གཟབ་གནང་དགོས་པའི་དུས་ལ་སླེབས་འདུག་སྙམ། དེ་མིན་ནམ་ཞིག་འགོས་ནད་དེ་ཕོག་ཚར་ནས་བཟུང་སྟེ་བླ་སྤྲུལ་མཁན་སློབ་གྲྭ་བཙུན་སོགས་ཀྱི་མཚན་བྱང་རྫིག་པོ་གང་འདྲ་ཡོད་ཀྱང་ནང་པའི་གྲལ་ནས་རྩ་དགོངས་ཞུས་པའི་ཕྱི་པ་གཙང་མ་གཙང་རྐྱང་ཞིག་སྟེ། དེའི་རྒྱུད་ན་སྐྱབས་སྡོམ་སོགས་འཇའ་ལྟར་ཡལ་ནས་ལོག་ལྟས་ལས་འབྲས་མེད་པར་ལྟ་ཞིང་རྟག་ཆད་ཀྱི་མཐའ་ལ་ལྷུང་བའི་ཕྱིར།
མཆོག་གསུམ་ལ་སྐྱབས་སུ་མ་སོང་བར་ནང་པའི་གྲལ་དུ་མི་ཚུད་དེ། ཕྱི་པ་ནང་པ་སྐྱབས་འགྲོའི་ཁྱད་ཅེས་པའི་གསུང་དང་རྒྱབ་འགལ་དུ་སོང་བའི་ཕྱིར་རོ། །སངས་རྒྱས་དཀོན་མཆོག་ལ་སྐྱབས་སུ་སོང་ན་ཚྭ་ཚྭ་ཆག་དུམ་ཡན་ལ་སངས་རྒྱས་དཀོན་མཆོག་གི་འདུ་ཤེས་གཞག་དགོས་པ་དང་། དེ་བཞིན་ཡིག་འབྲུ་ན་གཅིག་ལ་ཆོས་དཀོན་མཆོག་གི་འདུ་ཤེས་དང། ན་བཟའ་དམར་སེར་ཡན་ལ་འཕགས་པའི་དགེ་འདུན་གྱི་འདུ་ཤེས་འཇོག་དགོས་པའི་ཕྱིར་རོ།།
རང་ཉིད་ཐར་པ་དོན་གཉེར་གྱི་གང་ཟག་ཅིག་ཡིན་ཕྱིན་ཆད་དང་པོར་དཀར་པོ་ཆོས་ཀྱི་གཞི་རྟེན་དད་པ་རང་རྒྱུད་ལ་ཅི་ནས་ཀྱང་ཡོད་དགོས་པ་ཡང་། རིན་ཆེན་ཕྲེང་བ་ལས།2 དད་ཅན་ཉིད་ཕྱིར་ཆོས་ལ་བསྟེན། །ཤེས་རབ་ལྡན་ཕྱིར་ཡང་དག་རིག །འདི་གཉིས་གཙོ་བོ་ཤེས་རབ་སྟེ། །དེ་ཡི་སྔོན་འགྲོ་དད་པ་ཡིན། །ཞེས་གསུངས་པའི་ཕྱིར་དང་། དེའི་དོན་ལ་བསམས་ཏེ་ནམ་རྒྱུན་ང་ཚོས་སངས་རྒྱས་ཀྱི་ཐུགས་རྒྱུད་ན་སེམས་བསྐྱེད་ཡོད་མེད་དང་ས་བཅུ་རྒྱུན་མཐའི་རྒྱུད་ལ་སྒྲིབ་པ་ཡོད་མེད་དེ་བཞིན་སྒྲ་རྟག་པ་ཡིན་མིན་དང་རྟ་དཀར་པོ་ཡོད་མེད་ལ་སོགས་ཁ་བདེ་པོ་རྐྱང་རྐྱང་བཤད་ནས་མ་འདུག་པར་བློ་ནང་ལ་བཀུག་སྟེ་རང་ཉིད་སུ་ཡིན་ངོ་ཤེས་པའི་སྒོ་ནས་རང་གི་རྒྱུད་ལ་སྐྱབས་སྡོམ་ལྡན་མིན་དང་། དད་པ་དག་སྣང་ཡོད་མེད། བདག་མེད་དང་མི་རྟག་ཡིན་མིན་སོགས་ལ་བརྟག་དཔྱད་རེ་གཏང་རྒྱུ་ཅི་ནས་ཀྱང་མ་བརྗེད་པར་གནང་དགོས་པ་ནི་ཁ་ཚ་དགོས་གཏུགས་ཤིག་ཏུ་མཐོང་། དེ་མིན་ཕྱོགས་གཅིག་ནས་ང་ཚོས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་པ་སྟོན་པ་ཞེས་བཅོམ་ལྡན་འདས་གང་ཉིད་ལ་མ་བགྲོས་ཁ་གཅིག་གྲགས་སུ་ཚད་མའི་སྐྱེས་བུར་ཁས་ལེན་ཞིང་། ཕྱོགས་གཞན་ཞིག་ནས་རྒྱལ་བའི་བཀའ་དྲི་མ་མེད་པ་ལའང་བརྟག་དཔྱད་དགོས་ཟེེར་ནས་རང་ཉིད་མཁས་འདོད་ཀྱིས་སངས་རྒྱས་ཀྱི་གསུང་ལ་སྔ་ཕྱི་འགལ་བ་ལྟག་སྤྲོད་ཡོད་ཚུལ་སྨྲ་བ་ནི་རང་ཉིད་ཀྱི་བྱིས་བློས་ཟབ་ཅིང་རྒྱ་ཆེ་བའི་ཆོས་ཚུལ་གྱི་གཏིང་མཐའ་མ་དཔོག་པ་ཙམ་ལས་སྔར་མེད་མཁས་པའི་ལེགས་བཤད་ཅིག་ག་ལ་ཡིན། ཁྱོད་ཀྱིས་ཤཱཀྱའི་རྒྱལ་སྲས་གཞོན་ནུ་དོན་གྲུབ་ཚད་མའི་སྐྱེས་བུར་ཁས་མི་ལེན་ན་ཆོག་མོད། གལ་སྲིད་ཁྱོད་ཀྱིས་ཟས་གཙང་སྲས་ཚད་མའི་སྐྱེས་བུར་ཁས་བླངས་ནས་བཟུང་སྟེ་ཁོང་གི་གསུང་སྐྱོན་ཅན་དུ་ཇི་ལྟར་ལྟ་ནུས་སམ། གང་ཉིད་ཚད་མའི་སྐྱེས་བུར་འཇོག་བྱེད་དེ་ཡང་དེའི་གསུང་ཚད་མ་ཡིན་པའི་རྒྱུ་མཚན་དུ་མ་བྱས་སམ། དེས་ན་རང་རེ་སྟོན་པའི་རྗེས་འཇུག་གི་ཆོས་པ་ཞིག་ཏུ་འདོད་ན། དཀོན་མཆོག་སྒྲོན་མེའི་མདོ་ལས།3 དད་པ་སྔོན་འགྲོ་མ་ལྟར་བསྐྱེད་པ་སྟེ། །ཡོན་ཏན་ཐམས་ཅད་སྲུང་ཞིང་འཕེལ་བར་བྱེད། །ཅེས་པའི་གསུང་དེ་ཡུལ་དུས་གང་དུའང་ཐུགས་དམ་དུ་འཛིན་ཅིང་མ་ལྟར་དུ་ནམ་ཡང་བརྗེད་མི་རུང་བའི་སྙིང་ནོར་བཞིན་དུ་ཡིད་ལ་བཅངས་ནས་ད་གཟོད་ཐོས་བསམ་ལ་ཞུགས་ན་མི་ལེགས་སམ།
དེ་མིན་ཁ་རྩང་དེ་རིང་དཔེ་ཆ་བ་ཁ་ཅིག དང་ཐོག་རང་རྒྱུད་ལ་དང་བའི་དད་པ་ཙམ་ཞིག་ཡོད་ཀྱང་། གང་འཚམས་ནས་ཐོས་པ་ཁ་ཕྱིེར་བལྟས་སུ་སོང་བའི་ཉེར་ལེན་གྱིས་རྟོག་གེ་ཤེས་འཆལ་དུ་གྱུར་ནས། ཡུལ་གོང་མའི་ཡོན་ཏན་ལ་སེམས་མངོན་པར་དགའ་བའི་དང་བའི་དད་པའི་རྩ་བ་རུལ་ཞིང་དགེ་བ་བླང་བྱ་དང་སྡིག་པ་དོར་བྱར་འདོད་པའི་དད་པའི་སྡོང་པོ་འགྱེལ་ནས་རྒྱུ་འབྲས་ཆོས་ལ་ཡིད་ཆེས་པའི་དད་པའི་ལོ་འདབ་ཉིལ་ཏེ། ཅི་ཡང་ལྟ་བཟོ་མེད་ཅིང་དཀར་ཆོས་ཕོངས་པའི་ཆོས་པ་ཞིག་ཏུ་གྱུར་ཏེ།
དེ་ཡང་དཀོན་མཆོག་བརྩེགས་པ་ལས།4དད་པ་མེད་པའི་མི་རྣམས་ལ། །དཀར་པོའི་ཆོས་རྣམས་མི་འབྱུང་སྟེ། །ས་བོན་མེ་ཡིས་འཚིག་པ་ལ། །སྨྱུ་གུ་སྔོན་པོ་ཇི་བཞིན་ནོ། །ཞེས་པའི་གྲལ་དུ་ངམ་ངམ་ཤུགས་ཤུགས་ཀྱིས་ལྷུང་བའི་ཕྱིར་རོ།།
གཞན་ཡང་དཔེ་ཆ་བ་ཁ་ཅིག་རྒྱལ་བའི་གསུང་རབ་དཔེ་དེབ་དག་འགོམ་ཡུག་ཏུ་ཤོར་ཀྱང་སྣང་མེད་དུ་འཇོག་པ་དེ་ཡང་མཐར་གཏུགས་ན་རང་རྒྱུད་ལ་དད་པ་དག་སྣང་ཕོངས་པས་མ་ཡིན་ནམ། བརྗོད་བྱ་བསླབ་གསུམ་སྟོན་པའི་རྗོད་བྱེད་འདུལ་མདོ་མངོན་པའི་གཞུང་ལུགས་དཔེ་དེབ་དག་ཐུན་མོང་རིག་གནས་ཀྱི་དེབ་ལྟར་བརྩི་རུང་ངམ། དེ་ཡང་ཇི་སྐད་དུ། ལྔ་བརྒྱ་ཐ་མར་གྱུར་པ་ན། །ང་ནི་ཡི་གེ་གཟུགས་སུ་གནས། །ཞེས་པའི་གསུང་དེ་ཡིད་ལ་དྲན་པར་མཛོད་ཅིག སྤྱིར་བཏང་བྱས་ན་གང་གིས་ནང་དོན་གཞུང་ལ་ཐོས་པ་ཇི་ཙམ་བྱས་པ་དེ་ཚོད་ཀྱིས་སྟོན་དང་བསྟན་པ་ལ་དད་གུས་དག་སྣང་ཇེ་ཆེར་དུ་འགྲོ་དགོས་ངེས་རེད་དེ། དད་པའི་ས་བོན་རུལ་ནས་ལོག་རྟོག་བདུད་སྤྲིན་འཚུབས་ཤིང་ཐོས་པ་ཁ་ཕྱིར་བལྟས་སུ་སོང་བའི་ཉེར་ལེན་གྱི་འབྲས་བུ་ལྡོག་ཕྱོགས་ནས་ཐོན་པ་དེ་ནི་སྙིང་རྗེའི་ཡུལ་དུ་མ་གྱུར་རམ།
སྐུ་གཟུགས་མཆོད་རྟེན་ལ་སོགས་པ། །གསེར་དངུལ་ས་རྡོ་གང་ཡིན་རུང་།།
རབ་གནས་འཐོར་བའི་རྟེན་ཡིན་ན། །སངས་རྒྱས་དཀོན་མཆོག་འདུ་ཤེས་སྐྱེད།།
བོད་ཡིག་དབྱིན་ཡིག་གང་ཡིན་རུང་། །འདུལ་མདོ་མངོན་པའི་གཞུང་ཡིན་ན།།
དམ་ཆོས་དཀོན་མཆོག་བློ་བཞག་སྟེ། །གུས་པས་སྤྱི་བོའི་གཙུག་ཏུ་བཀུར།།
སོ་སྐྱེས་འཕགས་པ་སུ་ཡིན་རུང་། སྡོམ་པ་དམ་ཚིག་ལ་གནས་པའི།།
ལུང་རྟོགས་བསྟན་འཛིན་སྐྱེས་བུ་ལ། །དགེ་འདུན་དཀོན་མཆོག་དག་སྣང་བྱོས།།
གཞན་ཡང་ཁ་ཅིག་ན་རེ་ང་ཚོ་དཔེ་ཆ་བ་ཡིན་པས་དབང་རྣོན་ཆོས་ཀྱི་རྗེས་འབྲང་ལས་དབང་རྟུལ་དད་པའི་རྗེས་འབྲང་མིན་ཟེར་བཞིན། དང་བའི་དད་པ་ལ་རྨོངས་དད་མིང་དུ་བཏགས་ནས་སྣང་ཆུང་དུ་བཏང་སྟེ་གཡུག་རྐྱང་བྱེད་ལ། རྒྱལ་བའི་སྐུ་གཟུགས་མཆོད་རྟེན་སོགས་ལ་ས་རྡོ་ཐ་མལ་ཙམ་ལས་ཕྱག་དང་མཆོད་པའི་ཡུལ་དུ་མ་མཐོང་ཞིང་། གཞན་དད་སྦྱིན་ཕོ་མོས་དང་བའི་དད་པས་སྒོ་གསུམ་གུས་པ་ཆེན་པོས་ཕྱག་དང་སྐོར་བ་འབུལ་དུས་རྗེས་སུ་ཡི་རང་བྱ་རྒྱུའི་ཚབ་ཏུ་མི་འདོད་པའི་རྣམ་འགྱུར་ཡ་མ་ཟུང་འདྲ་སྟོན་གྱིན་འདུག དེ་འདྲ་ཡིན་དུས་རང་ཉིད་སུ་ཡིན་པ་ཡང་དྲན་པ་བརྗེད་པའི་ཚད་དུ་མ་སླེབས་སམ།
དེ་དུས་རང་རྒྱུད་ན་དགེ་བ་བླང་བྱ་དང་སྡིག་པ་དོར་བྱར་འདོད་པའི་དད་པ་ཞེས་པ་དེ་ཡང་མོ་གཤམ་བུ་མོའི་མག་པར་བཏང་ཟིན་འདུག་པ་མ་ཟད། རྒྱུ་དགེ་བ་ལ་འབྲས་བུ་བདེ་བ་དང་རྒྱུ་མི་དགེ་བ་ལ་འབྲས་བུ་སྡུག་བསྔལ་འབྱུང་བར་ཡིད་ཆེས་པའི་དད་པའི་ཞག་རྩི་ཙམ་ཡང་དཔེ་ཆ་བ་དབང་རྣོན་ཆོས་ཀྱི་རྗེས་འབྲང་ཁྱེད་ཀྱི་རྒྱུད་ལ་མེད་པ་ཟུར་བལྟས་ལེབ་མཐོང་མ་ཡིན་ནམ། གལ་སྲིད་རྒྱུ་མཚན་ཤེས་ནས་ཐོབ་པའི་དད་པ་རང་རྒྱུད་ལ་མངའ་བ་ཡིན་ན། སྣང་སྲིད་ཀྱི་ཆོས་ཀུན་ཡེ་ནས་སངས་རྒྱས་ཡིན་པས་མ་དག་པའི་ས་རྡོ་བཙལ་ཀྱང་མ་རྙེད་ཅིང་དག་པའི་ལྷ་སྐུ་འབའ་ཞིག་ཏུ་མཐོང་ནས་རྐང་པ་འཇོག་ས་ཡང་མི་རག་པའི་ཚད་དུ་སླེབ་དགོས་རྒྱུ་ལ། དེ་ལས་ལྡོག་སྟེ་སྐུ་གཟུགས་མཆོད་རྟེན་ལྷ་ཁང་བླ་མ་ལ་སོགས་མཇལ་དུས་ཀྱང་དད་པས་སྐེད་པ་གུག་ཙམ་ཡང་བྱེད་མི་ཐུབ་པའི་རྟོག་གེ་ཚིག་སྐམ་མགོ་མཁྲེགས་ཤིག་ཏུ་ཆགས་དུས་དཔེ་ཆ་བ་དབང་རྣོན་ཆོས་ཀྱི་རྗེས་འབྲང་དེ་ཚོ་ལ་ལྟ་བཟོ་ཞིག་འདུག་གམ།
དེས་ན་དཔེ་ཆ་བ་ཚོས་དང་བའི་དད་པ་དེ་རྨོངས་དད་དུ་བརྩིས་ཏེ་སྣང་མེད་དུ་མ་བཞག་པར་དང་འདོད་ཡིད་ཆེས་དད་གསུམ་གྱིས་རང་རྒྱུད་མཛེས་པར་བྱས་ནས་ཐོས་སོགས་ཤེས་རབ་ཚུལ་བཞིན་བརྩོན་རྒྱུ་ཅི་ནས་ཀྱང་གཙིགས་ཆེན་དུ་གནང་མི་དགོས་སམ། དེ་མིན་ཐོས་རྟགས་ཞི་ཞིང་དུལ་བ། །སྒོམ་རྟགས་ཉོན་མོངས་མེད་པ། །ཞེས་པའི་རྣམ་ཐར་རྗེས་སུ་མ་སོང་བར། གྱོང་པོ་སྣུམ་གྱིས་ཐུལ་ཀྱང་། །མར་སྐོགས་མར་གྱིས་མི་ཐུལ། །སྡིག་ཆེན་ཆོས་ཀྱིས་ཐུལ་ཀྱང་། །ཆོས་དྲེད་ཆོས་ཀྱིས་མི་ཐུལ། །ཞེས་པའི་གྲལ་ནང་དུ་ལྷུང་ན་ཉེན་ཚབས་ཤིན་ཏུ་མི་ཆེའམ། གནད་དོན་ཧྲིལ་གྱིས་དྲིལ་ན་དེ་འདྲའི་ས་མཚམས་སུ་འདྲུད་མཁན་དེ་ཡང་ཐོས་པའི་ང་རྒྱལ་ང་ཆེ་ང་བཙན་ཞེས་པའི་དེ་ཡིན་པར་གོར་མ་ཆག དེའི་ཕྱིར་མཁས་པས་ནོར་ན་འདོམ་གང་། །བླུན་པོས་ནོར་ན་མཐོ་གང་། །ཞེས་པའི་གཏམ་དཔེ་དེ་སྲུང་མདུད་དོད་དུ་ནམ་ཡང་སྐེ་ལ་ཐོགས་ཤིག
ཤེས་རབ་འབར་ནས་མཁས་པའི་གོ་ས་རུ། །མ་སོན་ན་ཡང་རང་རྒྱུད་ཞིང་ས་ལ།།
དད་པའི་མྱུ་གུ་འཁྲུངས་ཏེ་ལས་རྒྱུ་འབྲས། །ཚུལ་བཞིན་སྲུང་བའི་ཆོས་པ་ཞིག་ཏུ་མོས།།
དད་པའི་གྲུ་གཟིངས་བོར་བའི་རྟོག་གེ་དག། །སྲིད་པའི་སྡུག་བསྔལ་ཆུ་བོ་རབ་བརྒལ་ཏེ།།
ཐར་པའི་གླིང་དུ་བགྲོད་པའི་སྐབས་མེད་ན། །ཐར་འདོད་རྣམས་ཀྱིས་དད་པའི་གྲུ་ལ་བརྟེན།།
མདོར་ན་ཆོས་པའི་མཚན་བྱང་འཁུར་མཁན་ཞིག་གི་ངོས་ནས་རབ་བྱུང་ན་མ་འོངས་པའི་དམིགས་ཡུལ་དང་ད་ལྟའི་ལངས་ཕྱོགས་མ་ནོར་བའི་སྒོ་ནས། དད་པའི་ཞིང་ས་ལ་བརྩོན་འགྲུས་ཀྱི་ཆུ་ལུད་བཀྲམས་ཤིང་ལོག་རྟོག་གི་ཡུར་མ་ཡུར་ནས་རང་དོན་དུ་ཐོས་བསམ་སྒོམ་གསུམ་གྱི་ས་བོན་བཏབ་སྟེ། གཞན་དོན་དུ་འཆད་རྩོད་རྩོམ་གསུམ་གྱི་མེ་ཏོག་བཞད་ཅིང་གཉིས་དོན་དུ་མཁས་བཙུན་བཟང་གསུམ་གྱི་འབྲས་བུ་སྨིན་ནས་བསྟན་པ་འཛིན་པའི་སྐྱེས་བུ་ཞིག་ཏུ་འགྱུར་བའི་འབད་བརྩོན་གནང་དགོས་པ་ནི་ང་ཚོའི་ཕྲག་ཏུ་བབས་པའི་འོས་འགན་ཞིག་མ་ཡིན་ནམ། གལ་ཏེ་དེ་ལྟར་མ་འཇོན་ཀྱང་རང་རྒྱུད་ཚུལ་ཁྲིམས་ཀྱི་ཞིང་ས་ལ་བཅས་རང་གི་སེར་བ་མི་འབེབས་པར་དྲན་པ་དང་ཤེས་བཞིན་གྱིས་བྱ་ར་བྱེད་ཅིང་རང་ཚུགས་མ་ཤོར་བར་དད་པ་དང་དག་སྣང་གི་ཆུ་ལུད་བཀྲམས་ནས་རང་དགོས་ཐོས་བསམ་སྒོམ་གསུམ་གྱི་ལས་ལ་གཅིག་ཏུ་གཞོལ་ནས་རང་མགོ་ཉི་མ་ཆོས་ཀྱིས་འཁྱོལ་བར་བྱེད་དགོས་པར་སེམས། མ་མཐར་ཡང་རང་ངོ་མ་བརྗེད་གཞན་སེམས་མ་དཀྲུགས་པར་རང་ཉིད་ནང་པའི་གྲལ་ནས་མ་བུད་ཅིང་། རང་རིགས་ལ་ཕྱོགས་ལྷུང་དང་ཨ་ཕའི་ཁ་ཕོར་གཙང་ཞེན་གྱི་ཕྱོགས་རིས་མ་གོས་པར་དད་པའི་ཞག་རྩི་ཡོད་པའི་སྒོ་ནས་རང་ཚུགས་མ་ཤོར་བ་ཞིག་དང་། དེ་བཞིན་གཞན་རིགས་ལ་ལོག་རྟོག་དང་ཕྲག་དོག་གི་དུག་ཆུས་མ་བརླན་པར་དག་སྣང་གི་བློ་སྦྱངས་ནས་གཞན་སེམས་མི་འཁྲུག་པར་གཉིས་ཕན་དབུ་མའི་ལམ་དུ་བསྐྱོད་དགོས་པ་ནི་ཆོས་མིང་འཛིན་པ་རང་གཞན་ཚང་མའི་ཕྲག་ཏུ་བབས་པའི་འོས་འགན་ཞིག་ཏུ་མཐོང་། ཉེར་གཅིག་གི་དུས་འདིར་མཁས་བླུན་དབྱེ་བ་མེད་པར་འབུ་གྲོག་མ་ཚང་ནས་ཐོན་པ་ནང་བཞིན་འཚང་ཁ་ཤིག་ཤིག་ངང་སྤྱི་ཚོགས་དྲྭ་ལམ་ཐོག་མ་བོས་མགྲོན་པོར་ཕེབས་ཡོང་བ་ནི་འགོག་ཏུ་མེད་པའི་དུས་རབས་ཀྱི་ཁ་ཕྱོགས་ཤིག་ཏུ་སྣང་།
དེ་དང་སྟབས་བསྟུན་ནས་མཁས་དབང་ཚོས་ལེགས་སྤེལ་ཉེས་འགོག་གི་སྒོ་ནས་གཞན་ཕན་རླབས་ཆེན་གྱི་བྱ་གཞག་བསྒྲུབས་དང་སྒྲུབ་བཞིན་པ་ནི་ང་ཚོའི་བསྟོད་བསྔགས་བྱ་ཡུལ་ཞིག་དང་རྗེས་སུ་ཡི་རང་འོས་པའི་གནས་ཡིན་ཞིང་སོ་སོས་ཀྱང་དེ་ལྟར་རེ་སྨོན་དང་འབད་བརྩོན་བྱེད་དགོས་པའི་གནས་སྟངས་ཤིག་རེད་དེ། འོན་ཀྱང་དེེ་དང་དུས་མཚུངས་བདག་འདྲ་བའི་སློབ་གཉེར་བ་ཁ་ཅིག རང་དགོས་སློབ་སྦྱོང་ལ་དོ་སྣང་དང་སྤྲོ་བ་བརླགས་ཏེ་དེའི་ཚབ་ཏུ་མི་དགོས་པའི་གཞན་ལ་ཇུས་མེད་ཇུས་གཏོགས་ཀྱི་དོ་དབྱིངས་ཞུགས་ནས་དུས་ཚོད་ཆུད་ཟོས་སུ་བཏང་སྟེ་དོན་མེད་ཆོས་སྤོང་གི་ལས་ངན་གསོག་པའི་ངན་གོམས་བརྟུལ་ཞུགས་བཟུང་སྟེ། དེ་ཡང་རང་མགོ་རུལ་བ་སྣ་ཡིས་མ་ཚོར། ཞེས་པ་དང་། རང་ངོར་གཡག་རྒྱུག་པ་མ་མཐོང་། །གཞན་ངོར་ཤིག་རྒྱུག་པ་མཐོང་། །ཞེས་པའི་སྤྱོད་པའི་རྗེས་སུ་བསྙེགས་ཏེ། ཆགས་སྡང་གི་རྟ་ལ་བཞོན་ཅིང་ཕྲག་དོག་གི་སྲབ་ལ་འཇུས་ཏེེ་མ་རིག་པའི་ལྕག་ཚན་བྲབས་ཤིང་ཤེས་འཆལ་གྱི་ཐང་ལ་ང་རྒྱལ་གྱི་བང་རྩལ་གློད་ནས་རང་དོན་ཐོས་བསམ་སྒོམ་གསུམ་གྱི་ཞིང་ས་ལ་ལོག་རྟོག་གི་རྩྭ་ངན་སྐྱེས་ཤིང་། འཇིག་རྟེན་ཆོས་བརྒྱད་སད་སེར་གྱིས་གཞན་དོན་འཆད་རྩོད་རྩོམ་གྱི་མེ་ཏོག་བཅོམ་སྟེ། གཉིས་དོན་མཁས་བཙུན་བཟང་གསུམ་གྱི་འབྲས་བུ་དེ་ཕྱོགས་རིས་དང་ཟུར་ཟའི་སད་དང་སེར་བས་ཡོངས་སུ་བཅོམ་ཞིང་དོན་མེད་གཞན་ལ་ཁ་གཏོང་བ་ནི་ཆོས་སྤོང་གི་ལས་ངན་ཞིག་སྟེ། མཁས་གྲུབ་རཱ་ག་ཨ་སྱས་ཀྱིས། ཁམས་གསུམ་སེམས་ཅན་གསད་ལས་སྡིག་ཆེ་བ། །བྱང་ཆུབ་སེམས་དཔའ་རྣམས་ལ་བཀུར་བ་བཏབ། །དོན་མེད་སྡིག་ཆེན་བསགས་་་་་་། །ཞེས་པའི་གསུང་དེ་དབང་རྣོན་ཆོས་ཀྱི་རྗེས་འབྲང་ཁྱོད་ཀྱིས་མ་ཐོས་པ་དང་དོན་མ་གོ་བ་མི་སྲིད་ཀྱང་སྒྲ་ཐོས་དོན་རྟོགས་ཀྱང་ཁྱད་གསོད་དུ་བཏང་བ་དེ་ནི་ཤིན་ཏུ་མི་རིགས་པའི་གནས་སོ།།
སླར་སྨྲས་པ།
དད་གསུམ་མེ་ཏོག་ཐུགས་རྒྱུད་རབ་མཛེས་ཤིང་། །སྒོ་གསུམ་དགེ་ལ་གཅིག་ཏུ་གཞོལ་མཛད་དེ།།
བསླབ་གསུམ་ནོར་གྱིས་ཕྱུག་པའི་ཆོས་པ་ལ། །དུས་གསུམ་ཀུན་ཏུ་འབོད་སྐུལ་ཞུས་པ་མིན།།
དད་གསུམ་ཞག་རྩི་རྒྱུད་ལ་མ་འགོས་ཤིང་། །མཆོག་གསུམ་སྐྱབས་ཡུལ་ཡིན་པར་དྲན་པ་བརྗེད།།
དུག་གསུམ་ནད་ཀྱིས་མནར་བའི་ཆོས་པ་ལ། །སྒོ་གསུམ་དད་ལ་བརྩོན་ཅེས་འབོད་སྐུལ་ཞུ།།
གོང་དུ་གང་ཞུས་པ་དེ་དག ནས་ལ་སྦང་མའི་ཁ་བརྡ་དང་། སྤྱན་རས་གཟིགས་ལ་མ་ཎིའི་ལུང་ཞེས་པའི་དཔེར་རུ་སོང་ན་ཐང་།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། དེབ་གཟུགས། སྨད་ཆ། ཤོག་ངོས་ ༢༠༣ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། ཡིད་བཞིན་མཛོད་འགྲེལ། དེབ་གཟུགས། སྨད་ཆ། ཤོག་ངོས་ ༡༩༦ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་པར་མ། དཔར་ཐེངས་དང་པོ། ཡིད་བཞིན་མཛོད་འགྲེལ། དེབ་གཟུགས། སྨད་ཆ། ཤོག་ངོས་ ༡༩༧ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་པར་མ། དཔར་ཐེངས་དང་པོ། ཡིད་བཞིན་མཛོད་འགྲེལ། དེབ་གཟུགས། སྨད་ཆ། ཤོག་ངོས་ ༡༩༦ པར་གསལ།
