ཤེར་ཕྱིན་གནད་ཀྱི་ཟིན་ཐོ་ཀློང་ཆེན་སྒྱུ་འཕྲུལ།

སློབ་དཔོན་པདྨ་རྡོ་རྗེ། རྣམ་གྲོལ་གླིང་།

བྱམས་བརྩེའི་འོད་ལ་ཕྱོགས་རིས་མེད།།
ཡངས་པའི་སྤྱན་ལ་དགྲ་གཉེན་མེད།།
ཕྲིན་ལས་འཇུག་པ་ནམ་མཁའ་བཞིན།།
པདྨའི་མཚན་ཅན་སྤྱི་གཙུག་གཉེན།།

ཞེས་དམ་པའི་སྤྱོད་པ་དང་མཐུན་པར་མཆོད་བརྗོད་སྔོན་དུ་བཏང་ནས། འདིར་གང་གླེང་བར་བྱ་བའི་བརྗོད་བྱའི་གནད་བསྡུས་ནི། ཆོས་ཀྱི་ཕུང་པོ་མཐའ་ཡས་པའི་གནད་གསང་གཅིག་ཏུ་བསྟན་པའི་བསྟན་བཅོས་མངོན་པར་རྟོགས་པའི་རྒྱན་ལས་མཆོད་བརྗོད་ཀྱི་ཡུལ་དུ་གྱུར་པའི་མཁྱེན་པ་གསུམ་རྟེན་ངེས་མ་ངེས་སྐོར་དང་། ཉེར་ཞི་ཁྲིད་མཛད་ཅེས་པའི་མྱང་འདས་ལས་འཕྲོས་ནས་མྱང་འདས་ལ་ཐེག་པ་ཆེ་ཆུང་གི་མྱང་འདས་གཉིས་སུ་ངེས་མ་ངེས་དང་། བྱེ་སྨྲའི་ལུགས་ལ་ལྷག་མེད་དགྲ་བཅོམ་ཡོད་མེད་སོགས་ཀྱི་སྐོར་དང་། རྣམ་པ་ཀུན་ལྡན་སྣ་ཚོགས་འདི་གསུངས་པ་ཞེས་པའི་སྐབས་ནས་བསྟན་པའི་ཆོས་འཁོར་ལས་འཕྲོས་ནས་དྲང་ངེས་དང་། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་པའི་སྐབས་ནས་བསྟན་པའི་སེམས་བསྐྱེད་ཀྱི་གནད་གསང་སངས་རྒྱས་ས་ལ་སེམས་བསྐྱེད་ཡོད་མེད་དང་། སེམས་བསྐྱེད་སེམས་སེམས་བྱུང་གང་དུ་བཞེད་པ། སེམས་བསྐྱེད་ཀྱི་སེམས་རྟེན་འཇོག་ཚུལ། རང་བཞེད་སྨོན་འཇུག་གཉིས་ཀྱི་ས་མཚམས། མདོ་ལས་སེམས་ཅན་རྣམས་རྣམ་པར་ཤེས་པ་རྒྱུན་རེ་རེ་བ་ཞེས་པའི་མདོའི་དགོངས་དོན་བཅས་ལ་རགས་རིམ་ཙམ་དཔྱད་པར་སྤྲོའོ།།

མཁྱེན་གསུམ།

སྤྱི་དོན་ལས། མཁྱེན་གསུམ་རྟེན་ངེས་པ་ཅན་ཡིན་ཏེ། ཞེས་པའི་མཁྱེན་གསུམ་རྟེན་ངེས་མ་ངེས་སྐོར་ལ་རྨོངས་པས་རྟོག་འཆར་འགའ་ཞིག་གླེང་ན། མཁྱེན་གསུམ་ལ་མདོའི་གླེང་གཞིའི་སྐབས་ནས་དངོས་སུ་བསྟན་པའི་མཁྱེན་གསུམ་དང་། མདོའི་བསྟན་བྱ་གཙོ་བོར་གྱུར་པའི་མཁྱེན་གསུམ་དང་། མཆོད་བརྗོད་སྐབས་ནས་དངོས་སུ་བསྟན་པའི་མཁྱེན་གསུམ་དང་། བསྟན་བཅོས་ཀྱི་བསྟན་བྱའི་གཙོ་བོར་གྱུར་པའི་མཁྱེན་གསུམ་དང་། བསྐྱེད་བྱ་དང་ཤེས་བྱའི་མཁྱེན་གསུམ་སོགས་དུ་མ་མཆིས། མཁྱེན་པ་གསུམ་རྟེན་ངེས་པ་དང་མ་ངེས་པར་གསུང་མཁན་དུ་མ་འདུག་ཀྱང་སྤྱིར་མཁྱེན་གསུམ་ནི་རྟེན་ངེས་པ་ཅན་མིན་ཏེ། གཞི་ཤེས་ལ་ཉན་རང་དང་ལམ་ཤེས་ལ་བྱང་སེམས་ཁོ་ནའི་མཁྱེན་པར་སྨྲ་བ་མི་འཐད་པའི་ཕྱིར། ཅིའི་ཕྱིར་ཞེ་ན། ¹བསྟན་བཅོས་ཀྱི་དགོངས་འགྲེལ་དུ་བརྗོད་བྱའི་ཁྱད་པར་དང་ཉིང་དགོས་བསྟན་པའི་གཞུང་གིས་གཞན་སྡེ་ཕྱི་རོལ་པ་དང་རང་སྡེ་ཉན་རང་གི་མྱོང་མི་ཐུབ་པའི་མཁྱེན་གསུམ་གཅིག་དང་། མངོན་རྟོགས་བརྒྱད་ཀ་བྱང་སེམས་ཀྱི་ཐོས་སོགས་ཀྱིས་དྲན་པ་ལ་བཞག་ནས་མངོན་དུ་བྱེད་པར་བཤད་པ་དང་། ²དཔལ་སྤྲུལ་སྤྱི་དོན་དུ་ལམ་ཤེས་ཀྱི་ས་མཚམས་དང་། ³བོད་སྤྲུལ་གྱིས་འགྲེལ་པ་མ་ཕམ་ཞལ་ལུང་དུ་གཞི་ཤེས་དང་ལམ་ཤེས་ཀྱི་མཚན་ཉིད། ⁴མཁན་པོ་ཐུབ་བསྟན་བརྩོན་འགྲུས་ཀྱིས་དོན་བདུན་ཅུར་ལམ་ཤེས་ཀྱི་ས་མཚམས་ཐེག་ཆེན་གྱི་ལམ་ལྔ་ཀར་ན་ཡོད་པ་གསུངས་པའི་ཕྱིར། འོ་ན་མདོ་དང་བསྟན་བཅོས་སུ་མཁྱེན་གསུམ་རྟེན་ངེས་པ་གསུངས་པ་མིན་ནམ་ཞེ་ན། ⁵མདོ་དང་⁶བསྟན་བཅོས་ནས་གསུངས་པ་ནི་རྣམ་གཞག་རྟེན་ཙམ་གྱིས་དབང་དུ་བྱས་ནས་གསུངས་པ་ཡིན་པས་འགལ་བ་མེད་དོ། །གལ་ཏེ་དེ་ལྟར་མིན་ན་སྐབས་གསུམ་པའི་བསྟན་བྱ་གཙོ་བོར་ཡིན་ན། བྱང་སེམས་ཀྱི་རྒྱུད་ལ་མེད་པར་འདོད་དགོས་པས་ངོ་མཚར་ཆེའོ། །ཡང་ན་མཆོད་བརྗོད་སྐབས་ནས་དངོས་སུ་བསྟན་པའི་མཁྱེན་གསུམ་རྟེན་ངེས་པ་ཅན་དང་། མདོའི་བསྟན་བྱ་གཙོ་བོར་གྱུར་པའི་མཁྱེན་གསུམ་རྟེན་ངེས་པ་ཅན་མིན་ཞེས་སྨྲ་དགོས་སོ།།

མཆོད་བརྗོད་གླེང་གཞི་དང་སྦྱར་བའི་བཤད་པ་བོད་ན་ཨར་བྱང་ཆུབ་ཡེ་ཤེས་དང་ཕྱིས་ཀྱི་མཁས་པ་⁷བོད་སྤྲུལ་གྱིས་མཛད་ལ། འོན་ཀྱང་བོད་སྤྲུལ་གྱི་མཆོད་བརྗོད་གླེང་གཞི་དང་སྦྱོར་དུས་དགྲ་བཅོམ་པ་དེ་གཞི་ཤེས་ཀྱི་འབྲས་བུ་ལས་རྟེན་དུ་མ་བཤད་པས་གླེང་གཞིའི་སྐབས་ནས་དངོས་སུ་བསྟན་པའི་མཁྱེན་གསུམ་དང་། མཆོད་བརྗོད་ཀྱིས་དངོས་སུ་བསྟན་པའི་མཁྱེན་གསུམ་གྱི་རྟེན་མཚུངས་བར་བཤད། ཁོ་བོས་ནི་མཆོད་བརྗོད་གླེང་གཞི་དང་སྦྱར་བའི་བཤད་པ་འཕགས་སེང་གཉིས་ཀྱིས་མཛད་པ་མ་མཇལ། མཆོད་བརྗོད་དང་དགོས་འགྲེལ་ནི་མདོ་བཤད་པའི་སྔོན་འགྲོ་ལས་བཤད་པའི་གཞུང་དངོས་མིན་ནོ། །གླེང་གཞི་སྐབས་ནས་དངོས་སུ་བསྟན་པའི་གཞི་ཤེས་ཀྱི་རྟེན་གང་ཟག་ཡིན་ན། མཆོད་བརྗོད་སྐབས་ནས་དངོས་སུ་བསྟན་པའི་གཞི་ཤེས་ཀྱི་རྟེན་གང་ཟག་ཡིན་པས་མ་ཁྱབ་ཅེས་སྨྲ་བར་འདོད་དེ། སྔ་མའི་རྟེན་དུ་གྱུར་པ་དགྲ་བཅོམ་པ་ཟག་པ་ཟད་པ་ཞེས་དགྲ་བཅོམ་པ་ཡང་ཡོད་ལ། ཕྱི་མའི་རྟེན་ལ་ཉན་རང་སློབ་པ་ཡིན་དགོས་ཏེ། མཆོད་བརྗོད་སྐབས་ནས་དངོས་སུ་བསྟན་པའི་གཞི་ཤེས་ལ་འབྲས་བུ་ཉེར་ཞིར་ཁྲིད་བྱེད་དང་། ཐབས་དེ་ཁོ་ན་ལ་བརྟེན་ནས་ཉེར་ཞི་འཐོབ་པར་བྱེད་དགོས་པས་གཞི་ཤེས་འཐོབ་བྱེད་དང་ཉེར་ཞི་འཐོབ་བྱར་འགྲེལ་ཆུང་གིས་བཤད་དོ། །གཞི་ཤེས་དང་ལམ་ཤེས་ལ་འཕགས་པའི་རྟོགས་པར་ངེས་པ་རྒྱན་གྱི་འགྲེལ་པ་གང་དུའང་མི་སྣང་ཞིང་།⁸ཉི་སྣང་གི་ལུང་ལ་བརྟེན་ནས་ཁ་ཅིག་གིས་གཞི་ཤེས་དང་ལམ་ཤེས་ལ་འཕགས་པའི་རྟོགས་པ་ཁོ་ནར་འཆད་མཁན་འདུག་ཀྱང་། དེ་ནི་རྒྱ་བོད་མཁས་པའི་གཞུང་ལ་ངལ་བ་ཞིབ་ཏུ་མ་བྱས་པའི་འབྲས་རྟགས་ཙམ་ལས་ངོ་མཚར་བའི་བཤད་པ་གང་ཡང་མིན་ནོ།།

མྱང་འདས།

མྱང་འདས་དང་འབྲེལ་བའི་རྟོག་འཆར་འགའ་ཞིག་གླེང་ན། ཕལ་ཆེ་བས་མཐར་ཐུག་ཐེག་པ་གསུམ་དུ་འདོད་མཁན་དག་གི་ལུགས་ལ་ལྷག་མེད་དགྲ་བཅོམ་པ་ཡོད་པ་གཞིར་བཞག་དང་། ⁹མདོ་སྡེ་དགོངས་འགྲེལ་དང་¹⁰བསྡུ་བ་སོགས་ཤེས་བྱེད་དུ་འཁུར་ནས་ངལ་བ་ཆེན་པོས་སྒྲུབ་གནང་བར་མཐོང་། ཁོ་བོ་ནི་མཐར་ཐུག་ཐེག་གསུམ་སྨྲ་བའི་སེམས་ཙམ་པའི་ལུགས་ལ་ཉན་རང་ལྷག་མེད་དགྲ་བཅོམ་ཡོད་པ་བསྡུ་བ་ན་ཕུང་པོ་ལྷག་མ་མེད་པའི་མྱང་ངན་ལས་འདས་པའི་དབྱིངས་ལ་གནས་མཁན་ཞིག་ཡོད་པར་གསུངས་པ་དང་། དེ་ཡང་¹¹བསྡུ་བར་རིགས་དྲུག་གང་ཡང་མིན་པ་ཞིག་བཞེད་པ་ཚིག་གིས་གསལ། ལྷག་མེད་དགྲ་བཅོམ་ཡོད་པའི་གཞུང་¹²བསྡུ་བ་སོགས་ཤིན་ཏུ་གསལ་བ་འདི་དག་ནི་མཐར་ཐུག་ཐེག་གསུམ་འདོད་པའི་སེམས་ཙམ་པའི་ལུགས་ཡིན་པ་ལས་བྱེ་སྨྲ་སོགས་ཉན་ཐོས་སྡེ་པ་དག་གི་ལུགས་ལ་ལྷག་མེད་དགྲ་བཅོམ་ཡོད་པའི་ཤེས་བྱེད་དུ་མི་རུང་ངོ་།།འོ་ན་བྱེ་བྲག་སྨྲ་བའི་ལུགས་ལ་ལྷག་མེད་དགྲ་བཅོམ་ཡོད་དང་མེད་ཅེ་ན། མཇིང་པ་གཟེངས་སུ་བསྟོད་ནས་མེད་ཅེས་སྨྲ་རིགས་ཏེ། བྱེ་སྨྲའི་ལུགས་ལ་ལྷག་མེད་དགྲ་བཅོམ་ཡོད་པའི་གཞུང་མི་སྣང་པའི་ཕྱིར། གལ་ཏེ་ལྷག་མེད་དགྲ་བཅོམ་ཡོད་ན་ཕུང་པོ་དང་བཅས་དགོས་ལ། ཕུང་པོ་ལ་ཟག་བཅས་མ་གཏོགས་དམིགས་སུ་མེད། དེ་ཡོད་ན་ཤིན་ཏུ་མི་རིགས་ཏེ། ཟག་བཅས་ལ་སྡུག་བདེན་ཡིན་དགོས་པ་བྱེ་སྨྲའི་ཐུན་མིན་གྱི་བཞེད་པ་ཡིན་པའི་ཕྱིར། གཟུགས་ཕུང་མེད་འདུ་བྱེད་ཀྱི་ཕུང་པོ་དང་བཅས་པར་འདོད་ནའང་ཉེས་པ་སྔར་དང་འདྲ་ལ། ¹³མཆིམས་མཛོད་དུ་གཟུགས་མེད་ཀྱི་རྟེན་ལ་འགོག་སྙོམས་མངོན་དུ་བྱེད་མི་སྲིད་པའི་རྒྱུ་མཚན་གྱི་གནད་ཀྱང་དྲན་དགོས། སྲོག་དང་བཅས་ན་ལྷག་བཅས་ལས་ལྷག་མེད་དུ་ཤིན་ཏུ་མི་རིགས་སོ།།

ཡང་འདིར་དོགས་གནད་གཞན་ཞིག་ནི་བྱེ་སྨྲའི་ལུགས་ལ་ལྡན་མིན་འདུ་བྱེད་རྒྱུན་ཆད་རྒྱུ་ཡོད་མེད་ཀྱང་དཔྱད་དགོས་ཏེ། ཐོབ་པ་རྒྱུད་ཀྱིས་བསྡུས་དགོས་པ་བྱེ་སྨྲའི་ཐུན་མིན་གྱི་བཞེད་པ་ཡིན་པས། ལྷག་མེད་མྱང་འདས་ཀྱི་ཐོབ་པ་རྒྱུད་ལྡན་གྱི་གང་ཟག་མེད་པ་དང་། དེ་ལྷག་བཅས་དགྲ་བཅོམ་པའི་རྒྱུད་ལ་ཡོད་ན་དེའི་མྱང་འདས་གཉིས་ཅིག་ཅར་ཐོབ་པར་ཐལ་བ་སོགས་བྱེ་སྨྲ་དང་ཉན་ཐོས་སྡེ་གཉིས་ཀྱི་ལུགས་ལ་ལྷག་མེད་དགྲ་བཅོམ་ཡོད་པ་ལས་མེད་པའི་སྒྲུབ་བྱེད་ཁ་གསལ་བས་ཆོས་སྐྱོང་སྲུང་མས་བཀའ་ཆད་དྲག་པོ་འདྲ་མེད་ན་དེ་དེ་བཞིན་ཁས་ལེན་དགོས་སོ།།

ཐེག་པ་སོ་སོའི་འཐོབ་བྱ་མཐར་ཐུག་དབང་བཙན་དུ་བྱས་ན་མྱང་འདས་ལ་ཐེག་པ་ཆེ་ཆུང་གི་མྱང་འདས་གཉིས་སུ་ངེས་ཀྱང་། སྤྱིར་མྱང་འདས་ལ་དེ་གཉིས་སུ་མ་ངེས་ཏེ། དགྲ་བཅོམ་རྟོགས་པ་སྔོན་སོང་དང་རིགས་ངེས་དག་སའི་སེམས་དཔའི་རྒྱུད་ཀྱི་ཉོན་སྒྲིབ་ཟད་པའི་འགོག་བདེན་ལྟ་བུའོ། །ཐེག་ཆེན་གྱི་དབང་དུ་བྱས་ན་སངས་རྒྱས་ཀྱི་རྒྱུད་ཀྱི་མྱང་འདས་ལ་ལྷག་མེད་མྱང་འདས་སུ་ངེས་ལ། ¹⁴གསེར་འོད་དམ་པ་དང་¹⁵སྐུ་གསུམ་འགྲེལ་པར་གཟུགས་སྐུ་གཉིས་ལ་ལྷག་བཅས་མྱང་འདས་ཀྱི་སྒྲས་བསྟན་པ་ཙམ་ལས་ལྷག་བཅས་མྱང་འདས་དངོས་མིན་ནོ། །ལྷག་མེད་མྱང་འདས་ཡང་ངོ་བོ་ཉིད་སྐུ་ལས་ཡེ་ཤེས་ཆོས་སྐུར་འཁྲུལ་པར་མི་བྱའོ། །ལྷག་མེད་མྱང་འདས་ནི་ངོ་བོ་ཉིད་སྐུ་ཁོ་ནར་ངོས་འཛིན་དགོས་པ་¹⁶གསེར་འོད་དམ་པའི་མདོ་ཉིད་ལས་གསལ་ལོ།།

ཆོས་འཁོར།

ཆོས་འཁོར་སྐབས་འདིར་གླེང་དགོས་པ་ཞིག་ནི་དྲང་ངེས་སྐོར་དེ་ཡིན། ཁ་ཅིག་གིས་¹⁷བློ་གྲོས་མི་ཟད་པའི་མདོ་སོགས་སྣང་སྟོང་བདེན་གཉིས་ཀྱི་ལྡོག་པས་དྲང་ངེས་འབྱེད་པ་ལས་གཞན་པའི་དྲང་ངེས་འབྱེད་ཚུལ་མེད་ཟེར་བ་ནི་མི་འཐད་དེ། ¹⁸སྟོང་ཐུན་ལས་བཀའ་ཐ་མའི་ངེས་དོན་བསྟན་ཚུལ་བར་པ་ལས་ལྷག་པ་དང་། ¹⁹མདོ་སྡེ་དགོངས་འགྲེལ་ལས་འཁོར་ལོ་ཐ་མའི་དོན་ལ་བསྔགས་པའང་དེར་གཏོགས་ཚད་མ་ཡིན་པ་དང་ངེས་དོན་གྱི་ཕྱོགས་ནས་གསུངས་སོ། །སྤྱིར་དྲང་ངེས་རྣམ་གཞག་ནི་ཉན་ཐོས་ཐེག་པ་ནས་ཨ་ཏི་ཡོ་གའི་ཐེག་པའི་བར་ཐེག་པ་སོ་སོ་ལ་དྲང་ངེས་ཀྱི་རྣམ་བཞག་བྱེད་ཆོག

གསུང་རབ་སྤྱིའི་དྲང་ངེས་ནི་ཆོས་ཅན་སྣང་ཚོད་པ་སྐྱེ་འགག་དང་དག་མ་དག་སོགས་སྨྲ་བསམ་བརྗོད་པའི་རིམ་པས་གཞལ་ཞིང་སྒྲོ་བཏགས་ནས་བསྟན་པ་ཐམས་ཅད་དྲང་དོན་དང་། དེ་སྟོན་པའི་བཀའ་རྣམས་དྲང་དོན་གྱི་མདོ་དང་། ཆོས་ཉིད་དང་དེའི་སྣང་ཆ་འོད་གསལ་བདེ་གཤེགས་སྙིང་པོ་ངེས་དོན་དང་། དེ་སྟོན་པའི་བཀའ་ལ་ངེས་དོན་གྱི་མདོར་འདོད་དགོས་པར་²⁰སེམས་ཉིད་ངལ་གསོ་ནས་གསུངས་སོ། །བྱེ་བྲག་བཀའ་བར་མཐའི་དྲང་ངེས་ནི་འཇམ་མགོན་བླ་མས་²¹དབུ་མ་རྒྱན་གྱི་སྤྱི་དོན་ལས་གཞི་བདེན་གཉིས་རྣམ་གཞག་ལ་སྣང་སྟོང་དང་གནས་སྣང་ཞེས་དོན་གྱི་དྲང་ངེས་འབྱེད་ཚུལ་གཉིས་དང་། སྣང་བ་ཀུན་རྫོབ་ལ་གནས་སྣང་གཉིས་སུ་དབྱེ་བ་བཞིན་སྟོང་པ་དོན་དམ་ལའང་དྲང་ངེས་གཉིས་སུ་འབྱེད་རྒྱུ་ཡོད། སྔ་མའི་དབང་དུ་བྱས་པའི་དྲང་ངེས་ནི་གཙོ་བོ་བློ་གྲོས་མི་ཟད་པའི་མདོ་ལ་བརྟེན་ནས་འཁོར་ལོ་བར་པའི་དྲང་ངེས་ཀྱི་རྣམ་གཞག་དང་། ཕྱི་མའི་དབང་དུ་བྱས་པའི་དྲང་ངེས་ནི་གཙོ་བོ་ངེས་དོན་གྱི་མདོ་སྡེ་དག་ལ་བརྟེན་ནས་²²རྒྱུད་བླ་མར་རྣམ་དབྱེར་བཅས་མ་བཅས་ནི་འཁོར་ལོ་ཐ་མའི་དྲང་ངེས་འཇོག་ཚུལ་ལོ། །བཀའ་བར་མཐའི་དྲང་ངེས་སོ་སོར་འབྱེད་དགོས་པའི་རྒྱུ་མཚན་ནི་ཀུན་མཁྱེན་ཡབ་སྲས་ཀྱི་གཞུང་ལ་ངལ་བ་ཞིབ་ཏུ་གནོངས་དང་རིམ་པས་རྟོགས་ངེས་པས་འདིར་ཡི་གེར་མང་དུ་དོགས་ནས་དེ་ཙམ་གྱི་ཆོག་ཤེས་པར་བྱས་སོ།།

སེམས་བསྐྱེད།

སེམས་བསྐྱེད་དང་འབྲེལ་བའི་གླེང་བྱ་མང་དུ་སྣང་། འོན་ཀྱང་འདིར་ཁོ་བོས་གླེང་འདོད་པ་ནི་འདིར་བཤད་པའི་ཐེག་ཆེན་ཀུན་རྫོབ་སེམས་བསྐྱེད་སངས་རྒྱས་ས་ལ་ཡོད་མེད་དང་། དེ་ཉིད་སེམས་སེམས་བྱུང་གང་དུ་འདོད་དགོས་མིན་སྐོར་སོགས་གནད་དོན་འགའ་རགས་ཙམ་གླེང་བར་སྤྲོ། སྤྱིར་བཏང་སངས་རྒྱས་ས་ལ་སེམས་བསྐྱེད་ཡོད་མེད་ལ་གངས་རི་ལྗོངས་སུ་རིས་མེད་མཁས་གྲུབ་དུ་མས་རྩོད་སྒྲུབ་དང་དགག་བཞག་སོགས་གླེང་སློང་མང་དུ་མཛད་པ་མཐོང་། རང་རེ་སྔ་འགྱུར་བའི་ཕྱོགས་ལའང་སངས་རྒྱས་ས་ལ་སེམས་བསྐྱེད་ཡོད་མེད་བཞེད་ཕྱོགས་གཉིས་སུ་སྣང་ཏེ། དེ་བཞིན་གཤེགས་པའི་བཀའ་དངོས་དང་ཁྱད་པར་མེད་པ་ཚད་མའི་ལམ་ནས་གྲུབ་པའི་བསྟན་བཅོས་ཆེན་པོ་ཚིག་དོན་གྱི་ཟུར་རེ་རེ་ནས་ཀྱང་འཁྲུལ་པའི་དྲི་མ་ཕྲ་མོས་ཀྱང་མ་གོས་པ་ཀུན་མཁྱེན་ཆོས་ཀྱི་རྒྱལ་པོའི་གསུང་རབ་²³གྲུབ་མཐའ་རིན་པོ་ཆེའི་མཛོད་དང་། ²⁴འགྲེལ་ཆེན་པདྨ་དཀར་པོ་དང་། ²⁵ངེས་དོན་ཤིང་རྟ་ཆེན་པོ་རྣམས་ལས་ལན་གཅིག་ཙམ་མིན་པ་ཡང་ནས་ཡང་དུ་སངས་རྒྱས་ཀྱི་ས་ལ་འདིར་བཤད་པའི་རགས་པ་བརྡ་ལས་བྱུང་བའི་སེམས་བསྐྱེད་མེད་པར་བཞེད་དོ། །དེའི་རིང་ལུགས་ཆེན་པོ་རིག་འཛིན་འཇིགས་མེད་གླིང་པས་ཀྱང་²⁶བདེན་གཉིས་ཤིང་རྟར་²⁷ཀུན་མཁྱེན་ཆེན་པོའི་བཞེད་པ་ལྟར་བཞེད། དཔལ་སྤྲུལ་སེམས་པ་ཆེན་པོས་²⁸ཤེར་ཕྱིན་སྤྱི་དོན་སོགས་ནས་སངས་རྒྱས་ཀྱི་ས་ལ་སེམས་བསྐྱེད་ཡོད་པ་བཞེད་པའི་ཕྱོགས་དང་། འཇམ་མགོན་བླ་མ་མི་ཕམ་མཆོག་གིས་ཀྱང་ཉིད་ཀྱི་གསུང་རབ་²⁹དབུ་མ་རྒྱན་གྱི་རྣམ་བཤད་དང་། ³⁰མདོ་དང་བསྟན་བཅོས་སྦྱར་ཚུལ་མ་ཕམ་ཞལ་ལུང་དང་། ³¹མངོན་རྟོགས་རྒྱན་གྱི་མཆན་འགྲེལ་པུནྜ་རི་ཀའི་དོ་ཤལ་བཅས་ནས་སངས་རྒྱས་ས་ལ་སེམས་བསྐྱེད་ཡོད་པར་བཞེད་པའི་ཕྱོགས་སོ།།

སེམས་བསྐྱེད་ཀྱི་ངོ་བོ་སེམས་སེམས་བྱུང་གང་དུ་བཞེད་མིན་ནི། ³²དཔལ་སྤྲུལ་སྤྱི་དོན་ལས་སེམས་བསྐྱེད་སེམས་པར་འདོད་པ་མདོ་རྒྱན་དབྱིག་འགྲེལ་གྱི་དགོངས་པ་དང་། སྨོན་ལམ་འདོད་པ་ཐོགས་མེད་ཀྱི་བྱང་སའི་དགོངས་པ་དང་། སེམས་པ་དང་སྨོན་ལམ་གཉིས་ཀར་བྱམས་པའི་མདོ་རྒྱན་གྱི་དགོངས་པ་བྱས་ཏེ་སློབ་དཔོན་སྐུ་མཆེད་གཉིས་ཀྱིས་སེམས་བསྐྱེད་འདོད་ཚུལ་འཕགས་སེང་གཉིས་དང་མི་འདྲ་བར་སེམས་བྱུང་དུ་བཞེད་ལ། ཁ་ཅིག་གིས་³³ཀུན་མཁྱེན་ཆོས་ཀྱི་རྒྱལ་པོས་ནི་གཙོ་སེམས་བསྐྱེད་པས་སེམས་བྱུང་དང་། སེམས་བྱུང་བསྐྱེད་པས་གཙོ་སེམས་ཀྱང་བསྐྱེད་པར་འགྱུར་བས་དེ་དག་དགོངས་པ་འགལ་མེད་དུ་བཞེད་ཅེས་སྨྲ་མཁན་འདུག་ཀྱང་དེ་ནི་མཉམ་པར་མ་བཞག་པའི་ངག་འཆལ་ཙམ་ལས་སྒྲུབ་བྱེད་སྣ་གཅིག་མ་མཐོང་ངོ་།།

སེམས་བསྐྱེད་ལ་འདོད་པའི་སྒྲས་བསྟན་པ་ནི་དེའི་མིང་གིས་བཏགས་པ་ཙམ་ལས་དངོས་མིན་པས་སེམས་བསྐྱེད་སེམས་བྱུང་དང་། དེ་གཉིས་གཞི་མཐུན་ཐལ་པའི་སྐྱོན་རུས་སྦལ་གྱི་སྤུ་ཙམ་དུ་ཟད་ལ། གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་པའི་འདོད་པ་དེ་གཞན་དོན་དང་བྱང་ཆུབ་ཐོབ་ཕྱིར་དེ་འདོད་པ་གཉིས་ཀར་སྦྱོར་དགོས་པའི་མཐའི་གསལ་བྱེད་ཀྱི་ཚིག་ཡིན་ལ། གལ་ཏེ་བྱང་ཆུབ་འདོད་པ་གཅིག་པུ་ལ་སྦྱར་ན་ཡུམ་བར་མ་ལས་འདི་འདོད་པ་དང་། དེ་འདོད་པ་གཉིས་ཀར་ངོས་འཛིན་གནང་བ་དང་འགལ་བ་དང་། ³⁴འགྲེལ་ཆུང་དུ་རྒྱུ་མིང་འབྲས་བུ་དང་གྲོགས་མིང་གྲོགས་ཅན་ལ་བཏགས་ཚུལ་ལས་སེམས་བསྐྱེད་འདུན་པ་གཉིས་ལྡན་གྱི་སེམས་སུ་གསུངས་པ་དང་འགལ་བའི་ཕྱིར་རོ། །³⁵དཔལ་སྤྲུལ་སེམས་པ་ཆེན་པོ་དང་³⁶འཇམ་མགོན་བླ་མ་མི་ཕམ་རྣམ་གཉིས་ཀྱིས་ཀྱང་ཤེར་ཕྱིན་གྱི་འགྲེལ་བ་དག་ལས་འཕགས་སེང་གཉིས་ཀྱི་བཞེད་ཕྱོགས་དང་མཐུན་པར་སེམས་བསྐྱེད་གཙོ་སེམས་ལ་བཞེད་དོ།།

སེམས་བསྐྱེད་ཀྱི་སེམས་རྟེན་ལ་³⁷དཔལ་སྤྲུལ་སྤྱི་དོན་དུ་སེམས་བསྐྱེད་ཀྱི་སེམས་རྟེན་ནི་དད་པ་དང་། སྙིང་རྗེ་དང་། བྱང་ཆུབ་ཀྱི་སེམས་ཀྱི་ཕན་ཡོན་ཐོས་པ་ཞེས་སོགས་རྟེན་བརྟེན་པ་དོན་གཞན་དང་། ³⁸མཆིམས་ལེགས་པར་བཤད་པའི་རྒྱ་མཚོ་དང་³⁹མཆིམས་མངོན་པའི་རྒྱན་ལས་འཁར་གཞོང་ལ་རྒྱ་ཤུག་བརྟེན་པ་དང་། ཤིང་པ་ལ་ཤ་དག་ལ་ཀུན་དགའ་ར་བ་བརྟེན་པ་ལྟར་མིན་པར་གསུངས། འོན་ཀྱང་དེ་གཉིས་འགལ་བར་སེམས་པར་མི་བྱ་སྟེ། སྤྱིར་རྟེན་བརྟེན་པ་ལ་དོན་གཞན་གྱི་རྟེན་དང་། ངོ་བོ་གཅིག་པའི་རྟེན་གཉིས་ཡོད་པ་ལྟར། སེམས་བསྐྱེད་ཀྱི་སེམས་རྟེན་ལའང་སེམས་བསྐྱེད་རང་ཉིད་གང་ལ་བརྟེན་ནས་སྐྱེས་པའི་རྒྱུའི་སེམས་རྟེན་དང་། སེམས་བསྐྱེད་རང་ཉིད་ས་གང་ལ་བརྟེན་ནས་སྐྱེས་པ་ལ་ས་དེར་བརྟེན་པ་འཇོག་པའི་ངོ་བོ་གཅིག་པའི་སེམས་རྟེན་དང་གཉིས་སུ་ཡོད་ཅིང་། སྔ་མའི་དབང་དུ་བྱས་ནས་ཤིང་པ་ལ་ཤ་དག་ལ་ཀུན་དགའ་ར་བ་བརྟེན་པ་ལྟར་གྱི་དཔལ་སྤྲུལ་སྤྱི་དོན་དུ་སེམས་བསྐྱེད་ཀྱི་སེམས་རྟེན་ལ་རྒྱལ་བ་ལ་དམིགས་པའི་དད་པ་དང་། སེམས་ཅན་ལ་དམིགས་པའི་སྙིང་རྗེ་སོགས་དེའི་སེམས་རྟེན་དུ་གསུངས། འོ་ན་⁴⁰དཔལ་སྤྲུལ་སྤྱི་དོན་སྤྱན་ལྔ་མངོན་ཤེས་ཀྱི་ཐད་དུ་རྟེན་དང་བརྟེན་པར་འགྱུར་ཚུལ་ཇི་འདྲ་བ་ཞེ་ན་ཞེས་སོགས་ཀྱིས་ལམ་དེ་སེམས་དེ་ལ་བརྟེན་ཚུལ་ནི་འཁར་གཞོང་ལ་རྒྱ་ཤུག་བརྟེན་པ་དང་ས་བོན་ལས་མྱུ་གུ་སྐྱེ་བ་དེ་ལ་བརྟེན་ཞེས་པ་ལྟ་བུ་མིན་ཚུལ་གསུངས་པ་དང་མི་འགལ་ལམ་ཞེ་ན། སྐྱོན་མེད་དེ། གོང་དུ་ཁོ་བོས་ལམ་དེའི་སེམས་རྟེན་ལ་གཉིས་ཡོད་པར་བཤད་པའི་ཕྱི་མའི་དབང་དུ་བྱས་པ་ཡིན་ཏེ། ⁴¹དཔལ་སྤྲུལ་སྤྱི་དོན་ལས་དེ་ལྟར་གསུངས་པ་དེ། སྤྱན་དང་མངོན་ཤེས་སོགས་བརྟེན་པ་ལམ་རྣམས་བསམ་གཏན་དང་གཟུགས་མེད་ཀྱི་ས་གང་ལ་བརྟེན་མངོན་པ་ཀུན་བཏུས་ཀྱི་ལུང་དང་སྦྱར་ནས་འཆད་པའི་སྐབས་ཡིན་པས། རྟེན་བརྟེན་པར་འགྱུར་ཚུལ་དྲིས་པ་ནི། བརྟེན་པ་ལམ་རྣམས་ས་གང་ལ་བརྟེན་ཚུལ་དྲིས་པ་ཡིན་གྱི། ལམ་གྱི་སེམས་རྟེན་ཐམས་ཅད་དྲིས་པ་མིན་ཏེ། ལམ་གྱིས་རྟེན་ས་ལ་བརྟེན་ཚུལ་དམིགས་ཀྱིས་བཀར་ནས་བཤད་པའི་ཕྱིར་རོ། །ཕྱི་མའི་དབང་དུ་བྱས་ནས་མཆིམས་ཆེ་ཆུང་གི་དགོངས་པ་ལྟར་ལམ་དེ་ས་དེའི་ངོ་བོར་སྐྱེས་པ་ལ་བྱ་སྟེ་ཞེས་བརྟེན་པ་ལམ་དང་རྟེན་ས་གཉིས་ངོ་བོ་གཅིག་དགོས་པ་ཆེས་གསལ་བས་དཔལ་སྤྲུལ་སྤྱི་དོན་དང་འགལ་བར་དོགས་མི་དགོས་སོ། །བརྟེན་པ་རང་ཉིད་ཁམས་གསུམ་ས་དགུ་གང་གི་ངོ་བོར་སྐྱེས་པའི་ཆ་ལ་ལམ་དེའི་སེམས་རྟེན་ཞེས་པའི་བརྡའམ་ཐ་སྙད་ནི་ཆོས་མངོན་པའི་སློབ་དཔོན་རྣམས་ཀྱིས་ཐོག་མར་བཏགས་པའི་བརྡའོ། །དེ་ཡང་ངོ་བོ་གཅིག་ལ་ལྡོག་པ་ཐ་དད་ཀྱི་ཕྱེ་བ་སྟེ། དཔེར་ན་ཚད་གཞུང་ནས་ཀྱང་བརྩེ་བ་དང་ཤེས་རབ་ཡིན་པའི་ཆ་བརྟེན་པ་དང་། རང་ཉིད་གསལ་རིག་ཡིན་པའི་ཆ་རྟེན་དུ་བྱས་ནས་རྟེན་བརྟེན་པ་སྒྲུབ་པའི་སྐབས་ཀྱི་དེ་དང་། ལམ་གྱིས་སེམས་རྟེན་ས་ལ་བརྟེན་ཚུལ་གཉིས་གོ་དོན་དང་གནད་གཅིག་གོ །ཐེག་ཆེན་སེམས་བསྐྱེད་ཀྱི་སེམས་རྟེན་དུ་གྱུར་པའི་འདོད་པའི་སེམས་ཡོད་མེད་ཀྱང་དཔྱད་དགོས་ཏེ། སེམས་བསྐྱེད་ཡིན་ན་བྱང་ཆུབ་སེམས་སྦྱོང་གི་ཐབས་རྣམས་སྒོམ་བྱེད་ཀྱི་ཡན་ལག་དང་མ་བྲལ་བར་སྦྱོར་བ་གཉིས་ལྡན་གྱིས་བསྒོམ་པའི་སྟོབས་ལས་རྩོལ་མེད་ཀྱི་མྱོང་བ་ཐོན་པའི་ལམ་ཡིན་དགོས་པས་ཐོས་བསམ་གྱི་ངོ་བོར་གྱུར་པའི་ལམ་སོགས་དང་མི་འདྲ་བའི་ཕྱིར་རོ།།

མདོར་ན་ལམ་དེའི་སེམས་རྟེན་ལ་ལམ་དེ་དང་ངོ་བོ་གཅིག་ཏུ་མ་ངེས་ཀྱང་ལམ་དེའི་སེམས་རྟེན་ས་ལ་བརྟེན་པ་ལམ་དང་ངོ་བོ་གཅིག་དུ་ངེས་ཤིང་། ཀུན་མཁྱེན་ཡབ་སྲས་དང་དཔལ་སྤྲུལ་རིན་པོ་ཆེ་རྣམས་ཀྱི་གསུང་རབ་མང་པོས་ལམ་རང་ཉིད་སེམས་གང་ལ་བརྟེན་ནས་སྐྱེས་པའི་རྒྱུ་ལའང་སེམས་རྟེན་དུ་གསུངས་པས། ལམ་དེའི་སེམས་རྟེན་ལ་སྐྱེད་བྱེད་རྒྱུའི་སེམས་རྟེན་དང་། ལམ་དེ་ས་གང་ལ་བརྟེན་པའི་སེམས་རྟེན་གཉིས་སུ་ཕྱེ་དགོས་སོ།།

སྨོན་འཇུག་གཉིས་ཀྱི་ས་མཚམས་ལ་⁴²དཔལ་ཡེ་ཤེས་གྲགས་པས་སེམས་བསྐྱེད་ཉེར་གཉིས་ལས་དང་པོ་གསུམ་སྨོན་སེམས་དང་། ལྷག་མ་བཅུ་དགུ་འཇུག་སེམས་སུ་བཞེད་ཀྱང་། དཔལ་སྤྲུལ་སྤྱི་དོན་ལྟར་ན་ལེགས་བཤད་གསེར་ཕྲེང་དང་མཐུན་པ་སྨོན་སེམས་ཚོགས་ལམ་ཁོ་ནར་དང་། འཇུག་སེམས་འཇུག་སྡོམ་ཐོབ་པའི་ཚོགས་ལམ་ནས་སངས་རྒྱས་ཀྱི་སའི་བར་དུ་ཡོད་པར་འདོད་དགོས་ལ། དཔལ་སྤྲུལ་རིན་པོ་ཆེའི་དགོངས་པ་དངོས་ནི་དེ་མིན་པ་ཉིད་ཀྱིས་མཛད་པའི་⁴³ཤེར་ཕྱིན་འབྲུ་འགྲེལ་དང་། ⁴⁴ཡོན་ཏན་མཛོད་ཀྱི་དཀའ་འགྲེལ་གཉིས་ཀ་ན་ཀུན་མཁྱེན་ཆེན་པོའི་དགོངས་པ་དང་མཐུན་པར་བཞེད་པའི་ཕྱིར་རོ། །⁴⁵ཀུན་མཁྱེན་ཆོས་རྗེས་ངེས་དོན་ཤིང་རྟ་ཆེན་པོར་སེམས་བསྐྱེད་ཉེར་གཉིས་པོ་རེ་རེའི་སྐབས་སུ་འགྲོ་བའི་ཚེ་ཡང་འགྲོ་འདོད་ཀྱིས་མི་འདོར་བ་བཞིན་དུ་འཇུག་སེམས་དུས་ནའང་སྨོན་སེམས་ཡོད་དགོས་བས་ན་དེ་དག་ལ་སྨོན་འཇུག་གཉིས་རེ་ཡོད་པར་འདོད་དགོས་ཏེ། བྱང་ཆུབ་དོན་གཉེར་དང་སྦྱོར་བས་ལག་ལེན་གཉིས་ཀ་ཚང་དགོས་པའི་ཕྱིར་དང་། སེམས་བསྐྱེད་གཉིས་དང་བྱང་ཆུབ་སེམས་པའི་སྡོམ་པ་ནི་ངོ་བོ་གཅིག་ལ་ལྡོག་པས་དབྱེ་བ་སྟེ། དཔེར་ན། ནོར་བུ་རིན་པོ་ཆེ་ལ་རིམ་ནད་སེལ་བ་དང་། དགོས་འདོད་འབྱུང་བ་དང་། མུན་པ་སེལ་བའི་ཆ་གསུམ་ཡོད་པ་ལྟར་ངོ་བོ་གཅིག་ལ་ལྡོག་པ་ཐ་དད་དུ་དབྱེ་བ་ལྟ་བུའོ། །དེས་ན་སྨོན་འཇུག་གཉིས་ཀ་ལས་དང་པོའི་ས་ནས་དག་སའི་བར་དུ་ཡོད་པར་བཞེད་དོ།།

སེམས་བསྐྱེད་ཀྱི་ཐད་དུ་མདོ་ལས་སེམས་ཅན་རྣམས་ཀྱི་རྣམ་པར་ཤེས་པ་ནི་རྒྱུན་རེ་རེ་བའོ། །ཞེས་པའི་གཞུང་དོན་ལ་ཀུན་མཁྱེན་ཆོས་ཀྱི་རྒྱལ་པོའི་⁴⁶གྲུབ་མཐའ་མཛོད་དང་། འཇམ་མགོན་བླ་མ་མི་ཕམ་རིན་པོ་ཆེའི་གསུང་རབ་⁴⁷དབུ་མ་རྒྱན་གྱི་རྣམ་བཤད་དང་། ⁴⁸ཤེས་རབ་ལེའུའི་རྣམ་བཤད་ནོར་བུ་ཀེ་ཏ་ཀ་དང་། ⁴⁹ཚད་མ་རྣམ་འགྲེལ་གྱི་གཞུང་གསལ་པོ་བཤད་པ་ལེགས་བཤད་སྣང་བའི་གཏེར་དག་ལས་⁵⁰སེམས་ཅན་གཅིག་གི་རྒྱུད་ལ་དུས་ཅིག་ལ་ཡུལ་བུམ་པ་ལྟ་བུ་འཛིན་པའི་རྣམ་ཤེས་རིགས་རེ་རེ་ལས་རིགས་མཐུན་པའི་ཤེས་པ་རྫས་ཐ་དད་པ་རྟོག་པ་དང་རྟོག་མེད་གང་ཡིན་ནའང་དུ་མ་ཅིག་ཆར་ཏུ་སྐྱེ་རྒྱུ་མེད་པར་གསུངས། རང་ལུགས་འཛིན་པ་ཁ་ཅིག་གིས་⁵¹རྣམ་འགྲེལ་ལས་རྟོག་གཉིས་ཅིག་ཅར་མཐོང་བ་མེད་ཅེས་པ་དང་། ⁵²དབུ་མ་རྒྱན་གྱི་རྣམ་བཤད་དུ་འདི་ནི་བུམ་པའོ་སྙམ་དུ་རྟོག་པའི་ཚེ། བུམ་མིན་ཐམས་ཅད་རྣམ་པར་མ་བཅད་ན་དེ་མི་འགྲུབ་པས་དེ་ག་རང་གཅིག་པུ་ལས་རྟོག་པ་གཞན་དང་དུས་མཉམ་འགྲོགས་པ་མི་སྲིད་ཅེས་པའི་གཞུང་དག་ལ་བརྟེན་ནས་རིགས་མཐུན་པའི་ཤེས་པ་རྫས་ཐ་དད་པའི་རྟོག་པ་དང་རྟོག་མེད་དུ་མ་དུས་གཅིག་ལ་སེམས་ཅན་ཅིག་གི་རྒྱུད་ལ་མི་འབྱུང་བ་བཞིན་དུ། རྟོག་པ་རིགས་མི་མཐུན་པ་རྫས་ཐ་དད་པ་དུ་མའང་གང་ཟག་ཅིག་གི་རྒྱུད་ལ་མི་འབྱུང་ཞིང་རྟོག་མེད་རིགས་མི་མཐུན་པ་རྫས་ཐ་དད་པ་དུ་མ་ཅིག་ཅར་བྱུང་བར་འདོད་ཀྱང་དེ་ནི་གཞུང་གི་དོན་ལེགས་པར་མ་གོ་བའི་རྣམ་འགྱུར་ངོམ་པ་ཙམ་དུ་ཟད་དེ། རྣམ་འགྲེལ་གྱི་གཞུང་དེའི་ནང་དོན་ནི། རིགས་མི་མཐུན་པའི་རྟོག་པ་ལ་རྩོལ་བས་གློ་བུར་དུ་གསར་བྱུང་དུ་མ་ཅིག་ཅར་མི་འབྱུང་ཞེས་པའི་དོན་དང་། ཡང་ན་ཕྱི་རོལ་རིགས་པ་ཅན་པ་འགོག་པའི་སྐབས་ཡིན་པས་ཉེས་པ་མེད་དེ། རིགས་པ་ཅན་པས་རྣམ་ཤེས་གཅིག་ལས་ཁས་མི་ལེན་པའི་ཕྱིར་དང་།

⁵³ལེགས་བཤད་སྣང་བའི་གཏེར་དུ་རྟོག་བཞིན་མཐོང་ལ་རྟོག་པ་མེད་ཅེས་སོགས་ཀྱིས་གཟུགས་འཛིན་རྟོག་པ་རང་དང་དུས་མཚུངས་པའི་རྟོག་པ་གཞན་གྱི་དེ་མྱོང་བ་མེད་པ་དང་གསར་འབྱུང་གི་རྟོག་པ་གཉིས་དུས་མཉམ་དུ་མི་འབྱུང་གི་དོན་ལས་རྟོག་པ་རྫས་ཐ་དད་དུ་མ་མི་འབྱུང་བའི་དོན་དུ་མ་གསུངས་པའི་ཕྱིར་རོ། །རྒྱན་གྱི་རྣམ་བཤད་ཀྱི་དགོངས་དོན་ལ་དཔེ་དང་དཔེ་ཅན་བྱེད་པ་ཤན་འབྱེད་མ་ནུས་པ་དང་། གཞུང་ཚིག་གཅོད་མཚམས་ལ་མཉམ་པར་མ་བཞག་པའི་རྟགས་སུ་ཁུམས། ⁵⁴ལེགས་བཤད་སྣང་བའི་གཏེར་དུ་རིགས་མི་མཐུན་པའི་བློ་དུ་མ་རྐྱེན་ཚང་ན་ཅིག་ཆར་དུ་སྐྱེ་བ་དང་། དེ་སྐྱེ་བ་དཔེའི་སྒོ་ནས་གསུངས་པ་རྣམས་འདིར་དྲན་པ་མཛད་དགོས་ལ། རྫས་རིགས་མཐུན་པའི་ཤེས་པ་དང་། དམིགས་པ་གཅིག་ལ་འཛིན་སྟངས་དངོས་འགལ་ཅན་གྱི་བློ་ལ་འདིར་རིགས་མཐུན་བློའི་དོན་དུ་གོ་མི་རིགས་སོ།།

མདོར་ན་མདོ་དང་བསྟན་བཅོས་དག་ལས་རིགས་མཐུན་མི་མཐུན་ཅིག་ཅར་དུ་འབྱུང་བ་ཡོད་མེད་སྣ་ཚོགས་པ་བཤད་པའི་དོན་དྲིལ་ན་འགྲོ་བ་གཅིག་གི་རྒྱུད་ལ་ཅིག་ཅར་དུ་སྐྱེ་རུང་བ་དང་མི་རུང་བའི་ཤེས་པ་ནི། རྟོག་པ་དང་རྟོག་མེད་རིགས་མཐུན་གྱི་ཤེས་པ་དུ་མ་དུས་མཉམ་དུ་སྐྱེ་མི་རུང་བ་དང་། རིགས་མི་མཐུན་པའི་ཤེས་པ་ལའང་སྤང་གཉེན་ལྟ་བུ་དང་། གསར་བྱུང་གི་རྟོག་པ་གཉིས་ཅིག་ཅར་དུ་མི་འབྱུང་ཞིང་སྐྱེ་མི་རུང་ལ། དེ་ལས་གཞན་པའི་རིགས་མི་མཐུན་པའི་ཤེས་པ་དུ་མ་དུས་མཉམ་དུ་སྐྱེ་རུང་བའི་རྣམ་གཞག་བྱས་ན་ཤིན་ཏུ་ནས་ལེགས་པའི་བཤད་པའོ།།

མཇུག་མཐའི་གཏམ།

དོགས་གཞི་ཆེ་ཞིང་གཞུང་དོན་ཤིན་ཏུ་དཀའ་བའི་གནད་དག་གཞན་དུ་མ་སྐྱུར་བར་ཕྱོགས་གཅིག་ཏུ་བསྡུས་ནས་རགས་ཙམ་དཔྱད་ཁུལ་བྱས་མོད། རྒྱལ་སྲས་གྲགས་པའི་བཤེས་གཉེན་གྱིས། དོན་དཀའ་བ་ལ་བདག་འདྲའི་བློ། །འཁྲུལ་མི་སྲིད་པ་མ་ཡིན་པས། །གལ་ཏེ་རིགས་པར་ལྟ་ན་བླངས། །ཅི་སྟེ་མིན་ན་གཞན་དུ་གྱིས། །ཞེས་གསུངས་པ་ལྟར་བློ་རྒྱ་རྟ་རྔ་ཙམ་ལས་ཀྱང་ཕྲ་བ་ཞིག་གིས་གཞུང་ཆེན་རི་བོའི་རྒྱ་ཁྱོན་བསྡོམས་པར་རློམ་པ་ནི། གནས་ཚུལ་དང་མི་མཐུན་པར་སྨོས་མེད་ལགས་ན། ཐོས་བསམ་དམན་པས་འདིར་ཡང་དག་པར་མ་བཤད་པ་དང་། མ་བྲིས་པ། ལོག་པར་བྲིས་པ་ཇི་སྙེད་ཅིག་མཆིས་པ་ཀུན་ཀྱང་གཞུང་འདིའི་མཛད་པ་པོ་མཆོག་ལ་སྙིང་ནས་བཤགས་པ་དང་ལྷན། འདི་ལ་འབད་པས་ཐོབ་པའི་ལེགས་ཆ་ཕྲ་མོ་ཙམ་ཡོད་ན་ལུས་ཅན་ཀུན་གནས་ལུགས་འབྱེད་པའི་ཤེས་རབ་དང་། སྙིང་བརྩེ་གཉིས་ལ་སྐད་ཅིག་ཏུའང་མི་འབྲལ་བའི་རྒྱུ་རུ་བསྔོའོ།།

སླར་སྨྲས་པ།

གཞུང་གི་གནད་ལ་ཅུང་ཙམ་དཔྱད་པ་འདིར།།
ཉེས་བཤད་ལོག་འགྲེལ་སྤྱན་ལྡན་མདུན་དུ་བཤགས།།
འབད་པས་ཐོབ་པའི་ལེགས་ཆ་ཅུང་མཆིས་ན།།
ཀུན་ཀྱང་ཤེས་རབ་གསལ་བའི་རྒྱུར་གྱུར་ཅིག།

འབྲས་སྤུངས་བློ་གསལ་གླིང་དཔེ་མཛོད་ཁང་གི་པར་མ། ཤོག་ངོས་ ༩ པ་ལས། གཞན་གྱིས་མྱོང་བ་མ་ཡིན་ཡིན་ཏེ། །ཆོས་སྤྱོད་བཅུ་ཡི་བདག་ཉིད་ཀྱི། །མདོ་དོན་དྲན་པ་ལ་བཞག་ནས། །བློ་དང་ལྡན་པས་མཐོང་འགྱུར་ཕྱིར།།
སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༥ ལོའི་པར་མ། ཤོག་ངོས་ ༢༦ པ་ལས། དེ་ཡང་གཞི་ཤེས་ལམ་ཤེས་གཉིས་ནི་ཚོགས་ལམ་ནས་མི་སློབ་པའི་བར་ན་ཡོད་དོ།།
སི་ཁྲོན་མི་རིགས་དཔེ་སྐྲུན་ཁང་། བོད་སྤྲུལ་གསུང་འབུམ་པོད་ ༢ པ། ཤོག་ངོས་ ༢༥ པ་ལས། དང་པོ་ལ་རྣམ་པ་སྐྱེ་མེད་ཀྱི་མངོན་རྟོགས་རྣམ་མཁྱེན། ལམ་མཚན་མེད་ཀྱི་མངོན་རྟོགས་ལམ་ཤེས། གཞི་བདག་མེད་ཀྱི་མངོན་རྟོགས་གཞི་ཤེས།
མོན་རྡི་རང་ཐུབ་གསུང་དར་རྒྱས་གླིང་གི་སློབ་གཉེར་ཁང་གི་ཕྱི་ལོ་ ༢༠༡༧ ལོའི་པར་མ། ཤོག་ངོས་ ༢༩ པ་ལས། ས་མཚམས། ཐེག་ཆེན་གྱི་ལམ་ལྔ་ཀ་ན་ཡོད།
སྡེ་དགེ་བཀའ་འགྱུར་པོད་ ༨༤ པ། ཤོག་ངོས་ ༢༨༨ པ་ལས། རབ་འབྱོར་ཐམས་ཅད་ཤེས་པ་ཉིད་ནི་ཉན་ཐོས་རང་སངས་རྒྱས་རྣམས་ཀྱི་ཡིན་ནོ། །ལམ་ཤེས་པ་ཉིད་ནི་བྱང་ཆུབ་སེམས་དཔའ་རྣམས་ཀྱི་ཡིན་ནོ། །རྣམ་པ་ཐམས་ཅད་མཁྱེན་པ་ཉིད་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཡིན་ནོ།།
འབྲས་སྤུངས་བློ་གསལ་གླིང་གི་དཔེ་མཛོད་ཁང་གི་པར་མ། ཤོག་ངོས་ ༡༡ པ་ལས། ཐུབ་པའི་རྣམ་ཀུན་མཁྱེན་པ་ཉིད། །ཅེས་དང་། བྱང་ཆུབ་སེམས་དཔའ་མཁས་རྣམས་ཀྱི། །ལམ་ཤེས་ཉིད་ནི་དེ་འདྲར་བཤད། །ཅེས་དང་། ཉན་ཐོས་ལ་སོགས་མཐོང་བའི་ལམ། །དེ་འདྲ་ཀུན་ཤེས་ཉིད་དུ་འདོད།།
སི་ཁྲོན་མི་རིགས་དཔེ་སྐྲུན་ཁང་། བོད་སྤྲུལ་གསུང་འབུམ་པོད་ ༢ པ། ཤོག་ངོས་ ༥ པ་ལས། མཆོད་བརྗོད་ཀྱི་ཚིགས་སུ་བཅད་པའི་དོན་མདོའི་གླེང་གཞི་དང་སྦྱར་ཏེ་དེའི་སྦས་དོན་དུ་གྱུར་པ་མཁྱེན་པ་གསུམ་གྱི་ཡོན་ཏན་བརྗོད་པའི་སྒོ་ནས་སྲས་འཕགས་བཞིའི་ཡུམ་དུ་གྱུར་པའི་ཤེར་ཕྱིན་ལ་ཕྱག་མཛད་པ་སྟེ། ཞེས་སོགས་གསུངས།
སྡེ་དགེ་བསྟན་གྱུར། ཤེར་ཕྱིན་པོད་ཀ་པ། ཤོག་ངོས་ ༡ པོ་ལས། འཕགས་པའི་གང་ཟག་ཐམས་ཅད་ཀྱི་དབང་དུ་མཛད་ནས་ཐམས་ཅད་མཁྱེན་པ་རྣམ་པ་གསུམ་གྱི་ཐུན་མོང་མ་ཡིན་པའི་ཡོན་ཏན་ཉེ་བར་དགོད་པ་སྔོན་དུ་འགྲོ་བས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་ལོ། །ཤེར་ཕྱིན་པོད་ཀ་པ། ཤོག་ངོས་ ༢༨༨ པ་ལས། འཕགས་པའི་གང་ཟག་ཐམས་ཅད་ཀྱི་དབང་དུ་མཛད་ནས་ཐམས་ཅད་མཁྱེན་པ་ཉིད་གསུམ་གྱི་རྣམ་པ་རྣམས་བསྡུས་པར་འགྱུར་བ་ཡིན་ཏེ།
སྡེ་དགེ་བཀའ་འགྱུར། པོད་ ༢༠༥ པ། ཤོག་ངོས་ ༢༢༢ པ་ལས། དོན་དམ་ཡང་དག་འཕགས་པ་ཉན་ཐོས་རིགས་ཅན་གང་ཟག་ཞི་བའི་བགྲོད་པ་གཅིག་པུ་པ་ནི་སངས་རྒྱས་ཐམས་ཅད་བརྩོན་པ་དང་ལྡན་པར་གྱུར་ཀྱང་བྱང་ཆུབ་སྙིང་པོ་ལ་བཞག་སྟེ། བླ་ན་མེད་པར་ཡང་དག་པར་རྫོགས་པའི་བྱང་ཆུབ་ཐོབ་པར་བྱར་མི་ནུས་སོ། །དེ་ཅིའི་ཕྱིར་ཞེ་ན། འདི་ལྟར་དེ་སྙིང་རྗེ་ཤིན་ཏུ་ཆུང་བ་དང་། སྡུག་བསྔལ་གྱིས་ཤིན་ཏུ་འཇིགས་པའི་ཕྱིར་རང་བཞིན་གྱིས་རིགས་དམན་པ་ཁོ་ན་ཡིན་པའི་ཕྱིར་རོ། །ཉན་ཐོས་བྱང་ཆུབ་ཡོངས་སུ་གྱུར་བ་གང་ཡིན་པ་དེ་ནི་ངས་རྣམ་གྲངས་ཀྱིས་བྱང་ཆུབ་སེམས་དཔའ་ཡིན་པར་བསྟན་ཏེ། འདི་ལྟར་དེ་ནི་ཉོན་མོངས་པའི་སྒྲིབ་པ་ལས་རྣམ་པར་གྲོལ་ནས། དེ་བཞིན་གཤེགས་པ་རྣམས་ཀྱིས་བསྐུལ་ན། ཤེས་བྱའི་སྒྲིབ་པ་ལས་རྣམ་པར་གྲོལ་བར་བྱེད་པའི་ཕྱིར་རོ།།
སྡེ་དགེ་བསྟན་འགྱུར། པོད་ ༡༣༡ པ། ཤོག་ངོས་ ༢༤༩ པ་ལས། ཉན་ཐོས་བྱང་ཆུབ་ཡོངས་སུ་འགྱུར་བ། ཅི་ཕུང་པོ་ལྷག་མ་མེད་པའི་མྱང་ངན་ལས་འདས་པའི་དབྱིངས་ལ་གནས་ཤིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སྒྲུབ་པར་བྱེད་དམ། འོན་ཏེ་ཕུང་པོའི་ལྷག་མ་དང་བཅས་པའི་མྱང་ངན་ལས་འདས་པའི་དབྱིངས་ལ་གནས་ཤིང་བྱེད་ཅེ་ན། སྨྲས་པ། ཕུང་པོའི་ལྷག་མ་དང་བཅས་པའི་མྱང་ངན་ལས་འདས་པའི་དབྱིངས་ལ་གནས་ཤིང་བྱེད་དེ། འདི་ལྟར་ཕུང་པོའི་ལྷག་མ་མེད་པའི་མྱང་ངན་ལས་འདས་པའི་དབྱིངས་ལ་གནས་པ་ནི་རྩོམ་པ་ཐམས་ཅད་དང་བྲལ་ཞིང་། འབད་པ་ཐམས་ཅད་རྒྱུན་བཅད་པ་ཡིན་པའི་ཕྱིར་རོ། །གལ་ཏེ་ཕུང་པོ་ལྷག་མ་དང་བཅས་པའི་མྱང་ངན་ལས་འདས་པའི་དབྱིངས་ལ་གནས་ཤིང་། བླ་ན་མེད་པའི་ཡང་དག་པར་རྫོགས་པའི་བྱང་ཆུབ་མངོན་པར་སྒྲུབ་པར་བྱེད་ཅེ་ན། ཇི་ལྟར་སྐྱེ་བ་གཅིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སྒྲུབ་ཏུ་རུང་སྟེ། དགྲ་བཅོམ་པ་ལ་ནི་རེ་ཞིག་སྐྱེ་བ་གཅིག་ཀྱང་མེད་ན། སྐྱེ་བའི་རྒྱུན་ལྟ་སྨོས་ཀྱང་ཅི་དགོས་ཤེ་ན། སྨྲས་པ། ཚེའི་འདུ་བྱེད་བསྲིངས་ནས་མངོན་པར་སྒྲུབ་པར་བྱེད་དོ།།
སྡེ་དགེ་བསྟན་འགྱུར། པོད་ ༡༣༡ པ། ཤོག་ངོས་ ༢༤༥ པ་ལས། དབྱིངས་དེར་ཡོངས་སུ་མྱང་ངན་ལས་འདས་པ་ནི་ལྷ་ཉིད་ཀྱི་གྲངས་སུ་མི་འགྲོ་ལ། དྲི་ཟ་ཉིད་དུ་ཡང་མ་ཡིན། ཀླུ་ཉིད་དུ་ཡང་མ་ཡིན། མིའམ་ཅི་ཉིད་དུ་ཡང་མ་ཡིན། ལྷ་མ་ཡིན་ཉིད་དུ་ཡང་མ་ཡིན། གནོད་སྦྱིན་ཉིད་དུ་ཡང་མ་ཡིན། མི་ཉིད་ཀྱི་གྲངས་སུ་ཡང་མི་འགྲོ་སྟེ།
སྡེ་དགེ་བསྟན་འགྱུར། པོད་ ༡༣༡ པ། ཤོག་ངོས་ ༢༤༩ པ་ལས། ཉན་ཐོས་བྱང་ཆུབ་ཡོངས་སུ་འགྱུར་བ། ཅི་ཕུང་པོ་ལྷག་མ་མེད་པའི་མྱང་ངན་ལས་འདས་པའི་དབྱིངས་ལ་གནས་ཤིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སྒྲུབ་པར་བྱེད་དམ། འོན་ཏེ་ཕུང་པོའི་ལྷག་མ་དང་བཅས་པའི་མྱང་ངན་ལས་འདས་པའི་དབྱིངས་ལ་གནས་ཤིང་བྱེད་ཅེ་ན། ཞེས་སོགས་ལུང་ཆ་ཚང་གོང་དུ་བཀོད་ཡོད་པས་དེར་གཟིགས་མཛོད།
བོད་ཀྱི་གཙུག་ལག་ཞིབ་དཔྱོད་ཁང་གི་པར་མ། བོད་ཀྱི་གཙུག་ལག་གཅེས་བཏུས་པོད་ཕྲེང་། ༢༣ པ། ཤོག་ངོས་ ༡༥༠ པ་ལས། སྙོམས་འཇུག་གཉིས་ཀ་འདོད་པ་དང་གཟུགས་ཀྱི་ཁམས་པའི་རྟེན་ཅན་ཡིན་གྱི་གཟུགས་མེད་པའི་ནི་མ་ཡིན་ཏེ། དགག་གཞི་མེད་པའི་ཕྱིར་དང་། འདུ་ཤེས་མེད་པའི་སྙོམས་འཇུག་བསམ་གཏན་བཞི་པས་བསྡུས་པའི་ཕྱིར་དང་། འགོག་པ་ནི་འདུ་ཤེས་དང་ཚོར་བ་རགས་པས་སྐྱོ་བས་ཡིན་ན་གཟུགས་མེད་པ་ནི་ཞི་བར་གནས་པས་དེ་དག་གིས་སྐྱོ་བ་མེད་པའི་ཕྱིར་རོ།།
སྡེ་དགེ་བཀའ་འགྱུར། པོད་ ༨༩ པ། ཤོག་ངོས་ ༣༥ པ་ལས། རིགས་ཀྱི་བུ། སྐུ་གཉིས་པོ་དེ་དག་ལ་བརྟེན་ནས་ནི་སངས་རྒྱས་ཐམས་ཅད་ཀྱི་ལྷག་མ་དང་བཅས་པའི་མྱང་ངན་འདས་པ་བསྟན་ཏོ། །ཆོས་ཀྱི་སྐུ་དེ་ལ་བརྟེན་ནས་ནི་ལྷག་མ་མེད་པའི་མྱང་ངན་ལས་འདས་པ་བསྟན་ཏོ།།
སྡེ་དགེ་བསྟན་འགྱུར། པོད་ ༡༠༨ པ། ཤོག་ངོས་ ༣༢ པ་ལས། དེ་ལྟར་ཉན་ཐོས་དང་ཐུན་མོང་བའི་མྱང་ངན་ལས་འདས་པ་བརྗོད་པ་ཁས་བླངས་ཏེ་བསྟན་ཏོ།།
སྡེ་དགེ་བཀའ་འགྱུར། པོད་ ༨༩ པ། ཤོག་ངོས་ ༣༣༡ པ་ལས། སྐུ་གཉིས་ལ་ནི་མྱང་ངན་ལས་འདས་པ་ཞེས་མི་གསུང་སྟེ། ཆོས་ཀྱི་སྐུ་ལས་གཞན་པའི་སངས་རྒྱས་མེད་པའི་ཕྱིར་རོ། །ཅིའི་ཕྱིར་སྐུ་གཉིས་པོ་ལ་མྱང་ངན་ལས་འདས་པ་ཞེས་མི་བྱ་ཞེ་ན། སྐུ་དེ་གཉིས་ནི་ཡང་དག་པ་མ་ཡིན་པ་བཏགས་པ་ཙམ་ལས། སྐད་ཅིག་ཏུ་སྐྱེ་ཞིང་འགག་པ་རྟག་པར་མི་གནས་པ་དང་། ཡང་དང་ཡང་དུ་འབྱུང་བས་མ་ངེས་པ་ལྟར་ཆོས་ཀྱི་སྐུ་ནི་དེ་ལྟ་མ་ཡིན་ནོ།།
སྡེ་དགེ་བཀའ་འགྱུར། པོད་ ༦༠ པ། ཤོག་ངོས་ ༢༩༩ པ་ལས། ངེས་པའི་དོན་གྱི་མདོ་སྡེ་ནི་གང་། དྲང་པའི་དོན་གྱི་མདོ་སྡེ་ནི་གང་ཞེ་ན། མདོ་སྡེ་གང་དག་ཀུན་རྫོབ་བསྒྲུབ་པ་བསྟན་པ་དེ་དག་ནི་དྲང་པའི་དོན་ཞེས་བྱའོ། །མདོ་སྡེ་གང་དག་དོན་དམ་པ་བསྒྲུབ་པ་བསྟན་པ་དེ་དག་ནི་ངེས་པའི་དོན་ཞེས་བྱའོ།།
སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༤ ལོའི་པར་མ། ཤོག་ངོས་ ༢༡༥ པ་ལས། དེས་ན་འཁོར་ལོ་བར་པའི་བསྟན་དོན་ཀུན་བྱང་གི་ཆོས་ཐམས་ཅད་སྟོང་པར་བསྟན་པ་ནི་དེ་དེ་བཞིན་དུ་གྲུབ་སྟེ་བདེ་གཤེགས་སྙིང་པོའང་སྟོང་པ་ཉིད་ཀྱི་རང་བཞིན་ཡིན་པའི་ཕྱིར་རོ། །འོན་ཀྱང་སྟོང་པའི་རང་བཞིན་ཅན་གྱི་སྐུ་དང་། ཡེ་ཤེས་ཀྱི་སྣང་བ་དང་འདུ་འབྲལ་མེད་པའི་ཁྱད་པར་དུ་བྱས་པའི་སྙིང་པོ་བསྟན་པ་འདི་འཁོར་ལོ་ཐ་མའི་ངེས་དོན་གྱི་མདོ་སྡེ་རྣམས་ཀྱི་དགོངས་པ་ཡིན་པས་ཚུལ་དེ་ཙམ་གྱི་ཆ་ནས་འཁོར་ལོ་བར་པ་ལས་ལྷག་པའི་ཕྱིར། མདོ་སྡེ་དགོངས་འགྲེལ་ལས་འཁོར་ལོ་ཐ་མའི་དོན་ལ་མཆོག་ཏུ་བསྔགས་པའང་དེར་གཏོགས་ཚད་མ་ཡིན་གྱི་སྙིང་པོ་བསྟན་པའི་ངེས་དོན་གྱི་ཕྱོགས་ནས་དེ་ལྟར་གསུངས། དེས་ན་འཁོར་ལོར་བར་པར་བསྟན་པའི་སྟོང་ཉིད་དང་། ཐ་མར་བསྟན་པའི་སྐུ་དང་ཡེ་ཤེས་དག་སྣང་སྟོང་ཟུང་དུ་ཆུད་པར་བྱ་དགོས་པས། བར་པ་དང་ཐ་མའི་ངེས་དོན་གྱི་སྐོར་རྣམས་དབྱེ་བསལ་མེད་པར་གཉིས་ཀ་ངེས་དོན་དུ་ཀུན་མཁྱེན་ཀློང་ཆེན་པས་བཞེད་པ་འདི་ཁོ་ན་ལྟར་བཟུང་པར་བྱ་སྟེ། དེ་གཉིས་གཅིག་ངེས་དོན་དུ་བྱས་ན་གཅིག་དྲང་དོན་དུ་བྱ་དགོས་པའི་འགལ་བ་མེད་པར་མ་ཟད། ཟུང་དུ་ཚོགས་པར་བྱས་ན་བདེ་གཤེགས་སྙིང་པོ་དེ་ལྟ་བུ་ལ་རྒྱུ་རྒྱུད་ཀྱི་དོན་དུ་བྱས་ནས་རྡོ་རྗེ་ཐེག་པའི་མན་ངག་གི་གནད་འབྱུང་བས་སངས་རྒྱས་ཀྱི་བསྟན་པ་དེ་དག་གནད་གཅིག་ཏུ་འབབ་པར་ཤེས་དགོས་ཤིང་། མཐར་ཐུག་གི་དོན་འདི་ལ་ཀླུ་ཐོགས་གཉིས་སོགས་འཕགས་པ་རྣམས་དགོངས་པ་གཅིག་སྟེ་ཆོས་དབྱིངས་བསྟོད་པ་དང་སེམས་འགྲེལ་ལ་སོགས་པ་དང་། རྒྱུད་བླའི་འགྲེལ་པ་སོགས་ཀྱིས་གསལ་བར་རྟོགས་པའི་ཕྱིར་རོ།།
སྡེ་དགེ་བཀའ་འགྱུར། པོད་ ༤༩ པ། ཤོག་ངོས་ ༤༩ པ་ལས། ཐེག་པ་ཐམས་ཅད་ལ་ཡང་དག་པར་ཞུགས་པ་རྣམས་ལ་ལེགས་པར་རྣམ་པར་ཕྱེ་བ་དང་ལྡན་པས་ངོ་མཚར་རྨད་དུ་བྱུང་བའི་ཆོས་ཀྱི་འཁོར་ལོ་གསུམ་པ་བསྐོར་ཏེ། བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བ་འདི་ནི་བླ་ན་མ་མཆིས་པ། སྐབས་མ་མཆིས་པ། ངེས་པའི་དོན་ལགས་ཀྱི། རྩོད་པའི་གཞིའི་གནས་སུ་གྱུར་པ་མ་ལགས་སོ།།
དཔལ་བརྩེགས་བསྐྱར་དཔར་མ། ཀུན་མཁྱེན་ཀློང་ཆེན་པའི་གསུང་འབུམ། དེབ་ཕྲེང་། ༢༡ པ། ཤོག་ངོས་ ༡༣༧ པ་ལས། དྲང་དོན་དང་ངེས་དོན་གྱི་རྣམ་པར་གཞག་པ་ནི་ཆོས་ཐམས་ཅད་ཀྱི་ཆོས་ཉིད་དེ་བཞིན་ཉིད་དབྱིངས་རང་བཞིན་གྱིས་དག་པ་སེམས་ཉིད་འོད་གསལ་བའི་དགོངས་པ་ནི་རང་བཞིན་གྱིས་དག་ཅིང་འཕོ་འགྱུར་མེད་པ་སྐྱེ་འགག་གནས་གསུམ་ལས་འདས་པ་ནམ་མཁའི་ངོ་བོ་ནི་ངེས་པའི་དོན་ཡིན་ལ། དེ་སྟོན་པའི་བཀའ་དང་བསྟན་བཅོས་མ་ལུས་པ་ངེས་པའི་དོན་གྱི་ཁོངས་སུ་བསྡུའོ། །ཆོས་ཅན་སྣང་ཚོད་པ་སྐྱེ་བ་དང་། འགག་པ་དང་། འོང་བ་དང་། འགྲོ་བ་དང་། དག་པ་དང་། མ་དག་པ་དང་། ཕུང་པོ་དང་། ཁམས་དང་། སྐྱེ་མཆེད་ལ་སོགས་པའི་རིམ་པ་རྣམ་པ་སྣ་ཚོགས་པར་སྣང་བ་རྨི་ལམ་ལྟ་བུ་སྨྲ་བསམ་བརྗོད་པའི་རིམ་པས་གཞལ་ཞིང་སྒྲོ་བཏགས་ནས་བསྟན་པ་ཐམས་ཅད་དྲང་བའི་དོན་ཞེས་བྱའོ། །དེ་སྟོན་པའི་བཀའ་དང་བསྟན་བཅོས་ཐམས་ཅད་ཀུན་རྫོབ་པའི་ནང་དུ་བསྡུའོ།།
སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༧ ལོའི་པར་མ། ཤོག་ངོས་ ༢༦ པ་ལས། དེའང་བཀའ་དང་བསྟན་བཅོས་རྣམས་ན་བདེན་གཉིས་འཇོག་ཚུལ་གཉིས་སུ་གནས་ཏེ། གནས་ལུགས་དོན་དམ་ལ་དཔྱོད་པའི་ཚད་མའི་དབང་དུ་བྱས་ཏེ། སྟོང་པ་ལ་དོན་དམ་དང་། སྣང་བ་ལ་ཀུན་རྫོབ་ཅེས་བཞག་པ་དང་། སྣང་ཚུལ་ལ་དཔྱོད་པ་ཀུན་ཏུ་ཐ་སྙད་པའི་ཚད་མའི་དབང་དུ་བྱས་ཏེ། གནས་སྣང་མཐུན་པ་མི་བསླུ་བའི་ཡུལ་དང་ཡུལ་ཅན་ལ་དོན་དམ་དང་། ལྡོག་ཕྱོགས་ལ་ཀུན་རྫོབ་ཏུ་འཇོག་པའི་ཚུལ་གཉིས་ལས།
༢༠༡༤ ལོའི་སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༤ ལོའི་པར་མ། དེ་བཞིན་གཤེགས་པའི་སྙིང་པོའི་སྐབས་དེ་དང་པོ། ཤོག་ངོས་ ༧༦ པ་ལས། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གི་ཁམས་སྟོང་གི །རྣམ་དབྱེ་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན།།
དཔལ་བརྩེགས་བསྐྱར་དཔར་མ། ཀུན་མཁྱེན་ཀློང་ཆེན་གྱི་གསུང་འབུམ། དེབ་ཕྲེང་། ༡༥ པ། ཤོག་ངོས་ ༡༥༩ པ་ལས། དེའང་ཁས་བླངས་པའི་ཆོ་གས་ཐོབ་པའི་སེམས་བསྐྱེད་ནི་སློབ་ལམ་ན་ཡོད་ཀྱི་སངས་རྒྱས་ཀྱི་ས་ལ་མེད་དོ།།
དཔལ་བརྩེགས་བསྐྱར་དཔར་མ། ཀུན་མཁྱེན་ཀློང་ཆེན་གྱི་གསུང་འབུམ། དེབ་ཕྲེང་། ༡༤ པ། ཤོག་ངོས་ ༢༥༨ པ་ལས། དེའང་སངས་རྒྱས་ན་ཆོ་ག་ལས་བྱུང་བ་དང་། ད་གཟོད་འཐོབ་བྱའི་སེམས་བསྐྱེད་དུ་མེད་ཀྱང་། ཐུགས་རྗེ་ཆེན་པོས་དོན་མཛད་པ་དུས་ལས་མི་ཡོལ་བའི་སེམས་བསྐྱེད་པ་དང་། དོན་དམ་སེམས་བསྐྱེད་ཡོད་དེ། དོར་པ་མེད་པའི་སྟོང་པ་ཉིད་ཡོད་པའི་ཕྱིར་དང་། དོན་དམ་སེམས་བསྐྱེད་ཐོབ་ལ་ཉམས་བྱེད་ཀྱི་རྒྱུ་མེད་པའི་ཕྱིར་རོ། །དེས་ན་སངས་རྒྱས་ཀྱི་ས་ན་སེམས་བསྐྱེད་ཡོད་མེད་ནི་ཚུལ་འདིས་ཤེས་པར་བྱའོ།།
དཔལ་བརྩེགས་བསྐྱར་དཔར་མ། ཀུན་མཁྱེན་ཀློང་ཆེན་གྱི་གསུང་འབུམ། དེབ་ཕྲེང་། ༢༡ པ། ཤོག་ངོས་ ༡༧ པ་ལས། ཁ་ཅིག་སྐབས་འདིའི་ཐ་མ་གསུམ་ཀུན་ཏུ་འོད་ཀྱི་ས་ལ་སྦྱོར་བའི་ལུང་དུ་འཆད་པ་མི་རིགས་ཏེ། སངས་རྒྱས་ཀྱིས་དེ་ལ་འཇུག་མི་རིགས་པའི་ཕྱིར་ཏེ། ཟད་པའམ་མཐའ་མི་དམིགས་པའི་ཕྱིར་རོ། །སངས་རྒྱས་ཀྱིས་ཞེས་པ་ཐེག་ཆེན་གྱི་དགྲ་བཅོམ་ཞུགས་པའི་ས་སྟེ་བཅུ་པའི་སྦྱོར་དངོས་རྗེས་གསུམ་དུ་བཤད་ཅིང་། མདོ་སྡེ་རྒྱན་ལས། རྒྱལ་སྲས་རྣམས་ཀྱི་སེམས་བསྐྱེད་པ། །སྤྲིན་དང་འདྲ་བར་བསྟན་པ་ཡིན། །ཞེས་པས་ཉི་ཤུ་རྩ་གཉིས་པོ་འདི་ཚོགས་ལམ་ནས་ས་བཅུ་པའི་བར་དུ་གསུངས་པ་ཡིན་ནོ། །འདིར་སངས་རྒྱས་ཀྱི་ས་ལ་སེམས་བསྐྱེད་ཡོད་མེད་ཅེ་ན། སློབ་ལམ་པའི་སེམས་བསྐྱེད་ལྟར་ད་གཟོད་ཐོབ་པར་འདོད་པ་མེད་དེ་ཐོབ་ཟིན་པའི་ཕྱིར་དང་། ཁས་བླངས་པའི་དུས་ལས་འདས་པའི་ཕྱིར་ཆོ་གས་བླངས་པའི་སེམས་བསྐྱེད་མེད་པ་ཡིན་ནོ།།
སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༨ ལོའི་པར་མ། མདོ་སྐོར། སྨད་ཆ། ཤོག་ངོས་ ༣༨ པ་ལས། དེའང་སངས་རྒྱས་ཀྱི་ས་ན་ཆོ་ག་ལས་བྱུང་བ་དང་འཁོར་བའི་ཤེས་པ་ཅན་མེད་ཀྱང་ཁམས་དེའི་ཡོན་ཏན་ཅི་ཡོད་པ་ཐམས་ཅད་མངོན་དུ་གྱུར་ནས་ཐུགས་རྗེ་ཆེན་པོའི་མཛད་པ་དུས་ལས་མི་ཡོལ་བ་དོན་དམ་པའི་ཡེ་ཤེས་དང་རོ་གཅིག་ཏུ་གྱུར་པ་དེ་ལ་བྱའོ།།
སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༨ ལོའི་པར་མ། མདོ་སྐོར། སྨད་ཆ། ཤོག་ངོས་ ༤༢ པ་ལས། འདིར་ཀུན་མཁྱེན་ཆེན་པོའི་བཞེད་པ་ལྟར་ན་དེ་ལ་སོགས་པའི་བྱང་ཆུབ་སེམས་པའི་ཐུགས་རྒྱུད་ཀྱི་དཀར་ཆོས་ཀྱི་ཡོན་ཏན་ཐམས་ཅད་ལ་བསམ་པས་སྨོན་པའི་ཆ་དང་འཇུག་པས་ལག་ལེན་ལ་ཁྱབ་པར་བྱེད་པའི་ཆ་གཉིས་ཡོད་པས་དེ་གཉིས་པོ་རེ་རེ་ལ་ཐམས་ཅད་འདུ་བ་ཡིན་ནོ།།
སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༨ ལོའི་པར་མ། ཤོག་ངོས་ ༤༠ པ་ལས། རྒྱལ་སྲས་ལ་ཡོད་པས་སངས་རྒྱས་ལ་ཡོད་པ་མི་ཁེགས་ལ། རྒྱལ་སྲས་རྣམས་ཀྱིས་འཐོབ་པར་བྱ་བའི་སེམས་བསྐྱེད་ཅེས་ཀྱང་དགོངས་པ་བརྟགས་ནུས་ཏེ། དེ་ལྟ་མིན་ན་སྔར་གྱི་ས་མཚམས་དང་འགལ་ཞིང་དོན་དམ་སེམས་བསྐྱེད་ཀྱང་མེད་པར་ཐལ་ལོ།།
སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༧ ལོའི་པར་མ། ཤོག་ངོས་ ༢༥༡ པ་ལས། དེ་ལྟ་བུ་ཀུན་རྫོབ་བྱང་ཆུབ་ཀྱི་སེམས་དེ་ཉིད་ནི། དོན་དམ་བྱང་ཆུབ་ཀྱི་སེམས་མཚན་ཉིད་པ་རྟོགས་པའི་གང་ཟག་ལ་ནམ་ཡང་འབྲལ་མི་ཤེས་སུ་འབྱུང་སྟེ།
ཡེ་ཤེས་སྡེ་ཆོས་པར་ཁང་། འཇམ་མགོན་མི་ཕམ་རིན་པོ་ཆེའི་བཀའ་འབུམ། ཤེར་ཕྱིན་སྐོར། དེབ་ ༩ པ། ཤོག་ངོས་ ༡༩༣ པ་ལས། སེམས་བསྐྱེད་དེ་སྐྱེ་བའི་གེགས་སྒྲིབ་པ་དང་ཉོན་མོངས་བསལ་ནས་ཞེས་པའི་ཚོགས་ལམ་ཆུང་ངུ་ནས་སངས་རྒྱས་ཀྱི་སའི་བར་དུ་དེའི་གེགས་དང་བྲལ་ཞིང་གྲོགས་འདུན་པ་སོགས་དང་མཚུངས་པ་ལྡན་པའི་སྒོ་ནས་ས་ལྟ་བུའི་སེམས་བསྐྱེད་ལ་སོགས་པར་འཇོག་པ་ཡིན་པས་གཞན་ཀུན་ཀྱང་དོན་གྱིས་འདིར་འདུ་བ་ཡིན་ནོ།།
ཡེ་ཤེས་སྡེ་ཆོས་པར་ཁང་། འཇམ་མགོན་མི་ཕམ་རིན་པོ་ཆེའི་བཀའ་འབུམ། ཤེར་ཕྱིན་སྐོར། དེབ་ ༩ པ། ཤོག་ངོས་ ༣༧༠ པ་ལས། མདོར་ན་དེ་དག་ཚོགས་ལམ་ཆུང་ངུ་ནས་སངས་རྒྱས་ཀྱི་སའི་བར་དུ་དེའི་གེགས་དང་བྲལ་ཞིང་གྲོགས་འདུན་པ་སོགས་དང་མཚུངས་པར་ལྡན་པའི་སྒོ་ནས་ས་ལྟ་བུའི་སེམས་བསྐྱེད་ལ་སོགས་པར་ཇེ་བཟང་དུ་སོང་ནས་འཇོག་པ་ཡིན་ནོ། །ས་མཚམས་འདི་ནི་སློབ་དཔོན་སེང་བཟང་གི་ལུགས་ཡིན་ལ། ས་བཅུ་རྒྱུན་མཐའི་སྦྱོར་དངོས་མཇུག་ན་ཡོད་པར་བཞེད་པའང་ཡོད་དོ།།
སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༥ ལོའི་པར་མ། ཤོག་ངོས་ ༣༥ པ་ལས། དང་པོ་མཚན་གཞི་ལ་བཞེད་ཚུལ་ལྔ་སྟེ། ཞེས་སོགས་གསུངས།
དཔལ་བརྩེགས་བསྐྱར་དཔར་མ། ཀུན་མཁྱེན་ཀློང་ཆེན་པའི་གསུང་འབུམ། དེབ་ཕྲེང་། ༡༤ པ། ཤོག་ངོས་ ༢༥༦ པ་ལས། འདིར་སེམས་དང་སེམས་བྱུང་གི་ཁྱད་པར་བསྟན་པ་ནི། སེམས་བསྐྱེད་པས་ནི་སེམས་བྱུང་ཞར་ལ་བསྐྱེད། །སེམས་ནི་དོན་གྱི་ངོ་བོ་རང་སྟོབས་རིག །སེམས་བྱུང་དོན་གྱི་ཁྱད་པར་རང་སྟོབས་རིག།།
འབྲས་སྤུངས་བློ་གསལ་གླིང་གི་པར་མ། ཤོག་ངོས་ ༡༥ པ་ལས། ཇི་ལྟར་ན་སེམས་བསྐྱེད་པ་ཡིན་པར་འགྱུར་ཞེ་ན། བདེན་མོད་ཀྱི།
སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༥ ལོའི་པར་མ། ཤོག་ངོས་ ༣༧ པ་ལས། གཞན་དོན་དུ་རྫོགས་པའི་བྱང་ཆུབ་འདོད་པ་དང་མཚུངས་ལྡན་དུ་འབྱུང་བའི་སེམས་སོ།།
ཡེ་ཤེས་སྡེ་ཆོས་པར་ཁང་། འཇམ་མགོན་མི་ཕམ་རིན་པོ་ཆེའི་བཀའ་འབུམ། ཤེར་ཕྱིན་སྐོར། དེབ་ ༩ པ། ཤོག་ངོས་ ༣༦༦ པ་ལས། གཞན་འགྲོ་བ་མཐའ་ཡས་པ་སེམས་ཅན་ཐམས་ཅད་ཀྱི་དོན་ཁུར་དུ་ཁྱེར་བའི་ཕྱིར་ཞུགས་པ་སྙིང་རྗེའི་ཆེད་དུ་བྱ་བ་གཞན་དོན་ལ་དམིགས་པ་དང་། དོན་དུ་གཉེར་བྱ་ཡང་དག་པར་རྫོགས་པའི་བྱང་ཆུབ་འཐོབ་པར་འདོད་པ་དང་མཚུངས་ལྡན་གྱི་སེམས་ཁྱད་པར་ཅན་ཡིན་ནོ།།
སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༥ ལོའི་པར་མ། ཤོག་ངོས་ ༣༥ པ་ལས། སེམས་རྟེན་ནི། རྒྱལ་བ་ལ་དམིགས་པའི་དད་པ། སེམས་ཅན་ལ་དམིགས་པའི་སྙིང་རྗེ། བྱང་སེམས་ཀྱི་ཕན་ཡོན་ཐོས་པ་དང་གསུམ་ཡིན་ཏེ།
སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། ཤོག་ངོས་ ༡༤ པ་ལས། རྟེན་དང་བརྟེན་པའི་དོན་ནི། ལམ་དེ་ས་དེའི་ངོ་བོ་སྐྱེས་བ་ལ་བྱ་སྟེ། དཔེར་ན། ཤིང་པ་ལ་ཤ་དག་ལ་ཀུན་དགའ་ར་བར་བརྟེན་ཏོ་ཞེས་པ་ལྟ་བུའོ། །རྟེན་དང་བརྟེན་པ་མཚན་ཉིད་པ་རྫས་དོན་གཞན་ཡིན་ན་ཧ་ཅང་ཐལ་བར་འགྱུར་རོ།།
བོད་ཀྱི་གཙུག་ལག་ཞིབ་དཔྱོད་ཁང་གི་པར་མ། བོད་ཀྱི་གཙུག་ལག་གཅེས་བཏུས་པོད་ཕྲེང་། ༢༣ པ། ཤོག་ངོས་ ༨ པ་ལས། བརྟེན་པའི་དོན་ཡང་ལམ་དེ་དག་བསམ་གཏན་དང་གཟུགས་མེད་ཀྱི་ཏིང་ངེ་འཛིན་གྱི་རང་བཞིན་དུ་སྐྱེས་པ་ལ་བརྗོད་ཀྱི་འཁར་གཞོང་ལ་རྒྱ་ཤུག་བརྟེན་པ་ལྟར་ནི་མ་ཡིན་ནོ།།
སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༥ ལོའི་པར་མ། ཤོག་ངོས་ ༥༦ པ་ལས། འོ་ན་རྟེན་དང་བརྟེན་པར་འགྱུར་ཚུལ་ཇི་ལྟ་བུ་ཞེ་ན། འདི་ནི་འཁར་གཞོང་ལ་རྒྱ་ཤུག་བརྟེན་པ་དང་། ས་བོན་ལས་མྱུ་གུ་སྐྱེ་བ་ལ་དེ་ལ་བརྟེན་ཞེས་པ་ལྟ་བུ་ཡང་མིན་ནོ། །འོ་ན་ཅི་ཞེ་ན། བརྟེན་པར་བཤད་པ་དེ་རྣམས་ས་གང་དང་གང་གི་ངོ་བོར་སྐྱེས་པ་ལ་བརྟེན་པའི་ཐ་སྙད་བྱས་པ་སྟེ། ཚུལ་འདི་ནི་ལམ་གྱི་སེམས་རྟེན་ཐམས་ཅད་ལ་རིག་པར་བྱ་སྟེ་ཆོས་མངོན་པ་བའི་ཐུན་མོང་མ་ཡིན་པའི་བརྡའོ།།
སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༥ ལོའི་པར་མ། ཤོག་ངོས་ ༥༥ པ་ལས། དེ་ཡང་ཀུན་བཏུས་ཀྱི་ལུགས་ཀྱི་བསམ་གཟུགས་བརྒྱད་ཀའི་དངོས་གཞི་ལས་ཡོན་ཏན་ཁྱད་པར་ཅན་གྱི་རྟེན་དུ་རུང་བ་ཐམས་ཅད་ལ་རབ་མཐའི་བསམ་གཏན་དང་གཟུགས་མེད་དུ་འདོད་དོ།།
དཔལ་བརྩེགས་བསྐྱར་དཔར་མ། ཀུན་མཁྱེན་ཀློང་ཆེན་པའི་གསུང་འབུམ། དེབ་ཕྲེང་། ༢༡ པ། ཤོག་ངོས་ ༡༨ པ་ལས། སློབ་དཔོན་དཔལ་ཡེ་ཤེས་གྲགས་པ་ནི། དང་པོ་གསུམ་སྨོན་པ། ཕྱི་མ་བཅུ་དགུ་འཇུག་པར་འདོད་དེ། འདུན་སོགས་གསུམ་གྱི་དབྱེ་བ་ཡིས། །སྨོན་པའི་སེམས་ནི་རྣམ་པ་གསུམ། །འཇུག་པའི་སེམས་ཞེས་བྱ་བ་ནི། །རྣམ་པ་བཅུ་དགུ་དག་ཏུ་བཞེད།།
སི་ཁྲོན་མི་རིགས་དཔེ་སྐྲུན་ཁང་། དཔལ་སྤྲུལ་གསུང་འབུམ། པོད་ཅ་པ། ཤོག་ངོས་ ༢༥༧ པ་ལས། དེ་དག་ཀྱང་བསམ་པ་སོགས་གྲོགས་དང་། ས་སོགས་དཔེ་དང་། ཆོས་གཞིར་གྱུར་སོགས་ཆོས་མཐུན་ཏེ། ཐམས་ཅད་ལ་སྦྱར་ཤེས་པར་བྱ་ཞིང་། ལམ་དེ་དང་དེར། དེ་དག་ལྷག་པར་སྤྱོད་པ་ཙམ་ལས་ཕལ་ཆེར་ཐམས་ཅད་དུ་ཡོད་པ་ཡང་ཤེས་པར་བྱའོ།།
སི་ཁྲོན་མི་རིགས་དཔེ་སྐྲུན་ཁང་། དཔལ་སྤྲུལ་གསུང་འབུམ། པོད་ང་པ། ཤོག་ངོས་ ༡༡༡ པ་ལས། ཀུན་མཁྱེན་ཆེན་པོས་ནི་ཐམས་ཅད་ལའང་བསམ་པས་སྨོན་པའི་ཆ་དང་། འཇུག་པས་ལག་ལེན་ལ་ཁྱབ་པར་བྱེད་པའི་ཆ་གཉིས་རེ་ཡོད་དོ་ཞེས་གསུངས་སོ། །དེའང་ཡིན་ཏེ་དཔེར་ན་འདུན་པ་ལྟ་བུ་ལའང་བློས་བྱང་ཆུབ་ལ་འདུན་པ་ཙམ་ནི་སྨོན་པའི་སེམས་ཡིན་ལ། འདུན་པ་དེའི་དྲངས་ནས་བྱང་ཆུབ་སེམས་པའི་སྤྱོད་པ་གཞན་ལ་སློབ་པའི་ཆ་ནས་འཇུག་སེམས་ཡིན་ནོ།།
དཔལ་བརྩེགས་བསྐྱར་དཔར་མ། ཀུན་མཁྱེན་ཀློང་ཆེན་པའི་གསུང་འབུམ། དེབ་ཕྲེང་། ༢༡ པ། ཤོག་ངོས་ ༡༨ པ་ལས། དེ་རེ་རེ་སྐབས་སུ་སྨོན་འཇུག་གཉིས་གཉིས་ཡོད་པར་འདོད་དགོས་ཏེ། སྨོན་པ་ནི་བྱང་ཆུབ་དོན་གཉེར་ཆ་དེ་ཡིན་ལ། འཇུག་པ་སྦྱོར་པས་ལག་ལེན་ལ་ཁྱབ་པར་བྱེད་པའི་ཆ་གཉིས་པོ་ཚང་དགོས་པའི་ཕྱིར་རོ།།
དཔལ་བརྩེགས་བསྐྱར་དཔར་མ། ཀུན་མཁྱེན་ཀློང་ཆེན་པའི་གསུང་འབུམ། དེབ་ཕྲེང་། ༡༥ པ། ཤོག་ངོས་ ༧༧ པ་ལས། ཁ་དོག་དུ་མ་སྣང་ཡང་མིག་གི་རྣམ་ཤེས་གཅིག་གི་བདག་ཉིད་ཡིན་པས། གང་ཟག་རེ་རེ་ལ་མིག་གི་ཤེས་པ་དུ་མ་མི་འབྱུང་ལ། དེ་བཞིན་དུ་རྣ་བའི་ཤེས་པ་ལ་སོགས་པ་ཡང་རིགས་མཐུན་དུ་མ་མི་འབྱུང་བས་རིགས་མཐུན་པ་རེ་རེ་ཡིན་ལ།
སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༧ ལོའི་པར་མ། ཤོག་ངོས་ ༡༢༦ པ་ལས། རིགས་མཐུན་གྱི་ཤེས་པ་གཉིས་ནམ་ཡང་དུས་གཅིག་ཏུ་སྐྱེ་བ་མེད་དེ། གལ་ཏེ་ཡུལ་བུམ་པ་ལྟ་བུ་གཅིག་ལ་དམིགས་པའི་ཚེ་བུམ་འཛིན་གྱི་ཤེས་པ་རྟོག་མེད་རིགས་མཐུན་ནམ་རྟོག་བཅས་དུས་སྔ་ཕྱི་མེད་པར་སྐྱེ་ན། ཡུལ་ཅན་གཉིས་སུ་སོང་བས་རྒྱུད་ཐ་དད་པར་འགྱུར་དགོས་པ་ཡིན་ལ།
སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༨ ལོའི་པར་མ། ཤོག་ངོས་ ༤༩ པ་ལས། གཞན་དུ་ཤེས་པའི་རྒྱུད་གཅིག་ལ་སྒྲ་ཤེས་ན་གཟུགས་མི་ཤེས་ཞེས་བསམ་པར་མི་བྱ་སྟེ། རྟོག་མེད་ཀྱི་ཤེས་པ་རིགས་མི་མཐུན་དུ་མ་དུས་གཅིག་ཏུ་འབྱུང་རུང་བའི་ཕྱིར། དེ་ལྟར་ནའང་རིགས་མི་མཐུན་པའི་ཤེས་པ་དག་ནང་ཕན་ཚུན་གཅིག་མིན་ལ། ཡིན་ན་ཁ་དོག་ལྔ་ལྡན་གྱི་ཁྲ་འཛིན་དང་སྔོ་འཛིན་ལ་ཁྱད་མེད་པར་ཐལ་ལོ།།
ཝཱ་ཎ་རྙིང་མའི་བདེ་དོན་ལྷན་ཁང་གི་ཕྱི་ལོ་ ༢༠༠༩ ལོའི་པར་མ། སྨད་ཆ། ཤོག་ངོས་ ༡༡༨ པ་ལས། མེ་ལོང་གཅིག་ལས་མེད་པ་ལ་གཟུགས་གཅིག་གི་གཟུགས་བརྙན་གཅིག་ལས་གཉིས་སུ་མི་འཆར་བ་བཞིན་རྒྱུད་གཅིག་གི་བློ་ལ་བློ་རིགས་མཐུན་པ་གཉིས་དུས་གཅིག་མི་སྲིད་དོ། །དོན་གཉིས་སུ་མེད་པ་ལ་གཉིས་སུ་ཤར་བ་ག་ལ་སྲིད། གལ་ཏེ་ཟླ་བ་གཉིས་བཞིན་ཏུ་འཁྲུལ་ནས་ཤར་ན་ཡང་རིགས་མཐུན་པ་མ་ཡིན་ཏེ། ཤེས་པ་དེའི་ངོར་ཕ་རོལ་ཚུ་རོལ་གྱི་ཟླ་བ་གཉིས་སུ་ངེས་པའི་ཕྱིར་རོ། །དེས་ན་ཅིག་ཅར་ཤར་བའི་སྣང་བ་ཐམས་ཅད་ཡུལ་གྱི་གོ་ས་དང་རྣམ་པས་ཐ་དད་པར་འགྱུར་གྱི་ནང་རིགས་མཐུན་པ་མེད་དོ། །གལ་ཏེ་ཤེལ་ལ་ལར་མར་མེ་གཅིག་ལའང་གཟུགས་བརྙན་གཉིས་སོགས་འཆར་བ་བཞིན་དུ་རིགས་མཐུན་པ་གཉིས་ཤར་ཡང་ཅི་འགལ་སྙམ་ན། རྟོག་མེད་རྣམས་ནི་སྣང་བ་སྣ་ཚོགས་ཀྱི་རྐྱེན་ལས་དུ་མ་ཅིག་ཅར་དུ་འབྱུང་ཤེས་ཀྱང་། རྟོག་པ་ནི་གཟུང་དོན་གྱི་དབང་ལས་མ་ཡིན་པར་ཤེས་པ་སྔ་མའི་རྒྱུ་ལས་ཡུལ་གང་ལ་གཞན་ཀུན་བཅད་ནས་དེར་རྟོག་པ་ཙམ་སྐྱེ་བ་ཡིན་པས་རྟོག་གཉིས་ཅིག་ཅར་འཇུག་པ་མེད་དེ་རིམ་བཞིན་འབྱུང་བ་ཁོ་ནའོ།།
ཝཱ་ཎ་རྙིང་མའི་བདེ་དོན་ལྷན་ཁང་གི་ཕྱི་ལོ་ ༢༠༠༩ ལོའི་པར་མ། སྨད་ཆ། ཤོག་ངོས་ ༤༢༢ པ་ལས། དེ་ནི་རང་རྒྱུད་ཀྱི་བློ་དེ་རྣམས་སྔོ་འཛིན་མིག་ཤེས་ལྟ་བུ་སྔ་མ་རང་དང་རིགས་མཐུན་པ་རེ་རེ་ཉིད་ལ་ནུས་པ་ངེས་པར་གྱུར་པ་ཡི་དོན་ཡིན་གྱི་རིགས་མི་མཐུན་པ་དུ་མ་ཅིག་ཅར་མི་སྐྱེ་བའི་དོན་མིན་ཏེ། ཉེར་ལེན་ཅན་གཅིག་ལ་ཉེ་བར་ལེན་པ་ཐ་དད་པ་དུ་མ་མི་རུང་བས། འདི་ལྟར་རྣམ་པར་རྟོག་པ་རིགས་མཐུན་པ་རྣམས་ནི་རང་གི་རྒྱུད་ལ་སྔ་མ་སྔ་མ་ལས་ཕྱི་མ་ཕྱི་མ་རིམ་གྱིས་འབྱུང་བར་ཡང་དག་པར་རྟོགས་ཏེ་ཅིག་ཅར་འབྱུང་བ་མི་སྲིད་དོ།།
ཝཱ་ཎ་རྙིང་མའི་བདེ་དོན་ལྷན་ཁང་གི་ཕྱི་ལོ་ ༢༠༠༩ ལོའི་པར་མ། སྨད་ཆ། ཤོག་ངོས་ ༡༥༢ པ་ལས། དེ་ཉིད་ཀྱིས་མྱོང་ཡིན་ན་ནི། །རྟོག་གཉིས་ཅིག་ཅར་མཐོང་བ་མེད།།
སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༧ ལོའི་པར་མ། ཤོག་ངོས་ ༡༢༧ པ་ལས། དེས་ན་བུམ་པའོ་སྙམ་དུ་རྟོགས་པའི་ཚེ། བུམ་མིན་ཐམས་ཅད་རྣམ་པར་མ་བཅད་ན་དེ་མི་འགྲུབ་པས་དེ་ག་རང་གཅིག་པུ་ལས་རྟོག་པ་གཞན་དང་དུས་མཉམ་འགྲོགས་པ་མི་སྲིད།
ཝཱ་ཎ་རྙིང་མའི་བདེ་དོན་ལྷན་ཁང་གི་ཕྱི་ལོ་ ༢༠༠༩ ལོའི་པར་མ། སྨད་ཆ། ཤོག་ངོས་ ༡༥༢ པ་ལས། རྟོག་གཉིས་ཅིག་ཅར་མི་སྲིད་པ་བསྟན་པ་དེས་ནི་གཟུགས་འཛིན་ཤེས་པ་རང་དང་དུས་མཚུངས་པའི་རྣམ་པར་ཤེས་པ་གཞན་གྱིས་དེ་མྱོང་བ་མེད་པར་ཡང་བསྟན་པ་ཡིན་ཏེ། སྐྱེ་བུ་གཅིག་གི་རྒྱུད་ཀྱི་ཤེས་པ་ལ་རྟོག་གཉིས་ཅིག་ཅར་སྐྱེ་མི་སྲིད་པས་སོ།།
ཝཱ་ཎ་རྙིང་མའི་བདེ་དོན་ལྷན་ཁང་གི་ཕྱི་ལོ་ ༢༠༠༩ ལོའི་པར་མ། སྨད་ཆ། ཤོག་ངོས་ ༡༡༨ ལས། དུ་མ་ཅིག་ཅར་མི་སྐྱེ་བ་ལ་གནོད་པ་ཡོད་པ་དེ་ཕྱིར་རིགས་མི་མཐུན་པའི་བློ་དུ་མ་ནི་རྐྱེན་ཚང་ན་ཅིག་ཅར་སྐྱེ་བར་འགྱུར་ཏེ། མིག་ཤེས་གཅིག་པུ་ལའང་སྔོ་སེར་སོགས་དུ་མ་ཅིག་ཅར་དམིགས་པ་ཡོད་པ་ཡིན་ནོ།།

ཤེར་ཕྱིན་གནད་ཀྱི་ཟིན་ཐོ་ཀློང་ཆེན་སྒྱུ་འཕྲུལ།

དཔྱད་མཆན་སྤེལ། ལན་དོར།

འབྲེལ་བྱང་།

འབྲེལ་ཡོད་དྲ་ཚིགས།

དྲ་ཚིགས་ལྟ་མཁན།