ལོ་རིམ་དྲུག་པའི་སློབ་གཉེར་བ། ཕུར་བུ་ཚེ་རིང་།
བལྟ་བས་མི་ངོམས་འཛུམ་པའི་ཞལ་རས་ལ། །ཟུམ་མེད་སྤྱན་དཀྱུས་ཨུཏྤལ་ཡངས་པའི་འདབ།།
རྟག་ཏུ་མུ་མེད་འགྲོ་ཀུན་ལ་གཟིགས་པའི། །ཐུགས་བསྐྱེད་འདོར་བ་མེད་པ་གང་དེར་འདུད།།
ཅེས་མཆོད་པར་བརྗོད་པའི་མདུན་བསུས་ནས་གང་ཞིག་གླེང་བར་བྱ་བ་ནི། མངོན་རྟོགས་རྒྱན་ལས། ཆོས་ཀྱི་དབྱིངས་ལ་དབྱེར་མེད་ཕྱིར། །ཞེས་པ་ལས་འཕྲོས་ནས་སྤྱིར་གྲུབ་མཐའ་བཞིའི་རིགས་ལ་སྨྲ་བསམ་བརྗོད་དགོས་པ་མང་དུ་སྣང་ཡང་སྐབས་སུ་བབས་པའི་གླེང་བར་བྱ་བ་ནི་ཐལ་འགྱུར་བའི་ལུགས་ཀྱི་རིགས་ཀྱི་སྐོར་དེ་ཡིན། དེ་ལ་ཡང་རང་གཞན་གྱི་བཞེད་པ་མི་མཐུན་པ་མང་དུ་ཡོད་ན་ཡང་། ཁོ་བོར་རྣམ་དཔྱོད་དང་དུས་ཚོད་ཀྱིས་རྐྱེན་པས་དགག་གཞག་སྤང་གསུམ་གྱི་འབད་པ་དབེན། འོན་ཀྱང་རང་ལུགས་རིགས་ཀྱི་སྐོར་ལ་ས་བཅད་རྣམ་པ་བདུན་གྱི་སྒོ་ནས་ས་བོན་ཙམ་ཞིག་སྤྲོ་བར་བྱའོ།།
དང་པོ་རང་ལུགས་རིགས་ཀྱི་རྣམ་གཞག་བསྟན་པ།
ཁུངས་བཙན་པའི་ཆེད་དུ་མདོ་ཏིང་འཛིན་རྒྱལ་པོ་ལས།1དག་པ་དྭངས་པ་འོད་གསལ་བ། །མི་འཁྲུགས་འདུས་མ་བྱས་པ་ཉིད། །བདེ་བར་གཤེགས་པའི་སྙིང་པོ་སྟེ། །ཡེ་ནས་གནས་པའི་ཆོས་ཉིད་དོ། །ཞེས་ཚིག་རྐང་དང་པོས་ཁྱད་ཆོས་གསུམ་ལྡན་བསྟན་པར་སྣང། ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་ཉི་ཤུ་ལྔ་པ་ལས།2ཚེ་དང་ལྡན་པ་བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་ཀྱི་རང་བཞིན་འོད་གསལ་བའོ། །ཞེས་དང་། དེ་ཉིད་ལས།3འདི་ལྟར་སེམས་ལ་སེམས་མ་མཆིས་པ་སྟེ། ཞེས་སོགས་ཀྱིས་བསྟན། དེ་དག་གིས་ངོ་བོ་སྟོང་པ་དང་། རང་བཞིན་གསལ་བ་ཡང་བསྟན། ཐུགས་རྗེ་ཀུན་ཁྱབ་ནི་གཙོ་བོ་འཁོར་ལོ་ཐ་མར་མཁྱེན་བརྩེ་ནུས་གསུམ་གྱི་བདག་ཉིད་བསྟན་པའི་སྐབས་སུ་བསྟན། དེ་ཡི་དགོངས་དོན་འཇམ་མགོན་མི་ཕམ་ཡབ་སྲས་རྣམས་ཀྱང་འདི་ལྟར་བཞེད་དེ། ལྟ་གྲུབ་ཤན་འབྱེད་ལས།4གནས་ལུགས་ཡེ་དག་སྙིང་པོའི་ཆོས། །ངོ་བོ་སྟོང་ལ་རང་བཞིན་གསལ། །ཐུགས་རྗེ་ཀུན་ཁྱབ་རང་བཞིན་ཏེ། །ཁྱད་ཆོས་གསུམ་གྱི་བདག་ཉིད་ཅན། །ཞེས་པ་ལྟར་ངོ་བོ་སྟོང་པ་འཁོར་ལོ་བར་བའི་དགོངས་དོན་དང་རང་བཞིན་གསལ་བ་འཁོར་ལོ་ཐ་མའི་དགོངས་དོན་གཉིས་ཟུང་འཇུག་ཡིན་པ་དང་། ཐུགས་རྗེ་ཀུན་ཁྱབ་བར་མཐའ་འགལ་མེད་དུ་བསྟན་པ་སོགས་འོག་ཏུ་འཆད་འགྱུར་དང་བཅས་སོ། །དེ་ལྟར་རིགས་ཀྱི་རྣམ་གཞག་བསྟན་པ་ལ་རིགས་ཀྱི་དོན་ནི། དྲི་མ་དང་བཅས་པའི་སེམས་ཀྱི་ཆོས་ཉིད་གང་ཞིག་ཆོས་སྐུ་དང་གཟུགས་སྐུ་མངོན་དུ་འགྱུར་རུང་གི་བྲལ་གཞི་ལ་རིགས་ཞེས་བྱ་སྟེེ། དེ་ཡང་གྲུབ་མཐའ་མཛོད་ལས།5དབྱིངས་རང་བཞིན་གྱི་རྣམ་པར་དག་པ་དོན་དམ་པའི་བདེན་པ་རང་བྱུང་གི་ཡེ་ཤེས་དེ་ནི། དྲི་མ་དང་བཅས་པའི་དུས་ན་རིགས་སམ་ཁམས་སམ་དེ་བཞིན་གཤེགས་པའི་སྙིང་པོ་ཞེས་བྱ་ལ། དྲི་མ་དང་བྲལ་བའི་ཚེེ་ན་བྱང་ཆུབ་བམ་དེ་བཞིན་གཤེགས་པ་ཞེས་བྱ་བའི་རང་བཞིན་སྟེ། ཞེས་དང་། རྒྱུད་བླ་མ་ལས།6སེམས་ཀྱི་རང་བཞིན་འོད་གསལ་གང་ཡིན་པ། །དེ་ནི་ནམ་མཁའ་བཞིན་དུ་འགྱུར་མེད་དེ། །ཞེས་དང་། སྡོང་པོ་བཀོད་པའི་མདོ་ལས།7ཀྱེ་རྒྱལ་བའི་སྲས་དག་བྱང་ཆུབ་སེམས་དཔའི་རིགས་ཞེས་བྱ་བ་འདི་ནི་ཆོས་ཀྱི་དབྱིངས་ལྷུར་ལེན་པ་ནམ་མཁའ་ལྟར་ཡངས་པ་རང་བཞིན་གྱིས་འོད་གསལ་བ་སྟེ། ཞེས་པ་དེ་དག་ནས་གསུངས་པ་ལྟར་རོ།།
རིགས་དེ་ལ་དབྱེ་སྒོ་དུ་མ་ཞིག་ཡོད་པ་ལས་འདིར་རྟེན་དང་བརྟེན་པའི་སྒོ་ནས་དབྱེ་ན་རང་བཞིན་གནས་རིགས་དང་རྒྱས་འགྱུར་གྱི་རིགས་གཉིས་ཏེ། གྲུབ་མཐའ་མཛོོད་ལས།8སྔར་བཤད་པའི་ཀུན་ཁྱབ་འོད་གསལ་བ་དེ་ནི་སྣང་སྟོང་གི་དབྱེ་བས་གཉིས་སུ་བཤད་དེ། ཞེས་གསུངས་སོ། །དེ་གཉིས་ལས་ངོ་བོ་ཉིད་སྐུའི་བྲལ་གཞིའི་རྟེན་ནམ་བྲལ་རུང་གི་ཆ་ལ་རང་བཞིན་གནས་རིགས་ཏེ། དེ་ཉིད་ལས།9དབྱིངས་སྟོང་པ་ནི་ཆོས་སྐུ་ངོ་བོ་ཉིད་སྐུའི་བྲལ་རྒྱུ་རྟེན་ཡིན་ལ། ཞེས་སོ། །ཡེ་ཤེས་ཆོས་སྐུ་བྲལ་གཞིའི་རྟེན་ནམ་བྲལ་རུང་གི་ཆ་ལ་རྒྱས་འགྱུར་ཀྱི་རིགས་ཏེ། དེ་ལ་ཡང་དབྱེ་ན་གཞིའི་དབང་དུ་བྱས་པ་དང་ལམ་གྱི་དབང་དུ་བྱས་པའི་རྒྱས་འགྱུར་རིགས་རྣམ་པ་གཉིས་ཏེ། དེེ་ཉིད་ལས།10ཡང་དག་པར་བླང་བའི་རིགས་ལ་གཞི་དང་ལམ་གྱི་དབྱེ་བས་རྣམ་པ་གཉིས་སུ་དབྱེ་སྟེ། ཞེས་སོ། །དེ་ཡང་དང་པོ་ནི་ཐེག་ཆེན་ལམ་མ་ཞུགས་ཀྱི་དྲི་བཅས་སེམས་ཀྱི་གནས་ལུགས་གང་ཞིག་རང་བཞིན་གསལ་ཆ་ནས་ཡེ་ཤེས་ཆོས་སྐུའམ་གཟུགས་སྐུའི་རྟེན་དུ་གྱུར་པའི་ཆ་ནས་བཞག་པ་སྟེ། དེ་ཉིད་ལས།11ཡེ་ཤེས་སྣང་བ་རང་འོད་མཚན་དཔེ་དང་བཅས་པ་ནི་བརྟེན་པ་གཟུགས་སྐུ་གཉིས་ཀྱི་བྲལ་རྒྱུར་གནས་པ་སྟེ། ཞེས་སོ། །གཉིས་པ་ནི་ཐེག་ཆེན་ལམ་ཞུགས་རྒྱུད་ཀྱི་དྲི་བཅས་སེམས་ཀྱི་གནས་ལུགས་དེའི་རང་བཞིན་གསལ་ཆ་ནས་གཟུགས་སྐུའི་རྟེན་དུ་གྱུར་བ་སྟེ། དེ་ཉིད་ལས།12ཞར་ལ་ལམ་སློབ་དུས་ལྟར་བཤད་ན། དབྱིངས་ཀྱི་རིགས་དེ་གཉིས་ཀ་རང་བཞིན་ལྷུན་གྲུབ་ཏུ་ཡོད་པས་རང་བཞིན་གྱི་རིགས་ཟེར་ཏེ་རྟེན་དུ་གནས་ལ། དེའི་སྟེང་དུ་སེམས་དང་པོ་བསྐྱེད་པ་ནས་བཟུང་སྟེ་ས་བཅུ་རྒྱུན་མཐའི་བར་གྱི་དགེ་རྩ་བསོད་ནམས་དང་ཡེ་ཤེས་ཀྱི་ཚོགས་གཉིས་ཀྱིས་བསྡུས་པ་ཐམས་ཅད་ཡང་དག་པར་བླངས་པའམ་རྒྱས་འགྱུར་གྱི་རིགས་ཞེེས་བྱ་སྟེ། ཞེས་གསུངས་སོ།།
དེ་ལྟར་འཇམ་མགོན་མི་ཕམ་པས་ཀྱང་བཞེད་དེ། རྒྱུད་བླའི་མཆན་འགྲེལ་ལས།13རྒྱས་འགྱུར་དེ་ཡང་དོན་གྱི་དབང་དུ་སྔར་མེད་གསར་དུ་ནི་མིན་ཏེ་ཁམས་ཀྱི་སྟེང་གི་དྲི་མ་ཅུང་ཟད་བསྲབ་པས་ཁམས་ཀྱི་བྱེད་པ་གསོ་ནུས་པའི་ལས་ཞིག་མངོན་སུམ་དུ་བྱུང་བ་ཡིན་ནོ། །ཞེས་སོ། །དེས་ན་མང་པོ་ཞིག་གིས་རྒྱས་འགྱུར་རིགས་དེ་ལམ་གྱི་ངོ་བོར་གྱུར་པའི་འདུས་བྱས་སུ་བཞེད་འདུག་སྟེ། ལུང་དེ་དག་ལ་གཞིགས་ན་རིགས་ཡིན་ནས་བཟུང་ཆོས་ཉིད་ཡིན་དགོས་པར་སྣང་ངོ་། །དེ་ལྟར་རིགས་ཀྱི་རྣམ་པར་གཞག་པ་དེ་ཡང་སྔ་འགྱུར་གྱི་ཐུན་མོང་མ་ཡིན་པ་ཡིན་པ་དང་། གཞུང་གཞན་དུ་དེ་ལྟར་འཆད་དུ་མེད་པ་ཡིན་ཏེ། དེ་ཉིད་ལས།14དེང་སང་ནི་གཞི་ལ་རིགས་དེ་གཉིས་མི་བརྩི་བར། གཞི་དེ་རང་བཞིན་དང་། ལམ་ནི་རྒྱས་འགྱུར་དུ་འཇོག་པ་ནི་དབྱིངས་མ་གོ་བའི་རྣམ་འགྱུར་དུ་སྣང་སྟེ། གཞི་ལ་སྣང་སྟོང་ལྷུན་གྲུབ་ཏུ་ཡོད་པ་དང་འགལ་བའི་ཕྱིར། ཞེས་གསུངས་སོ། །བཞེད་པ་དེ་དག་ཀྱང་བསྟན་བཅོས་ཀྱི་དགོངས་དོོན་ཡིན་ཏེ། རྒྱུད་བླ་མ་ལས།15གཏེར་དང་འབྲས་བུའི་ཤིང་བཞིན་དུ། །རིགས་དེ་རྣམ་གཉིས་ཤེས་བྱ་སྟེ། །ཐོག་མེད་རང་བཞིན་གནས་པ་དང་། །ཡང་དག་བླངས་པ་མཆོག་ཉིད་དོ། །རིགས་འདི་གཉིས་ལས་སངས་རྒྱས་ཀྱི། །སྐུ་གསུམ་ཐོབ་པར་འདོད་པ་ཡིན། །དང་པོའི་སྐུ་ནི་དང་པོ་སྟེ། །གཉིས་པ་ཡིས་ནི་ཕྱི་མ་གཉིས། །ངོ་བོ་ཉིད་སྐུ་མཛེས་པ་དང་། །རིན་ཆེན་སྐུ་འདྲར་ཤེས་བྱ་སྟེ། །རང་བཞིན་གྱིིས་ནི་བྱས་མིན་དང། །ཡོན་ཏན་རིན་ཆེན་གཏེར་ཡིན་ཕྱིར། །ཆོས་ཆེན་རྒྱལ་སྲིད་ཆེ་ལྡན་ཕྱིར། །རྫོགས་ལོངས་འཁོར་ལོས་སྒྱུར་བཞིན་ནོ། །གཟུགས་བརྙན་གྱིས་ནི་རང་བཞིན་ཕྱིར། །སྤྲུལ་པ་གསེར་གྱི་གཟུགས་ལྟ་བུ། །ཞེས་གསུངས་པའི་དོན་དེ་དག་ཇི་བཞིན་ནོ།།
གཉིས་པ་དེ་ལ་དོགས་པ་སྤོང་བ།
ཡང་ཁ་ཅིག་གིས་སྟོང་ཐུན་ལས།16འོ་ན་ཁྱོད་ཀྱི་སྔར་གཞན་ལ་བརྗོད་པ་ལྟར་དེ་བཞིན་ཉིད་དུ་དབྱེར་མེེད་པ་ཙམ་གྱིས་རིགས་ཡོད་པར་འགྲུབ་ན། ས་རྡོ་སོགས་ལའང་རིགས་ཡོད་པར་ཐལ་ལོ་སྙམ་ན། རིགས་ཞེས་བྱ་བ་ནི་འཁྲུལ་བའི་སེམས་ཀྱིས་དབང་གིས་བྱུང་བའི་སྒྲིབ་གཉིས་ཟད་པར་སྤངས་ནས་ཤེས་བྱའི་རང་བཞིན་ལ་མ་འཁྲུལ་བའི་བློ་རྒྱས་པའི་སངས་རྒྱས་ཀྱི་རྒྱུ་སྐྱོན་མེད་ལ་འཇོག་དགོས་ན། དེ་སེམས་མ་ཡིན་པས་ས་རྡོ་སོགས་བེམ་པོ་ལ་ལམ་སྒྲུབ་པ་མེད་པས་ཐ་སྙད་དུ་དེ་བཞིན་ཉིད་དང་དབྱེར་མེད་ན་ཡང་དེ་ལ་རིགས་ཡོད་པར་འཇོག་མི་དགོས་ཏེ། ཞེས་པའི་ལུང་དེ་རྒྱུ་མཚན་དུ་བྱས་ནས་རིགས་ནི་རྒྱུད་ཀྱིས་བསྡུས་པའི་སེེམས་ཀྱི་སྟེང་གི་ཆོས་ཉིད་ཡིན་དགོས་པ་དང་། རྒྱུད་ཀྱིས་མ་བསྡུས་པའི་ཆོས་ཅན་སྟེང་གི་ཆོས་ཉིད་ལ་རིགས་སུ་མི་འདོད་མཁན་དུ་མ་ཞིག་སྣང་ཡང་། ཁོ་བོས་བསམས་ན་ཆོས་ཉིད་ཡིན་ནས་བཟུང་རིགས་ཡིན་པའི་ཁྱབ་སྟེ། སེམས་ཀྱི་སྟེང་གི་ཆོས་ཉིད་དེ་ཁྱད་ཆོས་གསུམ་ལྡན་གྱི་ཆོས་ཉིད་ཡིན་པ་གང་དེ་དང་རི་ར་བ་ཁང་ཁྱིམ་ལ་སོགས་པའི་ཆོས་ཅན་དེ་དག་གི་སྟེང་གི་ཆོས་ཉིད་གཉིས་རྒྱ་ཆད་ཕྱོགས་ལྷུང་དང་བྲལ་བའི་ཕྱིར། གཞན་དུ་སེམས་ཀྱི་སྟེང་གི་ཆོས་ཉིད་དེ་ལ་ཁྱད་ཆོས་གསུམ་པོ་དེ་ལྡན་པ་དང་། རི་ར་བ་ལ་སོགས་པའི་ཆོས་ཅན་དེ་དག་གི་སྟེང་གི་ཆོས་ཉིད་ལ་ཁྱད་ཆོས་དེ་མི་ལྡན་ན་ཆོས་ཉིད་དེ་གཉིས་ཀྱི་ངོ་བོའི་ཆ་ནས་རྒྱ་གང་དུ་ཆད་པ་དང་ཕྱོགས་གང་དུ་ལྷུང་བས་སེམས་ཀྱི་ཆོས་ཉིད་དེ་རྒྱ་ཆད་ཕྱོགས་ལྷུང་བྲལ་བ་མིན་པར་ཐལ་བའི་ཕྱིར། དེས་ན་ཆོས་ཉིད་ལ་རྒྱ་ཆད་ཕྱོགས་ལྷུང་དང་བྲལ་བ་ཡིན་དགོས་པ་དེ་ཡང་མི་ཕམ་པས། ངེས་ཤེས་སྒྲོན་མེ་ལས།17རྒྱ་ཆད་ཕྱོགས་ལྷུང་བྲལ་བ་ཡི། །ཟུང་འཇུག་ཁོ་ནའི་གྲུབ་མཐའ་སྐྱོང་། །ཞེས་སྣང་སྟོང་ཡ་བྲལ་མ་ཡིན་པ་དང་སྟོང་པ་དེ་ཡང་སྟོང་པ་གཞན་ཞིག་དང་དོན་ལ་དབྱེར་མེད་པས་ཆོས་ཉིད་ལ་རྒྱ་ཆད་ཕྱོགས་ལྷུང་དང་བྲལ་བ་ཡིན་པས་ཁྱབ་པར་བཞེད་འདུག་གོ།
འོ་ན་སྟོང་ཐུན་ལས་དེ་ལ་རིགས་ཡོད་པར་འཇོག་མི་དགོས་ཏེ་ཞེས་རིགས་སུ་མི་འཇོག་ཅེས་པའི་དོན་ནི། རི་ར་བ་ལ་སོགས་པ་དེ་དག་གི་སྟེང་གི་ཆོས་ཉིད་དེ་རིགས་ཡིན་ཡང་རྟེན་སྟོང་གཞི་ཆོས་ཅན་དེ་དག་ལ་བརྟེན་ནས་རིགས་སུ་མི་འཇོག་ཞེས་པའི་དོན་ནོ། །རྟེན་སྟོང་གཞི་ཆོས་ཅན་དེ་དག་ལ་བརྟེན་ནས་རིགས་སུ་མི་འཇོག་པའི་རྒྱུ་མཚན་ཡང་གོང་དུ་དྲངས་པའི་སྟོང་ཐུན་གྱི་ལུང་ལས་དེ་དག་ལ་ལམ་སྒྲུབ་པ་མེད་པ་དང་། དྲི་མ་གློ་བུར་བ་བྲལ་རུང་དང་། འཚང་རྒྱ་རུང་དང་རྒྱ་ངེས་གང་ཡང་མ་ཡིན་པའི་རྒྱུ་མཚན་ཡིན་པར་བཞེད་པར་སྣང་ངོ་། །དེེས་ན་འཇམ་མགོན་མི་ཕམ་པས་རིགས་སུ་མི་འཇོག་གསུངས་པ་ལས་རིགས་མིན་ཞེས་མ་གསུངས་པ་དེ་ཡང་གོ་རྒྱུ་རྣལ་མ་ཞིག་ཡོད་པར་དཔོག་ཐུབ་བོ། །དེས་ན་ཆོས་ཉིད་ལ་རིགས་ཀྱིས་ཁྱབ་པར་སྐད་གསང་མཐོན་པོས་སྒྲོག་གོ།
གསུམ་པ་བཀའ་བར་མཐའ་འགལ་མེད་གནད་ཀྱིས་ཆོས་ཉིད་ལ་རིགས་ཀྱིས་ཁྱབ་པར་བསྟན་པ།
བཀའ་བར་བའི་བསྟན་བྱ་གཙོོ་བོར་དངོས་བསྟན་སྟོང་པ་ཉིད་དང་ཐ་མའི་བསྟན་བྱ་གཙོ་བོར་རང་བཞིན་གསལ་ཆ་དེ་གཉིས་ཟུང་དུ་འཇུག་དགོས་ཏེ། འཁོར་ལོ་བར་པའི་བསྟན་བྱ་དེའི་མཐར་སྟོོང་གཞི་ཆོས་ཅན་དྲི་བཅས་སེམས་ཙམ་མ་བཞག་ནས་ཆོས་ཅན་ཐམས་ཅད་ཀྱི་སྟེང་གི་སྟོང་པ་ཉིད་གཏན་ལ་ཕབ། སྟོང་གཞི་ཆོས་ཅན་དེ་དག་གི་སྟེང་གི་སྟོང་ཉིད་དང་ཐ་མ་ནས་བསྟན་པའི་སྣང་ཆ་འོད་གསལ་བ་དེ་གཉིས་ཟུང་འཇུག་དབྱེར་མེད་ཡིན་པས་ཆོས་ཉིད་ལ་རིགས་ཀྱིས་ཁྱབ་པ་དང་འོད་གསལ་བས་ཁྱབ་པར་འདོད་དགོས་སོ། །དེ་ལྟར་བཀའ་བར་མཐའི་བསྟན་བྱ་དེ་གཉིས་ཟུང་དུ་འཇུག་དགོས་པ་དེ་ཡང་། སྟོང་ཐུན་ལས།18 དེས་ན་འཁོར་ལོ་བར་པ་ནས་བསྟན་པའི་སྟོང་པ་ཉིད་དང་ཐ་མར་བསྟན་པའི་སྐུ་དང་ཡེ་ཤེས་དག་སྣང་སྟོང་ཟུང་དུ་ཆུད་པར་བྱ་དགོས་པས། འཁོར་ལོ་བར་པ་དང་ཐ་མའི་ངེས་དོན་ཀྱི་སྐོར་རྣམས་དབྱེ་གསལ་མེད་པར་གཉིས་ཀ་ངེས་དོན་དུ་ཀུན་མཁྱེན་ཀློང་ཆེན་རབ་འབྱམས་ཀྱི་བཞེད་པ་འདི་ཁོ་ན་ལྟར་གཟུང་བར་བྱ་སྟེ། ཞེས་དང་།
བཀའ་འཁོར་ལོ་བར་མཐའ་གཉིས་ནས་བསྟན་པའི་བརྗོད་བྱ་ངོ་བོ་སྟོང་པ་དང་རང་བཞིན་གསལ་བ་གཉིས་ཟུང་འཇུག་ཡིན་པའི་གནད་ཀྱིས་བཀའ་བར་མཐའི་དགོངས་འགྲེལ་བསྟན་བཅོས་རྣམས་ཀྱང་འགལ་མེད་ཡིན་ཏེ། ལྟ་གྲུབ་ཤན་འབྱེད་ལས།19ཐལ་འགྱུུར་གཞུང་དུ་བདེན་གཉིས་ཀྱི། །རབ་དབྱེ་གཉིས་ཀ་འགལ་མེད་བཞེད། །དེ་ཕྱིར་ཟླ་བའི་གཞུང་དང་ནི། །རྒྱལ་ཚབ་མཆོག་གི་རྒྱུད་བླའི་གཞུང་། །གཉིས་ཀ་ཐེག་ཆེན་ཐལ་འགྱུར་པའི། །གཞུང་དུ་འགལ་མེད་གནད་གཅིག་ལགས། །ཞེས་དང་། ངེས་ཤེས་སྒྲོན་མེ་ལས།20 དེས་ན་ཚུལ་འདི་ལེགས་རྟོགས་ན། །ཀླུུ་སྒྲུབ་ལུགས་དང་བྱམས་པའི་གཞུང་། །ཕན་ཚུན་བུ་རམ་སྦྲང་རྩི་བཞིན། །ལྷན་ཅིག་ཡིིད་གས་བདེར་འཇུ་ཡིས། །གཞན་དུ་མི་འཕྲོད་ཟས་བཞིན་དུ། །ཞེས་གསུངས་སོ། །དེས་ན་བཀའ་འཁོར་ལོ་བར་མཐའ་གཉིས་ཀ་ཡང་འགལ་མེད་ཡིན་ཏེ། ལྟ་གྲུབ་ཤན་འབྱེད་ལས།21འཁོར་ལོ་བར་མཐའ་འགལ་མེད་མཆོག། །སྣང་སྟོང་ཟུང་འཇུག་སྙིང་པོའི་ཁམས། །སེམས་ཉིད་དག་དང་མ་དག་ལས། །ཐུགས་རྗེ་རྟེན་འབྱུང་ཆེན་པོར་གནས། །ཞེེས་སོགས་སྐབས་དུ་མར་གསུངས་པ་དང་། གཞན་ཡང་སྟོང་ཐུན་ལས།22 དེ་གཉིས་གཅིག་ངེས་དོན་དུ་བྱས་ན་གཅིག་དྲང་དོན་བྱ་དགོས་པའི་འགལ་བ་མེད་པ་མ་ཟད། ཟུང་དུ་ཚོགས་པར་བྱས་ནས་བདེ་གཤེགས་སྙིང་པོ་དེ་ལྟ་བུ་ལ། ཞེས་སོགས་གསུངས་པ་དང་། དེས་ན་བཀའ་བར་བ་ནས་བསྟན་པའི་སྟོང་གཞི་ཆོན་ཅན་སེམས་དང་རི་ར་བ་ལ་སོགས་པའི་སྟོང་ཉིད་དེ་ཐ་མའི་རང་བཞིན་གསལ་ཆ་གཉིས་ཟུང་འཇུག་ཡིན་པའི་ཕྱིར། རྒྱ་ཆད་ཕྱོགས་ལྷུང་དང་བྲལ་བའི་སྟོང་ཉིད་ཡིན་པའི་ཕྱིར། སྟོང་གཞི་ཆོས་ཅན་རི་ར་བ་ལ་སོགས་པ་དབྱེ་བ་ཙམ་ལས་དོན་ལ་དེ་དག་གི་སྟེང་གི་སྟོང་ཉིད་ལ་དབྱེར་མེད་ཡིན་པའི་ཕྱིར་ཏེ། སྟོང་ཐུན་ལས།23དེ་ལྟར་ཡིན་པར་རྒྱལ་ཚབ་སེམས་དཔའ་ཆེན་པོས་རྒྱུད་བླ་མ་ལས་གསུངས་པ་དང་། དཔལ་མགོན་འཕགས་པ་ཀླུ་སྒྲུབ་ཀྱིས་ཀྱང་ཆོས་དབྱིངས་བསྟོད་པར་གསལ་པོར་གསུངས་པའི་ཕྱིར་གཞུང་དེ་དག་གི་རྗེས་སུ་འབྲངས་ནས་རང་ལུགས་ཆོས་དབྱིངས་འདུས་མ་བྱས་པ་རིགས་སུ་འདོད་ཅིང་། དབྱིངས་དེ་ཉིད་ཆོས་ཐམས་ཅད་ཀྱི་གནས་ལུགས་ཡིན་ལ་དེའི་ངོ་བོ་སྐྱེ་འགག་མེད་པ་དང་། སྣང་སྟོང་དབྱེར་མེད་ཡིན་པའི་བདག་ཉིད་དུ་གནས་ཀྱི་ཕྱོགས་སུ་ལྷུང་བ་མེད་པ་ཡིན་ནོ། །ཞེས་གསུངས་སོ། །དེ་ལྟར་དབུ་མ་བཞི་བརྒྱ་པ་ལས།24གཅིག་གི་སྟོང་ཉིད་གང་ཡིན་པ། །དེ་ནི་ཀུན་གྱི་སྟོང་པ་ཉིད། །ཅེས་དང་། མངོན་རྟོགས་རྒྱན་ལས།25ཆོས་ཀྱི་དབྱིངས་ལ་དབྱེར་མེད་ཕྱིར། །རིགས་ནི་ཐ་དད་ཡོད་མ་ཡིན། །ཞེས་པ་རྣམས་ཀྱིས་སེམས་ཀྱི་ཆོས་ཉིད་དང་རི་ར་བ་ལ་སོགས་པའི་ཆོས་ཉིད་དེ་དག་རྟེན་སྟོང་གཞིའི་སྒོ་ནས་དབྱེ་བ་བཞག་པ་ཙམ་ལས་ཆོས་ཉིད་ལ་དབྱེ་བ་མེད་པས་ན་ཆོས་ཉིད་ལ་རིགས་ཀྱིས་ཁྱབ་པར་ཤིན་ཏུ་ནས་ཀྱང་འཐད་པ་ཉིད་དོ།།
བཞི་པ་དེ་དག་གི་འཐད་པ་མདོ་ཙམ་འགོད་པ།
དེ་ལྟར་སྙིང་པོ་བསྟན་པའི་མདོ་བཅུ་ནས་བསྟན་པའི་སེམས་ཅན་གྱི་རྒྱུད་ཀྱི་རིགས་ལ་སངས་རྒྱས་ཀྱི་ཡོན་ཏན་ཡེ་ནས་རང་ཆས་སུ་ཡོད་པར་གསུངས་པ་སོགས་དེ་དག་ཁ་ཅིག་གིས་དྲང་དོན་དུ་འདོད་པ་ལ་བརྟེན་ནས་སེམས་ཅན་གྱི་རྒྱུད་ལ་རིགས་ཡོད་པ་དེ་ཡང་དྲང་དོན་ལས་ངེེས་དོན་མིན་པར་བཞེད་དེ། དེ་ཡང་སེམས་ཅན་གྱི་རྒྱུད་ན་རིགས་མེད་ན་ཡང་ལམ་བསྒོམས་པས་སྒྲིབ་པ་སྤོང་བའི་གཉེན་པོོ་བསྟེན་ནས་མ་འོངས་པར་སངས་རྒྱས་པ་དེ་ཡི་ཚེ་མཚན་བཟང་སོ་གཉིས་སོགས་ཡོན་ཏན་ལྡན་པར་བཞེད་ཀྱང་། ཀླུ་སྒྲུབ་ཀྱིས་ཆོས་དབྱིངས་བསྟོད་པ་དང་བྱམས་པས་རྒྱུད་བླ་ནས་གསུངས་པ་བཞིན་དུ་རང་ལུགས་མདོ་དེ་དག་ངེས་དོན་མཐར་ཐུག་པར་འདོད་པ་དང་། སེམས་ཅན་གྱི་སྐབས་ན་རིགས་ཁམས་དེ་བར་གཤེགས་པའི་སྙིང་པོོར་སངས་རྒྱས་ཀྱི་སྐུ་དང་ཡེ་ཤེས་ཀྱི་ཡོན་ཏན་ཐམས་ཅད་ཡེ་ནས་འདུ་བྲལ་མེད་པར་རང་ཆས་ལྷུན་གྲུབ་ཏུ་ཡོད་པར་བཞེད་དེ། གོང་དུ་དྲངས་པའི་སྟོང་ཐུན་གྱི་ལུང་ལས་འཁོར་ལོ་བར་པ་དང་ཐ་མའི་ངེས་དོན་གྱི་སྐོར་རྣམས་དབྱེ་གསལ་མེད་པར་གཉིས་ཀ་ངེས་དོན་དུ་ཀུན་མཁྱེན་ཀློང་ཆེན་རབ་འབྱམས་ཀྱི་བཞེད་པ་འདི་ཁོ་ན་ལྟར་བཟུང་བར་བྱ་སྟེ། ཞེས་གསུངས་པ་ལྟར་དང་། ཆོས་དབྱིངས་བསྟོད་པ་ལས། སྟོང་པ་ཉིད་ནི་སྟོན་པའི་མདོ། །རྒྱལ་བས་ཇི་སྙེད་གསུངས་པ་སྟེ། །དེ་དག་ཀུན་གྱི་ཉོན་མོངས་ལྡོག། །ཁམས་དེ་ཉམས་པར་བྱས་མ་ཡིན། །ཞེས་གསུངས་པ་ལྟར་རོ།།
ལྔ་པ་དེ་ཡི་གནད་ཀྱིས་མཐར་ཐུག་ཐེག་པ་གཅིག་ཏུ་སྒྲུབ་པ།
དེ་ལྟར་བདེེ་གཤེགས་སྙིང་པོ་སེམས་ཅན་ཐམས་ཅད་ལ་ཡོད་པར་སྒྲུབ་པའི་རིགས་པ་འདིས་ཐར་པ་དང་ཐེག་པ་གཅིག་ཏུ་བསྒྲུབ་སྟེ། སྒྲིབ་པ་གཉིས་ཀ་སྤོང་བའི་གཉེན་པོ་སྤྲོས་པའི་མཐའ་ཐམས་ཅད་དང་བྲལ་བའི་རང་བཞིན་གནས་རིགས་སམ་ཆོས་ཉིད་ཚུལ་བཞིན་རྟོགས་པའི་བློ་དེ་ཉིད་ཐར་པ་འཐོབ་བྱེད་ཀྱི་ལམ་ཡང་དག་ཡིན་པའི་ཕྱིར། དེ་ལས་གཞན་དུ་ཐེག་པ་དམན་པ་རང་ལམ་ལ་བརྟེན་ནས་ཐར་པ་དང་ཐམས་ཅད་མཁྱེན་པ་འཐོབ་བྱེད་ཀྱི་ལམ་མེད་པས་སོ། །གལ་ཏེ་དེ་ལྟར་མ་ཡིན་ན་ཉན་རང་རྣམས་རང་ལམ་ཁོ་ན་ལ་བརྟེན་ནས་རྣམ་མཁྱེན་འཐོབ་རྒྱུ་ཡོད་པར་ཐལ་བ་དང་། དེ་དག་ལ་སྒྲིབ་པ་གཉིས་ཀ་སྤོང་བའི་གཉེན་པོ་ཡོད་པར་ཐལ་བས་དེས་ན་མཐར་ཐུག་ཐེག་པ་གཅིག་ཏུ་སྒྲུབ་ཀྱི་གཞན་ཉན་རང་རྣམས་དེ་ལས་ལྡོག་པའོ། །དེ་སྒྲུབ་པ་ལ་ལུང་རིགས་གཉིས་ལས་དང་པོ་རིགས་པ་ནི་རྣམ་པ་ལྔ་སྟེ། འཚང་རྒྱ་རུང་ཙམ་ལས་རྒྱ་ངེས་སུ་བསྒྲུབ་པ་དེ་ཙམ་གསལ་པོོར་མི་སྣང་བས་འདིར་བསྒྲུབ་པར་བྱ་སྟེ། དེ་ཡང་སེམས་ཅན་གྱི་རྒྱུད་ན་བདེ་གཤེགས་སྙིང་པོ་ཡོད་པའི་ཕྱིར། གློ་བུར་གྱི་དྲི་མ་གནས་ལུགས་ཀྱི་གཤིས་ལ་མ་ཞུགས་པས་སྣང་ཚུལ་འདུ་འབྲལ་རུང་བ་ཡིན་པས་ཡོན་ཏན་ཡེ་ལྡན་གྱི་ཆོས་སྐུ་ཀུན་ལ་ཁྱད་མེད་པའི་ཕྱིར། སེམས་གསལ་རིག་གི་ཆ་ལ་ཕྱི་མཐར་ཐུག་པ་མེད་པའི་ཕྱིར། རིགས་ཀྱི་ནུས་པ་ཆུད་མི་ཟ་བ་ཡིན་པས་དེ་ལ་སངས་རྒྱས་ཀྱི་ཕྲིན་ལས་འཇུག་པ་རྒྱུན་ཆད་མེད་པའི་ཕྱིར། སྒྲིབ་པ་གཉིས་ཀ་སྤོང་བའི་གཉེན་པོ་མཐའ་ཐམས་ཅད་དང་བྲལ་བའི་ཆོས་ཉིད་རྟོགས་པའི་ཤེས་རབ་དེ་གཅིག་པུ་ཡིན་པའི་ཕྱིར། འདི་ལ་དང་པོ་གཉིས་ཀྱི་འཚང་རྒྱ་རུང་ཙམ་དང་བར་བ་གཉིས་ཀྱིས་སེམས་ཅན་རྣམས་འཚང་རྒྱ་ངེས་སུ་བསྒྲུབ་པ་དང་། ཐ་མས་མཐར་ཐུག་ཐེག་པ་གཅིག་ཏུ་བསྒྲུབ་པ་ཡིན་ནོ།།
རིགས་པ་དེ་དག་བསྟན་པའི་ཁུངས་ནི། རིགས་པ་དང་པོ་གཉིས་ནི་རྒྱུད་བླའི་རིགས་བསྟན་པའི་རྩ་ཚིག་བར་མཐའ་གཉིས་ཀྱིས་བསྟན། གསུམ་པ་ནི། ཚད་མ་རྣམ་འགྲེལ་ལས།26 གང་ཕྱིར་རིགས་མཐུན་སྔ་མ་ཡི། །ས་བོན་ལས་ནི་འཕེལ་བ་ཅན། །བརྩེ་བ་ལ་སོགས་བློ་དེ་དག། །གོམས་པར་གྱུར་ན་གང་ན་གནས། །ཞེས་པས་བརྩེ་བ་ཐུགས་རྗེ་ཆེན་པོ་ཡང་ནས་ཡང་དུ་གོམས་པས་གསལ་རིག་གི་ཆ་དེ་ཇེ་བས་ཇེ་ཆེར་འཕེལ་ནས་ཚད་མེད་པའམ་ཕྱི་མཐའ་ཐུག་མེད་དུ་བསྟན། གཞན་ཡང་དེ་ཉིད་ལས།27སྒྲུབ་བྱེད་ཐུགས་རྗེས་གོམས་ལས་དེ། །ཞེས་སོགས་སྐྱེ་བ་སྔ་ཕྱི་སྒྲུབ་བྱེད་ཀྱི་རིགས་པ་སོགས་ཀྱིས་གསལ་རིག་གི་ཆ་དེ་ཉིད་ཡ་མཐའ་དང་མ་མཐའ་ཐུག་མེད་དུ་ངེས་པའི་སྒོ་ནས་གོམས་པ་ལ་མཐའ་མེད་དུ་འཕེལ་མི་རུང་བའི་ལོག་རྟོག་རྣམས་བཀག་པའོ།།
བཞི་པ་ནི་རིགས་ཡོད་པར་སྒྲུབ་པའི་རྩ་ཚིག་གསུམ་གྱིས་དངོས་སུ་མ་བསྟན་ཀྱང་ཤུགས་ལ་བསྟན་ཏེ། སྟོང་ཐུན་ལས།28 རིགས་དེ་འཚང་རྒྱ་བ་ལ་ནམ་ཡང་ཆུད་ཟ་བ་མི་སྲིད་པའི་གནད་ཀྱིས་སོ། །ཞེས་དང། ལྔ་པ་ནི་དབུ་མ་ལ་འཇུག་པ་ལས།29 གང་ཕྱིར་འདི་ན་དེ་ཉིད་ཤེས་ལས་དྲི་མ་མཐའ་དག་སེལ་བ་ནི། །ལྷུར་བྱེད་གཞན་མེད་ཅེས་པས་བསྟན། འོ་ན་རིགས་ཀྱི་ནུས་པ་ཆུད་མི་ཟ་བ་ཞེས་པ་ཇི་ལྟར་ཡིན་ཞེ་ན། སངས་རྒྱས་ཀྱི་ཕྲིན་ལས་སེམས་ཅན་ལ་འཇུག་པ་དང་དེ་ལྷུན་གྲུབ་ཡིན་པས་འཇུག་པ་ལ་བར་དུ་གཅོད་པའི་བགེགས་མེད་པའི་ཕྱིར་རོ། །ཞེས་གསུངས་སོ། །རིགས་པ་ལྔ་པོ་དེ་དག་ཀྱང་རྫོགས་སངས་སྐུ་ནི་འཕྲོ་བའི་ཕྱིར་ཞེས་པའི་རིགས་པ་དེ་དག་གི་ནང་དུ་འདུ་བ་དང་། རྩ་བའི་ཚིག་རྐང་གསུམ་པོ་དེ་དག་ལས་དང་པོ་འགྲེལ་སྟངས་གཉིས་ལས་དང་པོ་ཡོན་ཏན་ཡེ་ལྡན་གྱི་རིགས་ཕྱིས་འཚང་རྒྱ་བའི་ཚེ་འཕྲོ་བ་དང་། ཡང་ན་སངས་རྒྱས་ཀྱི་ཐུགས་རྗེ་དང་ཕྲིན་ལས་རྣམས་སེམས་ཅན་ལ་འཇུག་པ་དང་སངས་རྒྱས་པའི་འཇུག་པ་དེ་ཡང་རྒྱུན་མ་ཆད་པར་འཇུག་པ་སྟེ། གནས་སྐབས་སེམས་ཅན་གྱི་སྐབས་གློ་བུར་གྱི་དྲི་མ་དང་བཅས་ན་ཡང་། རང་བཞིན་ལ་དྲི་མ་མ་ཞུགས་པས་སངས་རྒྱས་ཀྱི་ཐུགས་རྗེ་དང་ཕྲིན་ལས་ལྷུན་གྲུབ་ཏུ་འཇུག་པ་དང་། དྲི་མ་དེ་སེམས་ཀྱི་རང་བཞིན་ལ་ཞུགས་ན་སངས་རྒྱས་ཀྱི་ཕྲིན་ལས་འཇུག་པ་ལ་བར་དུ་གཅོད་བྱེད་ཡོད་པས་མི་འཇུག་པ་དང་། འཇུག་ན་ཡང་དོན་མེད་པར་ཐལ་བས་ན་དྲི་མ་དེ་སེམས་ཀྱི་རང་བཞིན་ལ་ཞུགས་པ་མེད་པས་ཕྲིན་ལས་འཇུག་པ་དེ་དོན་དང་ལྡན་པ་ཡིན་ནོ།།
གཉིས་པས་ནི་སེམས་ཅན་དང་སངས་རྒྱས་ཀྱི་རྒྱུད་ཀྱི་དྲི་མ་དང་བཅས་མ་བཅས་རང་བཞིན་ལ་གློ་བུར་གྱི་དྲི་མ་མ་ཞུགས་པར་མཚུངས་པས་དེ་གཉིས་དབྱེར་མེད་ཡིན་པའི་ཕྱིར། འཁོར་བ་དང་མྱང་འདས་སེམས་ཅན་དང་སངས་རྒྱས་དབྱེར་མེད་དེ་ཆོས་སྐུ་སྟོང་པ་ཆེན་པོར་རོ་གཅིག་པས་སེམས་ཅན་སངས་རྒྱས་ཞེས་འཇོག་པ་དེ་སྣང་ཚུལ་ལ་མ་དག་འཁྲུལ་སྣང་ཙམ་ལས་དོན་དམ་པར་དབྱེར་མེད་སྟོང་པ་ཉིད་དུ་རོ་གཅིག་གོ །གསུམ་པས་དྲི་མ་དང་བཅས་མ་བཅས་ཀྱི་དེ་བཞིན་ཉིད་གཉིས་གནས་ཚུལ་དུ་དབྱེར་མེད་པས་སངས་རྒྱས་ཀྱི་ཕྲིན་ལས་འཇུག་པ་དེ་བར་མ་ཆད་པར་ལྷུན་གྲུབ་ཏུ་འཇུག་པར་བསྒྲུབས་ན་ད་དུང་བསྒྲུབ་མི་ཐུབ་པས་སེམས་ཅན་སངས་རྒྱས་ཀྱི་ནུས་པ་རང་ཆས་སུ་ཡོད་པར་བསྒྲུབས་ཏེ། སེམས་ཅན་གྱི་རྒྱུད་ལ་རིགས་ཡོད་པར་བསྟན་པ་ཡིན་ནོ། །དེ་དག་གིས་ཕྲིན་ལས་འཇུག་པ་དང་འཇུག་པ་དེ་ཡང་བར་དུ་གཅོད་པའི་བགེགས་མེད་པ་དང་། སངས་རྒྱས་ཀྱི་ནུས་པ་ཡོད་པར་སྒྲུབ་པ་དང་། སེམས་ཅན་འཚང་རྒྱ་ངེས་སུ་བསྒྲུབ་པ་ཡིན་ནོ། །འཚང་རྒྱ་ངེས་ཀྱི་རྒྱུ་ཚང་བ་ན་ལྡོག་མེད་དུ་འཚང་རྒྱ་ངེས་ཏེ། རྒྱུ་ཚང་བའི་ཕྱིར། དེ་ལྟར་དགོས་པ་ཡང་ཚད་མ་རྣམ་འགྲེལ་ལས།30མ་ཚང་མེད་རྒྱུ་དེ་ལ་ནི། །འབྲས་བུ་གང་གིས་ལྡོག་པར་འགྱུར། །ཞེས་པ་བཞིན་ནོ། །དེས་ན་མ་ཚང་བ་མེེད་པའི་རྒྱུ་ཚོགས་ན་འབྲས་བུ་སྐྱེད་པའི་བྱ་བ་ཡང་བྱེད་དེ། དོན་རྣམ་ངེས་ལས།31རྒྱུ་ཡི་ཚོགས་པ་ཚང་བས་ནི། །འབྲས་བུ་སྐྱེད་པའི་བྱ་བ་བྱེད། །ཅེས་གསུངས་པ་བཞིན་དེས་ན་རྒྱུ་མ་ཚང་མེད་ན་འབྲས་བུ་འབྱིན་ངེས་སུ་ཡིན་པར་དཔོག་ཐུབ་པས་སེམས་ཅན་རྣམས་འཚང་རྒྱ་ངེས་སུ་བསྒྲུབས་པ་ཡིན་ནོ། །དེ་ལྟར་སྟོང་ཐུན་ལས།32འདིར་རྒྱུ་ཡོད་པ་ཙམ་གྱིས་འབྲས་བུ་འབྱིན་པར་དཔོག་པ་ཙམ་མིན་ཏེ། ཆོས་ཉིད་དེ་བཞིན་ཉིད་ཀྱི་རིགས་ལ་འགྱུར་བ་མེད་པ་དང་། དེ་འབྲས་བུ་དང་ངོ་བོ་ལ་བཟང་ངན་མེད་པ་དང་། གློ་བུར་གྱི་དྲི་མ་རྣམས་ཡུན་ཇི་ལྟར་རིང་ཡང་འབྲལ་རུང་ཡིན་པས་རིགས་དེ་སངས་རྒྱས་པ་ལ་ནམ་ཡང་ཆུད་ཟ་བ་མི་སྲིད་པའི་གནད་ཀྱིས་སོ། །ཞེས་གསུངས་པ་ལྟར་རོ།།
འོ་ན་འདི་དག་རྒྱུ་ཚོོགས་གྲངས་ཚང་གི་འབྲས་རྟགས་ཡང་དག་དང་མཚུངས་སོ་ཞེ་ན་མི་མཚུངས་ཏེ། དེ་ལ་བར་དུ་གཅོད་པའི་གེགས་ཡོད་པས་སྐྱེ་རུང་ཙམ་ལས་སྐྱེ་ངེས་སུ་མི་འགྲུབ་པ་དང་། འདིར་སེམས་ཅན་རྣམས་འཚང་རྒྱ་ངེས་ཡིན་ཏེ་འཚང་རྒྱ་བ་ལ་བར་དུ་གཅོད་པའི་གེགས་མེེད་པར་སངས་རྒྱས་ཀྱི་ཐུགས་རྗེ་ཕྲིན་ལས་ལྷུན་གྲུབ་ཏུ་འཇུག་པའི་ཕྱིར་རོ། །ལུང་རིགས་དེ་དག་གིས་སེམས་ཅན་རྣམས་འཚང་རྒྱ་ངེས་བསྒྲུབ་མི་ཐུབ་ན། ཕྱིར་མི་ལྡོག་པའི་རྟགས་ཐོབ་པའི་སེམས་དཔའ་རྣམས་ཀྱང་བྱང་ཆུབ་འཐོབ་ངེེས་ཇི་ལྟར་སྒྲུབ། སེམས་ཅན་ལ་གློ་བུར་གྱི་དྲི་མས་བཅིངས་སོ་ཞེ་ན་དེ་དག་ཀྱང་དྲི་མ་མཐའ་དག་མ་སྤངས་པས་མཚུངས་པའི་ཕྱིར། དེ་ལྟར་རིགས་པ་ལྔ་དང་ཡང་ན་གསུམ་པོ་དེ་དག་གིས་སེམས་ཅན་འཚང་རྒྱ་རུང་དང་རྒྱ་ངེས་སུ་བསྒྲུབ་པའི་གནད་ཀྱིས་རིགས་པ་དེ་དག་གིས་མཐར་ཐུག་ཐར་བ་དང་ཐེག་པ་གཅིག་ཏུ་བསྒྲུབས་སོ།།
གཉིས་པ་ལུང་གིས་སྒྲུབ་པ་ནི། སྟོང་ཐུན་ལས།33 དེ་ལྟར་དེ་བཞིན་གཤེགས་པའི་སྙིང་པོ་སེམས་ཅན་ཐམས་ཅད་ལ་ཡོད་པར་སྒྲུབ་པའི་རིགས་པ་འདིས་མཐར་ཐུག་གི་ཐར་བ་དང་། དེ་བཞིན་གཤེགས་པ་དང་ཆོས་ཐམས་ཅད་ཀྱི་གནས་ལུགས་དོན་དམ་པ་རྣམས་ཐ་དད་དུ་མེད་ལ། དེ་ཡང་དེ་བཞིན་གཤེགས་པའི་སྙིང་པོ་ཉིད་ཀྱི་སྟོབས་ལས་བྱུང་བར་ཤེས་ན་མཐར་ཐུག་ཐེག་པ་གཅིག་ཏུ་འགྲུབ་ཀྱིས། ཞེས་གསུངས་པ་དང་། གཞན་དུ་དེ་ལྟར་མི་འཐད་པར་བསྟན་པ་ནི། དེ་ཉིད་ལས།34གཞན་དུ་བདེེ་གཤེགས་སྙིང་པོ་ཞེས་པ་སེམས་ཅན་གྱི་ཁམས་ན་མེད་པ་དང་། སངས་རྒྱས་ཀྱི་དུས་ན་མེད་པ་དང་། རྒྱུ་དུས་ཡོན་ཏན་མེད་ལ་འབྲས་དུས་གསར་དུ་ཡོན་ཏན་ཅན་དུ་སྨྲ་བ་སོགས་ཐེག་པ་ཆེན་པའི་དོན་ལ་རྒྱབ་ཀྱིས་ཕྱོགས་པ་དག་གིས་ལུགས་ལ་མཐར་ཐུག་ཐེག་གཅིག་སྒྲུབ་པའི་རིགས་པ་མཐའ་ཡས་པར་འགྱུར་རོ། །དེ་ལྟར་ཡང་ངེས་ཤེས་སྒྲོན་མེ་ལས།35མཐར་ནིི་ངེས་པར་རྟོགས་དགོས་ཏེ། །ཆོས་ཀུན་དེ་ཉིད་གཅིག་ཡིན་ཞིང་། །དེ་ཉིད་མཐོང་བས་ཚུལ་གཅིག་པས། །མཐར་ཐུག་ཐེག་གཅིག་འགྲུབ་པ་ཡི། །རིགས་པ་ཀླུ་སྒྲུབ་ཡབ་སྲས་སྨྲ། །ཞེས་དང་། འཇུག་པ་ལས་ཀྱང་།36གང་ཕྱིར་འདི་ན་དེ་ཉིད་ཤེས་ལས་དྲི་མ་མཐའ་དག་སེལ་བ་ནི། །ལྷུར་བྱེད་གཞན་མེད་ཆོོས་རྣམས་དེ་ཉིད་རྣམ་འགྱུར་དབྱེ་བའང་བསྟེན་མིན་ཞིང། །དེ་ཉིད་ཡུལ་ཅན་བློ་གྲོས་འདི་ཡང་ཐ་དད་འགྱུར་བ་མ་ཡིན་པ། །དེ་ཡི་ཕྱིར་ན་ཁྱོད་ཀྱིས་འགྲོ་ལ་ཐེག་པ་མི་མཉམ་དབྱེར་མེད་བསྟན། །ཅེས་གསུངས་སོ།།
འོན་ཀྱང་ཐེག་པ་གསུམ་ནི་དྲང་བའི་དོན་ཡིན་ཏེ། འཇུག་པ་རང་འགྲེལ་ལས།37གལ་ཏེ་མྱ་ངན་ལས་འདས་པ་གཅིག་ཁོ་ན་ཡིན་ཞེས་ན་ཇི་ལྟར་ཉན་ཐོས་དང་རང་སངས་རྒྱས་ཀྱི་ཐེག་པས་ཀྱང་ཡོངས་སུ་མྱ་ངན་ལས་འདའ་བར་བསྟན་ཞེ་ན། བསྟན་པ་འདི་དགོངས་པ་ཅན་ཉིད་དུ་བཤད་པ། ཞེས་དང་། དབུ་མ་ལ་འཇུག་པ་ལས།38གང་ཕྱིར་འགྲོ་ལ་ཉེས་པ་སྐྱེད་བྱེད་སྙིགས་མ་འདི་དག་ཡོད་གྱུར་པ། །དེ་ཕྱིར་འཇིག་རྟེན་སངས་རྒྱས་སྤྱོད་ཡུལ་གཏིང་ཟབ་ལ་འཇུག་མི་འགྱུར་ཞིང་། །བདེ་གཤེགས་གང་ཕྱིར་ཁྱོད་ལ་མཁྱེན་རབ་ཐུགས་རྗེའི་ཐབས་དང་ལྷན་གཅིག་པ། །མངའ་དང་གང་ཕྱིར་བདག་གིས་སེམས་ཅན་དགྲོལ་ཞེས་ཁྱོད་ཀྱིས་ཞལ་བཞེས་ཏེ། །ཞེས་གསུངས་པ་ལྟར་རོ།།
དྲུག་པ་སེམས་ཅན་རྣམས་འཚང་རྒྱ་ངེས་ཀྱི་གནད་ཀྱིས་འཁོར་བ་ལ་མཐའ་ཡོད་པར་བསྟན་པ།
འཁོར་བ་ལ་མཐའ་ཡོད་མེད་ནི་རྒྱན་སྣང་ལས།39ཁ་ཅིག་ན་རེ་གང་འདི་སངས་རྒྱས་ཀྱི་རིགས་ནི་ཐོག་མ་མེད་པ་ཡིན་པའམ་སངས་རྒྱས་རེ་རེ་བྱུང་བ་ན་སེམས་ཅན་གྲངས་མེད་པ་ཡོངས་སུ་མྱ་ངན་ལས་འདས་མོད་ཀྱི། དེ་ལྟ་ན་ཡང་འཁོར་བ་ལ་ཟད་པ་མེད་པས་མཐའ་ཡས་པའི་ཕྱིར་ནམ་མཁའ་དང་འདྲ་བ་སྟེ། རི་བོ་ལ་སོགས་པའི་སྒྲིབ་གཡོགས་དུ་མ་ཡོད་ན་ཡང་ནམ་མཁའ་ལ་ནི་ཡོངས་སུ་ཟད་པ་མེད་དོ་ཞེས་ཟེར་རོ། །ཞེས་མཐའ་མེད་ཀྱི་ལུགས་དང་། གཞན་དག་ན་རེ་གང་གཉེན་པོ་ཆོས་དང་ཉེ་བ་ན་འབྲི་བའི་ཆོས་ཅན་དུ་སྣང་བ་དེ་ནི་གཉེན་པོའི་ཕྱོོགས་ཤིན་ཏུ་འཕེལ་བས་ཤིན་ཏུ་འགྲིབ་པར་འགྱུར་བ་སྲིད་པ་ཡིན་ཏེ། དཔེར་ན་གསེར་གྱི་དྲི་མ་ལ་སོགས་པ་བཞིན་ནོ། །འཁོར་བ་ཡང་དག་མེད་ལ་སོགས་པ་མཚན་ཉིད་ཀྱི་གཉེན་པོའི་ཕྱོགས་མངོན་དུ་གྱུར་པ་ན་འགྲིབ་པའི་ཆོས་ཅན་ཡིན་ནོ། །ཞེ་བྱ་བའི་རང་བཞིན་གྱིས་གཏན་ཚིགས་ཀྱི་སྟོབས་ཀྱིས་འཁོར་བ་རྒྱུན་ཆད་པ་ཡིན་ནོ་ཞེས་འདོད་དོ། །ཞེས་མཐའ་ཡོད་ཀྱི་ལུགས་ཀྱང་བསྟན་ཡོད་དོ།།
རང་ལུགས་མདོ་གཞིར་བཞག་ནས་བཤད་ན་སྤྱིར་འཁོར་བ་ལ་མཐའ་ཡོད་པར་སྣང་། དེ་ལ་འདིར་འཁོར་བ་ལ་མཐའ་ཡོད་མེད་ཅེས་པའི་འཁོར་བ་དེ་ངོས་བཟུང་ན། གཟུང་འཛིན་གཉིས་སུ་སྣང་བ་དང་། ཇི་ལྟར་སྣང་བ་དེ་འདི་དང་དེ་ལྟར་ཞེན་ཅིང་མིང་སྣ་ཚོགས་ཀྱི་མངོན་པར་བརྗོད་པར་སྣང་བ་འདི་ཉིད་དེ། ཆོས་ཉིད་རྣམ་འབྱེད་ལས།40 དེ་ལ་ཆོས་ཀྱི་མཚན་ཉིད་ནི། །གཉིས་དང་ཇི་ལྟར་མངོན་བརྗོད་པར་། །ཞེས་དེ་ལྟར་འདོད་པ་དང་། ཡང་འཇམ་མགོན་མི་ཕམ་པས་གཟུང་འཛིན་འཁྲུལ་བའི་སྣང་བ་དང་དེར་ཞེན་པ་གཉིས་ངོས་བཟུང་འདུག་སྟེ། ངེས་ཤེས་སྒྲོན་མེ་ལས།41གཟུང་འཛིན་འཁྲུལ་སྣང་འདི་མིན་པའི། །འཁོར་བ་ཞེས་བྱ་གཞན་དུ་མེད། །ཅེས་སོ།།
དེ་དག་ལས་གཟུང་འཛིན་འཁྲུལ་སྣང་དང་དེར་ཞེན་པ་ལ་བཞེད་འདུག་པས་ཅུང་མི་འདྲ་བར་སྣང་ཡང་། འདིར་ནི་ལས་ཉོན་གྱིས་དབང་གིས་སྲིད་པར་ཉིང་མཚམས་སྦྱོར་བའི་སྡུག་བདེན་གྱི་ཕུང་པོ་ལ་འཁོར་བ་ཞེས་འཇོག་དགོས་ཏེ། ཚད་མ་རྣམ་འགྲེལ་ལས།42སྡུག་བསྔལ་འཁོར་བ་ཅན་ཕུང་པོ། །ཞེས་པ་ལྟར་འདིར་ལུགས་གཉིས་ལས་རང་ལུགས་མཐའ་ཡོད་པར་བཞེད་དགོས་པར་སྣང་སྟེ། དཔལ་སྤྲུལ་སྤྱི་དོན་ལས།43གསེར་གྱི་གཡའ་དག་པ་ལྟར་གཉེན་པོའི་ཕྱོགས་ཀྱིས་ཟད་པར་ནུས་པའིི་ཕྱིར་མཐའ་ཡོད་དེ། ཞེས་འདོད་པ་གཉིས་ལས་སློབ་དཔོན་ཡང་ཕྱི་མར་བཞེད་པར་མངོན་ཞིང། ཨ་བྷྱས་ལུང་དང་རིགས་པ་གཉིས་ཀའི་སྒོ་ནས་མཐའ་ཡོད་དུ་སྒྲུབ་པར་བྱེད་ཀྱང་། ཞེས་དཔལ་སྤྲུལ་སེམས་དཔའ་ཆེན་པོས་སློབ་དཔོན་ཡང་ཕྱི་མར་བཞེད་པར་མངོན་ཞིང་ཞེས་པ་དང་། ཨ་བྷྱས་ལུང་རིགས་གཉིས་ཀྱིས་མཐའ་ཡོད་དུ་སྒྲུབ་པ་དེ་དག་གི་ཕྱོགས་འཐད་པར་སེམས་སོ། །འཁོར་བ་པོ་བྱེ་བྲག་པ་ལ་བསམས་ན་འཁོར་བ་ལ་མཐའ་མ་ཡོད་དེ། དེ་སྤོང་བྱེད་ཀྱི་གཉེན་པོ་སྟོབས་ལྡན་ཡོད་པའི་ཕྱིིར། དེ་ལྟར་ཡིན་པ་དེ་ཡང་རྣམ་འགྲེལ་ལེགས་བཤད་སྣང་བའི་གཏེར་ལས། སྲིད་པའི་སྡུག་བསྔལ་གྱི་རང་བཞིན་ཅན་དེ་ནི་གཏན་དུ་བ་མིན་ཏེ་དེ་ཡི་རྒྱུ་ལ་གེགས་བྱེད་པའི་གཉེན་པོ་སོགས་པའི་སྒྲས་ལྷག་མེད་ཀྱི་དུས་སུ་དེ་སྐྱེ་བ་རྒྱུ་མ་ཚང་བ་སྲིད་པའི་ཕྱིར་རོ། །ཞེས་དང་། དེ་ཡང་ཚད་མ་རྣམ་འགྲེལ་ལས།44དེ་ནི་གཏན་དུ་བ་མིན་ཏེ། །རྒྱུད་ལ་གེགས་སོགས་སྲིད་ཕྱིར་རོ། །ཞེས་པ་ལས་དང་ཉོན་མོངས་པའི་རྒྱུ་ཅན་འཁོར་བ་དེ་གཏན་དུ་བ་མིན་ཏེ། རྒྱུ་ལས་ཉོན་གཉིས་གཉེན་པོ་སྟོབས་ལྡན་ཆོས་ཉིད་རྟོགས་པའི་ཤེས་རབ་ཀྱིས་ལྡོག་པའམ་ཟད་པས་དེ་ཡི་འབྲས་བུ་འཁོར་བ་ཡང་ཟད་པར་གྱུར་པས་གང་ཟག་བྱེ་བྲག་པ་ལ་འཁོར་བ་ལ་མཐའ་ཡོད་སྟེ། དབུ་མ་རྩ་བའི་མཆན་འགྲེལ་ལས།45དེ་ལྟར་འཁོར་བ་ནི་དོན་དམ་པར་ནམ་མཁའ་ལྟ་བུ་སྟེ། ཐ་སྙད་དུ་ཐོག་མ་མེད་ཀྱང་མཐའ་མ་ཡོད་དེ་ས་བོན་བཞིན་ནོ། །ཞེས་གསུངས་པ་བཞིན་ནོ།།
མདོར་ན་སྤྱིར་འཁོར་བ་ལ་མཐའ་མ་ཡོད་པར་སེམས་ཏེ། འཁོར་བ་བྱེ་བྲག་པ་ལ་མཐའ་ཡོད་པར་སྒྲུབ་པའི་ལུང་དང་རིགས་པ་དེ་དག་ལ་ཡང་མཚུངས་པའི་ཕྱིར། དེས་ན་ཐ་སྙད་དུ་འཁོར་བ་ལ་མཐའ་ཡོད་དུ་བཞེད་པ་དེ་འཐད་པར་སེམས་ཏེ། ལུང་དེ་དག་གིས་བསྒྲུབས་པའི་ཕྱིར། མཐའ་མེད་དུ་བཞེད་པའི་ལུགས་དེ་དག་ནི་འཁོར་བ་བྱེ་བྲག་པ་ལ་མཐའ་མེད་དུ་བཞེད་པ་ག་ལ་ཡིན། སྤྱིར་འཁོར་བ་ལ་ཚད་གཟུང་དུ་མེད་པ་ཙམ་གྱིས་མཐའ་མེད་དུ་བསྒྲུབ་མི་ནུས་ཏེ། རྒྱུ་མཚན་ལྟར་སྣང་དུ་གྱུར་བའི་ཕྱིར། གལ་ཏེ་མཐའ་མེད་ན་མཐའ་མེད་འཁོར་བ་པོ་དེ་དག་ལ་འཚང་རྒྱ་བའི་སྐབས་མེད་པ་དང་། དེ་དག་གི་རྒྱུད་ཀྱི་རིགས་ཀྱི་ནུས་པ་ཆུད་མི་ཟ་བ་མ་ཡིན་པར་ཐལ་བ་དང་སངས་རྒྱས་ཀྱི་ཕྲིན་ལས་འཇུག་པ་དེ་ཡང་ཕྱོགས་རེ་དང་བཅས་པ་ཐལ་བ་སོགས་རྒྱུ་མཚན་དེ་དག་ལ་བསམས་ན་མི་འཐད་པར་སེམས་སོ།།
བདུན་པ་གྲུབ་དོན་བསྡུས་བའི་སྒོ་ནས་མཇུག་བསྡུ་བ།
རང་ལུགས་ཀུན་མཁྱེན་ཀློང་ཆེན་གྱི་བཞེད་པ་ལྟར་རིགས་ཀྱི་རྣམ་གཞག་རྣམས་བཀོད་ནས་དེ་དག་ལ་དོགས་པ་སྤོང་བ་དང་། བཀའ་བར་མཐའ་འགལ་མེད་གནད་ཀྱིས་ཆོས་ཉིད་ལ་རིགས་ཀྱིས་ཁྱབ་པར་བསྟན་ནས་དེ་ཡི་འཐད་པ་ཡང་བསྟན། དེ་དག་བསྒྲུབས་ནས་རྟོགས་བྱ་མཐར་ཐུག་པ་གསལ་སྟོང་ཟུང་འཇུག་དེ་ཡིན་པས་དེ་རྟོགས་པའི་ཡེ་ཤེས་མཐར་ཐུག་པ་དེ་ཡང་ཆོས་ཉིད་རྟོགས་པའི་མི་རྟོག་ཡེ་ཤེས་དེ་གཅིག་པུ་ཡིན་པས་མཐར་ཐུག་ཐར་པ་དང་ཐེག་པ་གཅིག་ཏུ་བསྒྲུབས་པ་ཡིན། དེ་ལྟ་བུའི་སྒྲིབ་པ་གཉིས་ཀ་སྤོང་བའི་གཉེན་པོ་དེ་འཁོར་བའི་རྒྱུ་ལས་ཉོན་གཉིས་ཟད་པར་བྱས་པས་འཁོར་བ་ཡང་ཟད་པར་བསྒྲུབས་པས་འཁོར་བ་སྤྱི་བྱེ་བྲག་གང་དུ་བསམས་ན་ཡང་མཐའ་ཡོད་པར་གྲུབ་བོ། །དེ་ལྟར་ཀུན་མཁྱེན་ཡབ་སྲས་བརྒྱུད་པར་བཅས་པའི་ཐུགས་ལ་བརྣགས་པའི་ཆོས་མདོ་ཙམ་ཞིག་གླེང་བའི་དགེ་བའི་རྩ་བ་འདི་ཉིད་ཀྱིས་དེ་དག་གི་ཐུགས་དགོངས་ཡོངས་སུ་རྫོགས་པར་འགྱུར་བ་དང་། ཁྱད་པར་དུ་ང་དང་ང་འདྲའི་སྐྱེ་བོ་རྣམས་ཟབ་པ་དང་རྒྱ་ཆེ་བའི་དོན་ལ་འཇུག་པའི་རྒྱུར་གྱུར་ཅིག།
སླར་སྨོན་པ།
འདི་ལྟར་བགྱིས་པའི་དགེ་བས་ཚེ་རབས་ཀུན། །ཀློང་གསལ་དྲི་མེད་ཨ་སྔོན་མུན་པའི་དགྲ།།
གང་གི་མཁྱེན་རབ་འོད་ཟེར་སྟོང་ཕྲག་གིས། །མཁའ་མཉམ་འཁའ་མཉམ་འགྲོ་བློའི་པད་སྐྱོང་གྱུར་ཅིག།།
- ལུང་ཚིག་འདི་མདོ་ཚིག་ཇི་བཞིན་ཡིན་མིན་དཔྱད་གཞི་ཡི་གནས་སུ་གྱུར་ཀྱང་མདོ་ལུང་དོན་ཐོག་ནས་དྲངས་པ་མིན་ནམ་སྙམ། ད་ལྟ་མདོ་ཚིག་འདི་སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༨ ལོའི་པར་མ། སྡོམ་གསུམ་རྣམ་པར་ངེས་པའི་མཆན་འགྲེལ་རིག་འཛིན་འཇུག་ངོགས། ཤོག་ངོས་ ༧ པར་གསལ།
- སྡེ་དགེ་བསྟན་འགྱུར། ཤེར་ཕྱིན། ༢༦ ནས ༡༢༤ a པར་གསལ།
- སྡེ་དགེ་བསྟན་འགྱུར། ཤེར་ཕྱིན། ༢༦ ནས ༡༩༢ a པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། ཤོག་ངོས་ ༡༢༠ པར་གསལ།
- ཐཱའི་ཝན་པར་མ། ཤོག་ངོས་ ༡༣༣ པར་གསལ།
- སྡེ་དགེ་བསྟན་འགྱུར་ ༡༢༣ ནས ༩༧b པར་གསལ།
- ཐཱའི་ཝན་པར་མ། ཀློང་ཆེན་གསུང་འབུམ། ཤོག་ངོས་ ༡༣༢ པར་གསལ། ལུང་དེ་འདིར་སྡོང་པོ་བཀོད་པའི་མདོ་ལས་གསུངས་ཀྱང་། གསེར་ཕྲེང་ཤོག་ངོས་ ༤༧༤ པར་ཕལ་ཆེན་ལས་ཀྱང་། ཞེས་དྲངས་འདུག་པཎ་ཆེན་ཤཱཀྱ་མཆོག་ལྡན་གྱི་གསུང་འབུམ་ ༡-༢-༢༣༡b པར་ཡང་ལུང་འདི་དྲངས་འདུག་པས་མདོ་ལུང་ཡིན་པར་གདོན་མི་ཟའོ།།
- ཐཱའི་ཝན་པར་མ། ཤོག་ངོས་ ༡༤༠ པར་གསལ།
- ཐཱའི་ཝན་པར་མ། ཤོག་ངོས་ ༡༤༠ པར་གསལ།
- ཐཱའི་ཝན་པར་མ། ཤོག་ངོས་ ༡༤༡ པར་གསལ།
- ཐཱའི་ཝན་པར་མ། ཤོག་ངོས་ ༡༤༠ པར་གསལ།
- ཐཱའི་ཝན་པར་མ། ཤོག་ངོས་ ༡༤༠ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༠ ལོའི་པར་མ། ཤོག་ངོས་ ༧༨ པར་གསལ།
- ཐཱའི་ཝན་པར་མ། ཤོག་ངོས་ ༡༤༡ པར་གསལ།
- སྡེ་དགེ་བསྟན་འགྱུར། ཤོག་ངོས་ ༡༢༣-༦༡b།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༠ ལོའི་པར་མ། ཤོག་ངོས་ ༢༢༢ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༠ ལོའི་པར་མ། ཤོག་ངོས་ ༩༩ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༠ ལོའི་པར་མ། ཤོག་ངོས་ ༢༢༨ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། ཤོག་ངོས་ ༥༤ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༠ ལོའི་པར་མ། ཤོག་ངོས་ ༥༠ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༩ ལོའི་པར་མ། ཤོག་ངོས་ ༡༢༢ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༠ ལོའི་པར་མ། ཤོག་ངོས་ ༢༢༨ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༠ ལོའི་པར་མ། ཤོག་ངོས་ ༢༥ པར་གསལ།
- སྡེ་དགེ་བསྟན་འགྱུར། ཤོག་ངོས་ ༩༧ – ༩b པར་གསལ།
- སྡེ་དགེ་བསྟན་འགྱུར། ཤོག་ངོས་ ༨༠ – ༣b པར་གསལ།
- སྡེ་དགེ་བསྟན་འགྱུར། ཚད་མ། ཤོག་ངོས་ ༡༧༤-༡༡༢a པར་གསལ།
- སྡེ་དགེ་བསྟན་འགྱུར། ཚད་མ། ཤོག་ངོས་ ༡༧༤-༡༠༨b པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༠ ལོའི་པར་མ། ཤོག་ངོས་ ༢༢༦ པར་གསལ།
- སྡེ་དགེ་བསྟན་འགྱུར། ༡༠༢ ནས་ ༢༡༨a པར་གསལ།
- སྡེ་དགེ་བསྟན་འགྱུར། ཤོག་ངོས་ ༡༧༤ ནས་ ༡༡༦a པར་གསལ།
- རྣམ་གླིང་པར་མ། རྩ་བ་དེབ་ཕྲེང། ༡༦ ཕྱི་ལོ་ ༢༠༠༩ ལོར་དཔར། ཤོག་ངོས་ ༡༧༥ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༠ ལོའི་པར་མ། ཤོག་ངོས་ ༢༢༦ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༠ ལོའི་པར་མ། ཤོག་ངོས་ ༢༢༦ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༠ ལོའི་པར་མ། ཤོག་ངོས་ ༢༢༦ པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༠ ལོའི་པར་མ། ཤོག་ངོས་ ༤༨ པར་གསལ།
- སྡེ་དགེ་བསྟན་འགྱུར། ཤོག་ངོས་ ༡༠༢-༢༡༨a པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༡༨ ལོའི་པར་མ། ཤོག་ངོས་ ༣༨༡ པར་གསལ།
- སྡེ་དགེ་བསྟན་འགྱུར། ཤོག་ངོས་ ༡༠༢-༢༡༨a པར་གསལ།
- སྡེ་དགེ་བསྟན་འགྱུར། ཤོག་ངོས་ ༨༥-༢༡༣a པར་གསལ།
- སྡེ་དགེ་བསྟན་འགྱུར། ཤོག་ངོས་ ༡༢༣-༥༠aཔར་གསལ།
- འཇུ་མི་ཕམ་གྱི་གསུང་འབུམ། ཤོག་ངོས་ ༩-༢-༡༤a པར་གསལ།
- སྡེ་དགེ་བསྟན་འགྱུར། ཤོག་ངོས་ ༡༧༤-༡༡༣a པར་གསལ།
- སྔ་འགྱུར་རིག་མཛོད་རྩིས་འཕྲུལ་སྡེ་ཚན་གྱི་ཕྱི་ལོ་ ༢༠༢༢ ལོའི་པར་མ། ཤོག་ངོས་ ༡༦༢ པར་གསལ།
- པོད་ཆེན་དྲུག་གི་རྩ་བའི་གསུང་འབུམ། ཤོག་ངོས་ ༢-༧༨༩ པར་གསལ། སྡེ་དགེ་བསྟན་འགྱུར་དུ་དེ་མ་རྙེད།
- སྔ་གྱུར་རིག་མཛོད་རྩིས་འཕྲུལ་སྡེ་མཚན་གྱི་ཕྱི་ལོ་ ༢༠༢༠ ལོའི་པར་མ། ཤོག་ངོས་ ༨༦ པར་གསལ།
